1, 2. 1) ¿Imapitaj Pablo rikukorqa? 2) Pablo César juzgananta mañakusqanrayku, ¿ima tapuykunataj rikhurin?

 PABLO Cesareapi kaj carcelpi wisqʼasqa kashajtin, soldados sumajta payta qhawasharqanku. Iskay wata ñaupajta Judeaman kutisqantawan, judiosqa kinsa kutispi casi Pablota wañucherqanku, chaytaj uj mashkha diasllapi pasarqa (Hech. 21:27-36; 23:10, 12-15, 27). Judiosqa chay kutipi Pablota mana wañuchiyta aterqankuchu, jinapis siga wañuchiyta munashallarqankupuni. Pabloqa kamachej Festo Jerusalenman watejmanta kutichiyta munasqanta reparaspa, payman nerqa: “César juzganawanta munani”, nispa (Hech. 25:11).

² ¿Imaynatá Jehová qhawarqa Pablo chayta nisqanta? ¿Allinchu karqa Romata kamachej juzgananta mañakusqan? Chayta yachayqa mayta yanapawasun kay tukukuy tiempopi Diospa Gobiernonmanta allinta sutʼinchanallapajpuni. ¿Pablo jinallatajchu ‘leymanta valekuspa, sumaj willaykunata’ willamunanchej tiyan? (Fili. 1:7).

3, 4. 1) ¿Imaraykutaj judíos Festomanta mañakorqanku Pablota Jerusalenman pusachinanta? 2) ¿Imaynapitaj Pablo wañuchisqa kaymanta ujtawan librakullarqataj? 3) ¿Imaynatá Jehová Pablota jina kallpachallawanchejtaj?

³ Festoqa kamachiyta qallarisqanmanta kinsa diasninman Jerusalenman rerqa. a Jerusalenpi kashajtintaj kuraj sacerdoteswan, jatunpaj qhawasqa judioswan llullakuspa nerqanku Pablo jatuchaj juchasta ruwasqanta. Chayta nerqanku imaraykuchus paykuna yacharqanku Festo paykunawan allinyakoj chayman risqanta, jinallataj tukuy judioswanpis allinpi kausakuyta maskʼasqanta. Chaymanta aprovechakuspa paykuna Festomanta mañakorqanku Pablota Cesareamanta Jerusalenman pusachinanta, chaypi juzgasqa kananpaj. Jinapis paykunaqa yuyasharqanku Pablota ñanpi wañuchiyta. Festotaj mana pusachinanta nerqa, chantapis nillarqataj: “Chay runa juchayojpuni  chayqa, qankuna ukhumanta kurajkuna, noqawan khuska rispa jaqaypi uyanchamuchunku”, nispa (Hech. 25:5). Ajinapi Pabloqa wañuchisqa kaymanta ujtawan librakullarqataj.

⁴ Pablo ajina llakiykunapi kashajtin, Jehovaqa Jesucristonejta payta kallpacharqa. Uj kuti mosqoypi jina Jesús payman nerqa: “¡Kallpachakuy!”, nispa (Hech. 23:11). Kunanpis Diospa kamachisnenqa llakiykunapi rikukunchej, runastaj noqanchejman churanakuwanchej. Jehovataj mana chaykunamanta librawanchejchu, jinapis yachayta, kallpata ima qowanchej aguantanapaj. Arí, may munakuyniyoj Tatanchej Jehovaqa ‘sumaj atiyta’ qowasunpuni. Chaytaqa ama qonqanachu (2 Cor. 4:7).

5. ¿Imaynatá Festo Pablota juzgarqa?

