1, 2. 1) ¿Imaraykutaj Pablo Jerusalenman rerqa? 2) Pablo Jerusalenpi kashaspa, ¿imaspitaj rikukorqa?

 APÓSTOL Pabloqa watejmanta Jerusalenpa kʼullku callesninta, runawan juntʼa callesninta purisharqa. Jerusalenmanqa ashkha watastaña runas Jehovata yupaychaj rej kanku, chay llajtapi tiyakojkunataj may kusisqas kasharqanku llajtankumanta, suyunkumantawan. Chantapis Pabloqa yacharqa chay llajtapi tiyakoj ashkha hermanos ñaupajta jinallapuni imatapis ruwayta munasqankuta, chayraykutaj mana Jehová llajtanpi cambiosta ruwasqanman jinachu kausashasqankuta. Pabloqa Efesollapiraj kashaspa Jerusalenmanta hermanosta yanapananpaj yanapata tantarqa, chaytataj Jerusalenpi kaj hermanosman aparqa. Jinapis mana chayraykullachu rerqa, manaqa chaypi tiyakoj hermanosta yuyayninkuta cambianankupaj yanapayta munaspa rerqa (Hech. 19:21). Pabloqa Jerusalenpi ñakʼarinanta yachaspapis imatachus ruwayta munasharqa chayta juntʼaj rerqa.

² Pablo Jerusalenpi kashaspa, ¿imaspitaj rikukorqa? Payqa Jerusalenman chayaspa repararqa wakin hermanos paymanta llulla cuentosta creesqankuta. Mana chayllachu, Jerusalenpeqa Cristoj enemigosnin kasharqanku, paykunataj aswan qhepaman Pablota qhasimanta tumparqanku, maqarqanku, wañuchinankutataj nerqanku. Jinapis paykuna chayta ruwasqankurayku Pabloqa cheqa kajmanta sutʼinchayta aterqa. Apóstol Pablo chay imaspi rikukuspa kʼumuykukoj sonqo kasqanmanta, mana manchachikusqanmanta, creeyniyoj kasqanmanta imaqa mayta yachakusunman.

3-5. 1) ¿Pikunawantaj Pablo tantakorqa, chanta imastataj paykunaman willarerqa? 2) ¿Imatataj yachakusunman Pablo Jerusalenmanta ancianoswan tantakusqanmanta?

³ Pablowan compañerosninwanqa, Jerusalenman chayaytawan qʼayantin Jerusalén congregacionmanta ancianoswan tantakorqanku. Bibliaqa chay kutimanta parlaspa kausasharqankuraj chay apostolespa sutisninkuta mana oqharinchu, ichapis waj lugarespi paykuna  Diosta sirvishasqankurayku. Jinapis Jesuspa hermanon Santiagoqa Jerusalenllapipuni kasharqa (Gál. 2:9). Pablo Jerusalenmanta ‘tukuynin ancianoswan tantakushajtin’, ichapis chay tantakuypi Santiago presidente karqa (Hech. 21:18).

⁴ Pabloqa “paykunata napaykuytawan kantumanta willarqa, imastachus Dios naciones ukhupi ruwasqanta paypa willayninnejta” (Hech. 21:19). Hermanosqa may kallpachasqachá kasharqanku Pabloj willasqanta uyarispa. Noqanchejpis ajinallatataj kusikunchej waj suyuspipis cheqa kajmanta sumaj willaykunata ashkha runas japʼikushasqankuta uyarispa, ¿icharí? (Pro. 25:25).

⁵ Pabloqa Jerusalenmanta ancianoswan parlashaspa, willarerqachá Europamanta hermanos paykunapaj yanapata apachisqankuta. Ancianosqa maytachá kusikorqanku chay jina karupi tiyakoj hermanos paykunamanta llakikusqankuta yachaspa. Pablo parlayta tukusqantawan ancianosqa “Diosta jatuncharqanku” (Hech. 21:20a). Kunanpis ajinallataj pasan. Ashkha lugaresmanta hermanosninchejqa desastres kasqanrayku, chayri onqoykuna kasqanrayku ñakʼarinku. Paykunapis sonqocharejtinchej, yanapatataj apachejtinchej ñaupa tiempomanta cristianos jinallataj may kallpachasqas, kusisqastaj kanku.

6. ¿Imatataj Jerusalenmanta ancianos Pabloman willarqanku?

