CAPÍTULO 11
“Kusiywan, espíritu santowantaj juntʼasqa karqanku”
Pabloqa payman churanakoj runasman willan
Orqhosqa kashan Hechos 13:1-52 versiculosmanta
1, 2. 1) Waj willajkunamanta nisqa, ¿maymantaj kachasqa karqanku Bernabewan Saulowan? 2) ¿Imaynatataj chay willasqanku Hechos 1:8 versiculoj nisqan juntʼakunanpaj yanapakorqa?
SIRIAPI kaj Antioquiapeqa may kusiypuni karqa, imaraykuchus congregacionpi kaj yachachejkunamanta, profetasmanta ima espíritu santonejta Bernabeta, Saulota ima ajllakorqa sumaj willaykunata karu lugarespi willamunankupaj (Hech. 13:1, 2). a Ñaupaj kutispiña hermanosta kacharqanku willamunankupaj, jinapis chay kutispeqa maypichus cristianos karqanku chay lugaresllaman kacharqanku (Hech. 8:14; 11:22). Bernabetawan, Saulotawan, Juan Marcostawantajrí, maypichus manaraj Diosmanta willakorqachu chay lugaresman kacharqanku.
2 14 watas ñaupajta, Jesusqa discipulosninman nerqa: “Noqamantataj testigos jina willankichej Jerusalenpi, tukuy Judeapi, Samariapi, jinallataj kay jallpʼaj tukuy kʼuchusnintinpi”, nispa (Hech. 1:8). Jesuspa chay nisqantaj astawanraj juntʼakorqa Bernabewan Saulowan waj lugaresman willaj risqankurayku. b
“Tʼaqapuwaychej [...] uj ruwayta ruwanankupaj” (Hechos 13:1-12)
3. ¿Imaraykutaj ñaupa tiempopi mana viajayta atikullajchu?
3 Kay tiempopeqa tukuy ima viajanapaj kasqanrayku pisi tiempollapi may karuta viajasunman. Jinapis ñaupa tiempopeqa mana autos kajchu, ni avionespis. Chayrayku runasqa chakipi maymanpis rej kanku, ñankunastaj mana allinchu kaj. Ñaupa tiempopi uj diata chakipi rispaqa mayta saykʼoj kanku, 30 kilometrosta jinallataj rej kanku. c Bernabewan Saulowanqa uj mosoj ruwayta japʼisqankumanta may kusisqaschá kasharqanku. Jinapis yacharqanku chayta juntʼanankupaj mayta kallpachakunanku kasqanta (Mat. 16:24).
4. 1) ¿Pitaj Bernabetawan Saulotawan ajllarqa, chanta imaynatá hermanos chayta qhawarqanku? 2) ¿Imata ruwanatataj Biblia yuyaychawanchej?
4 ¿Imaraykutaj espíritu santo nerqa Bernabeta, Saulotawan tʼaqapunankuta? (Hech. 13:2). Bibliaqa mana chayta willawanchejchu. Jinapis paykuna espíritu santowan ajllasqa karqanku. Antioquiamanta profetaswan yachachejkunawantaj tukuy atisqankuta ruwarqanku paykunata yanapanankupaj, ajinamanta chay ruwayninkuta juntʼanankupaj. Paykunaqa mana Bernabemanta, ni Saulomantapis envidiakorqankuchu. Astawanpis “ayunaytawan Diosmanta mañakuytawan, Bernabeman, Saulomanwan makisninkuta churaykorqanku, chantá kacharpayarqanku” (Hech. 13:3). Bernabewan Saulowanqa maytachá kusikorqanku chay hermanos paykunata yanapasqankumanta. Noqanchejpis Diospa llajtanpi wakin imasta ruwanankupaj churasqa kaj hermanosta yanapananchej tiyan. Paykunamanta envidiakunamantaqa, ‘llankʼasqankurayku paykunata mayta munakunchej, sumajpajtaj qhawanchej’, chayta ruwanatapunitaj Biblia yuyaychawanchej (1 Tes. 5:13).
