CAPÍTULO 6
“Estebanqa Diospa jatun khuyakuyninwan, Diospa atiyninwantaj juntʼa” karqa
Esteban Jatun Juntaj ñaupaqenpi mana manchachikuspa parlasqanmanta yachakusun
Orqhosqa kashan Hechos 6:8–8:3 versiculosmanta
1-3. 1) ¿Imapitaj Esteban rikukorqa, chanta imaynataj pay kasharqa? 2) ¿Ima tapuykunamantaj kay capitulopi kutichisun?
ESTEBANQA Jatun Juntaj ñaupaqenpi sayasqa kasharqa. Chaytaj ichapis temploj qayllanpi karqa. Jatun Juntapeqa 71 jueces karqanku, paykunataj Estebanpa muyuyninpi tiyasqa kasharqanku, juzganankupaj wakichisqas. Paykunaqa atiyniyoj, autoridadniyojtaj karqanku. Casi tukuyninkutaj Estebanta chejnikorqanku. Paykunataqa kuraj kaj sacerdote Caifás wajyacherqa. Caifasqa Jatun Juntamanta kamachej karqa, chay Jatun Juntataj ñaupaj killasllapi Jesusta wañuchinankuta nerqa. Chayrayku, ¿paykunata Esteban manchachikunmanchu karqa?
2 Estebanqa mana paykunata manchachikorqachu. Chaytaj uyanpi sutʼi rikukorqa, “uyanqa uj angelpa uyanman” rijchʼakorqa (Hech. 6:15). Estebanpa uyanpeqa sutʼi rikukorqa ángeles jina mana manchachikusqan, sonqo tiyasqataj kasqan. Payta chejnikoj juecespis chayta sutʼita repararqanku. Chanta, ¿imaraykutaj Esteban sonqo tiyasqa kasharqa?
3 Chaypi tʼukureyqa mayta yanapawasun. Chanta, ¿imaraykutaj Estebanta Jatun Juntaman aparqanku? Niraj Jatun Juntaman apashajtinku, ¿imaynatataj Diosmanta willaj? ¿Imaynatataj pay jina ruwasunman?
Runasta “chʼajwacherqanku” (Hechos 6:8-15)
4, 5. 1) ¿Imayna sonqowantaj Esteban congregacionpi llankʼarqa? 2) ¿Imaraykutaj Biblia nin ‘Diospa atiyninwan juntʼa’ kasqanta?
4 Phishqa capitulopi yachakorqanchej jina, Estebanqa kʼumuykukoj sonqo karqa, mosoj congregacionpitaj mayta yanapakusharqa. Payqa mikhunata partinankupaj ajllasqa qanchis qharismanta ujnin karqa. Kʼumuykukoj sonqo kasqanraykutaj Jehovaqa apostolesman jina atiyta qorqa “jatuchaj tʼukuna imasta, milagrostawan” ruwananpaj. Chantapis Bibliaqa nillantaj Estebanqa “Diospa jatun khuyakuyninwan, Diospa atiyninwantaj juntʼa” kashasqanta (Hech. 6:8). Chaywan, ¿ima niytá munashan?
5 Estebanqa kʼacha kasqanrayku runaspa sonqonta suwaj. Payqa kʼachata parlasqanwan runaspa sonqonkumanpuni chayaj. Chayrayku runasqa reparaj kanku paypa parlasqanwan yanapachikuyta atisqankuta. Bibliaqa nin pay ‘Diospa atiyninwan juntʼa’ kasqanta. Payqa kʼumuykukoj sonqo kasqanrayku espíritu santo yanapananta saqerqa. Imastachus sumajta ruwayta yachasqanmanta mana jatunchakojchu, manachayqa Jehovallata jatunchaj, runasmantataj llakikoj. Chayraykuchá payta enemigonkupaj qhawarqanku.
6-8. 1) ¿Imasmantataj Estebanta enemigosnin tumparqanku, chanta imaraykutaj ajinata tumparqanku? 2) ¿Imaynatá yanapawasunman Estebanmanta yachakuy?
