CAPÍTULO 5
“Diostapuni kamachejniykuta jina kasunayku tiyan”
Apóstoles Diostapuni kasukusqankumanta tukuy cristianos yachakusunman
Orqhosqa kashan Hechos 5:12–6:7 versiculosmanta
1-3. 1) ¿Imatataj Jatun Juntamanta kajkuna apostolesman nerqanku? 2) ¿Imatataj apóstoles ajllananku karqa? 3) ¿Imaraykutaj apostolesmanta yachakuna tiyan?
JATUN Juntamanta juecesqa may phiñasqas kasharqanku. Paykunaj ñaupaqenkupitaj apóstoles sayasharqanku juchata ruwasqankumanta tumpaykusqankurayku. Chay Jatun Juntamanta kamachejqa kuraj kaj sacerdote José Caifás karqa, payqa may rabiasqapuni kasharqa. Chayrayku mana Jesuspa sutillantapis oqhariyta munarqachu kayta nishaspa: “¿Manachu kamacherqayku ama Jesuspa sutinpi yachachinaykichejta? ¿Imaraykutaj chanta yachachisqaykichejwan Jerusalenman juntʼaykuchishankichejri? ¿Imaraykutaj chay runaj wañuyninmanta juchachayta munawaykuri?”, nispa (Hech. 5:28). Chaywanqa kaytapis nishankuman jina karqa: “Manachus willayta saqenkichej chayqa, chaypimá rejsiwasqayku”, nispa.
2 ¿Imatá apóstoles ruwarqanku? Paykunamanqa Jesús kamacherqa willanankuta. Paytaj chayta kamacherqa payman Jehová atiyta qosqanrayku (Mat. 28:18-20). ¿Niñachu willankuman karqa enemigosninkuta manchachikuspa? Chayri, ¿mana manchachikuspachu willallarqankupuni? Apostolesqa Diostachus, runastachus kasukunankuta ajllananku karqa. Apóstol Pedrotaj mana manchachikuspa sutʼimanta tukuynin apostolespa sutinkupi parlarqa.
3 ¿Imaraykutaj apostolesmanta yachakuna tiyan? Imaraykuchus kay tiempopipis willanallanchejtaj tiyan, enemigosninchejtaj noqanchejtapis qhatiykachallawasunmantaj (Mat. 10:22). Enemigosninchejqa mana willanapaj tukuy imata ruwankuman chayri manapuni Jehovamanta willanata kamachiwasunman. Ajinapi rikukojtinchejqa apostolesmanta yachakuy mayta yanapawasunman. Paykunaqa mana manchachikuspa Jatun Juntaj ñaupaqenpi parlarqanku. a Ama willanankuta nishajtinkupis willallarqankupuni.
‘Jehovaj angelnin carcelpa punkusninta kicharerqa’ (Hechos 5:12-21a)
4, 5. ¿Imaraykú Caifaspis waj saduceospis “apostoleswan chhoqonakorqanku”?
4 Pasaj capitulopi yachakorqanchej jina, Jatun Juntamanta kajkuna ñaupaj kutirayku amaña willanankuta kamachejtinku, Pedrowan Juanwan kuticherqanku: “Mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hech. 4:20). Chay qhepata, ¿imataj karqa? Tukuynin apóstoles watejmanta templopi willayta qallarerqanku, astawanqa “Salomonpa Corredornin” nisqapi. Chay lugarqa techoyoj karqa, inti llojsimuy ladopitaj kasharqa. Chaypeqa ashkha judíos tantakoj kanku. Apostolesqa chay lugarpi milagrosta ruwaspa onqosqasta sanoyacherqanku, runasmanta supaykunata qharqorqanku. Wakin runasqa Pedroj llanthun chayasqallanwansina sanoyaporqanku. Paykunamanta ashkhastaj sumaj willaykunata japʼikorqanku. Ajinamanta Señorpi creejkunaqa “astawan astawan yapakusharqanku ashkha qharis, warmis ima” (Hech. 5:12-15).
