Munasqa Hermanosniy:

Profeta Ezequiel 2.600 watas ñaupajta tʼukuna imasta mosqoypi jina rikorqa, may jatun Kamachej Jehová uj jatun carretata apaykachajta. Chay carretaqa tʼukunapaj jina karqa, imaraykuchus may usqhaytapuni purej llinkʼunanpajpis mana sayajchu (Eze. 1:4, 9, 12, 14, 16-27).

Kay mosqoypi jina rikusqanqa yuyarichiwanchej imaynachus cielopi Jehovaj Llajtan ñaupajllamanpuni risqanta. ¿Imatataj nisunman Jehovaj Llajtanmanta kay Jallpʼapi? Imaschus kay wata pasajpi ruwakusqan, rikuchiwanchej Jehovaj Llajtan ñaupajllamanpuni risqanta.

Estados Unidospi ashkhas Betelitasmanta mayta llankʼarqanku Brooklynmanta mosoj Centralninkuman ripunankupaj, Warwick, Nueva York llajtaman, chantapis waj Betelpaj wasisninman ima. Wakinkunataj Betelmanta riporqanku uj mosoj llankʼayta japʼisqankurayku. Waj suyusmanta Betelitaspis may sinchʼita llankʼarqanku, mosoj tantakuna wasista ruwaspa, allinchaspa, sucursalesta ujchaspa chayri waj lugaresman rispa. ¿Qankunarí? Ichapis tiyakusqaykichej wasimanta mana cambiakorqankichejchu, chaywanpis llankʼarqankichej waj imaspi.

Diospa Llajtanta Kamachejkuna may kusisqa kashanku hermanosta rikuspa Jallpʼantinmanta khuska Jehovaj Llajtanwan risqankuta. Yachaykutaj ashkhas rerqanku maypichus pisi willajkuna kanku, wakintaj waj jinamanta sirverqanku, nisunman waj parlaypi willaspa, wakintajrí willarqanku waj jinasmanta. Ashkha cheqa sonqo cristianos, machitus, onqosqas ima, ñaupajman rishallankupuni mana saykʼuspa Jehovata sirvispa, ajinamantataj rikuchinku Satanás llulla kasqanta (1 Cor. 9: 24).

Ama qonqaychejchu, Jehová yachan ruwasqaykichejta ­sutinta munakusqaykichejtapis (Heb. 6:10). Ajinata ruwasqaykichejqa Abrahán Sara ima ruwasqankuta yuyarichiwayku. Abrahanqa 70 watasniyoj jina kashajtin riporqa tukuy familianwan Ur llajtamanta, may karu Canaán llajtaman. Chaypitaj tiyakorqanku toldospi 100 watasta jina wañupunankama. Abrahán warmin Sara ima ruwasqankoqa tʼukunapaj jina (Gén. 11:31; Hech. 7:2, 3).

¿Noqanchejpis paykuna jina ruwashanchejchu? Walej kanman tʼukurinanchej. Kay tukukuy pʼunchaykunapi cheqa sonqosllapuni kasun chayqa, Jesús niwasqanchejta ruwanata juntʼasun. Nerqataj: “Chayrayku rispa, tukuy laya runasta yachachisqasniyman tukuchimuychej, bautizaspa Tata  Diospa sutinpi, Wawanpa sutinpi, atiyninpa sutinpiwan”, nispa (Mat. 28:19).

Jesús “rispa” rimayta oqharispa llankʼallaychejpuni mana saykʼuspa nerqa. Kay pasaj watapi Jesuspa qhepanta purejkunaj ruwasqankuta rikuspa, mayta kusikunchej. Jallpʼantinpi Diospa Gobiernomanta sumaj willaykuna sutʼimanta rikukun Jehovaj bendicionnillanwan ruwakun (Mar. 13:10).

Diospa Gobiernomanta sumaj willaykunata may ashkhas japʼikushanku. Kay pasaj watapi chayarqanchej 8.340.847 willajkunaman, chantapis sapa killa Bibliamanta yachachikorqa 10.115.264 runasman. Sutʼimanta rikunchej Jehovaj carretanqa mana sayanchu, nitaj qankunapis hermanos. Chayrayku niraj Jehová kay pachata tukuchishajtin ruwallaychejpuni llankʼayniykichejta.

2017 watapaj ajllasqa texto mana qonqanapaj jina: ‘Jehová Diospi atienekuy allin kajtataj ruway’ (Sal. 37:3). Kay yuyaychayta kasukuspa, Jehovata sirvispa ima, paypi atienekusqanchejta rikuchinchej. Ama qonqanachu mana sapanchejchu kashanchej. Chantapis Jesús niwarqanchej: “Noqaqa qankunawan tuta pʼunchay kasaj, kay mundoj imasnin tukukunankama”, nispa (Mat. 28:20).

Yuyarikuna, ashkhata llankʼajtinchej chayri pisillatapis Jehová llankʼayninchejta bendecillanqapuni. Pay munan tukuy atisqanchejta allin sonqowan ruwananchejta. Ajinata ruwaspaqa, sonqonta kusichinchej, asirichinchejtaj (2 Cor. 9:6, 7). Chayrayku, Jehová Diosmanta mañakuna, Bibliamanta yachakuna, sonqo kʼajaywantaj willamuna, ajinamanta Jehovawan sumaj amigos kasun.

Satanás yachan paypaj “pisi tiempollaña kasqanta”, chayraykutaj Jehová Diosta wasanchananchejta munan (Apo. 12:12). Ama karunchakunachu Jehovamanta, ajinamanta Satanás mana urmachiwasunchu (Sal. 16:8). Ama qonqaychejchu mayta munakusqaykuta. Chantapis agradecesqas kayku Diospa Gobiernonta kausayniykichejpi ñaupajman churasqaykichejmanta, Llajtanwan khuska purisqaykichejmanta ima.

Hemanosniykichej,

Diospa Llajtanta Kamachejkuna