6 yachachiy

Cainmanta Abelmantawan

CAINTA Abeltawan qhawariy, paykuna wiñankuña. Cainqa chaqrata llamkʼaq runaman tukurqa, payqa tukuy imata puquchiq.

Abeltaq oveja michiq runaman tukurqa. Payqa ovejitasta qhawaspa miskʼichikuq. Ovejitasninqa wiñaspa mirarqanku. Jinamanta achkha ovejitasta qhawanan karqa.

Juk pʼunchay, Caín Abelwan Diosman juk regalota aparqanku. Cainqa puquchisqanta aparqa. Abeltaq astawan wira ovejitanta aparqa. Jehovaqa Abel qusqanwan mayta kusikurqa. Cainpa qusqanwantaq mana kusikurqachu. ¿Imaraykutaq?

¿Abelpa regalonllachu sumaq karqa? Mana, Abelqa kʼacha runa karqa, Diosta mayta munakuq. Caintaq mana jinachu karqa, payqa saqra runa karqa, mana wawqintapis munakuqchu.

Chayrayku Diosninchikqa kutirikunanpaq Cainta kʼamirirqa. Caintaq mana uyarikurqachu. Payqa, Dios Abelta allinpaq qhawasqanrayku mayta phiñakurqa. Juk pʼunchay Caín Abelta nirqa: ‘Jaku campoman’ nispa. Karupiña kachkaspa, Caín wawqinta maqaspa wañuchirqa. ¿Manachu Caín juchallikusqanta niwaq?

Abel wañurqa, chaywanpis kʼacha runa kasqanrayku Diosqa paymanta yuyarikun. Jehovaqa mana jaykʼaq chayjina kʼacha runatas qunqanchu. Chayrayku Diosninchik juk pʼunchay Abelta kawsarichimunqa. Abelqa mana jaykʼaq juktawan wañunqachu, wiñaypaq Jallpʼapi tiyakunqa. ¿Manachu payjina kʼacha runasta riqsiyta munawaq?

Diosninchik Cainjina saqra runasta chiqnikun. Chayrayku Diosninchikqa Cainta ayllunmanta karuman qharqurqa. Caintaq ripuchkaspa warmin kananpaq juknin pananta pusakapurqa.

Astawan qhipaman Caín warminwan mirarqanku. Chantapis Adán Evawan wak wawasniyuq karqanku, paykunapis casarakuspa mirallarqankutaq, jinamanta tukuy Jallpʼa runamanta juntʼakurqa. Kunanqa wakinkunata riqsisunchik.

Génesis 4:2-26; 1 Juan 3:11, 12; Juan 11:25.