5 Caifaspis waj saduceospis “apostoleswan chhoqonakorqanku”, “apostolesta japʼispataj carcelman wisqʼaykucherqanku” (Hech. 5:17, 18). ¿Imajtintaj chayta ruwarqanku? Imajtinchus apostolesqa Jesús kausarimusqanta yachachisharqanku, paykunataj mana kausarimuypi creejchu kanku. Chantapis apostolesqa nej kanku Jesuspi creejkunalla salvakunankuta. Chayrayku saduceosqa manchikorqanku runas Jesusta kamachejninkuta jina qhawanankuta. Yuyarqankutaj romanos templonkuta, nacionninkutapis qhechunankuta (Juan 11:48). Chayraykuchá mana munarqankuchu apóstoles willanankuta.
6. 1) ¿Pikunataj Jehovaj kamachisninta qhatiykachachiwanchej? 2) ¿Imaraykutaj mana tʼukunachu tiyan chejnikuwasqanchejmanta?
6 Kay tiempopipis ashkha kutispi religionta kamachejkuna Jehovaj kamachisninta wajkunawan qhatiykachachiwanchej. Paykunaqa atiyninkumanta valekuspa autoridadeswan chayri noticiasta willajkunawan yanapachikunku willayninchejta sayachinankupaj. ¿Imaraykutaj mana tʼukunanchejchu tiyan paykuna chejnikuwasqanchejmanta, envidiakuwasqanchejmanta? Imaraykuchus willasqanchejrayku runasqa yachanku llullasta paykunaman religionninkupi yachachisqankuta. Chantá allin sonqoyoj kajkunaqa cheqa kajta japʼikuspa iglesiankupi yachachisqanku imaspi manaña creenkuchu, Bibliaj juchachasqan costumbrestapis manaña ruwankuchu (Juan 8:32).
7, 8. 1) ¿Imatataj apóstoles ruwarqanku uj ángel paykunata yanapajtin? 2) ¿Imata tapurikunanchejtaj allin kanman?
7 Apostolesqa juzgasqa kanankupaj carcelpi suyakushaspa, ichapis yuyarqanku enemigosninku chaypi wañuchinankuta (Mat. 24:9). Jinapis mana suyashajtillanku, chay tuta “Jehová Diospa angelnin carcelpa punkusninta kicharispa paykunata orqhomorqa” (Hech. 5:19). b Chay angeltaj paykunata kamacherqa: “Riychej temploman, chaypitaj runasman willamullaychejpuni”, nispa (Hech. 5:20). Chay angelpa nisqanqa paykunaman sutʼita reparacherqa cheqan kajta ruwashasqankuta, kallpacharqataj ima kajtinpis willanallankupajpuni. Apostolesqa sinchʼi creeyniyoj karqanku, nitaj manchachikorqankuchu. Paykunaqa “sutʼiyayta temploman yaykuspa yachachiyta qallarerqanku” (Hech. 5:21).
8 Allin kanman kayta tapurikunanchej: “Apóstoles jina qhatiykachasqa kayman chay, ¿sinchʼi creeyniyojchu kayman mana manchachikuspa willanallaypajpuni?”, nispa. ‘Diospa Gobiernonmanta allinta sutʼinchanapajqa’ ángeles yanapawanchej, chayta yuyarikuytaj mayta kallpachawanchej (Hech. 28:23; Apo. 14:6, 7).
“Diostapuni kamachejniykuta jina kasunayku tiyan runasta kasunaykumantaqa” (Hechos 5:21b-33)
“Pusamuspataj Jatun Juntaj ñaupaqenpi sayaykucherqanku” (Hechos 5:27).
9-11. 1) ¿Imatataj apóstoles ruwarqanku amaña willanankuta kamachejtinku? 2) ¿Imatataj apostolesmanta yachakusunman?
9 Caifaswan, Jatun Juntamanta waj jueceswanqa apostolesta castiganankupaj wakichisqa kasharqanku. Paykunaqa mana yacharqankuchu apóstoles niña carcelpichu kasqankuta, chayrayku guardiasta kacharqanku apamunankupaj. Guardiasqa nichá ni imanakuyta aterqankuchu apostolesta carcelpi mana tarispa. Jinapis ‘carcelqa sumaj wisqʼasqa’ kakusharqa, guardiaspis punkuta sumajta qhawasharqanku (Hech. 5:23). Temploj capitannenqa yacharqorqapacha apóstoles watejmanta templopi kashasqankuta. Apostolesqa Jesusmanta willasqankurayku presochasqa kaspapis, Jesusmanta willashallarqankupuni. Chantá temploj capitannenqa guardiasninwan rispa apostolesta watej presochamorqa Jatun Juntamantaj pusamorqa.
