CAPÍTULO 8
Creejkunaqa “qhatiykachasqa kasqankumanta samarerqanku”
Sauloqa cristianosta qhatiykacharqa, aswan qhepatataj Diosmanta tukuy sonqo willarqa
Orqhosqa kashan Hechos 9:1-43 versiculosmanta
1, 2. ¿Ima yuyaywantaj Saulo Damascoman rerqa?
UJ MASHKHA runas Damasco llajtaman chayarqanku. Paykunaqa sajra sonqowan Jesuspa discipulosninta maskʼaj rerqanku wasisninkumanta qhatataspa orqhomunankupaj, kʼumuykachachinankupaj, wataykusqasta Jerusalenman apanankupaj, chaypitaj Jatun Juntamanta kajkuna paykunata jasutʼinankupaj.
2 Chay sajra sonqoyoj runaspa cabecillankoqa Saulo karqa. a Payqa uj runa wañusqanmanta juchayojña karqa, imaraykuchus chay ñaupajllata may kusiywan qhawarqa wakin judíos Cristoj discipulon Estebanta rumiswan chʼanqaspa wañuchisqankuta (Hech. 7:57–8:1). Aswan qhepatataj, Jerusalenpi tiyakoj creejkunata sinchʼita qhatiykachayta qallarerqa. Sauloqa mana chaywan contentochu kasqanrayku, “Señorpa Ñanninpi kajkunata” maskʼamorqa paykunata chinkarpachinanpaj. Pay yuyarqa chay religión mana allinchu kasqanta (Hech. 9:1, 2; kay “ Sauloqa Damascopi atiyniyoj karqa” nisqa recuadrota leeriy).
3, 4. 1) ¿Imataj Saulota pasarqa? 2) ¿Ima tapuykunamantaj kay capitulopi kutichisun?
3 Ujllata Sauloj muyuyninpi uj kʼanchay lliphipirerqa, paywan kajkunataj chay kʼanchayta rikullarqankutaj, manchariywantaj ni parlarillaytapis aterqankuchu. Saulotaj pampaman urmarqa, ciegotaj qhepakorqa. Chantá cielomanta uj parlayta uyarerqa nimojta: “Saulo, Saulo, ¿imaraykutaj qhatiykachashawankiri?”, nispa. Saulotaj mancharisqa taporqa: “Señor, ¿pitaj kankiri?”, nispa. Saulomantaj kuticherqa: “Jesús kani, pitachus qhatiykachashanki chay”, nispa. Saulotaj chayta uyarispa nichá samayllatapis aterqachu (Hech. 9:3-5; 22:9).
4 ¿Imatá yachakunchej Jesús imatachus Sauloman nisqanmanta? ¿Imaynatá yanapawanchej Saulo imaynatachus Jesuspa discipulonman tukusqanmanta yachakuy? ¿Imatá ñaupa cristianos ruwarqanku, uj tiempota mana qhatiykachasqa kajtinku, chanta imatá chaymanta yachakunchej?
“¿Imaraykutaj qhatiykachashawankiri?” (Hechos 9:1-5)
5, 6. Jesús Saulota imatachus tapusqanmanta, ¿imatá yachakunchej?
5 Saulo Damascoman rishajtin, Jesusqa mana nerqachu: “¿Imaraykutaj discipulosniyta qhatiykachashankiri?”, nispa, manaqa taporqa: “¿Imaraykutaj qhatiykachashawankiri?”, nispa (Hech. 9:4). Arí, Jesuspa discipulosnin sufrinchej chayqa, Jesuspis sufrillantaj (Mat. 25:34-40, 45).
6 Sichus Diospi creesqanchejrayku sufrishanchej chayqa, ama qonqanachu Jesuswan Jehovawan chayta qhawamushasqankuta (Mat. 10:22, 28-31). Ichapis chay pruebaqa mana chay ratochu chinkanqa. Jesusqa rikorqa Saulo Estebanta wañuchiypi yanapakusqanta, Jerusalenmanta hermanostapis wasisninkumanta qhatataspa orqhomusqanta, jinapis chay imas pasananta saqellarqa (Hech. 8:3). Jehovaqa Cristonejta Estebanman, waj discipulosmanpis kallpata qorqa aguantanankupaj, ajinamanta payta kasukunallankupajpuni.
