1-3. 1) ¿Imataj ñaupa tiempomanta hermanosta tʼaqanachinanpaj jinaña kasharqa? 2) Hechos libromanta yachakuy, ¿imata ruwanapajtaj yanapawasun?

 PABLOWAN Bernabewanqa willamunankupaj ñaupaj viajenkumanta Siriapi kaj Antioquiaman kutiporqanku. Paykunaqa may kusisqa kasharqanku Jehová ‘nacionesmanta kajkuna creenankupaj punkuta kicharisqanrayku’ (Hech. 14:26, 27). Antioquiapeqa llajtantinpi sumaj willaykuna willakusharqa, ashkha mana judiospis cristianosman tukusharqanku (Hech. 11:20-26).

² Judeamanta cristianosqa chayta yachaytawan mana tukuychu kusisqas kasharqanku. Imaraykuchus circuncidakunapuni kasqanta nejkunawan, mana circuncidakunachu kasqanta nejkunawan chʼajwayta qallarerqanku. Chantá judío cristianoswan, mana judío cristianoswan, ¿imaynatataj apanakunanku karqa? ¿Mana judío kaj cristianos Leyta juntʼanankuchu karqa? Ñaupa tiempomanta cristianos mana uj yuyayllachu kasqankurayku, congregacionmanta hermanosqa tʼaqanakunankupaj jinaña kasharqanku. ¿Imatá ruwankuman karqa mana tʼaqanakunankupaj?

³ Hechos 15 capitulomantaqa ashkha imasta yachakusun. Chaytaj yanapawasun congregacionpi imapis hermanosta tʼaqanachinanpaj jina rikhurejtin, allin yuyaywan chayta allinchanapaj.

4. 1) Wakin judío cristianos, ¿imatá yachachiyta munarqanku? 2) Jehová 13 watas ñaupajtaña Pedroman circuncisionmanta sutʼita entiendechisqanrayku, ¿ima tapuytaj rikhurin?

⁴ Lucas nin: “Wakin runasqa Judeamanta Antioquiaman jamuspa hermanosta kay jinata yachachiyta qallarerqanku: ‘Manachus Moisespa Leyninman jina circuncidakunkichej chayqa, mana salvasqa kayta atinkichejchu’, nispa” (Hech. 15:1). Mana yachakunchu chayta nejkuna niraj cristianosman tukushaspa fariseoschus manachus kasqankuta. Jinapis fariseos jinallataj yuyasharqanku. Chayrayku Leymanta tukuy  imata juntʼaytapuni munarqanku. Ichapis paykunaqa apostolespa, Jerusalenmanta ancianospa sutinkupi parlasqankuta nerqanku (Hech. 15:23, 24). Jehovaqa 13 watas ñaupajtaña Pedroman sutʼita entiendecherqa mana circuncidasqa kajkunata allinpaj qhawasqanta. Chanta, ¿imaraykutaj Judeamanta wakin cristianos mana circuncidasqa kajkuna, circuncidachikunankupuni kasqanta nisharqanku? (Hech. 10:24-29, 44-48). a

5, 6. 1) ¿Imaraykutaj judío cristianos mana circuncidasqa kajkuna circuncidachikunankupuni kasqanta nerqanku? 2) ¿Imapitaj mana kikinchu kanku circuncisionmanta tratowan, Jehová Abrahanwan tratota ruwasqanwan? (Sutʼinchayninta qhawariy).

