10 yachachiy

May jatun para

MANA arcaman yaykuqkunaqa, kikillantapuni kawsachkarqanku. Mana Jatun Para jamunanta creerqankuchu. Maytachá Noemanta asikurqanku. Chaywanpis mana asikullankumanpunichu karqa.

Jinallamanta parayta qallarirqa. Valdemantajina janaqpachamanta yaku jichʼaykakamurqa. ¡Noé mana llullakurqachu! Kunantaq manaña pipis arcaman yaykuyta atirqachu. Jehová Diosqa arcap punkunta wisqʼaykurqaña.

Juk ratupi yakuqa may chhika vallesta pʼampaykurqa. Jatuchaq mayusjina, sachʼasta, jatuchaq rumista kuyurichirqa. Yakuqa tukuyniqpi uyarikurqa. Runaqa mancharikuspa urqusman wicharirqa. ¡Atikuchkaptin Noeta uyarichkaspa mana arcaman yaykusqankumanta, maytacha pesachikurqanku! Kunanqa, manaña imatapis ruwayta atirqankuchu.

Yakuqa yapakullarqapuni. Yakuqa 40 pʼunchayta, 40 tutatawan jichʼaykakamurqa, urqusta pʼampaykunankama wicharirqa. Dios nisqanmanjinataq arcapi kaqkunaqa mana wañurqankuchu. Mana arcapi kaqkunataq wañurqanku.

Noeqa wawasninwan arcata ruwaspa allinta ruwarqa. Yaku yapakusqanmanjina arcaqa tuytuyta qallarirqa. Para sayasqantawan, inti lliphipirispa lluqsimurqa, tukuyniqpitaq yakulla karqa. Arcalla yaku patapi tuytuchkarqa.

Manaña runata ñakʼarichinapaq jatuchaq runas karqachu. Paykunaqa mamankuwan, saqra runawan ima, chay Jatun Parapi wañurqanku. Tatasninkuri, ¿wañullarqankutaqchu?

Jatuchaq runapta tatasninqa, mana ñuqanchikjinachu karqanku. Paykunaqa angelkuna karqanku, warmiswan tiyakunankupaq Jallpʼaman uraykamurqanku. Chayrayku Jatun Parapiqa paykuna mana wañurqankuchu. Aycha cuerponkuta saqiytawan angeljina janaqpachaman kutipurqanku. Diosqa manaña ayllunpi paykunata japʼikurqachu. Chay angelkunaqa Kuraq Supaypa angelesninman tukunku. Bibliaqa paykunata supaykuna nispa, sutichan.

Chaymanta Diosninchik wayrata phukuchirqa, jatun paramanta yakutaq pisiyayta qallarirqa. Chaymanta arcaqa 5 killaman juk urqupi qhipakurqa. Arca ukhupi kaqkunaqa yaku chʼakiyapusqanta rikuspa unaytaraq chaypi karqanku.

Chaymanta Noeqa juk yana pʼisqituta arcamanta kacharirqa. Juk ratuta phawakachaspataq mana maypi sayayta atisqanrayku, arcaman kutipurqa. Kutin kutita pʼisqituta kacharqa, pʼisqitutaq arcaman kutipullarqapuni.

Noeqa chʼaki jallpʼa rikhurisqanta yachayta munarqa, chayrayku juk palomatañataq arcamanta kacharqa. Paypis mana maypi sayayta atispa kutinpullarqataq. Juktawan palomitata kachaptintaq, palomitaqa siminpi qʼumir llaqhiwan kutimurqa. Yakuqa chʼakiyakapusqaña. Noeqa palomitata kachallarqataq, palomitaqa chʼaki jallpʼata tarikuspa manaña kutipurqachu.

Diosninchik Noeta parlarqa: ‘Arcamanta lluqsillayña warmiykiwan, churisniykiwan, ñuqchʼasniykiwan, animaleswan ima, nispa’. Arcapi wata kuraqta kawsarqanku. ¡Paykunaqa mana wañusqankurayku, maytacha kusikurqanku!

Génesis 7:10-24; 8:1-17; 1 Pedro 3:19, 20.