5. Bernabewan Saulowan, ¿imaynatá Chipre churupi willarqanku?
5 Bernabewan Saulowanqa Antioquiamanta llojsispa Seleuciakama chakipi rerqanku. Chaymantataj Chipre churuman uj barcopi rerqanku 200 kilometrosta jina. d Bernabeqa Chipremanta kasqanrayku maytachá chaypi sumaj willaykunata willayta munarqa. Chay churoj inti llojsimuynin ladopi “Salamina llajtaman chayaspataj, judiospa sinagogasninkupi Diospa palabranmanta willarqanku” (Hech. 13:5). e Chantá Bernabewan Saulowanqa Chipre churuta ujnin kantunmanta, ujnin kantunkama pasarqanku ñan patapi kaj jatuchaj llajtaspi willaspa. Mana yachakunchu mayqen ñannintachus risqankuta. Jinapis ichá 160 kilometrosta jina purerqanku.
6, 7. 1) ¿Pitaj Sergio Paulo karqa? 2) ¿Imaraykutaj Bar-Jesús mana munarqachu Sergio Paulo creenanta? 3) ¿Sergio Paulo mana creenanpaj imatachus Bar-Jesús ruwasqanta Saulo qhawakullarqachu?
6 Ñaupa tiempopeqa Chipre churupi llulla diosesta mayta yupaychaj kanku. Bernabewan Saulowantaj ajinapuni kasqanta rikorqanku, Chipre churoj inti yaykuynin ladopi Pafos llajtaman chayaspa. Chaypi paykunaqa “Bar-Jesús sutiyoj judiowan tinkorqanku. Chay runaqa layqa karqa, llulla profetataj. Chay layqa runaqa kamachej Sergio Paulowan kasharqa, pichus yachayniyoj runa karqa chaywan”. f Ñaupa tiempopeqa may respetasqa ashkha romanos niraj imatapis ajllashaspa layqa runasta chayri chʼaskasta qhawajkunata watukoj kanku. Sergio Paulopis “yachayniyoj runa” kashaspa chayta ruwaj. Jinapis Sergio Pauloqa Diospa Gobiernonmanta yachakuyta munarqa, ‘Diospa palabrantapis’ uyariyta munarqa. Jinapis Bar-Jesusqa mana munarqachu kamachej Sergio Paulo creenanta. Bar-Jesusqa Elimas sutiwanpis rejsisqallataj karqa. Elimas suteqa “layqa” niyta munan (Hech. 13:6-8).
7 Bar-Jesusqa mana munarqachu Sergio Paulo Diospa Gobiernonmanta sumaj willaykunata japʼikunanta. Payqa Sergio Pauloj yuyaychajnillanpuni kayta munarqa. Chayrayku payqa “Sergio Paulo mana creenanta” munarqachu (Hech. 13:8). Saulotaj Sergio Paulo mana creenanpaj imastachus Bar-Jesús ruwasqantaqa mana qhawakullarqachu. ¿Imatá pay ruwarqa? Biblia niwanchej: “Saulotaj pitachus Pablo nillajtaj kanku chay, espíritu santowan juntʼa kaspa, Elimasta allinta qhawarerqa. Nerqataj: ‘Tukuyta pantachej llulla runa, imaymana sajra kajwan juntʼasqa, Diabloj wawan, cheqan kajpa enemigon, ¿maykʼajkamataj Jehová Diospa cheqan ñanninta qʼewinkiri? Kunanqa Jehová Diospa makin pataykipi kanqa, ciegoyankitaj, intej kʼanchaynintataj uj tiempota mana rikunkichu’, nispa. Chay ratopachataj Elimaspa ñawisnenqa chharpuyarqa, laqhayarqataj. Muyuykachaspataj maskʼasharqa pillapis makinmanta aysaspa pusananpaj”, nispa. g ¿Imatataj Sergio Paulo ruwarqa chay milagrota rikuspa? Biblia nillanpuni: “Chayta rikuspa creerqa, maytataj tʼukorqa Jehová Diospa yachachiyninmanta”, nispa (Hech. 13:9-12).