⁵ Judío cristianosqa ichapis ashkha imasrayku circuncisionmanta mana kikintachu yuyarqanku. Imaraykuchus Jehovapuni kamacherqa qharis circuncidakunanku kasqanta. Chantapis uj runa circuncidachikusqanqa rikuchej pay Dioswan allinpi kasqanta. Jehovaqa ñaupajta Abrahanman kamacherqa paypis, wasinpi kaj qharispis circuncidakunanku kasqanta. Aswan qhepamantaj Jehovaqa israelitasman Leyta qoshaspa kamacherqa tukuy israelita qharis circuncidakunankuta (Lev. 12:2, 3). b Chantá Leyqa kamachillarqataj forasterospis circuncidakunanku kasqanta israelitaspa fiestasninkuta ruwayta munaspa, Pascua Fiestata jina (Éxo. 12:43, 44, 48, 49). Chayrayku judiosqa mana circuncidasqa kaj qharista chʼichipaj qhawaj kanku, nejtaj kanku mana Diosta sirviyta atisqankuta (Isa. 52:1).

⁶ Judío cristianosqa sinchʼi creeyniyoj, kʼumuykukoj sonqostaj kananku karqa Jehová jina imatapis qhawanankupaj, chaymantaj yachaykukunankupaj. Chay tiempopajqa Leypa tratonpa cuentanmanta mosoj tratoña rikhurerqa. Chayrayku judiosqa manaña nacekuytawanpachachu Diospa llajtanman tukorqanku. Judeapi tiyakoj cristianospis, judiospa waj llajtasninkupi tiyakoj cristianospis, mana manchachikojkuna kananku karqa Jesuspi creesqankuta ninankupaj, mana circuncidasqa cristianoswan khuskataj Diosta yupaychanankupaj (Jer. 31:31-33; Luc. 22:20).

7. Judeamanta uraykamoj runas, ¿imatataj mana entiendesqankuchu?

⁷ Jehovaj kamachiykunasnenqa kikillanpuni kakusharqa, mosoj tratotaj Moisespa Leyninpi kaj yuyaychaykunaman jina kasharqa (Mat. 22:36-40). Aswan qhepaman apóstol Pabloqa circuncisionmanta parlaspa nerqa: “Allin judioqa sonqon ukhumantapacha judío kaj. Circuncidasqa kasqantaj sonqonpi, mana qhelqasqa leynejtachu, manachayqa Diospa espiritunnejta”, nispa (Rom. 2:29; Deu. 10:16). Judeamanta uraykamoj runasqa mana chayta entienderqankuchu, paykunaqa nishallarqankupuni Jehová  munashallasqantapuni kamachisnin circuncidakunankuta. ¿Paykuna imatachus yuyasqankuta cambiankumanchu karqa?

8. ¿Imaraykutaj Diospa llajtanta kamachejkunata circuncisionmanta tapukorqanku?

⁸ Lucas nillanpuni: “Pablowan Bernabewantaj [Judeamanta uraykamoj] runaswan churanakorqanku, sinchʼitataj siminakorqanku. Chayrayku hermanosqa Pablota, Bernabeta, wakin hermanostawan, Jerusalenman kacharqanku chay imasmanta apostoleswan ancianoswan ima parlamunankupaj”, nispa (Hech. 15:2). c Antioquiamanta hermanosqa ‘sinchʼita siminakorqanku’, imaraykuchus sapa uj imatachus yuyasqanku ajinapuni kasqanta nerqanku. Paykunaqa allinta, ujchasqataj kausakuyta munarqanku, jinapis mana uj yuyayllaman chayayta aterqankuchu. Chayrayku Jerusalenpi kaj apostolestawan ancianostawan tapukorqanku, pikunachus Diospa llajtanta kamachejkuna karqanku chaykunata. ¿Imatá Antioquiapi kaj hermanosmanta yachakusunman?

9, 10. ¿Imatataj yachakunchej Antioquiamanta hermanosmanta, Pablomantawan Bernabemantawan?