6 Ashkha runas “Estebanwan discutej rerqanku. Manataj atipayta aterqankuchu. Imaraykuchus Estebanqa yachaywan, espíritu santoj yanapayninwantaj parlasharqa”. a Paykunaqa ni imaynamanta rikuchiyta aterqankuchu cheqata parlashasqankuta. Chayrayku “pakayllamanta wakin runasta yachaykucherqanku” Estebanpa contranpi parlanankupaj. “Ajinata parlaspa chʼajwacherqanku runasta, kurajkunata, leymanta yachachejkunatawan”. Estebantataj a la fuerzalla Jatun Juntaman aparqanku (Hech. 6:9-12). Jatun Juntapitaj enemigosnenqa payta juchacharqanku Diospa contranta, Moisespa contranta sajrata rimasqanta nispa. ¿Imaraykutaj ajinata juchacharqanku?
7 Ñaupajtaqa Estebanta juchacharqanku Diospa contranta parlan nispa. Paykuna yuyasqankuman jina, Estebanqa ‘Diospa templonpa contranpi’ parlasharqa (Hech. 6:13). Chantá Estebanta juchachallarqankutaj Moisespa contranpi parlasqanta nispa. Paykuna nerqanku Estebanqa Moisespa Leyninpa contranta parlasqanta, Moisés paykunaman yachacherqa chay costumbrestapis cambiayta munasqanta. Chayta ruwaytaj paykunapajqa jatun jucha karqa, imaraykuchus chay tiempomanta judiosqa templota, Leypa tukuy ima nisqanta, paykunalla rikhuricherqanku chay costumbrestapis may jatunpaj qhawaj kanku. Paykuna nerqanku Estebanqa religionninkuman churanakushasqanta, chayrayku wañuchisqapuni kananta.
8 Kay tiempopipis, Diosta yupaychasqankuta nej runas Diospa kamachisninta imaymanasta nispa qhasillamanta tumpanku. Chay jina runasqa imaymanasmanta autoridadesta tanqanku Jehovaj testigosninta qhatiykachanankupaj. ¿Imatá ruwananchej kanman qhasillamanta tumpawajtinchej? Estebanpa kausayninmanta yachakuy mayta yanapawasun.
‘May Jatun Diosmanta’ mana manchachikuspa sutʼincharqa (Hechos 7:1-53)
9, 10. 1) ¿Imaraykutaj wakin runas ninku Estebanpa parlasqan mana allinchu kasqanta? 2) ¿Imamantataj Estebanta juchacharqanku?
9 Iskay parrafopi yachakorqanchej jina, Estebanta juchachashajtinku, uyanqa angelpa uyan jina tranquilo kasharqa. Chantá Caifás taporqa: “¿Chay nisqanku ciertochu?”, nispa (Hech. 7:1). Ajinata tapojtinku Estebanñataj parlayta qallarerqa, sumajtataj sutʼincharqa.
10 Wakin runasqa ninku Estebanpa parlasqan mana allinchu kasqanta. Paykuna nisqankuman jina, Estebanqa ashkhata parlaykorqa, jinapis mana rikuchiyta aterqachu mana juchayojchu kasqanta. Chay, ¿ajinapunichu? Mana. Astawanpis paymanta yachakunchej, sumaj willaykunamanta tapuwajtinchej sumajta sutʼinchanata (1 Ped. 3:15). Estebantaqa juchacharqanku Diospa contranta, Moisespa contranta parlasqanta nispa. Paykuna nerqanku Estebanqa Temploj contranta, Leypa contranta parlasqanta. Estebantaj juchachasqankuman kutichikunanpajqa kinsa tiemposmanta parlarqa. Sumajtataj sutʼincharqa Israelpi chay tiempospi imaschus kasqanta. Chay tiemposmanta parlarina.
11, 12. 1) ¿Imatataj Esteban Abrahanmanta nerqa? 2) ¿Imaraykutaj allin karqa Esteban Josemanta parlasqan?