7. ¿Imastá ruwananchej tiyan qhatiykachayta aguantanapaj?
7 ¿Imastá ruwananchej tiyan qhatiykachayta aguantanapaj? Ñaupaj kaj, ima kajtinpis Jehovata kasukunallapuni. Iskay kaj, Jehovamanta yanapata mañakuna (Fili. 4:6, 7). Kinsa kaj, ama ima sajramantapis pagachikunachu, astawanqa Jehovaj makinman chayta saqepuna (Rom. 12:17-21). Tawa kaj, uj prueba tukukunankama aguantanapaj Jehová kallpata qonawanchejpi atienekuna (Fili. 4:12, 13).
“Saulo, hermanóy, [...] Señor Jesusmin kachamuwan” (Hechos 9:6-17)
8, 9. ¿Imaynataj Ananías kashanman karqa Jesús Saulowan parlamunanta nejtin?
8 Jesusqa Sauloj tapuyninman kutichiytawan nerqa: “Sayarispa llajtaman yaykuy, chaypi uj runa nisonqa imatachus ruwanaykita”, nispa (Hech. 9:6). Saulo ni imata rikuyta atisqanrayku makinmanta aysaspa Damasco llajtapi kaj alojamientoman pusarqanku. Chaypitaj Sauloqa kinsa diasta orakuspa, ayunaspataj kasharqa. Chaykamataj Jesusqa Ananiasman Saulomanta willarqa. Damascopi tiyakoj tukuy judiostaj Ananiasmanta “allinta parlaj kanku” (Hech. 22:12).
9 Ananiasqa kusisqachá, mancharisqatajchá kasharqa, imaraykuchus Jesús paywan parlarqa. Jesusqa wañusqas ukhumanta kausarimorqa, congregacionpa umantaj. Paytaj Ananiasta kamacherqa Saulowan parlamunanta. Chayqa may sumajpuni karqa. Ananiastaj mancharisqa kashasqanrayku nerqa: “Señor, ashkha runasmantaña uyarini chay runaqa Jerusalenpi kaj discipulosniykita anchata ñakʼarichisqanta. Kaymanpis jamun kuraj sacerdotesmanta ordenta qochikuspa, sutiykita tukuy oqharejkunata japʼichinanpaj”, nispa (Hech. 9:13, 14).
10. ¿Imayna runataj Jesús karqa?
10 Jesusqa mana Ananiasta kʼamerqachu chayta nisqanmanta, jinapis imatachus ruwananta sutʼita kamacherqa. Chantapis kʼachallamanta nerqa imaraykuchus Saulowan parlaj rinantapuni. Jesús nerqa: “Chay runataqa noqa ajllakuni noqamanta willananpaj nacionesman, reyesman, Israelpa wawasninmanpis. Noqaqa payman sutʼita rikuchisaj may jinatachus sutiyrayku ñakʼarinanta”, nispa (Hech. 9:15, 16). Ananiastaj chay rato Jesusta kasorqa, Saulowantaj parlaj rerqa, pichus hermanosta qhatiykacharqa chaywan. Ananiasqa Sauloman nerqa: “Saulo, hermanóy, ñanta jamushajtiyki rikhurisorqa chay Señor Jesusmin kachamuwan watejmanta rikuyta atinaykipaj, espíritu santowantaj juntʼasqa kanaykipaj”, nispa (Hech. 9:17).
11, 12. ¿Imatá yachakunchej Jesusmanta, Ananiasmanta, Saulomanta ima?
