7 yachachiy

Juk mana manchachikuq runa

RUNA miraytawan, Cainjina saqrata ruwarqanku. Chaywanpis juk runa mana paykunajinachu karqa. Chay runaqa Enoc sutiyuq karqa. Payqa mana runata manchachikuqchu. Runaqa tukuyniqpi saqrallatapuni ruwaq kanku. Enoctaqri Diosta yupaychaq.

¿Yachankichu imaraykuchus chay runas saqrallatapuni ruwaq kanku? Yuyariy. ¿Pitaq Adanta Evatawan mana Diosta kasukunankupaq chʼawkiyarqa? Bibliaqa payta Kuraq Supay nispa sutichan. Kay Supayqa tukuyninchik saqra kananchikta munan.

Juk pʼunchayqa Jehová Enocta jinata willananta nirqa: ‘Diosqa juk pʼunchaypi tukuy saqra runasta chinkachinqa’, nispa. Kayqa runata phiñachirqachá. Ichapis runasqa Enocta wañuchiyta munarqanku. Chaywanpis Enocqa, Dios kamachisqanta juntʼananpaq, nipita manchachikunanchu karqa.

Diosninchik mana chay saqra runap chawpinpi unayta Enoc kawsananta saqirqachu. Payqa 365 watasllata kawsakurqa. ¿Imaraykutaq ‘365 watasllata’ ninchik? Imaraykuchus chay pacha runaqa may unayta kawsakuq kanku. ¡Enocpa wawan Matusalenqa, 969 watasta kawsarqa!

Enoc wañusqanmanta qhipaman, runaqa astawan saqrayarqa. Bibliaqa, ‘runas achkha saqra imasta ruwasqankuta’ niwanchik. Chantapis ‘tukuy runa saqrallatapuni ruwayta yuyasqankuta’ niwanchik.

¿Imaraykutaq chay pacha saqra ruway aywirichkarqa? Supay jukjinamantañataq runata urmachinanpaq wakichikusqanrayku. Qhawarina imaynatachus.

Génesis 5:21-24, 27; 6:5; Judas 14, 15.