Qhatiykachasqa kaspapis Pablo jina mana manchachikuspa cheqa kajta sutʼinchanchej.
8. ¿Imaynatá Pablo jina mana manchachikoj kasunman?
8 Yachakorqanchej jina, Pabloqa mana Bar-Jesusta manchachikorqachu. Noqanchejpis willasqanchejman churanakojkunata nillataj manchachikunchejchu. Paykuna Bibliamanta yachakuyta munajkunata desanimayta munajtinkoqa, mana manchachikuspa cheqa kajmanta parlanchej. Jinapis ‘kʼacha simiwanpuni parlanchej’, “kachiwan kachinchasqata jina” (Col. 4:6). Ajinapis pikunachus yachakuyta munajkunataqa Jehovamanta yachakunankupaj yanapanallapuni, chayta ruwasqanchejrayku wajkuna phiñakojtinkupis. Nillataj manchachikunanchejchu tiyan llulla religión mana allintachu ruwashasqanta niyta. Imaraykuchus paykunaqa Bar-Jesús jina “Jehová Diospa cheqan ñanninta” qʼewishanku (Hech. 13:10). Noqanchejpis Pablo jinallataj mana manchachikuspa cheqa kajmanta willayta munanchej, cheqa kajmanta yachakuyta munajkunatapis yanapayta munanchej. Kay tiempopeqa mana Pabloman jinachu Dios atiyta qowanchej milagrosta ruwanapaj. Jinapis yachanchej uyariyta munajkunata Jehová espiritunwan yanapananta cheqa kajmanta yachakunankupaj (Juan 6:44).
“Kallpachanawaykupaj parlariychej” (Hechos 13:13-43)
9. Kay tiempopi congregacionta ñaupajman apajkuna, ¿imatá yachakunkuman Pablomantawan Bernabemantawan?
9 Chantá Pablowan, Bernabewan, Marcoswanqa Pafosmanta Perga llajtaman barcopi rerqanku. Pergaqa Asia Menorpi kasharqa, mar qocha kantupitaj, 250 kilometrospi jina. Hechos 13:13 versiculopeqa “Pablo, paywan kajkunapis” nispa nin, chaymantapachataj chay palabrasta ashkha kutispi oqharikun. Chaywantaj ichapis niyta munashan chay kutimantapacha Pablo ñaupajman apayta qallarisqanta. Bernabetaj mana Pablomanta envidiakorqachu, astawanpis khuska llankʼallarqankupuni Jehovaj munayninta juntʼanankupaj. Congregacionesta ñaupajman apajkunaqa mayta paymanta yachakunkuman. Jatunpaj qhawachikuyta maskʼanamanta nisqaqa, Jesús imatachus yuyaychawasqanchejta yuyarikunchej. Pay nerqa: “Tukuyniykichejtaj hermanos kankichej”, nispa. Chantá nillarqataj: “Jatunchakojqa kʼumuykachachisqa kanqa, kʼumuykukojtajrí jatunchasqa kanqa”, nispa (Mat. 23:8, 12).
10. Pergamanta Antioquiaman rej ñan, ¿imaynataj karqa?
10 Pergaman chayasqankutawan, Juan Marcosqa kaymanta jinalla Pablotawan Bernabetawan saqerparispa, Jerusalenman kutiporqa. Bibliaqa mana willawanchejchu imaraykuchus chayta ruwasqanta. Pablowan Bernabewantaj iskaynillankuña chakipi rerqanku Pisidiapi kaj Antioquiaman. Chay llajtaqa Galacia provinciapi kasharqa. Chayman chayaytaj mana atikullarqachu, imaraykuchus mar qochamanta 1.100 metros patapi kashan. Chantapis chay llajtaman chayanankupajqa orqosninta rinanku karqa, chaypitaj ashkha suwas kaj. Chay kutipajtaj ichapis Pabloqa onqosqaña kasharqa. h
11, 12. Antioquiapi kaj sinagogapi, ¿imamantataj Pablo parlarqa payta uyarinankupaj?
