1-3. 1) ¿Imatataj Pedro mosqoypi jina rikorqa? 2) ¿Imaraykutaj sumajta yachananchej tiyan Pedro mosqoypi jina rikusqan ima niytachus munasqanta?

 36 WATAPI Pedroqa Jope llajtapi kasharqa, payqa ashkha diasta quedakorqa Simonpa wasinpi. Simonqa mar qayllapi tiyakorqa, payqa suelata ruwaj. Judiosqa suelata ruwajkunata mana allinpajchu qhawaj kanku, nitaj paykunaj wasinkupi quedakuyta munankumanchu karqa. a Jinapis Pedroqa mana chay runas jinachu karqa. Jehovatajrí Pedroman entiendechiyta munarqa tukuyta uj rejllata pay qhawasqanta. Pedroqa Diosmanta mañakunanpaj terrazaman wicharerqa, Jehovataj chaypi uj imata payman yachacherqa.

² Pedroqa mañakushaspa mosqoypi jina uj imata rikorqa. Mayqen judiollapis chayta rikuspaqa millachikunman karqa. Cielomanta uj sábana jina uraykamusharqa, chay sabanapitaj Leyman jina chʼichipaj qhawasqa animales kasharqanku. Chayllapi Pedrota uj parlay nerqa chay animalesta wañuchispa mikhunanta. Pedrotaj mana mikhuyta munarqachu. Pay nerqa: “Ni jaykʼaj mikhorqanichu leyman jina mana mikhuna imastaqa, nitaj chʼichipaj qhawasqa imastapis”, nispa. Chay parlaytaj kinsa kutista nerqa: “Imastachus Dios llimphuchasqantaqa amaña chʼichi niychu”, nispa (Hech. 10:14-16). Pedroqa tʼukulla kasharqa imatachus rikusqanmanta, jinapis mana unaytachu ajina karqa.

 ³ Pedro mosqoypi jina imatachus rikusqantaqa sumajta entiendena tiyan. Ajinamanta yachakusun imaynatachus Jehová runasta qhawasqanta. Sichus Diospa Gobiernonmanta allinta sutʼinchayta munanchej chayqa, Jehová jinallataj runasta qhawananchej tiyan. ¿Imatataj yachakunchej Pedro mosqoypi jina rikusqanmanta? Chayta yachanapajqa imaschus chaypacha pasasqanmanta yachakuna.

4, 5. 1) ¿Pitaj karqa Cornelio? 2) ¿Imataj karqa Cornelio Diosmanta mañakushajtin?

⁴ Pedroqa mana yacharqachu imachus chay ñaupaj día Cesarea llajtapi kasqanta. Cesareaqa Jopemanta norte ladopi kasharqa, 50 kilometrospi jina. Chaypeqa “Diosta manchachikoj” runa tiyakorqa, paypis mosqoypi jina uj angelwan parlallarqataj. Chay runaqa Cornelio sutikorqa. Payqa romanospa ejercitonkupi centurión nisqa capitán karqa. b Chantapis payqa familianmanta sumaj uma karqa, imaraykuchus “Cornelioqa Diosta manchachikoj, tukuy familianpis Diosta yupaychaj”. Payqa mana judiochu karqa, nitaj judiospa yachachiyninkuta qhatejchu, chantapis mana circuncidasqachu karqa. Jinapis wajcha judiosmanta khuyakoj, imatachus necesitasqankuwan yanapaj, “Diosmantapis mayta mañakullajpuni” (Hech. 10:2).

⁵ Las tres de la tarde chayta Cornelio Diosmanta mañakushajtin, uj ángel mosqoypi jina nerqa: “Diosqa mañakusqaykita uyarisunki, wajchasta yanapasqaykitapis rikun”, nispa (Hech. 10:4). Chantá chay angelqa nerqa wakin  runasta apóstol Pedroman kachananta, Corneliotaj payta kasorqa. Cornelioqa mana judío kajkunamanta pay ñaupajta cristianoman tukorqa.