10 Kay capituloj qallariyninpi yachakorqanchej jina, religionta kamachejkunaqa may phiñasqas apostolesta nerqanku chay rato willayta saqenankuta. ¿Imatá apóstoles ruwarqanku? Apóstol Pedroqa tukuynin apostolespa sutinpi mana manchachikuspa kuticherqa: “Noqaykoqa Diostapuni kamachejniykuta jina kasunayku tiyan runasta kasunaykumantaqa”, nispa (Hech. 5:29). Tukuy cristianosqa apostolesmanta mayta yachakunchej. Noqanchejqa autoridadesta kasukunchejpuni, jinapis autoridadesqa mana atiyniyojchu kanku Diospa munayninta ama ruwanata kamachinawanchejpaj (Rom. 13:1). Chayrayku autoridades amaña willanata kamachiwajtinchej willallasunpuni, imaraykuchus Jehová chayta ruwanata kamachiwanchej. Noqanchejqa imaynallamantapis allin yuyaywan Diospa Gobiernonmanta allinta sutʼinchallasunpuni.
11 Juecesqa may phiñasqa kasharqanku apostoleswan, imaraykuchus apostolesqa mana manchachikuspa willasharqanku. Chayrayku juecesqa apostolesta ‘wañuchiytapuni munarqanku’ (Hech. 5:33). Apostolesqa yuyarqanku chaymanta wañusqallaña llojsinankuta, jinapis Jehovaqa may tʼukunatapuni paykunata yanaparqa.
“Mana chinkachiyta atinkichejchu” (Hechos 5:34-42)
12, 13. 1) ¿Imatá Gamaliel Jatun Juntamanta juecesman yuyaycharqa? ¿Imatá chay jueces ruwarqanku? 2) ¿Imaynatá Jehová llajtanta yanapayta atinman? 3) Sichus Jehová ‘cheqan runas kasqanchejrayku ñakʼarinanchejta’ saqen chay, ¿imamantataj mana iskayrayananchejchu tiyan?
12 Chantá Gamaliel c parlarqa, “payqa Leymanta yachachej karqa, tukuy runastaj payta allinpaj qhawaj kanku”, Jatun Juntamanta juecespis allinpaj qhawaj kanku. Payta maytapuni respetasqankuraykutaj, apostolesta “uj rato jawaman” orqhonankuta nejtin, chay rato kasorqanku (Hech. 5:34). Chantá Jatun Juntapi kajkunaman aswan ñaupajpi oqharikojkunamanta parlarqa, nerqataj chay oqharikojkunaj kamachejninku wañupojtin paykuna chinkapusqankuta. Chayrayku Gamalielqa nerqa suyarinallankuta, amataj apostolesta jarkʼanankuta, imaraykuchus kamachejninkoqa wañuporqaña. Gamalielqa kʼachallamanta paykunata yuyaycharqa: “Ama kay runasta imanaychejchu, kacharipuychej. Sichus chay yachachisqanku chayri chay ruwasqanku runasllamanta kashan chayqa, chinkaponqa. Diosmanta kashan chayrí, mana chinkachiyta atinkichejchu. Pajtataj qankunalla Diospa contranpi maqanakushaj rikhurishawajchej”, nispa (Hech. 5:38, 39). Jatun Juntamanta juecesqa Gamalielpa yuyaychasqanta japʼikorqanku, apostolesta “jasutʼichispataj, amaña Jesuspa sutinpi parlanankuta kamacherqanku” (Hech. 5:40).
