1-4. 1) ¿Imaraykutaj Pablo Jerusalenman risharqa? 2) ¿Imataj Pablowan Jerusalenpi kanan karqa?

 PABLOWAN Lucaswanqa nichá Miletomanta ripuyta atillarqankuchu. Imaraykuchus paykunaj sonqonku mayta nanarqa Efesomanta munasqa ancianosta saqenankuta yachaspa. Ajinapis paykunaqa ripunankupaj barcoman wicharerqanku. Apakusharqankutaj viajepaj tukuy ima necesitasqankuta, chantá apashallarqankutaj Judeapi kaj cristianospaj hermanos tantarqanku chay qolqeta. Paykunaqa chay yanapata pisichikoj hermanosman entregaytapuni munarqanku, ajinamanta chay viajenkuta tukunankupaj.

² Barcoman wicharejtinku, barcoj telasnintataj uraykuchejtinku wayraqa barcota apayta qallarerqa. Ajinapi paykunaqa barco sayachinamanta karunchakorqanku. Pablowan, Lucaswan, paywan khuska risharqanku chay qanchis hermanospiwan, pisimanta pisi hermanosmanta karunchakaporqanku. Hermanosqa may llakisqachá qhepakorqanku mar qocha kantupi (Hech. 20:4, 14, 15). Jisqʼonnintin hermanostaj barcomanta makinkuwanchá hermanosmanta despedikorqanku. Ajinapitaj barcoqa astawan astawan karunchakaporqa.

³ Pabloqa Efesomanta ancianoswan khuska kinsa watata llankʼarqa. Jinapis payqa Jehovaj espiritunwan pusachikuspa Jerusalenman risharqa. Payqa tumpata yacharqa imachus paywan Jerusalenpi kananta. ¿Imajtín chayta ninchej? Imajtinchus payllataj Efesomanta ancianosman nerqa: “Diospa espiritunta kasuspa, Jerusalenman rishani, manataj yachanichu imachus noqawan jaqaypi kananta. Kayllata yachani: Espíritu santoqa sapa llajtapi kutin kutita niwan wisqʼasqa kanayta, ñakʼarinayta ima”, nispa (Hech. 20:22, 23). Apóstol Pabloqa sufrinanta yachaspapis nerqa “Diospa espiritunta kasuspa” Jerusalenman rishasqanta. Payqa espiritoj nisqanta juntʼaytapuni, ruwaytapunitaj munarqa. Pabloqa mana sufriyta munarqachu. Jinapis paypajqa Diospa munayninta ruwaypuni ñaupajpi kasharqa.

⁴ Tukuypis Pablo jina ruwayta munanchej, ¿icharí? Jehová Diosman  kausayninchejta qopushaspaqa, payman ninchej paypa munayninta ñaupajta ruwananchejta imamanta nisqapis. Chayrayku may allinpuni Pabloj kausayninmanta siga yachakunanchej, imaynatachus pay jina ruwanapitaj tʼukurinanchej.

5. ¿Maynintataj Pablowan compañerosninwan rerqanku Tiro llajtaman chayanankupaj?

⁵ Pablowan compañerosninwanqa “cheqanta rispa” chay kikin diallapitaj Cos llajtaman chayarqanku. Paykuna risharqanku chay barcoqa, wayrawan apachikuspa cheqanta rerqa mana ni mayman wistʼuykuspa (Hech. 21:1). Chay chʼiseqa Cos llajtapisina qhepakorqanku, qʼayantintaj Rodasninta pasarqanku, chaymantataj Pataraman chayarqanku, chayqa kashan Asia Menorpa sur ladonpi. Patarapitaj cargata apasharqa chay barcoman wicharispa cheqanta rerqanku Feniciapi kaj Tiro llajtaman. Chayman rishajtinku imachus pasasqanta Lucas nin: “Rishaspataj Chipre churuta rikorqayku, paña  ladonta pasaspataj [...] rillarqaykupuni”, nispa (Hech. 21:3). ¿Imaraykutaj Lucas nerqa ‘paña ladonta pasaspa’ nispa?

6. 1) ¿Imaraykutaj Pablo Chipre churuta rikuspa aswan kallpachasqa kasharqa? 2) Imaynatachus Jehová bendecisusqanpi, yanapasusqanpi tʼukurispa, ¿ima niwajtaj?