6, 7. 1) Dios mañakusqanchejta uyarisqanmanta uj experienciata willariy. 2) ¿Imatá yachakunchej chay jina experienciasmanta?

⁶ ¿Diosmanta yachakuyta munaspa tukuy sonqo mañakojkunata Dios uyarinchu? Arí, uyarinpuni. Ajina karqa Albaniamanta uj señorawan. Paytaqa uj hermana visitarerqa, Torremanta Qhawaj revistatataj jaywarerqa. Chay revistapi parlasharqa imaynatachus wawasta uywanamanta. c Chay señorataj hermanaman nerqa: “Má creewankimanchu. Kunitallan Diosmanta mañakusharqani warmi wawasniyta uywanaypaj yanapanawanta. Diospuni qantaqa kachamusunki. Kay revistaqa noqapaj jinapuni”, nispa. Chantá chay warmi, warmi wawasninpis Bibliamanta yachakuyta qallarerqanku, aswan qhepamantaj qosanpis yachakuyta qallarillarqataj.

⁷ ¿Wajkunaj mañakusqankutapis Dios uyarillantajchu? Arí. Chay jina experienciasqa ashkha tiyan mundo enteropi. Chaytaj mana jinallamantachu pasan. ¿Imatá chaymanta yachakunchej? Ñaupaj kaj, Jehovaqa payta tukuy sonqo maskʼajkunaj mañakusqankuta uyarin (1 Rey. 8:41-43; Sal. 65:2). Iskay kaj, willaypi ángeles yanapashawanchej (Apo. 14:6, 7).

8, 9. ¿Imatataj espíritu santo Pedroman willarqa, chanta imatataj pay ruwarqa?

⁸ Pedroqa terrazallapipuni kasharqa, tʼukullataj kasharqa mosqoypi jina rikusqanta entiendeyta munaspa. Jinallapi Cornelioj kachasqan runas chayman chayarqanku (Hech. 10:17). ¿Imatataj Pedro ruwanman karqa? Sichus pay Leyman jina chʼichipaj qhawasqa animalesllatapis mana mikhuyta munarqachu chay, ¿rinmanchu karqa chay runaswan khuska? ¿Mana circuncidasqa runaj wasinmanpis yaykunmanchu karqa? Diosqa imatachus Pedro ruwananta munasqanta espíritu santonwan sutʼita reparacherqa. Diospa espiritonqa Pedrota nerqa: “Kinsa runas maskʼashasunku. Kunanqa sayarispa uraykuy, paykunawantaj mana iskayrayaspa rillay, imaraykuchus noqa paykunataqa kachamuni”, nispa (Hech. 10:19, 20). Pedrotaqa mosqoypi jina rikusqan yanaparqa espíritu santoj nisqanta kasukunanpaj.

⁹ Chantá chay runasqa Pedroman willarqanku Cornelio paykunata kachasqanta, nillarqankutaj Cornelioman uj ángel nisqanta chayta  ruwananta. Chayrayku Pedro “paykunata wasi ukhuman pasaykucherqa” (Hech. 10:23a). Pedroqa sutʼitachá reparasharqa imachus Diospa munaynin kasqanta. Chayrayku kasukorqa, chayman jinataj ruwarqa.

10. 1) ¿Imaynatá Jehová llajtanta ñaupajman pusashan? 2) ¿Imasta tapurikunanchejtaj allin kanman?

¹⁰ Kunanpis Jehovaqa llajtanman pisimanta pisi munayninta rejsichin (Pro. 4:18). Payqa espíritu santonnejta ‘allin kamachi yuyayniyojta’ ñaupajman pusashan (Mat. 24:45). Chayrayku wakin kutisqa, wakin versiculosta waj jinamantañataj entiendenchej, chayri Diospa llajtanpi wakin imasta waj jinamantañataj ruwanchej. Chayrayku tapurikuna: “Imapis waj jinamanta ruwakunanta nikojtin, ¿imatá ruwani? Dios espiritunnejta imatachus yuyaychasqanta, ¿tukuy sonqochu kasukuni?”, nispa.