13 Kunanpis Jehovaqa Gamaliel jina atiyniyoj runasmanta valekuspa llajtanta yanapallanmantaj (Pro. 21:1). Jehovaqa espíritu santonnejta kamachejkunajta, juecespata, leyesta churajkunajta sonqonkuta kuyurichinman, ajinamanta munaynin juntʼakunanpaj (Neh. 2:4-8). Jinapis wakin kutisqa ichá saqellanqa ‘cheqan runas kasqanchejrayku ñakʼarinanchejta’ (1 Ped. 3:14). Jina kajtenqa kay iskay imasmanta ama iskayrayanachu: Ñaupaj kaj, payqa kallpata qowasun aguantanapaj. Iskay kaj, enemigosninchejqa ni imata ruwayta atenqankuchu Jehovaj munaynin mana juntʼakunanpaj (Isa. 54:17; 1 Cor. 10:13).
14, 15. 1) ¿Imaynataj apóstoles kasharqanku jasutʼisqas kaspa? ¿Imaraykutaj ajina kasharqanku? 2) Ñakʼarichisqa kaspapis kusisqa kayta atisqanchejmanta uj experienciata willariy.
14 Apostolesqa jasutʼejtinkupis willallarqankupuni. Paykunaqa “Jatun Juntaj ñaupaqenmanta kusisqas riporqanku” (Hech. 5:41). Apostolesqa mana jasutʼichikusqankuraykuchu kusisqas kasharqanku, manachayqa Jehovaj nisqanta kasukushasqankurayku, Jesús jinataj ruwashasqankurayku (Mat. 5:11, 12).
15 Noqanchejpis ñaupa tiempomanta cristianos jinallataj, qhatiykachasqa kaspapis sumaj willaykunata willaspa mayta kusikunchej (1 Ped. 4:12-14). Mana kusikunchejchu manchachiyta munawajtinchej, millay imasta niwajtinchej, chayri carcelman wisqʼaykuwajtinchej, jinapis may kusisqas kanchej Jehovata kasukuspa. Hermanonchej Henryk Dornikmanta parlarina, paytaqa ashkha watasta sufricherqanku atiyninkumanta valekuspa munayninkuta ruwachej gobiernos. Paytawan hermanontawanqa agosto de 1944 watapi, autoridades uj carcelman aparqanku sinchʼita trabajachinankupaj. Paykunata qhatiykachajkunaqa nerqanku: “Paykunaqa ni imarayku nisqaykuta ruwankuchu. Creesqankurayku wañuchisqa kayta atisqankuta yachaspasina kusisqa kanku”, nispa. Hermanonchej Dorniktaj nerqa: “Noqaqa mana wañuyta munarqanichu. Jinapis ñakʼarichishawajtinku sinchʼita sayasqayrayku kusikorqani”, nispa (Sant. 1:2-4).
Apóstoles jinallataj “wasimanta wasi” willanchej.
16. 1) ¿Imastataj apóstoles ruwarqanku Diospa Gobiernonmanta allinta sutʼinchanankupaj? 2) Kay tiempopirí, ¿apóstoles jinallatajchu ruwanchej?
16 Apostolesqa chay ratopacha watejmanta willayta qallarerqanku. Paykunaqa ‘sapa día’ “mana saykʼuspa templopi, jinallataj wasimanta wasi rispa Cristo Jesusmanta sumaj willaykunata” mana manchachikuspa willasharqanku (Hech. 5:42). d Apostolesqa mana manchachikuspa ‘Diospa Gobiernonmanta allinta sutʼinchayta’ munarqanku. Biblia nin jinataj, paykunaqa runaspa wasisninkuman rerqanku, imaynatachus Jesús yachacherqa ajinata (Mat. 10:7, 11-14). Ajinata ruwasqankuraykuchá yachachisqankuwan Jerusalenman juntʼaykucherqanku. Kunanpis Jehovaj testigosnenqa apóstoles jina willasqanchejrayku may rejsisqa kanchej. Maypichus willanchej chaypi tukuy runasman Diospa Gobiernonmanta allinta sutʼinchanchej. Ajinamanta jallpʼantinpi tukuy runas sumaj willaykunata uyarinankupaj. Wasimanta wasi willasqanchejtataj Jehová bendecin. Kay tukukuy tiempopeqa may chhika runas Diospa Gobiernonmanta sumaj willaykunata japʼikunku. Paykunamanta ashkhastaj Jehovaj testigosnin wasinkuman risqanchejrayku ñaupaj kutirayku chay sumaj willayta uyarerqanku.
