1 yachachiy

Diosninchik ruwayta qallarin

TUKUY allinkunaqa Diosninchikmanta jamun. Intita pʼunchaypi kʼanchananpaq ruwan. Killata, chʼaskakunata ima, tutapi kʼanchanankupaq ruwan. Jallpʼatataq runa tiyakunanpaq ruwan.

Chaywanpis mana Intitachu nitaq Killatachu ñawpaqta ruwarqa, ¿imatataq ñawpaqta ruwarqari? Diosqa, payman rikchʼakuq espiritukunata ñawpaqta ruwarqa. Paykunatapis Diostajina mana rikuyta atisunmanchu. Bibliaqa paykunata angelkuna nispa sutichan. Diosninchik angelkunata janaqpachapi tiyakunankupaq ruwarqa.

Qallariypiqa Diosninchik juk may munasqa angelta ruwarqa. Payqa Diospa kuraq churin karqa. Tatanwan llamkʼarqa. Diosninchikta tukuy imata ruwayta yanaparqa. Kay churiqa Intita, Killata, chʼaskasta, Jallpʼata ima ruwayta yanaparqa.

Qallariypi, ¿imaynataq Jallpʼa karqari? Qallariypiqa mana pipis Jallpʼapi tiyakuyta atinmanchu karqa. Jallpʼaqa yakuwan pʼampasqa karqa. Diosninchiktaq Jallpʼapi runa tiyakunanta munarqa. Chayrayku Diosninchik ñuqanchikpaq Jallpʼata wakichiyta qallarirqa. ¿Imatataq ruwarqa?

Qallarinapaqqa Jallpʼapi mana kʼanchay karqachu, chayrayku Diosninchik Intiwan Jallpʼata kʼanchachirqa, jinamanta pʼunchay, tutapis kananpaq. Chaymanta Diosninchik mama quchamanta chʼaki jallpʼata rikhurichirqa.

Kay dibujitupi rikunchikjina, qallariypiqa mana imapis Jallpʼapi karqachu. Mana tʼikitas, sachʼas nitaq animalkunapis karqachu. Mama quchapipis mana challwakuna karqachu. Runakuna, animalkuna ima, Jallpʼapi allinta tiyakunankupaqqa Diosninchik maytaraq llamkʼanan karqa.

Jeremías 10:12; Colosenses 1:16; Proverbios 8:22; Génesis 1:1-10