⁹ Ñaupa cristianosmanta yachakunchej Diospa llajtanpi atienekuna kasqanta. Imaraykuchus chayta nisqanchejta qhawarina. Antioquiamanta hermanosqa yacharqanku Diospa llajtanta kamachejkunamanta kajkuna, tukuyninku judíos kasqankuta. Jinapis chay hermanosqa yacharqanku Diospa llajtanta kamachejkuna Diosmanta qhelqasqasman jinapuni circuncisionmanta chʼampayta allinchanankuta. ¿Imaraykutaj chayta ninchej? Imaraykuchus paykunaqa yacharqanku Jehovapuni llajtanta ñaupajman pusashasqanta espíritu santonnejta, congregacionpa uman Jesucristonejta ima (Mat. 28:18, 20; Efe. 1:22, 23). Kunanpis congregacionpi uj chʼampay rikhurejtin, Antioquiamanta hermanos jina Diospa llajtanpi, Diospa Llajtanta Kamachejkunapi ima atienekuna.

¹⁰ Yachakullanchejtaj kʼumuykukoj sonqo, pacienciayoj kananchej allin kasqanta. Pablowan Bernabewanqa waj nacionespi willamunankupaj espíritu santowan ajllasqa karqanku. Jinapis mana yuyarqankuchu atiyniyoj kasqankuta circuncisionmanta problemata sapallankumanta allinchanankupaj (Hech. 13:2, 3). Chantapis Pablo nerqa, ‘Señor rinanta nisqanrayku’ Jerusalenman risqanta. Chayrayku ninchej mana sapallanmantachu Jerusalenman risqanta (Gál. 2:2). Kunanpis ancianosqa pacienciayoj, kʼumuykukoj sonqoyoj kanankupaj kallpachakullankutaj. Congregacionta tʼaqanachinanpaj jina chʼampay rikhurejtenqa mana siminakunkuchu, nitaj nisqankutapuni valechiyta munankuchu. Astawanpis Jehová imatachus yuyasqanta Bibliapi  maskʼanku, allin kamachi yuyayniyoj ima kamachiykunatachus qosqantataj qhawaykunku (Fili. 2:2, 3).

11, 12. ¿Imaraykutaj suyakunanchej tiyan Jehová imatapis sutʼinchananta?

¹¹ Wakin kutisqa wakin imasta mana entiendeyta atillanchejchu. Chayrayku chayta entiendenapajqa ichapis Jehová yanapanawanchejta suyakuna kanqa. Cornelioqa 36 watapi espíritu santowan ajllasqa karqa. Jinapis chaypacha mana circuncidasqa kajkuna circuncidachikunankutachus manachus manaraj yachakorqachu. Hermanosqa imatachus Jehová yuyasqanta yachanankupaj 49 watakama suyakunanku karqa, nisunman 13 watasta. ¿Imaraykutaj chay chhika watasta suyakorqanku? Imaraykuchus Jehovaqa ichapis munarqa allin sonqoyoj judíos chay jatun cambioman yachaykukunankuta. Chantapis Diospa kamachisnenqa 1.900 watasta circuncisionmanta tratopi kasharqanku. Chay tratotataj Jehová ruwarqa munasqa amigon Abrahanwan (Juan 16:12).

¹² May sumajpuni Tatanchej Jehová munakuywan, pacienciawantaj pusawasqanchej, yachachiwasqanchej ima. Payqa imatapis allinninchejpajpuni yachachiwanchej (Isa. 48:17, 18; 64:8). Amapuni jatunchakojkuna kanachu, nitaj nisqanchejtapuni valechiyta munanachu. Jehovaj llajtanpi cambios kajtin, chayri wakin yachachiykunata waj jinamanta sutʼinchakojtenqa ama Diospa llajtanpaj rimanachu (Ecl. 7:8). Tumpitallatapis ajinata yuyashasqanchejta reparakunchej chayqa, Hechos 15 capitulomanta imatachus yachakusqanchejpi tʼukurina, Jehovamantataj yanapata mañakuna chay yachakusqanchejman jina ruwanapaj. d

13. ¿Imaynatá Jehová jina pacienciayoj kasqanchejta rikuchisunman?