11 Pisidiapi kaj Antioquiapeqa samarikuna pʼunchaypi Pablowan Bernabewan uj sinagogaman rerqanku. Biblia nin: “Leypis Profetaspa qhelqasqankupis tukuypaj leekusqantawan, sinagogapi kamachejkunaqa paykunaman nichimorqanku: ‘Hermanos, kallpachanawaykupaj imallatapis ninaykichej kajtenqa parlariychej’, nispa” (Hech. 13:15). Chantá Pabloqa sayariytawan parlayta qallarerqa.
12 Sinagogapi Pablota uyarejkunaqa wakin judíos karqanku, wakintaj judiospa yachachiyninta qhatejkuna. Chayrayku Pabloqa kay jinata parlayta qallarerqa: “Israelitas, uyariwaychej, qankunapis Diosta tukuy manchachikojkuna, uyariwaychej”, nispa (Hech. 13:16). Payta uyarejkunaqa mana japʼikuyta munarqankuchu Jesús Diospa munaynin juntʼakunanpaj yanapakusqanta. Chayrayku, ¿imaynatá Pablo paykunawan parlarerqa? Ñaupajtaqa Israel nacionmanta parlarqa, nerqataj Jehová paykunata yanapasqanta “Egipto jallpʼapi forasteros jina” tiyakushajtinku. Paykunata kacharichiytawantaj, “tawa chunka watasta jina chʼin jallpʼapi” paykunawan pacienciakusqanta. Chaymantataj Pabloqa paykunata yuyaricherqa imaynatachus israelitas sumaj jallpʼata japʼikapusqankuta, Jehovataj “chay jallpʼasta israelitasman” herenciata jina qopusqanta (Hech. 13:17-19). Wakin runasqa yuyanku chay samarikuna pʼunchaypi ima partestachus Leymanta, Profetaspa qhelqasqankumantapis leekorqa chay partesmanta Pablo parlasqanta. Ajina chayqa, Pabloqa sumajta yacharqa “tukuy runaspaj imaynachus kasqankuman jina” tukuyta (1 Cor. 9:22).
13. ¿Imastataj ruwasunman runas willasqanchejta uyariyta munanankupaj?
13 Noqanchejpis runas uyariyta munanawanchejpaj jina willaypi parlayta munanchej. Chayrayku imamantachus parlarinanchejta sumajta ajllanchej, paykuna yachakuyta munanankupaj jina, imapichus creesqankuman jinataj. Bibliamanta yachankuña chaytaj, ima versiculostachus paykuna rejsinkuña chaymanta parlarisunman. Wakin kutistaj allin kanman Bibliankupipuni chayta leerichinanchej. Noqanchejqa imaymanamanta runasta yanapayta munanchej willasqanchejta uyariyta munanankupaj.
14. 1) ¿Imaynatá Pablo Jesusmanta parlayta qallarerqa, chanta imamanta qhawarikunankutataj nerqa? 2) ¿Imatataj Pablota uyarejkuna ruwarqanku?