11, 12. 1) ¿Imatataj Pedro ruwarqa Cesareaman chayaytawan? 2) ¿Imatataj Pedro yachakorqaña?

¹¹ Qʼayantintaj Pedroqa sayariytawan jisqʼon runaswan khuska Cesareaman kachaykukorqa. Paywan khuska risharqanku Cornelioj kachamusqan kinsa runas, Jopemanta sojta judío hermanospiwan (Hech. 11:12). Cesareapitaj Cornelioqa Pedrota suyasharqa, “wajyachimusqataj familiaresninta, munasqa amigosnintawan”. Paykunapis nillatajchá judioschu karqanku (Hech. 10:24). Pedroqa Cesareaman chayaytawan mana circuncidasqa runaj wasinman yaykorqa. Payqa nichá jaykʼajpis chayta ruwayta yuyallarqapischu. Pay nerqa: “Qankunaqa allinta yachankichej, leyman jinaqa uj judío mana waj llajtayoj runaman qayllaykuyta atinchu, nitaj parlapayaytapis. Diostajrí reparachiwan ama pitapis chʼichipaj qhawanayta”, nispa (Hech. 10:28). Chaypacha Pedro entienderqaña Dios mosqoypi jina rikuchisqanwan imatachus yachachiyta munasqanta. Diosqa mana nishallarqachu tukuy imatapis mikhuyta atisqallanta, manachayqa nishallarqataj ama pitapis chʼichipaj qhawananta, ni nacionesmanta kajkunatapis.

¹² Cornelioj wasinpeqa Pedrota mayta suyasharqanku. Chayrayku Cornelio nerqa: “Kunanqa tukuyniyku kaypi kashayku Diospa ñaupaqenpi, imastachus Jehová Dios kamachisorqa ninawaykuta, chay tukuy imasta uyarinaykupaj”, nispa (Hech. 10:33). ¿Imatataj ruwasunman ajinata yachakuyta munaj runasta tarispa? ¿Imatataj Pedro ruwarqa? Pay nerqa: “Kunanqa allinta reparani, Diosqa tukuy runasta uj rejllata qhawasqanta. Payqa allinpaj qhawan mayqen nacionllamantapis payta manchachikojta, allin kajtataj ruwajta”, nispa (Hech. 10:34, 35). Pedroqa yachakorqaña  Dios tukuy runasta uj rejllata qhawasqanta maymanta kajtinkupis, imayna rijchʼayniyoj kajtinkupis. Chayrayku Pedroqa paykunaman willarqa Jesuspa willasqanmanta, wañusqanmanta, kausarimusqanmanta ima.

13, 14. 1) ¿Imataj karqa Corneliowan, waj mana judío kajkunawan 36 watapi cristianosman tukusqankutawan? 2) ¿Imaraykutaj wajkunata mana rijchʼayninkuman jinachu juzgana?

¹³ “Pedro parlashajtillanraj” imachus ni jaykʼaj pasarqachu chay pasarqa. Chaypacha nacionesmanta kaj runasqa espíritu santota japʼerqanku (Hech. 10:44, 45). Bibliaqa chay kutimanta parlaspalla nin, wakin discípulos niraj bautizakushaspa espíritu santota japʼisqankuta. Pedrotaj repararqa chay mana circuncidasqa runasta Dios allinpaj qhawasqanta. Chayrayku “bautizachikunankuta kamacherqa” (Hech. 10:48). Ajinata Pedroqa Gobiernomanta kinsa kaj llavewan uj punkuta jina kicharerqa, chaytaj qhepa kaj llave karqa (Mat. 16:19). Cornelioj wasinmanta kajkuna Jesuspa discipulosninman tukusqankumantapacha, mayqen mana circuncidasqa kajllapis ajllasqa cristianoman tukuyta aterqa. Ajinata chay pʼunchay, 36 watapi, Dios judiosta allinpaj qhawasqan tiempo tukukaporqa (Dan. 9:24-27).