⁶ Chipre churu chayninta pasashajtinku, ichapis Pabloqa dedonwan chay churuta señalaspa compañerosninman willarerqa, jisqʼon watas ñaupajta chaypi willashajtinku imaynachus risqanta. Pabloqa chaypi Diosmanta willarqa Bernabewan Juan Marcoswan ima willamunanpaj ñaupaj kutipi viajashaspa. Chaypitaj Elimas nisqa layqa runawan tinkorqa (Hech. 13:4-12). Pabloqa watejmanta chay churuta rikuspa, chaypi willashajtin imaynachus risqanmanta yuyarikuspa ima aswan kallpachasqachá kasharqa Jerusalenman ñakʼarej rinanpaj. Noqanchejpis allinta ruwanchej imaynatachus Jehová bendeciwasqanchejpi, imaynatachus pruebasta aguantanapaj yanapawasqanchejpi tʼukurispa. Chayraykutaj David jina nisunman: “Cheqan runataqa imaymana llakiykuna qhatirin. Jehová Diostajrí chay tukuy llakiykunamanta libran”, nispa (Sal. 34:19).

7. ¿Imatataj Pablowan compañerosninwan ruwarqanku Tiroman chayaytawankama?

⁷ Pabloqa yacharqa hermanoswanpuni kanan allin kasqanta, chayraykutaj hermanosta mayta rikuyta munasharqa. Lucasqa nin paykuna Tiroman chayaytawankama hermanosta maskʼasqankuta, tarisqankutataj (Hech. 21:4). Paykunaqa yacharqanku Tiropi hermanos kasqankuta, chayrayku paykunata maskʼarqanku. Chantá ichapis paykunaj wasinkupi qhepakorqanku. Kunanpis ajinallataj, mayman rejtinchejpis hermanosqa kankupuni, paykunataj wajyarikuwanchej. Chaytaj Jehovata rejsisqanchejmanta uj sumaj bendición. Arí, pikunachus Diosta munakunchej, cheqa religionpitaj kanchej chaykunaqa, mundo enteropi amigosniyoj kanchej.

8. ¿Ima niytá munan Hechos 21:4?

⁸ Pablowan compañerosninwanqa Tiropi qanchis diasta qhepakorqanku. Lucas nisqanman jinataj, chay diaspi hermanosqa espíritu santo paykunaman willasqanrayku, “kutin kutita Pablota nerqanku ama Jerusalenman rinanta” (Hech. 21:4). ¿Chay niyta munarqachu Jehová manaña munasqanta Pablo Jerusalenman rinanta? Mana, mana chaytachu niyta munarqa. Espíritu santoqa Pabloman willarqaña Jerusalenpi ñakʼarinanta, jinapis ni jaykʼaj nerqachu ama rinanta. Chanta, ¿ima niytá munan kay versículo? Tiromanta hermanosqa espíritu santo paykunaman willasqanraykusina entienderqanku Pablo mayta ñakʼarinanta. Chayta yachaspataj llakikorqanku, maytataj Pablota rogakorqanku ama Jerusalenman rinanta. Paykunaqa chayta ruwarqanku Pablota llakiymanta jarkʼayta munasqankurayku. Jinapis Pabloqa Jehovaj munaynintapuni ruwayta munarqa, chayraykutaj Jerusalenman rinantapuni nerqa (Hech. 21:12).

9, 10. 1) ¿Imamantataj Pablo ichapis yuyarikorqa Tiromanta hermanosta may llakisqasta rikuspa? 2) Casi tukuy runas, ¿imatataj mana ruwayta munankuchu, chanta imatataj Jesús nerqa?