⁶ Chantá ancianosqa Pabloman willarqanku Judeamanta wakin hermanos paypaj phiñasqa kashasqankuta. Paykuna nerqanku: “Hermanóy, qan yachanki judíos kajkunamantaqa may chhika waranqas creejkunaman tukusqankuta, tukuyninkutaj Moisespa Leyninta tukuy sonqo juntʼasqankuta. Paykunaqa qanmanta uyarisqanku, waj nacionespi tiyakoj judiosman Moisespa Leyninta manaña kasunankuta yachachishasqaykita, ama wawasninkuta circuncidanankuta, nitaj costumbresman jina ruwanankuta”, nispa (Hech. 21:20b, 21). a

7, 8. 1) Judeamanta cristianos, ¿imatataj Leymanta yuyarqanku? 2) ¿Imaraykutaj ninchej Leyta kasukuytapuni munaj cristianos mana Diospa contranpichu oqharikusqankuta?

⁷ Cristianos Moisespa Leyninta manaña juntʼanankuchu kasqanmantaqa, 20 watasmanta astawanña pasarqa. Chanta, ¿imaraykutaj ashkha cristianos Moisespa Leyninta juntʼayta munashallarqankupuni? (Col. 2:14). Apostoleswan, Jerusalenmanta ancianoswanqa 49 watapiña congregacionesman uj cartata apachispa sutʼincharqanku, mana judioschu kajkunaqa mana circuncidakunankuchu kasqanta, nitaj Moisespa Leynintapis  juntʼanankuchu kasqanta (Hech. 15:23-29). Jinapis chay cartaqa judío cristianosmanta mana parlarqachu, chayraykutaj paykunamanta ashkhasqa yuyarqanku chay Leyta juntʼanallankupuni kasqanta.

⁸ Judeamanta hermanos pantasqata yuyasqankurayku, ¿nisunmanchu paykuna Diospa contranpi oqharikusqankuta? Mana, mana chayta nisunmanchu. Paykunaqa mana llulla diosestachu yupaychasharqanku, nitaj Diosta mana yupaychajkunaj costumbresninkutachu ruwayta munasharqanku. Kasukuytapuni munasharqanku chay Leyqa allillan kakusharqa, mana demoniosmantachu jamorqa, astawanpis Jehovapuni chay Leyta paykunaman qorqa. Jinapis chay Leyqa ñaupa tratomanta karqa, cristianostaj mosoj tratopi kasharqanku. Chayrayku Jehovaqa paykuna yupaychasqankuta allinpaj qhawananpaj manaña suyarqachu Leyta juntʼanankuta. Leyta siga kasukunanku kasqanta nej cristianosqa, mana allintachu chayta entienderqanku, Diospa llajtanpitaj astawan atienekunanku karqa. Paykunaqa chay yuyasqankuta cambiananku karqa, ima cambiostachus Jehová ruwasharqa chaymantaj yachaykukunanku karqa (Jer. 31:31-34; Luc. 22:20). b

9. ¿Imatataj Pablo Moisespa Leyninmanta yachachej?

⁹ ¿Imatataj runas Pablomanta parlasharqanku? Runasqa nisharqanku  pay judiosman yachachisqanta “ama wawasninkuta circuncidanankuta”, nitaj costumbresninkutapis ruwanankuta. Chay nisqanku, ¿cheqachu karqa? Pabloqa mana judioschu kajkunaman astawan willarqa. Chayraykutaj paykunaman sutʼincharqa mana Moisespa Leyninta juntʼanankuchu kasqanta. Chantapis payqa sumajta sutʼincharqa mana judíos kajkunataqa mana obliganachu kasqanta circuncidakunankupaj, nitaj Moisespa Leyninta juntʼanankupajpis (Gál. 5:1-7). Chantapis Pabloqa ima llajtasmanchus willaj rerqa chay llajtaspi tiyakoj judiosman willallajtaj. Pabloqa payta uyarej judiosman sumajtachá sutʼinchallarqataj Jesuspa wañuyninwan Leyqa chinkasqanta, Dios allinpaj qhawanawanchejpajtaj manaña chay Leyta kasukunachu kasqanta (Rom. 2:28, 29; 3:21-26).

10. ¿Imaynatá Pablo qhawaj Leyta juntʼayta, circuncidakuyta ima?