⁵ Festoqa uj mashkha diasninman, Cesareapiña kashaspa “juzgana tiyanapi ” tiyaykukorqa. b Paypa ñaupaqenpitaj kasharqanku Pablo, payta tumpaykoj judíos ima. Pabloqa qhasillamanta tumpaykusqankuta uyariytawan nerqa: “Noqaqa mana ima juchatapis ruwanichu judiospa Leyninkoj contranta, nitaj temploj contranta, nillataj Cesarpa contrantapis”, nispa. Pabloqa mana ima juchayojpischu karqa, chayraykutaj kacharipunanku karqa.  Chanta, ¿ima nerqataj kamachej Festo? Payqa judioswan allinpaj qhawachikuyta munaspa Pablota taporqa: “¿Munawajchu Jerusalenman riyta, chaypitaj kay imasmanta ñaupaqeypi juzgasqa kayta?”, nispa (Hech. 25:6-9). Chayta nisqanqa nipuni allinchu karqa. Pablotachus Jerusalenman kachanman karqa chayqa, Pablota tumpasharqanku chay judiosllataj payta juzgankuman karqa, wañuchinkumantaj karqa. Festoqa mana justiciata ruwayta munarqachu, astawanpis runaswan allinpaj qhawachikuyllata maskʼarqa. Aswan ñaupaj wataspipis ajinallataj karqa kamachej Poncio Pilato Jesusta juzgashajtin (Juan 19:12-16). Kay tiempopipis wakin juecesqa runaswan allinpaj qhawachikuyta munaspalla mana leyesman jinachu juzganku. Chayrayku mana tʼukunanchejchu tiyan Diospa llajtan tukuy imata sutʼita rikuchejtinpis wakin juzgadospi juchachawajtinchej.

6, 7. 1) ¿Imaraykutaj Pablo César juzgananta mañakorqa? 2) ¿Imatataj Pablo tukuy cristianosman yachachiwanchej?

⁶ Pabloqa cuentata qokorqa Festoqa judiosllata kusichiyta munasqanmanta, chayraykutaj kausaynin wañuy patapi kashasqanmanta. Pabloqa Roma llajtayoj kasqanrayku ujnin derechonta Festo valechinanta munarqa. Chayrayku nerqa: “Cesarpa juzgadonpi kashani, kaypi juzgasqa kanay tiyan. Mana ima sajratapis judiospa contranta ruwanichu, qanpis chaytaqa sutʼita reparashanki. [...] César juzganawanta munani”, nispa. Pillapis César juzgananta mañakojqa Cesarmanpuni rej. Festopis chayllatataj nerqa. “César juzgasunanta munanki chayqa, Cesarman rinki”, nispa (Hech. 25:10-12). Pabloqa César juzgananta mañakuspa tukuy cristianosman yachachiwanchej, ajinallapitaj rikukojtinchej imatachus ruwana kasqanta. Sichus enemigosninchej contranchejpi leyta churaspa “problemasta rikhurichinku” chayqa, Jehovaj testigosnenqa leymanta valekunchej sumaj willaykunata willanallapajpuni (Sal. 94:20, sutʼinchaynin). c

⁷ Pabloqa iskay watasta qhasillamanta carcelpi wisqʼasqa karqa, chaymantataj riyta aterqa Romata kamachej Cesarwan juzgachikoj. Jinapis manaraj chayman rishajtin, waj kamachej paywan parlayta munarqa.

8, 9. ¿Imaraykutaj rey Agripa Cesareaman rerqa?

⁸ Pablo César juzgananta mañakusqanmanta uj mashkha diasninman, rey Agripawan hermanan Berenicewan Festota waturikoj rerqanku. d Roma nacionpi costumbre kasqanman jina, waj kamachejkunaqa mosoj kamachejkunata waturikoj riyta yachaj kanku. Agripaqa Festota felicitarqa mosoj kamachej jina yaykusqanmanta. Chaytataj ruwarqa paywan  allinpi kayta munaspa, jinamanta Festopis payta apoyananpaj (Hech. 25:13).