Wakin qharista ajllanku uj ‘ruwayman churanankupaj’ (Hechos 6:1-6)
17-19. ¿Ima llakiypitaj rikukorqanku mosoj congregacionmanta hermanos, chanta imaynatá apóstoles chayta allincharqanku?
17 Jerusalenmanta mosoj congregacionqa uj llakiypi rikukusharqa, hermanosqa tʼaqanakusharqanku. Yachakorqanchej jina, reciellanraj bautizakojkunamanta wakenqa, uj tiempitota Jerusalenpi quedakorqanku astawan yachakunankupaj. Jerusalenmanta hermanostaj qolqesitunkumanta tukuy sonqo qorqanku mikhunata, waj imastawan rantinankupaj (Hech. 2:44-46; 4:34-37). Jinapis uj chʼampay rikhurerqa. Hebreota parlaj viudasmanqa ‘sapa día mikhunata partisqankumanta’ jaywaj kanku, ‘griegota parlaj viudasmantaj mana jaywajchu’ kanku (Hech. 6:1). Ichapis chayqa ajina karqa wakillanta allinpaj qhawasqankurayku, wakintataj mana. Chaytaj mana allinchu, imaraykuchus chayqa tʼaqanakusta rikhurichinpuni.
18 Apostolesqa congregacionpi ashkha ruwanaswan kasharqanku, imaraykuchus hermanosqa astawan yapakushallarqankupuni. Chayrayku nerqanku: “Mana allinchu kanman Diospa palabranta saqerparispa mikhunataraj rakʼinaykoqa”, nispa (Hech. 6:2). Astawanpis hermanosta nerqanku qanchis qharista ajllanankuta, “pikunachus Diospa espiritunwan, yachaywantaj juntʼa kashanku chaykunata”. Ajinamanta apóstoles paykunata chay ruwayman churanankupaj (Hech. 6:3). Chay qanchis qharisqa de confianza kananku karqa. Imaraykuchus mana mikhunallatachu partinanku karqa, manaqa qolqeta apaykachananku karqa, necesitakusqan imasta rantinanku karqa, tukuy imatataj sumaj anotasqata japʼinanku karqa. Chay ajllasqa qharispa sutisninkutaj griego parlaypi karqa. Chayrayku ichapis griegota parlaj viudasqa paykunawan mana manchikuspa parlariyta atillankuman karqa. Apostolesqa Jehovamanta mañakuytawan, chay ajllasqa qharis imayna runaschus kasqankuta sumajta qhawariytawan, paykunata mikhunata partinankupaj churarqanku. e
19 Chay qanchis hermanos mikhunata partispa mayta llankʼashasqankurayku, ¿niñachu sumaj willaykunata willananku karqa? Mana. Paykunamanta ujnenqa Esteban karqa, paytaj mana manchachikuspa tukuy sonqo willarqa (Hech. 6:8-10). Paykunamanta ujnintaj Felipe karqa. Paymanta Biblia nin: “Sumaj willaykunata willaj”, nispa (Hech. 21:8). Arí, chay qanchis hermanosqa Diospa Gobiernonmanta sumaj willaykunata tukuy sonqo willallarqankupuni.
20. ¿Imastataj kay tiempopi apostolespa tiemponkupi jina ruwakun?