¹³ Chantapis estudiosninchejwan Jehová jina pacienciakunanchej tiyan. Paykunamanta wakenqa ichapis ñaupa  creenciasninkuta chayri costumbresninkuta mana saqeyta atishallankuchu. Jina kajtenqa ichapis uj tiempota suyananchej kanqa estudionchej cambiananpaj espíritu santo yanapananta (1 Cor. 3:6, 7). Chantapis allin kanman Jehovamanta yanapata mañakunanchej, paytaj tiemponpi imatachus ruwananchejta reparachiwasun (1 Juan 5:14).

14, 15. 1) Pablota, Bernabeta, compañerosninkutawan jatunpaj qhawasqankurayku, ¿imatataj ruwarqanku Antioquiamanta hermanos? 2) ¿Imaynatataj Pablowan compañerosninwan kallpacharqanku Feniciapi, Samariapi kaj hermanosta?

¹⁴ Lucas nillanpuni: “Antioquía congregaciontaj paykunawan uj chhikanta rispa kacharpayarqanku. Paykunataj rerqanku Fenicianta, Samarianta, creejkunaman willaspa, imaynatachus nacionesmanta kajkuna Diosman kutirikusqankuta. Chaytaj tukuy hermanosta maytapuni kusicherqa”, nispa (Hech. 15:3). Hermanosqa Pablota, Bernabeta, compañerosninkutawan uj chhikanta compañarqanku. Chaytataj ruwarqanku paykunata munakusqankurayku, jatunpaj qhawasqankurayku, Jehová Diostaj bendecinanta munasqankurayku. Antioquiapi kaj hermanosmantaqa mayta yachakusunman. Allin kanman kayta tapurikunanchej: “¿Tukuy hermanostachu jatunpaj qhawani? ¿Aswan jatunpajchu qhawani ancianosta ‘pikunachus parlaspa, yachachispa sinchʼita llankʼanku chaykunata’?”, nispa (1 Tim. 5:17).

¹⁵ Pablowan compañerosninwanqa Jerusalenman rishaspa Feniciapi, Samariapi tiyakoj hermanosta mayta kallpacharqanku. Paykunaqa willarqanku ashkha mana judío kajkuna cristianosman tukusqankuta. Chay cristianosmanta wakenqa ichapis ayqekoj judíos karqanku, pikunachus Esteban wañuchisqa kasqantawan ayqekorqanku chaykuna. Kay tiempopipis mayta kallpachallawanchejtaj imaynatachus Jehová willasqanchejta bendecishasqanta yachay. Chaytaj astawanraj kallpachawanchej llakiykunapi rikukushajtinchej. Chay sumaj willaykunata uyarinchej tantakuykunapi, jatuchaj tantakuykunapi ima. Chantapis sumaj willaykuna kallantaj publicacionesninchejpi, jw.org nisqapi llojsimoj experienciaspi, wakin hermanospa kausayninkumanta llojsimoj yachaqanaspi ima. ¿Chaykunawan yanapachikushanchejchu?

16. ¿Imaraykutaj ninchej circuncisionmanta problema aswan sinchʼiña kasqanta?

¹⁶ Antioquiamanta jamoj hermanosqa 550 kilometrosta sur ladoman riytawan Jerusalenman chayarqanku. Lucas nin: “Congregacionpis, apostolespis, ancianospis kʼacha sonqowan paykunata japʼikorqanku. Pablowan Bernabewantaj willarqanku Dios paykunanejta ashkha imasta ruwasqanta”, nispa (Hech. 15:4). “Wakin creejkunataj, pikunachus ñaupajta fariseospa yachachiykunasninta qhatej kanku chaykuna, tiyanasninkumanta sayarispa nerqanku: ‘Mana judío kajkunamanta creejkunaqa circuncidasqapuni  kananku tiyan, Moisespa Leynintapis juntʼanankuta ninanchej tiyan’, nispa” (Hech. 15:5). Circuncisionmanta problemaqa aswan sinchʼiña kasharqa, chayrayku allinchakunan karqa.