⁹ Rey Agripaqa Festoj willasqanta uyariytawan Pablomanta mayta yachayta munarqa. Chayrayku qʼayantenqa iskaynin kamachejkuna “may maylla jamuspa juzgadoman yaykorqanku” Pabloj parlasqanta uyarinankupaj. Paykuna ajina tʼukunata chayasqankumanta nisqataj, Pabloj parlasqan aswan tʼukunapaj karqa (Hech. 25:22-27).

10, 11. 1) ¿Imaynatataj Pablo rey Agripata parlapayarqa? 2) ¿Imastataj Pablo kausayninmanta rey Agripaman willarqa?

¹⁰ Pabloqa rey Agripaman respetowan parlarerqa, maytataj agradecekorqa ñaupaqenpi parlarejta saqesqanmanta. Chantapis nerqa Agripaqa judiospa tukuy costumbresninkuta allinta rejsisqanta, imasmantachus judiospura japʼinakusqankutapis yachasqanta. Chantá ñaupajta fariseo jina kausakusqanta Agripaman willarqa. Fariseostaj ‘waj judiosmanta nisqaqa leyta allintapuni juntʼaj kanku, wajkunatapis matʼej kanku paykuna jina juntʼanankupaj’ (Hech. 26:5). Pabloqa fariseo kashaspallaraj Mesías chayamunanta suyakusharqa. Jinapis cristianoman tukuytawanña Dios ashkha watas ñaupajtaña kachamunanta nerqa, chay Mesías Jesucristo kasqanta mana manchachikuspa willarqa. Chantataj pay nerqa Diospa chay nisqan juntʼakusqantaña willasqanrayku juzgasqa  kashasqanta, payta qhasimanta tumpajkunapis chaypi creellasqankutataj. Chayrayku Agripaqa astawan chaymanta yachayta munarqa. e

¹¹ Chantá Pabloqa Agripaman willarqa paypis ñaupajta mana khuyarikuspa manchayta cristianosta qhatiykachasqanta. Pay nerqa: “Noqapis yuyaj kani tukuy imasta ruwanay kasqanta, Nazareno Jesuspa sutinpa contranpi. [...] Paykunapaj manchay phiñasqa kasqayraykutaj, karu llajtaspipis paykunata qhatiykachamorqani”, nispa (Hech. 26:9-11). Pabloqa chayta nispa mana yapasqatachu parlasharqa. Ashkha runastaj testigos karqanku may sinchʼitapuni cristianosta qhatiykachasqanmanta (Gál. 1:13, 23). Agripaqa Pablota uyarispa ichapis tapukorqa: “¿Imaraykutaj chanta cambiarqari?”, nispa.

12, 13. 1) ¿Imaraykutaj Pablo cambiarqa? 2) ¿Imaynapitaj Pablo uj ‘ayjonta jaytʼaj’ animal jina kasharqa?

¹² Pablollataj sutʼincharqa imaraykuchus cambiasqanta. Pay nerqa: “Uj pacha kuraj sacerdotes kachawasqankurayku Damasco llajtaman risharqani, jaqaypipis kikinta ruwamunaypaj. Jinallapi chaupi pʼunchayta ñanta rishajtiy, rikorqani cielomanta uj kʼanchay muyuykuwasqaykuta noqata, noqawan khuska rejkunatapis. Chay kʼanchaypa lliphipiynintaj intitapis atiparqa. Tukuyniykutaj pampaman urmarqayku. Chantá hebreo parlaypi uj parlayta uyarerqani niwajta: ‘Saulo, Saulo, ¿imaraykutaj qhatiykachashawankiri? Ayjonta jaytʼaspaqa qanlla nanachikushanki’, nispa. Noqataj taporqani: ‘Señor,  ¿pitaj kanki?’, nispa. Señortaj kutichiwarqa: ‘Jesús kani, pitachus qhatiykachashanki chay’”, nispa (Hech. 26:12-15). f