11 Ñaupa tataspa tiemponku (Hech. 7:1-16). Estebanqa juchachasqankuman kutichikuyta qallarishaspa ñaupa tatanku Abrahanmanta parlarqa. Tukuy judiostaj Abrahanta jatunpaj qhawaj kanku. Chayrayku Estebanqa nerqa: “May Jatun Diosqa ñaupa tatanchej Abrahanman rikhurerqa Mesopotamiapi kashajtin”, nispa (Hech. 7:2). Chantapis nerqa Abrahanqa forastero jina Sumaj Jallpʼapi tiyakusqanta. Chay tiempopeqa mana karqachu templo, ni Moisespa Leyninpis. Chayrayku ni pi niyta atinmanchu karqa Jehovata sirvinapajqa templopuni chayri Leypuni necesitakusqanta.
12 Chantá Estebanqa Josemantañataj parlayta qallarerqa, imaraykuchus judiosqa paytapis jatunpaj qhawallajtaj kanku. Joseqa Abrahanpa mirayninmanta cheqan runa karqa. Estebantaj judiosta yuyaricherqa, Josetaqa hermanosnillantaj qhatiykachasqankuta, esclavota jinataj vendeykusqankuta. Chay hermanosnintaj Israel aylluspa ñaupa tatasninku karqanku. Jinapis Diosqa Josemanta valekorqa israelitas mana yarqhaymanta wañunankupaj. Estebanqa sumajta yacharqa Josewan Jesucristowan ashkha imaspi kikin kasqankuta. Jinapis mana chaymanta parlarqachu, ajinamanta Jatun Juntapi kajkuna payta uyarinallankupajpuni.
13. 1) ¿Imaraykutaj may allin karqa Esteban qhasillamanta tumpashasqankuta rikuchinanpaj Moisesmanta parlasqan? 2) Moisesmanta parlaspa, ¿imatataj sutʼita rikucherqa?
13 Moisespa tiempon (Hech. 7:17-43). Estebanqa ashkhata Moisesmanta parlarqa. Chaytaj may sumaj karqa imaraykuchus Jatun Juntamanta kajkunaqa casi tukuyninku saduceos karqanku. Paykunataj Moisespa qhelqasqan librosllapi creej kanku. Paykunaqa Esteban Moisespa contranta parlasqanta nerqanku. Jinapis Estebanqa Moisesmanta parlasqanwan sutʼita rikucherqa Moisesta, Leytapis jatunpaj qhawasqanta, qhasillamantataj tumpashasqankuta (Hech. 7:38). Chantapis nillarqataj Moisesta israelitas qhesachasqankuta, paykunata salvayta munashajtinpis. Israelitasqa Moisespa contranpi oqharikorqanku 40 watasniyoj kashajtin. Chaymanta 40 watasninmantaj watejmanta Moisespa contranpi oqharikullarqankutaj, chaytataj kutin kutita ruwarqanku. Ajinamanta Estebanqa pisimanta pisi sutʼita rikucherqa Diospa llajtan Jehovaj churasqan kamachejkunaj contranpi ashkha kutispi oqharikusqankuta. b
14. Esteban Moisesmanta parlaspa, ¿imastataj sutʼita rikucherqa?
14 Estebanqa payta uyarejkunaman yuyaricherqa imatachus Moisés nisqanta. Moisesqa nerqa Dios uj profetata sayarichinanta payta jina. ¿Pitaj chay profeta kanman karqa? ¿Imaynatataj payta japʼikunkuman karqa? Estebanqa manaraj chaymanta parlashaspa Moisesmanta parlallarqapuni. Pay nerqa laurashaj khishkarara sachʼita ukhumanta Jehová Moiseswan parlasqanta, chay lugartaj santoman tukusqanta. Ajinamanta Estebanqa sutʼita rikuchillarqataj ima lugarllapis santoman tukuyta atisqanta. Chayrayku, ¿munanmanchu karqa Jehová uj lugarllapi payta yupaychanata, Jerusalén templopi jina? Imatachus Esteban nisqanta qhawarina.
15, 16. 1) ¿Imaraykutaj Esteban yupaychana toldomanta parlarqa? 2) ¿Imaraykutaj Esteban Salomonpa templonmanta parlarqa?