17. 1) Ñaupa tiempopi, ¿pikunataj Diospa llajtanta kamachejkunamanta karqanku? 2) ¿Imaraykutaj Jerusalenmanta ancianos Diospa llajtanta kamachejkunamanta karqanku?

¹⁷ Proverbios 13:10 nin: “Yuyaychayta maskʼajkunataj yachayniyoj kanku”, nispa. Chay yuyaychayman jina ruwaspa “apostoleswan ancianoswan tantakorqanku, [circuncisionmanta] allinta parlanankupaj” (Hech. 15:6). Ñaupa tiempopi Diospa llajtanta kamachejkunaqa, kay tiempopi Diospa Llajtanta Kamachejkuna jinallataj tukuy congregacionpa sutinpi imatapis ajllaj kanku. Paykuna ukhupitaj kasharqanku “apostoleswan ancianoswan”. Chanta, ¿imaraykutaj Jerusalenmanta ancianos apostoleswan khuska Diospa llajtanta kamachejkunamanta karqanku? Diospa llajtanta ñaupajman apanankupaj wakichisqa qharis kanallankupajpuni. Ajinamanta mayqen apostolllatapis apóstol Santiagota jina wañuchichejtinku, chayri apóstol Pedrota jina carcelman uj tiempopaj wisqʼaykojtinku Diospa llajtanta ñaupajman apajkuna kanallankupajpuni.

18, 19. ¿Imatataj Pedro nerqa chanta imatataj payta uyarejkuna ruwananku karqa?

¹⁸ Lucas nillanpuni: “Unaytaña parlaykusqankumantataj, Pedroqa sayarispa paykunata nerqa: ‘Hermanosníy, qankunaqa allinta yachankichej qallariymantapacha Diosqa qankuna ukhumanta ajllawasqanta, noqanejta nacionesmanta kajkuna sumaj willaykunata uyarinankupaj, creenankupajtaj. Runaj sonqonta rejsej Diosqa sutʼita rikucherqa mana judío kajkunata allinpaj qhawasqanta, espíritu santota paykunaman qospa, imaynatachus noqanchejmanpis qowarqanchej ajinata. Payqa noqanchejta, mana judío kajkunatapis uj rejllata qhawawarqanchej. Paykuna creesqankuraykutaj sonqosninkuta chʼuwacharqa’”, nispa (Hech. 15:7-9). Uj libro nisqanman jina, 7 versiculopi griego parlaymanta ‘parlaykusqankumanta’ nispa traducikun chay palabraqa, griego parlaypi niyta munallanmantaj allinta qhawaykurisqankuta, wakin tapuykunapitaj tʼukurisqankuta.  Wakin hermanosqa circuncisionmanta waj jinatasina yuyarqanku, wakintaj waj jinata. Jinapis tukuyninku chayta qhawaykuriyta munarqanku, sapa ujtaj imatachus yuyasqankuta, imaynachus kashasqankutapis sutʼita nerqanku.

¹⁹ Apóstol Pedroj nisqanqa tukuy chaypi kajkunata yuyaricherqa paypuni 36 watapi rikusqanta Corneliowan, tukuy wasinpi kajkunawan mana circuncidasqachu kaspapis espíritu santota japʼisqankuta. Sichus Jehová uj rejllataña qhawasharqa judiosta, mana judío kajkunatawan chay, paykunapis ajinallatataj ruwananku karqa. Chantapis Pedroqa nillarqataj, Jehovaqa payta yupaychajkunata Cristopi creesqankurayku allinpaj qhawasqanta, manataj Leyta kasukusqankuraykuchu (Gál. 2:16).

20. ¿Imaraykutaj Pedro nerqa mana judío kajkuna circuncidakunankupuni kasqanta nejkuna Diosta pruebaman churashasqankuta?