 ⁹ Pabloqa hermanosta may llakisqasta rikuspa ichapis Jesuspa discipulosnin imatachus ruwasqankumanta yuyarikorqa. Jesusqa discipulosninman willarqa Jerusalenman rinanta, chaypitaj mayta ñakʼarinanta, wañuchinankuta ima. Pedrotajrí Jesusmanta llakikuspa nerqa: “‘Señor, ama chaytaqa parlallaypischu. Mana chay imaspeqa rikukunkichu’, nispa. Jesustajrí kutirikuspa Pedrota nerqa: ‘¡Riy kaymanta Satanás! Qanqa pantachiyta munawanki, mana Dios yuyasqanman jinachu yuyashanki, manachayqa runas yuyasqankuman jinalla’, nispa” (Mat. 16:21-23). Jesusqa wañunan kajtinpis, Jehová imatachus ruwananta nerqa, chayta ruwaytapuni munarqa. Pablopis Jesús jinallataj Diospa munayninta ruwayta munarqa. Tiromanta hermanospis imaynatachus Pedro Jesusmanta llakikorqa, ajinallatataj Pablomanta llakikorqanku. Jinapis mana entienderqankuchu Jehovaqa Pablo Jerusalenman rinantapuni munasqanta.

¹⁰ Kay tiempopipis casi tukuy runas mana kallpachakuyta munankuchu, paykunaqa imatapis facilitota munanku. Chayrayku mayqen religionchá cambianankupaj kallpachakunankuta mana ninchu, chayman rinku. Jinapis Jesusqa nerqa discipulosnin mana ajinatachu yuyananku kasqanta. Pay nerqa: “Sichus pipis qhepayta jamuyta munan chayqa, pay kikinta chejnikuchun, ñakʼarina kʼaspin aparisqataj qhepayta jamullachunpuni”, nispa (Mat. 16:24). Jesús jina ruwayqa imamanta nispapis aswan allin, sumajtaj. Jinapis mana chayta ruwayta atikullanchu.

11. ¿Imatataj Tiromanta hermanos ruwarqanku Pablota munakusqankurayku, yanapaytataj munasqankurayku?

¹¹ Tiropi uj mashkha diasta kaytawan Pablowan, Lucaswan, compañerosninkuwan imaqa siga viajallarqankupuni. Bibliaqa willawanchej imaynatachus Pablowan compañerosninwan Tiro llajtayoj hermanosmanta despedikusqankuta. Chaypitaj reparanchej Tiromanta hermanosqa Pablota mayta munakusqankuta, Diospaj llankʼasqanpitaj yanapasqankuta. Tukuy hermanos: qharispis, warmispis, wawaspis Pablota compañarqanku qocha kantukama.  Chaypitaj tukuyninku qonqoriykukuspa Diosmanta mañakorqanku, chantá Pablomanta despedikorqanku. Chaymantataj Pablowan, Lucaswan, compañerosninkuwan imaqa barcoman wicharispa Tolemaidaman rerqanku, chaypitaj uj diata hermanoswan qhepakorqanku (Hech. 21:5-7).

12, 13. 1) ¿Imastataj Felipe ruwarqa Diosta yupaychaypi? 2) ¿Imatataj Felipemanta yachakunkuman familiapi uma kajkuna?

¹² Lucasqa nin tukuyninku Pablowan Cesareaman risqankuta. a Chayman chayaspataj “sumaj willaykunata willaj Felipej” wasinman rerqanku (Hech. 21:8). Felipeqa ashkha watastaña Jehovapaj llankʼasharqa. 20 watas ñaupajta Jerusalenpi apostolesqa payta churarqanku reciellanraj rikhurerqa chay congregacionpi mikhunata rakʼiymanta encargakunanpaj. Chantapis Felipeqa ashkha watastaña willaspa kasharqa. Yachakorqanchej jinataj, Jerusalenpi hermanosta qhatiykachayta qallarejtinku, payqa Samariaman riporqa. Chaypitaj Diosmanta willallarqapuni, aswan qhepatataj Etiopiamanta eunuco runaman Diosmanta yachacherqa (Hech. 6:2-6; 8:4-13, 26-38). Pablowan compañerosninwanqa may kusisqaschá kasharqanku Felipewan tinkuspa.