15 Yupaychana toldo tiempo, templo karqa chay tiempo ima (Hech. 7:44-50). Estebanqa Jatun Juntapi kajkunata yuyaricherqa Jehová Moisesman kamachisqanta uj toldota ruwananta. Chaytataj kamacherqa manaraj templo kashajtin. Chay toldotaqa yupaychana toldo nispa rejsej kanku, apayta atinapaj jinallataj karqa. Jatun Juntamanta kajkunaqa mana niyta aterqankuchu yupaychana toldoqa templomanta nisqa aswan pisi kasqanta. Imaraykuchus kikin Moisespis chay toldopi Jehovata yupaycharqa.
16 Chaymanta Estebanqa parlarqa Salomón Jerusalén templota ruwachisqanmanta, templota Diosman jaywapushaspa Dios yuyaychasqanman jina mañakusqanmanta ima. Estebanqa Salomonpa palabrasninta oqharispa nerqa: “Aswan Patapi kaj Diostajrí mana runaj makinwan ruwasqa wasispichu tiyakun”, nispa (Hech. 7:48; 2 Cró. 6:18). Jehovaqa munayninta juntʼananpaj uj templomanta valekuyta atin, jinapis mana uj templotapunichu necesitan. Chayrayku Jehovata yupaychajkunaqa, mana yuyanankuchu karqa runaspa ruwasqanku templollapi Jehovata yupaychayta atisqankuta. Chaymanta parlayta tukuchananpajtaj Estebanqa profeta Isaiaspa qhelqasqanta oqharispa nerqa: “Jehová Diosqa nin: Cieloqa kamachina tiyanay, jallpʼataj chaki sarunay. ¿Ima laya wasitataj ruwapuwankichejri? Chayri, ¿maypitaj samarikunay cheqari? ¿Manachu tukuy kay imastaqa makisniywan ruwarqani?”, nispa (Hech. 7:49, 50; Isa. 66:1, 2).
17. 1) ¿Imaynatá Esteban rikucherqa payta qhasimanta tumpajkuna manchay sajras kasqankuta? 2) ¿Imaynatá Esteban rikucherqa mana juchayoj kasqanta?
17 Kaykama yachakorqanchej jina, Estebanqa sutʼita rikucherqa payta qhasillamanta tumpajkuna manchay sajras kasqankuta. Ajinamanta Estebanqa rikucherqa Jehovaqa mana nisqantapunichu valechisqanta, munayninta juntʼananpajtaj mana costumbresmantachu valekusqanta. Jehovaqa tiempo pasasqanman jina imachus necesitakusqanta cambian munayninta juntʼananpaj. Jatun Juntamanta kajkunapajqa Jerusalenpi kaj kʼachitu templonku may munasqa karqa, Moisespa Leyninman runaspa costumbresninkuta yapaykusqankupis. Jinapis paykunaqa mana repararqankuchu imaraykuchus Jehová paykunaman Leyta qosqanta, imaraykuchus templotapis ruwachisqanta. Esteban chaymanta parlaspa kaytapis paykunata tapushanman jina karqa: “¿Imatataj ruwana tiyan Leyta, templotapis jatunpaj qhawanapaj? ¿Manachu Jehovata kasukuna tiyan?”, nispa. Ajinamanta Estebanqa sutʼita rikucherqa mana ima sajratapis ruwasqanta, Jehovata kasukunanpajtaj kallpachakusqanta.
18. ¿Imaynatá Esteban jina ruwasunman?
18 Esteban sumajta sutʼinchasqanmanta, ¿imatá yachakunchej? Payqa Diospa Palabranta sumajta rejserqa. Noqanchejpis ‘cheqa kaj palabrata maychus kajta yachachiyta’ munanchej chayqa, Bibliata sumajta estudiananchej tiyan (2 Tim. 2:15). Estebanmanta yachakullanchejtaj runaswan kʼachallamanta parlarinata, mana sonqonkuta nanachispalla. Estebanqa willarqa may sajra, phiña runasman, jinapis unaysituta paykunawan parlarerqa imastachus kikinta yuyasqankumanta, imastachus jatunpaj qhawasqankumanta ima. Chantapis kurajkunata jatunpaj qhawaspa parlarqa, nerqataj: “Tatasníy”, nispa (Hech. 7:2). Noqanchejpis Diospa Palabranmanta cheqa kajta willashaspa “llampʼu sonqowan” parlariyta munanchej, ‘sonqomantapacha respetaspataj’ (1 Ped. 3:15).