11 ¿Imatá yachakunchej Jesusmanta, Ananiasmanta, Saulomanta ima? Jesusqa nisqanman jinapuni willayta ñaupajman apashan (Mat. 28:20). Jesusqa kay tiempopi mana pi runawanpis parlanchu, jinapis allin kamachi yuyayniyojnejta willayta ñaupajman apashan. Jesusqa chay kamachita churarqa tukuy kamachisninta qhawananpaj (Mat. 24:45-47). Publicadoreswan precursoreswanqa Diospa Llajtanta Kamachejkunaj yanapayninwan Cristota sumajta rejsiyta munaj runasta maskʼamushanku. 7 capitulopi yachakorqanchej jina, paykunamanta ashkhasqa Jehovamanta yanapata mañakorqanku, Jehovaj testigosnintaj paykunata visitarqanku (Hech. 9:11).
12 Ananiasqa imatachus Jesús kamachisqanta kasukorqa, chayraykutaj Jehová payta bendicerqa. Noqanchejpis Jesusmanta allinta sutʼinchanallanchejtaj tiyan, ¿chay ruwayta manchachikojtinchejpis juntʼashanchejchu? Wakin hermanosqa mana rejsisqanku runaswan parlayta manchikunku, chayrayku mana wasimanta wasi willaj riyta atillankuchu. Wakin hermanostaj mana atillankuchu negociospi, callespi, telefononejta, chayri cartanejta willayta. Noqanchejpis manchachikullanchejtaj chayqa, Ananiasmanta mayta yachakusunman. Payqa manchachikuyninta atiparqa, Saulotataj yanaparqa espíritu santota japʼinanpaj. b Ananiasqa Jesús kamachisqanta maychus kajta juntʼarqa paypi atienekusqanrayku, Saulotataj hermanonta jinaña qhawasqanrayku. Noqanchejpis willayta mana manchachikunapajqa, Jesús willayta ñaupajman apashasqanpi atienekuna, runasta entiendenapaj kallpachakuna, runasqa manchay phiñasman rijchʼakojtinkupis ichá hermanosninchejman tukunkuman (Mat. 9:36).
“Willayta qallarerqa Jesusqa Diospa Wawanpuni kasqanta” (Hechos 9:18-30)
13, 14. Qanpis Bibliamanta yachakushanki chay, nirajtaj bautizasqachu kanki chayqa, ¿imatá Saulomanta yachakuwaj?
13 Sauloqa chay ratopacha yachakusqanman jina ruwayta qallarerqa. Payqa watejmanta qhawayta atiytawan bautizakorqa, Damascopi kaj discipuloswantaj tantakuyta qallarerqa. Chay ratopachataj “sinagogaspi willayta qallarerqa Jesusqa Diospa Wawanpuni kasqanta” (Hech. 9:20).
14 Qanpis Bibliamanta yachakushanki chay, nirajtaj bautizasqachu kanki chayqa, ¿imatá Saulomanta yachakuwaj? Imatachus yachakusqaykiman jina ruwanayki kasqanta. Sauloqa paypuni rikorqa Cristoj ujnin milagronta, chaytaj maytachá yanaparqa mana iskayrayaspa willananpaj. Waj runaspis Jesuspa milagrosninta rikullarqankutaj. Wakin fariseosqa rikorqanku Jesús makin chʼakisqa runata sanoyachisqanta. Ashkha judiostaj yacharqanku Jesús Lazarota kausarichisqanta. Jinapis paykunaqa mana Jesusta qhatiyta munarqankuchu, wakintaj payman churanakorqanku (Mar. 3:1-6; Juan 12:9, 10). Jinapis Sauloqa mana paykuna jinachu karqa, yachakusqanman jinataj cambiarqa. Payqa chayta ruwarqa Diosta manchachikusqanrayku, manataj runasta manchachikusqanraykuchu. Chantapis sonqomantapacha Cristota agradecekorqa payta khuyakusqanmanta (Fili. 3:8). Qanpis Saulo jina ruwanki chayqa, ima kajtinpis willallankipuni, bautizakunaykipajtaj wakichisqa kanki.