14 Chantá Pabloqa sutʼincharqa Israelmanta reyesqa ‘uj salvajpa’ ñaupa tatanku kasqanta, chay salvajtaj Jesús kasqanta. Sutʼinchallarqataj Juan Bautista runasta wakichisqanta Jesusta japʼikunankupaj. Chantá nillarqataj Jesús wañuchisqa, kausarichisqataj kasqanta (Hech. 13:20-37). Chayta niytawan Pablo nerqa: “Noqa willashaykichej Diosqa Jesusnejta juchasniykichejta pampachananta. Diosqa Jesusnejllatataj creejkunatapis mana juchayoj kasqankuta niyta atin”, nispa. Chantá nillarqataj: “Sumajta qhawarikuychej Profetaspa qhelqasqanku ama qankunapi juntʼakunanpaj. Chay qhelqasqapi nin: ‘Qhawaychej asipayajkuna, qankunaqa tʼukunkichej, wañunkichejtaj. Noqaqa uj ruwayta ruwashani kausashajtillaykichejraj. Chay ruwayta pillapis kantumanta willasunkichejman chaypis, manapuni creewajchejchu’, nispa”. Chanta, ¿imatataj Pablota uyarejkuna ruwarqanku? Paykunaqa “rogakorqanku qhepan samarikuna pʼunchaypi, chay imasmanta paykunaman parlarinankuta. Sinagogapi tantakuy tukukusqantawantaj, Pablotawan Bernabetawan ashkha judíos qhaterqanku, judiospa yachachiyninta qhatejkuna ima”, pikunachus Diosta yupaychaj kanku chaykuna (Hech. 13:38-43).
“Nacionesmanta kajkunaman [...] willamusqayku” (Hechos 13:44-52)
15. ¿Imataj karqa qhepan samarikuna pʼunchaypi?
15 “Qhepan samarikuna pʼunchaytaj, casi tukuy llajtantin tantakorqanku” apóstol Pablota uyarinankupaj. Chaytaj wakin judiosmanqa nipuni allinchu rijchʼarqa. Chayrayku Pabloj ‘parlasqanmanta sajrata rimaspa churanakorqanku’. Jinapis Pablowan Bernabewanqa mana manchachikuspa paykunaman nerqanku: “Diospa palabranqa qankunamanraj ñaupajta willasqa kanan karqa. Qankunatajrí mana uyariyta munankichejchu, ajinamanta rikuchinkichej wiñay kausayta mana japʼinaykichejpaj jinachu kasqaykichejta. Chayrayku nacionesmanta kajkunaman Diospa palabranta willamusqayku. Jehová Diosqa kay jinata kamachiwarqayku: ‘Nacionespaj kʼanchay kanaykipaj churarqayki, jallpʼaj karu kʼuchusninkama salvacionmanta willanaykipaj’, nispa” (Hech. 13:44-47; Isa. 49:6).
“Pablota, Bernabetawan qhatiykacharqanku [...]. Creejkunatajrí kusiywan, espíritu santowantaj juntʼasqa karqanku” (Hechos 13:50-52).
16. 1) Pablowan Bernabewan willasqankuta, ¿judíos japʼikorqankuchu? 2) ¿Imatataj Pablowan Bernabewan ruwarqanku?
16 “Chayta uyarispa nacionesmanta kajkunaqa kusikorqanku, [...] wiñay kausayta japʼinankupaj allin sonqoyoj kajkunataj creerqanku” (Hech. 13:48). Ajinamanta Diospa Palabranqa tukuy chay jallpʼaspi willakorqa, judiostaj mana chayta japʼikorqankuchu. Pablowan Bernabewanqa paykunaman nerqanku Mesiasmanta sumaj willaykunaqa, paykunamanraj ñaupajta willasqa kasqanta, nitaj chay willayta japʼikusqankuta, chayraykutaj Dios paykunata castigananta. Chantá judiosqa phiñarikuspa “qhapaj warmista, llajtamanta allinpaj qhawasqa runastawan chʼajwacherqanku. Paykunataj oqharikuspa Pablota, Bernabetawan qhatiykacharqanku, jallpʼankumantataj qharqorqanku”. Chanta, ¿imatataj Pablowan Bernabewan ruwarqanku? “Paykunaj contranpi chakisninkumanta jallpʼata thalarakuspa, Iconioman riporqanku”. Pisidiamanta kaj Antioquiapi, ¿niñachu uj cristianopis kanman karqa? Mana, ni imarayku. Astawanpis chay llajtapi qhepakoj creejkunaqa “kusiywan, espíritu santowantaj juntʼasqa karqanku” (Hech. 13:50-52).