¹⁰ Jinapis Pabloqa mana rimarqachu judiospa wakin costumbresninkuta ruwajkunata, nisunman samarikuna pʼunchaypi mana trabajajkunata, chayrí wakin mikhunasta mana mikhojkunata (Rom. 14:1-6). Circuncisionmanta parlaspapis, mana ima kamachiytapis churarqachu. Chanta, ¿imaraykutaj Pablo Timoteota circuncidarqa? Imaraykuchus judiosqa “yacharqanku Timoteoj tatan griego kasqanta”, nitaj munarqachu pay mana circuncidasqa kasqanrayku willasqankuta runas mana japʼikunankuta (Hech. 16:3). Sapa ujmanta kasharqa circuncidakunankuchus manachus. Payllataj galatasman cartanpi nerqa: “Ni circuncidasqa kaypis, ni mana circuncidasqa kaypis valenchu. Astawanqa creeyniyoj kaymin valen. Creeytaj munakuynejta rikuchikun”, nispa (Gál. 5:6). Chayrayku Leyta juntʼayta munaspa circuncidakoj runaqa mana allintachu ruwasharqa, nillataj allintachu ruwasharqa circuncidachikunanpaj wajta tanqaj runapis. Imaraykuchus chay imasta ruwaj runasqa pisi creeyniyoj kasqankuta rikuchisharqanku.

11. 1) ¿Ima kamachiykunatataj ancianos Pabloman qorqanku? 2) ¿Imatataj Pablo mana ruwanmanchu karqa? (Sutʼinchaynintawan qhawariy).

 ¹¹ Pablomanta imastachus runas parlasqankoqa manapuni cheqachu karqa, chaytaj judío cristianostapis pantachisharqa. Chayrayku ancianosqa Pabloman kay kamachiykunata qorqanku: “Noqayku ukhupi tawa qharis tiyan, paykunaqa imatachus Diosman ruwasaj nisqankuta juntʼayta munanku. Paykunata pusaspa Leyman jina paykunawan khuska llimphuchakamuy, qolqetataj churapuy umankuta pʼajlachikunankupaj. Chaywanqa tukuy yachanqanku qanmanta uyarisqankoqa mana cheqachu kasqanta, manachayqa yachanqanku maychus kajta purishasqaykita, Moisespa Leynintapis juntʼashasqaykita”, nispa (Hech. 21:23, 24). c

12. ¿Imatataj Pablo tukuy sonqo ruwarqa?

¹² Pabloqa niyta atinman karqa Moisespa Leyninta juntʼanallapuni kasqanta nej judío cristianos pantasqa kashasqankuta,  manataj runas paymanta llullasta parlasqankuchu mana allin kasqanta. Jinapis Pabloqa ancianospa nisqankuta tukuy sonqo kasukorqa, imaraykuchus chay nisqankoqa mana Diospa Palabranpi kaj yuyaychaykunaj contranpichu kasharqa. Chaymanta aswan qhepamantaj Pablo nerqa: “Leypa atiyninpi kajkunapajtaj, leypa atiyninpipis kayman jina kani, mana leypa atiyninpi kaspapis. Ajinamanta paykunata Cristoman pusanaypaj”, nispa (1 Cor. 9:20). Pabloqa chay kutipi Jerusalenmanta ancianosta kasukuspa “leypa atiyninpipis” kashanman jina ruwarqa. Pablomantaqa yachakunchej ancianosta kasukuna kasqanta, manataj munayninchejman jinapuni imapis ruwakunanpaj wapuchakunachu kasqanta (Heb. 13:17).

13. 1) ¿Imajtintaj wakin judíos templopi chʼajwayta qallarerqanku? 2) ¿Imaynapitaj phiñasqa judiospa makinkumanta Pablo lluspʼerqa?

¹³ Pisi diasllaña faltarqa chay tawa runas Diosman imatachus nisqankuta juntʼanankupaj, Pablotaj templopi kasharqa. Jinallapi Asiamanta wakin judíos templopi Pablota rikuspa qhasillamanta tumpaykorqanku mana judío kajkunata temploman pusasqanta nispa. Chantá chʼajwarqanku, Pablotataj maqayta qallarerqanku. Manachus romano soldadospa comandanten Pablota jarkʼakunman karqa chayqa, chay runasqa payta wañuchinkuman karqa. Pablota wañuchiyta munasqankuta reparaspataj, comandanteqa Pablota mana imananankupaj carcelman wisqʼaykucherqa. Chaymantapachataj Pabloqa tawa watasmanta astawan carcelpi karqa. Runasqa Pablota wañuchiytapuni munarqanku, comandante imajtinchus Pablota wañuchiyta munashasqankuta tapojtintaj, paykunaqa qhaparerqanku, imaymana juchasmantataj Pablota tumpaykorqanku. Ujkuna uj jinata qhaparisqankurayku, wajkunataj waj jinata qhaparisqankurayku, comandanteqa ni imata entienderqachu. Chantá ashkha soldados Pablota chaymanta orqhorqanku. Cuartelman apaykunankupajña kashajtinkutaj, Pabloqa comandanteman nerqa: “Ama jina kaychu, runaswan parlajta saqellaway ari”, nispa (Hech. 21:39). Comandantetaj “ya” nerqa, ajinapi Pabloqa imapichus creesqanmanta mana manchachikuspa sutʼincharqa.