19. ¿Imatataj Esteban mana manchachikuspa nerqa?
19 Imatachus Biblia nisqantaqa runasman willananchejpuni tiyan, ama manchachikunachu paykuna phiñakunankuta. Chantapis Jehovaj juicio pʼunchayninmanta mana manchachikuspa tukuy imata willana tiyan. Estebanpis ajinatapuni ruwarqa. Payqa ichá repararqa chay tukuy imasta sutʼinchajtinpis, payta uyarisharqanku chay jueces yuyayninkuta mana cambianankuta. Chantá Estebanqa espíritu santoj yanapayninwan parlayta tukuchashaspa nerqa, ñaupa tatasninku jinallataj ruwashasqankuta, pikunachus Joseta, Moisesta, tukuy profetastapis qhesacharqanku chaykuna jina (Hech. 7:51-53). Arí, Jatun Juntamanta kajkunaqa Mesiasta wañucherqanku, pimantachus Moisés, tukuy profetaspis willarqanku chayta. Chayta ruwaspataj Diospa Leyninta pʼakerqanku.
“Señor Jesús, makisniykipi kausayniyta saqepuni” (Hechos 7:54–8:3)
“Paykunaqa chayta uyarispa Estebanpaj sinchʼita phiñakorqanku, payta qhawarispataj kirusninkuta kʼaruracherqanku” (Hechos 7:54).
20, 21. 1) Jatun Juntamanta kajkuna Estebanpa nisqan cheqa kasqanta yachaspa, ¿imatataj ruwarqanku? 2) ¿Imaynatá Jehová Estebanman mana manchachikunanpaj kallpata qorqa?
20 Juecesqa mana niyta aterqankuchu Estebanpa nisqan llulla kasqanta, chayrayku maytapuni phiñarikorqanku, kirusninkuta kʼarurakorqanku, rabiawantaj atipachikorqanku. Estebanqa sutʼitachá repararqa imachus paywan kananta. Payqa Señornin Jesús jinallataj ñakʼarichisqa, wañuchisqa ima kanan karqa.
21 Estebanqa mosqoypi jina rikorqa Diospa jatun kayninta, Jesustapis Diospa pañanpi sayashajta. Chaytaj Estebanman kallpata qorqa mana manchachikunanpaj. Chaytaqa Jehová payta munakusqanraykulla rikuyta aterqa. Chaymantataj Estebanqa imatachus mosqoypi jina rikusqanta juecesman willarqa. Paykunataj mana uyariyta munaspa ninrisninkuta tapaykukorqanku. ¿Imayrayku? Imaraykuchus Jesusqa aswan ñaupajtaña paykunallamantaj nerqa pay Mesías kasqanta, pisimantawantaj Tatanpa paña ladonpi kananta (Mar. 14:62). Esteban imatachus mosqoypi jina rikusqanqa sutʼita rikucherqa Jesús imatachus nisqanqa cheqapuni kasqanta. Chay Jatun Juntamanta juecesqa Mesiasta wasancharqanku, wañucherqankutaj. Chayrayku juecesqa Estebanta aparqanku rumiswan chʼanqaykuspa wañuchinankupaj. c
22, 23. 1) ¿Imaynataj Esteban kasharqa wañuchisqa kashaspa? 2) ¿Imaraykutaj Esteban jina Jehovapi atienekusunman?
22 Estebanqa wañuchisqa kashaspa Señornin jinallataj sonqo tiyasqa kasharqa, chantapis Jehovapi atienekorqa, payta wañuchejkunatapis perdonarqa. Payqa ichapis mosqoypi jina Jesusta Tatanpa ladonpi sayashajta rikushallarqapuni, ichapis chayrayku niraj wañupushaspa kayta nerqa: “Señor Jesús, makisniykipi kausayniyta saqepuni”, nispa. Estebanqa sumajta yacharqa Cristo kayta nisqanta: “Noqa kani kausarimuy, kausaytaj”, nispa (Juan 11:25). Chantá Estebanqa mañakushaspa sinchʼita qhaparerqa: “Jehová Diosníy, ama kay juchata ruwasqankumanta paykunata castigaychu”, nispa. Chayta niytawantaj wañuporqa (Hech. 7:59, 60).