15, 16. 1) ¿Imatá Saulo sinagogaspi ruwarqa? 2) Damascomanta judíos, ¿imaynatá Sauloj willasqanta qhawarqanku?
15 Judiosqa maytachá tʼukorqanku Saulota sinagogaspi Jesusmanta willashajta rikuspa. Wakenqa tʼukulla kasharqanku, wakintaj phiñasqa kasharqanku. Chayrayku paykunapura tapunakusharqanku: “¿Manachu kay runaqa Jerusalenpi mayta qhatiykacharqa Jesuspa sutinta oqharejkunata?”, nispa (Hech. 9:21). Sauloqa imaraykuchus Jesuspi creesqanta sutʼinchananpaj judiosta mayta tʼukuricherqa, “sutʼita rikuchispa Jesusqa Cristopuni kasqanta” (Hech. 9:22). Uj imata sutʼita sutʼinchakojtinpis mana tukuypunichu chaypi creenku. Wakin runasqa costumbresninkurayku chayri jatunchakoj runas kasqankurayku manapuni yuyayninkuta cambiayta atinkuchu. Jinapis Sauloqa chay jina runasman willallarqapuni.
16 Chaymanta kinsa watasninman, Damascomanta judiosqa Sauloj contrallanpipuni kasharqanku, wañuchinankupajtaj yachachinakorqanku (Hech. 9:23; 2 Cor. 11:32, 33; Gál. 1:13-18). Saulotaj chayta yachaytawan pakayllamanta llajtamanta riporqa. Lucas nin jina, “discipulosnenqa Saulota tutan jatun canastapi llajta perqaj ventananta uraykucherqanku” (Hech. 9:25). Lucas Sauloj discipulosninmanta parlasqanqa, rikuchiwanchej Damascomanta wakin runasqa Sauloj willasqanta japʼikusqankuta, Cristoj discipulosninmantaj tukusqankuta.
17. 1) Bibliamanta yachachisqanchejta, ¿tukuychu japʼikunku? 2) ¿Imatataj ruwanallanchejpuni tiyan, chanta imaraykutaj?
17 Bibliamanta yachakusqaykita familiaresniykiman, amigosniykiman, chayri waj rejsisqasniykiman ñaupaj kutipi willarejtiyki, ichapis suyarqanki Bibliamanta cheqa kajta sutʼinchasqaykita japʼikunankuta. Ichapis wakenqa chayta japʼikorqanku, ashkhastaj mana. Ichapis familiaykimanta kajkunallataj enemigonkuta jina qhawasorqanku (Mat. 10:32-38). Ajina chayqa Bibliaj nisqanman jina kausakullaypuni, Bibliamanta paykunaman allinta sutʼinchanaykipajtaj kallpachakullaypuni. Ichapis paykunaqa chayta rikuspa cambiankuman (Hech. 17:2; 1 Ped. 2:12; 3:1, 2, 7).
18, 19. 1) Saulo Jesuspa discipulonmanpuni tukusqanta Bernabé apostolesman willajtin, ¿imataj karqa? 2) ¿Imaynatá Bernabé jina, Saulo jina ruwasunman?
18 Saulo Jerusalenman kutejtintaj, hermanosqa manapuni creerqankuchu Jesuspa discipulonman tukusqanta. Bernabetajrí apostolesman “allinta willarqa” Saulo Jesuspa discipulonmanpuni tukusqanta, chayrayku paykunaqa payta tukuy sonqo japʼikorqanku. Ajinamanta Sauloqa paykunawan uj tiempota qhepakorqa (Hech. 9:26-28). Sauloqa sajra runasmanta cuidakuspapis, sumaj willaykunata mana pʼenqakuspa willallarqapuni (Rom. 1:16). Jinapis payqa mana manchachikuspa Jerusalenpi willallarqapuni, maypichus Jesucristoj discipulosninta qhatiykachayta qallarerqa chaypi. Jerusalenmanta judiostaj paypaj may phiñasqas kasharqanku, manaña paykuna partechu kasqanrayku, chayrayku payta wañuchiyta munarqanku. “Chayta yachaspa hermanosqa Saulota Cesareaman pusarqanku, chaymantataj Tarsoman kacharqanku” (Hech. 9:30). Jesusqa hermanosmanta valekuspa Saulota nerqa imatachus ruwananta, paytaj kasukorqa. Chaytaj karqa Sauloj allinninpaj, hermanospaj allinninkupaj ima.