17-19. ¿Imaynatá Pablo jina, Bernabé jina ruwasunman, chanta imaynatá chayta ruway kusisqa kanapaj yanapawasun?
17 ¿Imatá yachakusunman imatachus Pablowan Bernabewan ruwasqankumanta? Qhapaj runas chayri allinpaj qhawasqa runas manaña willanata munajtinkupis willanallapuni kasqanta. Chantapis Antioquiapi tiyakojkuna willasqankuta mana uyarejtinku, Pablowan Bernabewan ‘chakisninkumanta jallpʼata thalarakorqanku’. Chaytaj mana niyta munarqachu Pablowan Bernabewan chay llajtapi tiyakojkunapaj phiñasqa kashasqankuta, astawanpis chayta ruwarqanku paykunawan imapis kajtin, manaña juchayojchu kasqankuta rikuchinankupaj. Paykunaqa yacharqanku chay runasta mana obligayta atisqankuta willayninkuta japʼikunankupaj. Jinapis waj lugarman willaj ripuyta aterqanku, chayrayku Iconioman riporqanku.
18 Pisidiapi kaj Antioquiapi qhepakoj hermanoswan, ¿imataj karqa? Paykunaqa churanakoj runaspa chaupinkupi kasharqanku. Jinapis kusisqa kanankoqa mana runas willasqankuta japʼikunankumantachu kasharqa. Jesús nerqa: “Diospa palabranta uyarispa kasukojkunamin kusisqaqa kanku”, nispa (Luc. 11:28). Antioquiapi kaj hermanostaj Jesuspa yuyaychasqanman jina ruwanankupaj kallpachakorqanku.
19 Pablowan Bernabewan jina ruwana, yuyarikunataj sumaj willaykunata willanallapuni kasqanta, runasmantataj kashan chay willasqanchejta japʼikunanku chayri mana. Mana uyariyta munawajtinchejrí, ¿imatá ruwasunman? Ñaupa tiempomanta cristianos jina ruwana. Sichus cheqa kajta munakusun, Diospa espiritunwanpis pusachikusun chayqa, kusisqallapuni kasunchej runas churanakuwajtinchejpis (Gál. 5:18, 22).
a “ Bernabé ‘sonqochaj wawa’” nisqa recuadrota leeriy.
b Chay kutipajqa Jerusalenmanta aswan karu lugarespiña Diosmanta willakusharqa. Chay lugarespitaj mosoj congregacionespis karqankuña, Siriapi kaj Antioquiapi jina. Chaytaj Jerusalenmanta norte ladopi kashan, 550 kilometrospi jina.
c “ Unay ñankuna” nisqa recuadrota leeriy.
d Ñaupa tiempomanta barcosqa, uj diapi 160 kilometrosta jina rej kanku may ladomanchus rishaj kanku chay ladoman wayramojtin. Jinapis tiempo mana allinchu kajtenqa mana ancha karutachu rej kanku.
e “ Judiospa sinagogasninku” nisqa recuadrota leeriy.
f Chipre churoqa Romamanta Senadoj atiyninpi kasharqa. Chayrayku Romamanta Senado ajllaj pichus chay churuta kamachinanta. Chay kamachejtataj procónsul nispa nej kanku.
g Chay kutimantapacha Saulomanta parlaspa Pablo sutillataña oqharikun. Chay sutitaj latinpi kashan. Wakin runasqa ninku Saulo chay sutita churakusqanta, Sergio Paulo creesqanrayku. Jinapis chayqa mana jinachu kanman, imaraykuchus Chipre churumanta ripuytawan siga Pablo sutillawanpuni rejsisqa karqa, “nacionesman kachasqa apóstol” jinataj. Payqa chay kutimantapacha Pablo sutiwan rejsichikuyta ajllarqa, manañataj Saulo sutiwanchu. Saulo suteqa hebreo parlaypi karqa, griego parlaypitaj uj millay palabraman rijchʼakorqa (Rom. 11:13).