¹⁴ “Diosqa tukuyta uj rejllata qhawan”. Diospa Gobiernonmanta willajkunataj chayta yuyarikunchejpuni (Rom. 2:11). Chantapis Diosqa “munan tukuy laya runas salvakunankuta” (1 Tim. 2:4). Chayrayku ama jaykʼajpis runasta rijchʼayninkuman jina juzganachu. Diospa Gobiernonmanta allinta sutʼinchanapaj kamachisqa kanchej, chayrayku tukuy runasman willana imayna rijchʼayniyoj kajtinkupis, maymanta kajtinkupis, ima religionniyoj kajtinkupis.

15, 16. 1) ¿Imaraykutaj wakin judío cristianos Pedropaj rimarqanku? 2) ¿Imatataj Pedro paykunaman sutʼincharqa?

¹⁵ Pedroqa hermanosman maytachá willariyta munasharqa, mana circuncidasqa kajkunapis “Diospa palabranta japʼikusqankuta”. Chayrayku Pedroqa Jerusalenman rerqa, Jerusalenpi kajkunataj imachus pasasqanta yachasqankuñasina. Jerusalenman chayasqantawantaj “circuncisionta munajkunaqa payta rimarqanku”. Paykunaqa mayta rimaspa kasharqanku, Pedrotataj nerqanku: “Mana circuncidasqa runaspa wasinkuman yaykusqanki, paykunawantaj mikhusqanki”, nispa (Hech. 11:1-3). Paykunaqa mana nacionesmanta kajkuna Cristoj discipulosninman tukusqankumantachu phiñasqa kasharqanku. Astawanpis paykuna nisharqanku nacionesmanta kajkunata Jehová allinpaj qhawananpajqa, Moisespa Leyninta kasukunankupuni kasqanta, chayraykutaj circuncidakunanku kasqanta. Jesuspa discipulosninmanta ashkha judiosqa, Moisespa Leyninman jinallapuni ruwayta munasharqanku, mana chayta saqeyta atisharqankuchu.

¹⁶ Chanta, ¿imatataj Pedro nerqa? Hechos 11:4-16 nisqanman jina, Pedroqa tawa imasmanta parlarqa. Ajinamantataj rikucherqa imatachus ruwasqanqa Diospa munayninman jina kasqanta. Uj kaj, Pedroqa willarqa imatachus Dios mosqoypi jina rikuchisqanta (Hech.11:4-10). Iskay kaj, chantá willallarqataj espíritu santonejta imatachus Jehová payman kamachisqanta (Hech. 11:11, 12). Kinsa kaj, Pedro nillarqataj uj ángel Cornelioman rikhurisqanta (Hech 11:13, 14). Tawa kaj, Pedro willallarqataj nacionesmanta kajkuna espíritu santota japʼisqankuta (Hech 11:15, 16). Tukuchananpajtaj kay jinata tapurispa runasta tʼukuricherqa: “Sichus Diosqa Señor Jesucristopi creejkunaman qowarqanchej chay regalollatataj paykunamanpis qorqa chayqa, ¿pitaj noqa kasqani Diosta jarkʼanaypajri?”, nispa (Hech. 11:17).

17, 18. 1) Pedroj sutʼinchasqanta uyarispa, ¿imatataj judío cristianos ajllananku karqa? 2) ¿Imaraykutaj congregacionpi ujchasqa kay mana atikullanchu? 3) ¿Imasta tapurikunanchejtaj allin kanman?