19 Biblia nisqanman jina, Bernabeqa Saulo yanapata necesitasqanta reparaspa yanaparerqapacha. Ajinata yanapasqanraykutaj paykunaqa sumaj amigosmanchá tukorqanku. Noqanchejrí, ¿imaynatá Bernabé jina ruwasunman? Mosoj publicadoresta yanaparispa. Ichapis paykunawan willaj risunman, Jehovawan sumaj amigos kanankupajtaj yanaparisunman. Chayta ruwajtinchejqa Jehová mayta bendeciwasunchej. Sichus mosoj publicadores kanchej chay, ¿imaynatá Saulo jina ruwasunman? Sumaj experienciayoj hermanoswan Saulo jina yanapachikusunman. Ajinamanta aswan sumajta willasunchej, aswan kusisqa kasunchej, chay hermanoswantaj wiñaypaj amigos kasunchej.
“Ashkha runastaj Señorpi creerqanku” (Hechos 9:31-43)
20, 21. ¿Imatataj ruwarqanku ñaupa tiempomanta cristianos, kay tiempomanta cristianospis ‘qhatiykachasqa kasqankumanta samarishaspa’?
20 ¿Imataj karqa Saulo Jesuspa discipulonman tukusqanmanta, Jerusalenmantataj ayqekusqanmanta qhepata? “Creejkunaqa tukuy Judeapi, Galileapi, Samariapi ima, qhatiykachasqa kasqankumanta samarerqanku” (Hech. 9:31). ¿Imatataj paykuna chay tiempopi ruwarqanku? (2 Tim. 4:2). Bibliaqa niwanchej hermanospa creeyninku astawan sinchʼiyasqanta. “Paykunaqa Jehová Diosta manchachikuspa kausakusharqanku, espíritu santomanta kallpata japʼisqankuman jinataj”. Tukuy chaytaj karqa apostoleswan, waj ñaupajman apaj hermanospiwan discipulospa creeyninkuta sinchʼiyachishasqankurayku, Diosmanta willaytataj ñaupajman apaspa sumajta ruwashasqankurayku. Pedroqa Sarón pampapi kaj Lida llajtapi tiyakoj hermanosta kallpachaj rerqa. Pedro chayta ruwasqanrayku chay llajta qayllasmanta ashkha runasqa “Señorman kutirikorqanku” (Hech. 9:32-35). Discipulosqa mana paykunaj ruwanasnillankutachu ruwarqanku. Paykunaqa purajmanta yanapanakuspa, sumaj willaykunatataj willaspa karqanku. Chayrayku creejkunaqa “astawan yapakusharqanku”.
21 1990 watas chaynejta, ashkha suyusmanta Jehovaj testigosnenqa “qhatiykachasqa kasqankumanta samarerqanku”. Chaypacha Diospa llajtanta ñakʼarichej gobiernosqa kaymanta jinalla chinkaporqanku. Chayrayku chay lugarespi Jehovamanta willajta saqellawarqanchejña chayri manaña ñaupajta jinapunichu prohibiwarqanchej. May chhika hermanosninchejtaj tukuynejpi sumaj willaykunata willarqanku. Chayta ruwasqankuraykutaj, may chhika runas chay willayta uyarerqanku.