¹³ Pabloqa niraj mosqoypi jina Señorta rikushaspa, uj ‘ayjonta jaytʼaj’ animal jina kasharqa. Ñaupa tiempopi cargasta apaj animalesta qhatejkunaqa, metal puntayoj kʼapiswan tʼojsispa qhatej kanku. Sichus uj animal mana kasukuspa chay kʼaspita jaytʼajtenqa paylla nanachikoj. Ajinallatataj Pablopis Dioswan mana pusachikuyta munaspaqa, paylla Diosmanta karunchakusharqa. Pabloqa allin sonqoyoj karqa, jinapis mana cheqa kajta yacharqachu. Damascoman ñanta rishajtintaj Jesús payman rikhurispa cheqa kajta entiendenanpaj yanaparqa (Juan 16:1, 2).

14, 15. ¿Imatataj Pablo nerqa imaraykuchus cambiasqanmanta?

¹⁴ Chantá Pabloqa Agripaman willarqa kausaynin mayta cambiasqanta.  Pay nerqa: “Cielomanta Jesús rikhurimuwaspa kamachiwasqanta kasorqani. Ajinamanta willayta qallarerqani, ñaupajtaqa Damascopi, chantá Jerusalenpi, tukuynin Judeapi, nacionesmanta kajkunaj llajtasninkupipis. Paykunamanqa willarqani juchasninkumanta pesachikuspa Diosman kutirikunankuta, ruwasqankuwantaj pesachikusqankuta rikuchinankuta”, nispa (Hech. 26:19, 20). Pabloqa Jesús payman rikhurisqanmantapacha, ashkha watastaña Jesuspa kamachisqanta kasukusharqa. ¿Imaynataj Pablota willasqanpi rerqa? Pabloj willasqanta japʼikojkunaqa juchasninkumanta pesachikorqanku, manaña sajra imasta ruwarqankuchu, Diospa munaynintataj ruwayta qallarerqanku. Chayrayku paykunaqa leyesta kasukorqanku, tukuywan allinpi kausakunankupajtaj kallpachakorqanku.

¹⁵ Jinapis Pabloj enemigosnenqa, Pabloj willasqan runasta yanapasqanpi mana piensarillarqankupischu. Chayrayku Pablo nerqa: “Judiosqa templopi japʼiwarqanku, wañuchiytataj munawarqanku. Chaywanpis Dios yanapawasqanrayku kunankama willashallanipuni, pisipaj qhawasqa runasman, jatunpaj qhawasqa runasmanpis”, nispa (Hech. 26:21, 22).

16. ¿Imaynatataj Pablo jina ruwasunman autoridadespa ñaupaqenpi parlashaspa?

¹⁶ Cristianosqa ‘wakichisqapuni kananchej’ tiyan suyakuyninchejmanta sutʼinchanapaj (1 Ped. 3:15). Imapichus creesqanchejmanta juecespa ñaupaqenpi chayri waj autoridadespa ñaupaqenpi sutʼinchananchej kajtenqa, allinpuni kanman Pablo imaynatachus Agripaj ñaupaqenpi, Festoj ñaupaqenpi parlarisqanta yuyarikunanchej. Sichus autoridadesman willarisunchej, Biblia allin runas kananchejpaj yanapawasqanchejta, pikunachus willasqanchejta uyarinku chaykunatapis yanapasqanta chayqa, ichapis paykunaqa noqanchejmanta aswan allinta yuyanqanku.

17. 1) ¿Imatataj Festo nerqa Pabloj willasqanta uyariytawan? 2) ¿Imatataj runas yuyanku willasqanchejmanta?

¹⁷ May jina sumajtapuni Pablo sutʼinchasqanta uyariytawan, Festowan Agripawanqa mana chʼinllachu karqanku. Chayrayku Pablo sutʼinchashajtin Festoqa jatunmanta qhaparerqa: “¡Pablo! ¡Locoyapushankiña! ¡Chay jinata estudiasqaykipi locoyapushanki!”, nispa (Hech. 26:24). Kunanpis ashkha runas willasqanchejta uyarispa Festo jinallataj yuyanku. Paykunaqa yuyanku imatapunichus Biblia nisqanta wajkunaman willasqanchejqa qhasilla kasqanta. Chantapis kay mundomanta yachayniyoj runasqa mana creeyta atillankuchu wañusqas kausarimunankuta Biblia nisqanpi.