¹⁷ Pedroj sutʼinchasqanta uyariytawan cristianoman tukoj judiosqa, imatachus ruwanankuta ajllananku karqa. ¿Paykuna saqenkumanchu karqa mana circuncidasqa kajkunata juzgayta? ¿Congregacionpipis japʼikunkumanchu karqa mana circuncidasqa kajkunamanta reciellanraj bautizasqa kajkunata? Biblia niwanchej: “Chayta uyarispa [apostoleswan hermanoswanqa] manaña imatapis nerqankuchu. Astawanqa Diosta jatuncharqanku, nerqankutaj: ‘Diosqa munan nacionesmanta kajkunapis  juchasninkumanta pesachikunankuta, ajinamanta kausayta japʼinankupaj’, nispa” (Hech. 11:18). Ajinata ruwasqankuraykutaj congregacionqa ujchasqallapuni karqa.

¹⁸ Kay tiempopipis ujchasqa kayqa mana atikullanchu. Jehovaj kamachisnenqa “tukuy nacionesmanta, tukuy ayllusmanta, tukuy laya runasmanta, tukuy parlaykunamantawan” kanchej. Chayrayku ashkha congregacionespi tiyan tukuynejmanta hermanos imaymana rijchʼayniyoj, imaymana culturasniyoj (Apo. 7:9). Chayrayku allin kanman kay imasta tapurikunanchej: “¿Wajkunamanta malta piensayta sonqoymanta orqhonichu? Kay mundomanta runasqa rijchʼayninkurayku, nacionninkurayku, idiomankurayku, culturankurayku mayta jatunchakunku, ¿noqarí kallpachakunichu mana paykuna jina hermanosniywan kanaypaj, congregacionpis ujchasqallapuni kananpaj yanapakunaypaj?”, nispa. Apóstol Pedroj pantaykusqanmanta yuyarikuna, nacionesmanta kajkuna bautizakusqankumanta aswan qhepaman, wakin hermanos jinallataj mana circuncidasqa kajkunamanta malta piensayta qallarerqa, paykunamantataj karunchakaporqa. Chayrayku Pabloqa Pedrota kʼamerqa (Gál. 2:11-14). Noqanchejpis sumajtapuni qhawarikuna ama wajkunamanta malta piensanapaj.

19. ¿Pikunamantaj Antioquiapi willayta qallarerqanku, chanta imataj karqa?

¹⁹ Imachus Diospa munaynin kasqanta yachaytawan, Jesuspa discipulosnenqa mana circuncidasqa kajkunaman willayta qallarerqanku. Aswan qhepaman Siriamanta Antioquiapi imachus kasqanta qhawarina. d Chay llajtapeqa ashkha judíos tiyakoj kanku, paykunataj mana circuncidasqa kajkunawan allinta kausakoj kanku. Chayrayku may allinpuni karqa chay llajtapi mana circuncidasqa kajkunaman willayta qallarinanku. Chay llajtapipunitaj wakin creejkunaqa griegota parlaj runasman, circuncidasqa kajkunaman, mana circuncidasqa kajkunamanpis willarqanku (Hech. 11:20). Jehovaj bendicionninwantaj “ashkha runas creerqanku” (Hech. 11:21).

20, 21. 1) ¿Imatataj Bernabé ruwarqa kʼumuykukoj sonqo kasqanrayku? 2) ¿Imaynatataj willayninchejpi Bernabé jina ruwasunman?

²⁰ ¿Pitaj yanapanman karqa Antioquiapi astawan yachakuyta munajkunata? Jerusalenmanta hermanosqa Bernabeta kacharqanku. Jinapis ashkha runas sumaj willaykunata uyariyta munarqanku. Chayrayku Bernabeqa mana sapallan willayta atinmanchu karqa. ¿Pitaj payta yanapanman  karqa? Bernabeqa Saulowan yanapachikorqa, pichus aswan qhepaman nacionesman apóstol jina kachasqa karqa chaywan (Hech. 9:15; Rom. 1:5). Bernabeqa mana yuyarqachu: “Saulo aswan sumaj yachachejmanpis tukushanman, mana paywan yanapachikuymanchu”, nispa. Astawanpis kʼumuykukoj sonqo karqa, yanapata necesitasqantataj reparakorqa. Chayrayku paypuni Tarsoman rerqa Saulota maskʼaj, chantá iskayninku uj watata Antioquiapi hermanosta kallpachaspa karqanku (Hech. 11:22-26a).