²⁰ Apóstol Pedroqa imatachus Dios nisqanta yachaspa, pikunamantajchus espíritu santonta qosqanta rikuspa nerqa: “Chanta, ¿imaraykutaj Diosta pruebaman churashankichej, creejkunaman llasa qʼepita qʼepiriykuchispari? Chaytaqa ni ñaupa tatasninchejpis, nitaj noqanchejpis apayta aterqanchejchu. Astawanqa creenchej salvasqa kananchejta Señor Jesuspa jatun khuyakuyninnejta, paykunapis creenku kikillantataj salvasqa kanankuta”, nispa (Hech. 15:10, 11). Mana judío kajkuna circuncidakunankupuni kasqanta nejkunaqa, mana judioschu kaj cristianosta Moisespa Leyninta juntʼanankuta nisharqanku. Chay Leytaqa ni judiospis tukuyninta juntʼayta aterqankuchu, chayrayku paykunaqa wañunankupaj maldecisqa kasharqanku (Gál. 3:10). Judiosqa Jehovaman agradecekunanku karqa Jesusnejta jatun khuyakuyninta paykunaman rikuchisqanmanta. Chayraykuchá Pedro paykunaman nerqa kausayninkuwan Diosta pruebaman churashasqankuta. Arí, paykunaqa Diospa paciencianta pruebaman churasharqanku.

21. ¿Imaynatataj Bernabewan Pablowan yanaparqanku ancianosta, apostolestawan sumajta ajllanankupaj?

²¹ Pedroj nisqanqa mana qhasichu karqa imaraykuchus “tukuyninku chʼinyakuspa uyarerqanku”. Chantá Bernabewan Pablowanqa paykunaman willarqanku, “Dios paykunanejta ashkha milagrosta, tʼukuna imastawan naciones ukhupi ruwasqanta” (Hech. 15:12). Chaypacha apostoleswan, ancianoswanqa wakichisqa kasharqanku tukuy imata qhawaykurinankupaj, ajinamanta circuncisionmanta imatachus Dios yuyasqanman jina ajllanankupaj.

22-24. 1) ¿Imaynatataj Diospa Llajtanta Kamachejkuna ñaupa tiempomanta apóstoles, ancianos jina ruwanku? 2) ¿Imatataj ancianos ruwanku uj imata mana allinchayta atispa?

²² Diospa Llajtanta Kamachejkunaqa, tantakuspa Diospa Palabrantapuni qhawaykurinku yanapachikunankupaj, Diosmantataj espíritu santota mañakunku imatapis pay yuyasqanman jina ajllanankupaj (Sal. 119:105; Mat.  7:7-11). Diospa Llajtanta Kamachejkunamanqa tukuyninkuman ñaupajsitumantaña willakun imasmantachus tantakuyninkupi parlanankuta. Ajinamanta mañakunankupaj, chaypitaj tʼukurinankupaj (Pro. 15:28). Tantakushaspañataj chay ajllasqa cristianosqa Bibliatapuni qhawaykurinku, imatachus sapa uj yuyasqankutataj sutʼita, respetowantaj ninku.

²³ Congregacionesmanta ancianospis, Diospa Llajtanta Kamachejkuna jina ruwaspa allinta ruwanku. Jinapis, ¿imatá ruwankuman ujnin tantakuyninkupi mana tukuyninkuchu uj yuyayllaman chayaspa? Ajina kajtenqa sucursalta tapukunkuman, chayri sucursalpa sutinpi kachasqa hermanosta, congregacionesta waturej hermanosta jina. Sucursalmanta hermanos mana chayta allinchayta atejtinkutaj, Diospa Llajtanta Kamachejkunaman qhelqankuman.

²⁴ Jehovaqa mayta bendecin pikunachus llajtanta ñaupajman apanku chaykunata jatunpaj qhawajkunata, kʼumuykukoj sonqowan kasukojkunata, pacienciakojkunata ima. Qhepan capitulopi yachakusun jinataj, Jehovaqa paykunaman allin kausayta qon, chantapis yanapan congregacionpi ujchasqa kanankupaj, ashkhayanankupaj ima.