14, 15. 1) ¿Imastataj Pablo judiosman willarqa? 2) ¿Imastataj comandante ruwarqa imaraykuchus judíos Pablopaj phiñakusqankuta yachananpaj?

¹⁴ Pablo nerqa: “Uyariwaychej. Noqa willasqaykichej imaynachus kasqanta”, nispa (Hech. 22:1). Pablo hebreopi parlasqanta uyariytawan, runasqa chʼinyakorqanku. Chantá Pabloqa paykunaman sutʼincharqa imaraykuchus cristianoman tukusqanta. Pabloqa sumaj yuyaywan chayta sutʼincharqa, paymanta astawan yachayta munajkuna wajkunata wakin imasta tapurikunankupaj jina. Pabloqa nerqa may rejsisqa yachachej Gamaliel payta yachachisqanta. Chaypi kajkunamanta wakintaj yacharqankuchá pay aswan ñaupajta Jesuspa discipulosninta qhatiykachasqanta. Pablo chay runasman nerqa Damascoman ñanta rishajtin, wañuymanta kausarimorqa chay Cristo mosqoypi jina  payman rikhurisqanta, paywantaj parlasqanta. Chantá Pablo nerqa paywan khuska rejkuna uj kʼanchayta rikusqankuta, uj parlaytataj uyarisqankuta, jinapis chay uyarisqankuta mana entiendesqankuta (Biblia de estudio nisqapi Hechos 9:7; 22:9 versiculospa sutʼinchayninta leeriy). Pablo nillarqataj uj kʼanchayta rikusqanrayku ciego qhepakusqanta, chayrayku makinmanta aysaspa Damascoman pusasqankuta, chaypitaj Ananías sutiyoj runa, uj milagronejta watejmanta qhawarichisqanta. Ananiasqa chay lugarpi tiyakoj judíos ukhupi may rejsisqa karqa.

¹⁵ Pabloqa nerqa Jerusalenman kutimusqantawan Jesús templopi payman rikhurisqanta. Chayta uyariytawan judiosqa mayta phiñarikorqanku, qhaparerqankutaj: “¡Wañuchiychej chay runata! ¡Wañunan tiyan!”, nispa (Hech. 22:22). Pablota ama wañuchinankupajtaj, comandanteqa Pablota cuartel ukhuman apaykorqa. Comandanteqa yachaytapuni munarqa imaraykuchus judíos chay jinatapuni Pablopaj phiñakusqankuta. Chayrayku nerqa Pablota seqʼospa parlachinankuta. Jinapis seqʼonankupajña kashajtin, Pabloqa romano kasqanta nerqa, derechosninta respetanankutataj nerqa. Kunanpis Jehovaj kamachisnenqa leyesmanta valekunchej imapichus creesqanchejmanta sutʼinchanapaj (210 paginapi “ Romaj leyesnin, Roma llajtayojkuna ima” nisqa  recuadrota leeriy, chantá “ Leyesmanta valekuspa willanchej” nisqa recuadrota leeriy). Pablo romano kasqanraykutaj, comandanteqa waj jinamanta payta parlachinan karqa. Chayrayku qʼayantin Jatun Juntamanta kajkunata usqhayllata tantacherqa. Chay Jatun Juntaqa judiospa aswan jatun juzgadonku karqa. Pablotataj paykunaj ñaupaqenman pusacherqa.

16, 17. 1) ¿Imataj karqa Pablo Jatun Juntaj ñaupaqenpi parlayta qallarisqantawan? 2) ¿Imaynatataj Pablo rikucherqa kʼumuykukoj sonqo kasqanta?

¹⁶ Pabloqa Jatun Juntaj ñaupaqenpi nerqa: “Hermanosníy, kunankamaqa Diospa ñaupaqenpi may llimphu sonqoyoj kausakuni”, nispa (Hech. 23:1). Chantá niña imatapis niyta aterqañachu, imaraykuchus chayta uyariytawan “kuraj kaj sacerdote Ananiasqa, Pabloj qayllanpi kajkunata kamacherqa Pablota siminpi laqʼanankuta” (Hech. 23:2). Chayqa pʼenqay karqa. Kuraj kaj sacerdote Pablomanta malta piensasqanqa sutʼi rikukorqa, imaraykuchus Pablo niraj imatapis sutʼinchashajtin “siminpi laqʼanankuta” kamacherqa llulla runapis kanman jina. Chayraykuchá Pabloqa Ananiasta nerqa: “Puraj uya, Dios qanta laqʼasonqa. Qanqa Leyman jina juzganawaykipaj tiyaykukunki. Chanta, ¿qanllatajchu Leyta pʼakispa laqʼanawankuta kamachinki?”, nispa (Hech. 23:3).