22. Willajta saqewasqanchejta, ¿imaynatá aprovechasunman?
22 Ima suyupichus tiyakunchej chaypi Diosta yupaychajta saqellawanchej chay, ¿sumajtachu chayta aprovechashanchej? Satanasqa mayta munarishan Jehovata sirvinamanta nisqa kapuyniyoj kayllata maskʼananchejta (Mat. 13:22). Ama Satanaspa munasqanta ruwanachu. Astawanpis autoridades willajta saqeshawasqanchejta aprovechana Diospa Gobiernonmanta allinta sutʼinchanapaj, congregacionmanta hermanostataj kallpachanapaj, imaraykuchus kausayqa ujllata cambianman.
23, 24. 1) Biblia Tabitamanta parlasqanmanta, ¿imastá yachakunchej? 2) ¿Imatataj ruwanallapuni tiyan?
23 Tabitamantañataj parlarina, paytaqa Dorcas sutiwan rejsikullantaj. Payqa Diosta yupaychaj warmi karqa, Jope llajtapitaj tiyakorqa. Jopeqa Lida llajtamanta mana karupichu kasharqa. Payqa tiemponta, kapuynintapis mana usuchejchu. Imaraykuchus “ashkha allin ruwanasta ruwaj, wajchastapis mayta yanapaj”. Jinapis ujllata onqoykuspa wañuporqa. c Chayrayku Jope llajtamanta hermanosqa may llakisqaschá kasharqanku, astawanraj pikunatachus yanaparqa chay viudas. Tabitaj cuerpontaqa pʼampanankupaj wakichisharqanku, Pedrotaj chayman chayaytawan maypichus wakichisharqanku chayman yaykorqa. Chantá Diosmanta mañakuytawan uj milagrota ruwaspa Tabitata kausaricherqa. Chay jina milagrotataj niraj mayqen apostolpis ruwarqachu. Chantá Pedroqa viudasta, waj hermanosta ima chay cuartoman pasaykucherqa, Tabitatataj kausashajta paykunaman rikucherqa. Hermanosqa may kusisqaspunichá kasharqanku Tabitata kausashajta rikuspa. Pedro chay milagrota ruwasqantaj aswan qhepaman llakiykunata atipanankupaj yanaparqa. Tabita kausarichisqa kasqanqa “tukuy Jope llajtapi yachakorqa, ashkha runastaj Señorpi creerqanku” (Hech. 9:36-42).
¿Imaynatá Tabita jina ruwasunman?
24 Biblia Tabitamanta parlasqanmantaqa iskay imasta yachakusunman. Ñaupaj kaj, kausayninchejqa mana rantisqachu, ima ratopis chinkaripullanman, chayrayku sumajta aprovechana, Diospa ñaupaqenpi allinpaj qhawasqa kanapajtaj kallpachakuna (Ecl. 7:1). Iskay kaj, Jehová wañusqasta kausarichimunanpi tukuy sonqo atienekuna. Jehovaqa mana qonqaporqachu Tabita may kʼacha kasqanta, chayman jinataj payta bendicerqa. Noqanchej imastachus payta sirvinapaj ruwasqanchejtapis manallataj qonqaponqachu. Niraj Armagedón chamushajtin wañupusun chaypis kausarichimuwasunchej (Heb. 6:10). Chayrayku “mana allin tiempopipis” chayri ‘qhatiykachasqa kasqanchejmanta samarishaspapis’, ni jaykʼaj saqespa Cristomanta allinta sutʼinchanallapuni (2 Tim. 4:2).
a “ Saulo fariseo kashajtin” nisqa recuadrota leeriy.
b Ashkha kutispi apostoleslla espíritu santota wajkunaman qoyta atej kanku. Jinapis chay kutipeqa, ichá Jesús Ananiasman atiyta qorqa Sauloman espíritu santota qonanpaj. Sauloqa unayta mana tinkorqachu 12 apostoleswan, jinapis chay tiempopi Jesusmanta willasharqa. Jesusqa Sauloman necesitasqan atiyta qorqa willayninta juntʼayta atinanpaj.
c “ Tabitaqa ‘ashkha allin ruwanasta ruwaj’” nisqa recuadrota leeriy.