²¹ ¿Imaynatá willaypi rikuchisunman kʼumuykukoj sonqo kasqanchejta? Wakin kutis yanapata necesitasqanchejta reparakuspa. Tukuypis wakin imasta sumajta ruwanchej, wakin imaspitaj yanapata necesitanchej. Wakenqa mayllapipis kashaspa chayri wasimanta wasi sumajta predicanku. Jinapis mana revisitasta ruwayta atillankuchu, nitaj estudiosta qallariytapis. Sichus willayninchejpi wakin imasta mana ruwayta atillanchejchu chayqa, chayta ruwanapaj kallpachakuna, wajkunawantaj yanapachikuna. Ajinamanta aswan sumaj yachachejkuna kasun, aswan kusisqastaj kasun (1 Cor. 9:26).

22, 23. 1) ¿Imatá ruwarqanku Antioquiamanta hermanos purajmanta munanakusqankurayku? 2) ¿Imaynatá kay tiempopi cristianos Antioquiamanta hermanos jina ruwanchej?

²² Bibliaqa nillanpuni: “Chaymantapacha Antioquiamanta creejkunaqa Diospa munayninman jina cristianos sutiwan rejsisqa karqanku”, nispa (Hech. 11:26b). Chay sutitaqa Diospuni ajllarqa, chaytaj Cristoj yachachisqanta qhatejkunapaj jinapuni. Chanta, ¿mana circuncidasqa cristianoswan, judío cristianoswan munanakunkumanchu karqa? Chayta yachanapajqa 46 watapi yarqhay kasqanmanta parlarina. e Yarqhay wataspeqa wajcha runas astawan ñakʼarej kanku, imaraykuchus mana qolqenku, ni mikhunankupis jallchʼasqa kajchu. Ajinapisina rikukorqanku Judeapi tiyakoj ashkha judío cristianos. Antioquiamanta hermanostaj, nisunman judío kajkuna, mana judío kajkunapis, chayta yachaytawan tukuyninku “parlarikorqanku” hermanosman “yanapata apachinankupaj” (Hech. 11:29). Chayta ruwasqankupi sutʼita reparanchej hermanos tukuy sonqo munanakusqankuta.

²³ Kunanpis ajinallataj, wakin hermanosninchej yanapata necesitasqankuta yachaytawan, tukuy atisqanchejta ruwanchej paykunata yanaparinapaj, ima suyupi tiyakojtinkupis. Sinchʼi muyoj wayras, terremotos,  tsunamis, waj desastres ima kajtin, Sucursalta Kamachejkunaqa usqhayllata wakichinku Comités de Socorro nisqata, chay lugarespi tiyakoj hermanosta yanapanapaj. Ajinamanta rikuchinchej hermanos jina purajmanta munanakusqanchejta (Juan 13:34, 35; 1 Juan 3:17).

24. Pedro mosqoypi jina rikusqanmanta, ¿imatataj yachakunchej?

²⁴ Jopepi kashaspa Pedro mosqoypi jina rikusqanmantaqa tukuy cristianos mayta yachakusunman. Chay rikusqanmanta yachakunchej: Jehovaqa tukuyta uj rejllata qhawasqanta, tukuymantaj Gobiernonmanta allinta sutʼinchanata munasqanta. Chayrayku tukuy laya runasman willanapaj kallpachakuna, imayna rijchʼayniyoj kajtinkupis, maymanta kajtinkupis, qhapaj chayri wajcha kajtinkupis. Ajinamanta paykunapis sumaj willaykunata uyarinankupaj, japʼikunankupajtaj (Rom. 10:11-13).