23 Yachakusqanman jina, Jesuspa discipulosninta qhatiykachajkunaqa, discípulos ukhumanta Estebanta ñaupajta wañucherqanku (“ Estebanqa Jesuspa testigon kasqanrayku wañorqa” nisqa recuadrota leeriy). Jinapis mana payllatachu wañucherqanku. Watas pasasqanman jinaqa, religionta kamachejkuna, munaynillankuta ruwachiyta munaj gobiernos, waj may sajra enemigospis Jehovata kasukoj runasta wañuchillarqankutaj. Jinapis Esteban jinallataj Jehovapi atienekuyta atillanchejpuni. Jesusqa Reyña, Jehovataj tukuy atiyta payman qorqa. Chayrayku Jesusqa payta qhatejkunata kausarichimonqapuni (Juan 5:28, 29).
24. 1) ¿Imatataj Saulo ruwarqa Estebanta wañuchishajtinku? 2) ¿Imaynatá Estebanpa wañuynin wajkunata yanaparqa?
24 Estebanta rumiswan chʼanqaspa wañuchishajtinku, chaypi kasharqa Saulo sutiyoj joven. Payqa Estebanta wañuchisqankuta allinpaj qhawarqa. Chaymanta qhepatataj Sauloqa congregacionta manchayta qhatiykachayta qallarerqa. Estebanpa wañuynintaj tiempowan waj cristianostapis yanapallarqataj. Paykunaman kallpata qorqa wañupunankukama Diosta kasukunankupaj, chantapis Saulota yanapallarqataj. Payqa aswan qhepaman Pablo sutiwan astawan rejsisqa karqa. Sauloqa sonqomantapacha pesachikorqa Estebanta wañuchiypi yanapakusqanmanta (Hech. 22:20). Pay kikillantaj nerqa: “Ñaupajtaqa Diospa contranpi sajrata rimaj kani, llajtanta qhatiykachaj kani, machu machu runataj karqani”, nispa (1 Tim. 1:13). Sauloqa nipunichá qonqakorqachu Estebanmanta, imatachus nisqanmantapis. Payqa aswan qhepaman discursosninpi, cartasninpi ima, imasmantachus Esteban parlarqa chay imasllamantataj parlarqa (Hech. 7:48; 17:24; Heb. 9:24). Sauloqa tiempowan Esteban jinallataj ruwarqa, pichus mana manchachikoj runa karqa “Diospa jatun khuyakuyninwan, Diospa atiyninwantaj juntʼa” karqa chay jina. Chayrayku allin kanman kaypi piensarinanchej: “¿Noqapis atiymanchu Esteban jina ruwayta?”.
a Chay runasmanta wakenqa “kacharisqas nisqa grupomanta” karqanku. Paykunaqa ichapis karqanku Romaj atiyninmanta kacharichisqa judíos chayri kacharichisqa esclavos, pikunachus judiospa yachachiyninta qhatej kanku chaykuna. Wakin runastaj karqanku Ciliciamanta, nisunman Sauloj llajtan Tarsomanta. Jinapis Bibliaqa mana ninchu Estebanwan discutej rerqanku chay runaswanchus manachus Saulo kashasqanta.
b Estebanta qhasimanta tumpashajtinku payqa Moisesmanta parlarqa, willarqataj imatachus Moisés Egiptopi estudiasqanta, mashkha watayojchus Egiptomanta ayqekusqanta, mashkha tiempotachus Madianpi tiyakusqantapis. Chay imastataj Bibliamanta waj librospi mana tarisunmanchu.
c Roma nacionpa leyesninman jina, Jatun Juntamanta kajkunaqa manasina niyta atejchu kanku uj runa wañuchisqa kananta (Juan 18:31). Ajina kajtinpis chayri manapis, Estebantaqa manchay phiña runas rabiawan atipachikuspa wañucherqanku, manataj uj juzgadochu nerqa Esteban juchayoj kasqanta wañuchisqa kananpaj.