20 Kay tiempopipis congregacionesta ñaupajman apajkunata ajllakullantaj, chaytataj apostolespa tiemponkupi jina ruwakun. Pikunatachus ancianos chayri siervos ministeriales kanankupaj ajllakun chay hermanosqa Jehová jina yuyananku tiyan, kausayninkupitaj espíritu santoj poqoynin rikukunan tiyan. Chantá Diospa Llajtanta Kamachejkuna yuyaychasqankuman jina, Biblia nisqanman jina kausakoj hermanosta ancianos chayri siervos ministeriales kanankupaj churakun (1 Tim. 3:1-9, 12, 13). f Ancianos chayri siervos ministeriales imaynachus kanankoqa Bibliapi qhelqasqa kashan. Bibliataj espíritu santo yuyaychasqanman jina qhelqakorqa. Chayrayku ancianoswan siervos ministerialeswanqa espíritu santonejta churasqa kanku. Paykunaqa maytapuni llankʼanku, ashkha imastataj congregacionpi ruwanku. Ancianosqa ichapis qhawarinanku kanqa ashkha watastaña Jehovata kasukoj machitu hermanosta imaynasmantachus yanapanankuta (Sant. 1:27). Wakin ancianostaj mayta llankʼashanku Tantakuna Wasista ruwaypi, jatuchaj tantakuykunata wakichiypi, chantá Comités de Enlace con los Hospitales nisqapi. Siervos ministerialespis congregacionpi ashkha ruwaykunaswan yanapakunku, ajinamanta ancianos hermanosta waturikunankupaj, yachachinankupaj ima. Tukuy chay hermanosqa congregacionpi ruwanasninkuta juntʼananku tiyan, jinallataj Diospa llajtanmanta japʼisqanku ruwaykunatapis. Chay imasta ruwaspapis sumaj willaykunata willamullankutaj Dios kamachiwasqanchejman jina (1 Cor. 9:16).
“Diospa palabranqa tukuynejpi uyarikusharqa” (Hechos 6:7)
21, 22. ¿Imaraykutaj ninchej Jehová ñaupa tiempomanta mosoj congregacionta bendecisqanta?
21 Mosoj congregacionmanta hermanosqa Jehovaj yanapayninwan enemigosninku qhatiykachasqanta aguantarqanku, paykuna ukhupi tʼaqanakus rikhurisqantapis allincharqanku. Jehovaqa paykunata bendecisharqa, chayrayku Hechos 6:7 nin: “Diospa palabranqa tukuynejpi uyarikusharqa, Jerusalenpitaj creejkunaqa astawan astawan yapakushallarqankupuni, ashkha sacerdotespis creellarqankutaj”, nispa. Hechos libropeqa imaynatachus Jehová hermanosta bendecisqanmanta ashkhata parlan, kay versiculopi leerqanchej chay willaytaj chaykunamanta ujnillan kashan (Hech. 9:31; 12:24; 16:5; 19:20; 28:31). Kunanpis mayta kallpachallawanchejtaj, imaynatachus waj ladomanta hermanosninchejta predicacionpi Jehová bendecishasqanta yachay.
22 Jinapis ñaupa cristianosmanta parlarinallapuni. Religionta kamachejkunaqa, Diospa kamachisninman astawanraj churanakunkuman karqa. Ñaupa tiempomanta cristianosqa may sinchʼi qhatiykachayta aguantananku karqa. Qhepan capitulopi yachakusun jinataj, Estebanta maytapuni qhatiykacharqanku.
a “ Jatun Juntaqa judiospa jatun juzgadonku karqa” nisqa recuadrota leeriy.
b Hechos libropeqa 20 kutistapuni angelesmanta parlakun, kaypitaj ñaupaj kutirayku parlakushan. Ajinapis Hechos 1:10 versiculopiña “yuraj ropasniyoj” iskay runasmanta parlakun, paykunapis angelesllataj karqanku.
c “ Jatunpaj qhawasqa yachachej Gamaliel” nisqa recuadrota leeriy.
d “ ‘Wasimanta wasi’ willanku” nisqa recuadrota leeriy.
e ‘Chay ruwayqa’ mana ima ruway jinallachu karqa. Chay qanchis qharisqa Jehová imastachus ancianosmanta mañan chay imasta ichapis juntʼasharqankuña. Jinapis Bibliaqa mana willawanchejchu maykʼajmantapachachus congregacionespi ancianosta churakuyta qallarikusqanta.
f Apostolespa tiemponkupeqa wakin wakichisqa qharis atiyta japʼerqanku ancianosta churanankupaj (Hech. 14:23; 1 Tim. 5:22; Tito 1:5). Kunanpis Diospa Llajtanta Kamachejkunaqa congregacionesta waturej hermanosta churanku, congregacionespi ancianosta, siervos ministerialesta ima churanankupaj.