18. ¿Ima nispataj Pablo kutichikorqa, chanta ima nerqataj rey Agripa?

¹⁸ ¿Ima nispataj Pablo kutichikorqa? Pay nerqa: “Mana locoyapushanichu wiraqochíy Festo. Parlasqayqa cheqapuni, allinta piensarispa parlashani. Chay tukuy imastaqa rey Agripapis allinta yachan, chayrayku paypa  ñaupaqenpi tukuy sonqo parlashani”, nispa. Chantá rey Agripaman nerqa: “¿Profetaspa nisqankuta creenkichu? Noqa yachani creesqaykita”, nispa. Agripataj Pablota nerqa: “Niraj imapi cristianoman tukuchiwankiman”, nispa (Hech. 26:25-28). Mana yachanchejchu chayta nispa ciertomantapunichus manachus parlasqanta, jinapis sutʼita yachanchej Pabloj sutʼinchasqanqa payta tʼukurichisqanta.

19. Festowan Agripawan, ¿imatataj Pablomanta nerqanku?

¹⁹ Chantá iskaynin kamachejkuna sayarerqanku. Ajinamantataj chaypi kajkuna repararqanku Pablota juzgayta tukusqankuta. “Ripushaspataj paykunapura ninakorqanku: ‘Kay runajtaqa mana ima juchanpis kanchu wañuchisqa chayri presochasqa kananpajqa’, nispa. Agripataj Festota nerqa: ‘Manachus Cesarwan juzgachikuyta mañakunman karqa chayqa, kay runaqa kacharisqaña kanman karqa’, nispa” (Hech. 26:31, 32). Iskaynin kamachejkunaqa sutʼita repararqanku Pablo mana juchayojchu kasqanta. Paykunaqa ichapis chay kutimantapacha cristianosta aswan sumajta entienderqanku, paykunawantaj kʼachas karqanku.

20. ¿Imaraykutaj mana qhasichu karqa Pablo Judeata kamachejkunaman willasqan?

²⁰ Chay iskay atiyniyoj kamachejkunamantaqa, manasina mayqenpis cristianoman tukorqachu. Chanta, ¿qhasillachu karqa Pablo paykunaman willasqan? Mana. Pabloqa Judeamanta reyesman, kamachejkunaman ima willarqa. Manachus Pablo willanman karqa chayqa, paykunaqa ichapis ni jaykʼaj Diospa Gobiernonmanta sumaj willaykunata uyarinkumanchu karqa (Luc. 21:12, 13). Hermanostaj Pablo ajina pruebaspi rikukuspapis, Diosta kasukullasqantapuni, aguantallasqantapunitaj yachaspaqa, may kallpachasqas karqanku (Fili. 1:12-14).

21. ¿Imaraykutaj willanallanchejpuni tiyan pruebas kajtinpis, churanakuy kajtinpis?

²¹ ¿Ima nisunmantaj kay tiemponchejmanta? Manchay pruebas kajtinpis, churanakuy kajtinpis willallasunpuni chayqa, chay willasqanchejqa mana qhasichu kanqa. Imaraykuchus ajinamanta ichapis wakin autoridadesman Diospa Gobiernonmanta willayta atisun. Paykunamantaj ichapis waj kutipeqa mana willayta atillasunmanchu. Chantapis Diosta kasukusqanchej, aguantasqanchej imaqa, ichapis hermanosninchejta kallpachanqa, ajinamanta manchay pruebaspi rikukuspapis, wajkuna paykunaman churanakojtinkupis Diospa Gobiernonmanta sumaj willaykunata allinta sutʼinchanallankupajpuni.