¹⁷ Chaypi kajkunamanta wakenqa Pablota laqʼaj runapaj phiñakunankumantaqa, Pablopaj phiñakorqanku chay jinata kutichikusqanrayku. Paykuna nerqanku: “¿Diospa kuraj kaj sacerdotenwanchu ajinata siminakushanki?”, nispa. Pabloqa kʼumuykukoj sonqo kasqanta, Leytapis jatunpaj qhawasqanta rikuchinanpaj nerqa: “Hermanosníy, mana yacharqanichu payqa kuraj kaj sacerdote kasqanta, qhelqasqa kashan: ‘Ama sajrata rimankichu llajtaykipi kamachejpajqa’, nispa” (Hech. 23:4, 5; Éxo. 22:28). d  Chantá Pabloqa waj jinamantañataj paykunawan parlarqa. Payqa yacharqa Jatun Juntamanta kajkuna wakin fariseos kasqankuta, wakintaj saduceos. Chayrayku nerqa: “Hermanosníy, noqaqa fariseo kani, fariseospa wawan. Noqataqa wañusqas kausarimunankuta suyakusqayrayku juzgashawanku”, nispa (Hech. 23:6).

18. 1) ¿Imaraykutaj Pablo nerqa fariseo kasqanta? 2) ¿Imaynatá Pablo jina willaypi ruwasunman?

¹⁸ ¿Imaraykutaj Pablo nerqa fariseo kasqanta? Imaraykuchus payqa “fariseospa wawan” karqa. Paypa familianqa fariseospa sectankumanta karqa, chayraykutaj ichapis ashkha runas fariseota jinallapuni payta qhawaj kanku. e Fariseosqa kausarimuymanta llulla imaspi creej kanku, paykuna nej kanku alma mana wañusqanta, chantapis yuyallajtaj kanku uj kʼacha runa wañupojtin waj cuerpopi watejmanta kausasqanta. Pablotajrí mana chay imaspi creerqachu, manachayqa imatachus Jesús kausarimuymanta yachacherqa chaypi creerqa (Juan 5:25-29). Fariseos kausarimuymanta llulla  imaspi creerqanku chay, ¿imaraykutaj Pablo kausarimuymanta parlarqa? Payqa fariseos jinallataj yuyarqa wañusqas watejmanta kausayta atisqankuta, saduceostaj ni imarayku chaypi creeyta munajchu kanku. ¿Imaynatá Pablo jina willaypi ruwasunman? Catolicoswan chayri evangelicoswan parlashaspaqa, noqanchejpis Diospi creellasqanchejtataj nisunman. Paykunaqa ichapis Trinidad yachachiypi creenku, jinapis noqanchejqa imatachus Biblia Diosmanta willawanchej chaypi creenchej. Ajinapis, paykunapis noqanchejpis Dios kasqanpipuni creenchej.

19. ¿Imaraykutaj Jatun Juntamanta kajkuna paykunapura chʼajwarqanku?

¹⁹ Pabloj nisqanqa Jatun Juntamanta kajkunata tʼaqanacherqa, chayrayku paykunaqa manchayta chʼajwarqanku. “Fariseospa gruponkumantataj wakin leymanta yachachejkunaqa sayarispa sinchʼita siminakorqanku, nerqankutaj: ‘Kay runapeqa mana ima sajratapis tariykuchu, ichapis paytaqa uj espíritu chayri uj ángel parlapayarqa’, nispa” (Hech. 23:9). Saduceostajrí mana angelespi creejchu kanku, chayrayku paykunaqa Pablota uj ángel parlapayasqanta nejtinku maytapuni phiñarikorqanku (214 paginapi “ Saduceoswan fariseoswan” nisqa recuadrota leeriy). Paykuna maytapuni chʼajwasqankuraykutaj comandanteqa soldadosta kamacherqa Pablota chay chaupimanta orqhonankuta (Hech. 23:10). Jinapis Pabloj kausaynenqa wañuy patallapipuni kasharqa. ¿Imataj paywan kanman karqa? Chayta qhepan capitulopi yachakusunchej.