5 yachachiy

Phutiy kawsay qallarin

EDÉN huertamanta jawapi may phutiy kawsay qallarirqa. Adán Evawan mikhunankupaq sinchita llamkʼananku karqa. Miskʼi puquyniyuq sachʼas wiñananmantaqa, khichkas, qhipus ima, wiñarqanku. Adán Evawan mana Diosta kasukusqankurayku, paymanta karunchakusqankurayku, chayjina kawsayta tarikurqanku.

Astawanraq, Adanwan Evawan wañuyta qallarirqanku. Yuyariy, Diosninchikqa, ‘mana mikhunamanta sachʼap puquyninta mikhunkichik chayqa wañunkichik’, nispa nirqa. Chayrayku mikhusqankumantapacha wañuyta qallarirqanku. ¡Diosta wasanchaspaqa, wampu runajina ruwarqanku!

Chay sumaq huertamanta wikchʼuchikuytawan, Adán Evawan wawayuq karqanku. Chayrayku wawasninkupis machuyaspa wañunallankutaq karqa.

Adán Evawan Jehovatachus kasukunkuman karqa, may kusisqa wawasninkuwan wiñaypaq kawsankuman karqa. Mana machuyankumanchu karqa, mana unqunkumanchu karqa, nitaq wañunkumanchu karqa.

Diosninchikqa tukuy runa wiñaypaq kusisqa kawsakunanta munan. Paytaq chay munasqan juntʼakunanpaq parlanña. Mana Jallpʼallachu kʼachitu kanqa, manaqa runapis manaña unqunqachu. Chantapis, tukuy puraqmanta munanakunqanku, Dioswantaq sumaqta masinchakunqanku.

Evaqa Diosta wasanchasqanrayku manaña Diospa munasqa masin karqachu. Chayrayku nanaywan wawatapis nacechikurqa. Chiqamanta nisunman, mana Diosta kasukusqankurayku mayta ñakʼarirqanku. ¿Jina kasqantachu niwaq?

Adán Evawan mirayta qallarirqanku. Kuraq wawanta Caín nispa suticharqanku, qhipan wawantataq Abel nispa suticharqanku. ¿Paykunamanta yachayta munawaqchu?

Génesis 3:16-23; 4:1, 2; Apocalipsis 21:3, 4.