¹³ Felipeqa sonqo kʼajayllawanpuni willasharqa. Payqa Cesareapi tiyakusharqa, jinapis siga runasman willashallarqapuni. Chayraykutaj Lucasqa nin: ‘Sumaj willaykunata willaj Felipe’, nispa. Chantapis Bibliaqa nin Felipeqa chay kutipaj tawa warmi wawasniyoj kasqanta, paykunataj profetas jina willasqankuta. Chaypi reparanchej wawasninpis tatan jinallataj sumaj willajkuna kasqankuta (Hech. 21:9). b Arí, Felipeqa maytachá kallpachakorqa familianman Jehovamanta yachachinanpaj, ajinamanta paykunapis Jehovata munakunankupaj, paytataj  sirvinankupaj. ¿Imaynatataj familiamanta uma kajkuna Felipe jina ruwankuman? Sumaj willaykunata willayta, wajkunata yanapaytapis ñaupajman churaspa, ajinamanta wawasninkupis paykuna jina ruwanankupaj. Chantapis wawasninkuman yachachinanku tiyan willayta jatunpaj qhawayta.

14. 1) Apóstol Pablo hermanosta visitajtin, ¿imaynataj hermanos qhepakoj kanku? 2) ¿Imaynatataj ñaupa tiempomanta cristianos jina ruwasunman?

¹⁴ Pabloqa mayman rispapis hermanosta maskʼajpuni, paykunawantaj qhepakoj. Hermanosqa may kusisqachá kasharqanku apóstol Pablota compañerosnintawan wajyarikuspa. Apóstol Pablo paykunata visitarejtintaj may kallpachasqaschá qhepakoj kanku (Rom. 1:11, 12). Noqanchejpis ñaupa tiempomanta hermanos jinallataj ruwasunman congregacionesta waturej hermanota, señorantawan wasinchejman wajyarikuspa. Paykunataqa wajyarikusunman mana sumaj wasiyojchu kaspapis, ajinamanta paykunata kallpachayta atisunchej, paykunapis noqanchejta kallpachawasun (Rom. 12:13).  

15, 16. 1) ¿Imatataj Ágabo Pablomanta nerqa? 2) Agaboj willasqanta uyarispa, ¿imaynataj runas kasharqanku?

¹⁵ Pablo Felipej wasinpi alojakushajtin Ágabo chayarqa, payqa jatunpaj qhawasqa runa karqa. Pablowan kasharqanku chaykunataj yacharqanku payqa profeta kasqanta. Agaboqa aswan ñaupajta nerqa yarqhay watas kananta. Chay nisqantaj Claudio kamachishajtin juntʼakorqa (Hech. 11:27, 28). Chayrayku chaypi kajkunaqa ichapis tapukusharqanku: “¿Ima willaywantaj Ágabo jamunri? ¿Imatataj kunan willawasunri?”, nispa. Agaboqa chaypi kajkuna qhawashajtillanpuni Pabloman chimpaspa churakusharqa chay chumpita qhechorqa. Chay chumpeqa jatun karqa, pʼaltataj, chaytaj cinturanpi watasqa kasharqa. Chay chumpeqa sirvej qolqeta, waj imastawan jallchʼanapaj. Chantá Agaboqa Pabloj chumpinwan chakisninta, makisnintawan wataykukorqa. Chaymantataj uj tʼukuna willayta willarqa. Pay nerqa: “Espíritu santoqa kayta nin: ‘Judiosqa kay chumpej dueñonta ajinata Jerusalenpi wataykonqanku, nacionesmanta runaspa makisninmantaj jaywaykonqanku’, nispa” (Hech. 21:11).

¹⁶ Agaboqa nerqa Pablo Jerusalenman rinanta. Chantapis nillarqataj judiosqa Jerusalenpi Pablota ‘nacionesmanta runaspa makisninkuman jaywaykunankuta’. Agaboj nisqanqa tukuy chaypi kajkunata mancharicherqa. Lucas chay kutimanta parlaspa nin: “Chayta uyarispataj, noqaykoqa chaypi kajkunawan Pablota rogakorqayku ama Jerusalenman rinanta. Pablotaj niwarqayku: ‘¿Imaraykutaj waqaspa iskayrayachiyta munawankichejri? Noqaqa wakichisqa kashani, mana watasqa kanallaypajchu, manachayqa Jerusalenpi Señor Jesuspa sutinrayku wañunaypajpis’, nispa” (Hech. 21:12, 13).

17, 18. 1) ¿Imatataj Pablo nerqa Diospa munaynintapuni ruwayta munasqanta rikuchinanpaj? 2) ¿Imatataj hermanos ruwarqanku manaña Pablota jarkʼayta atispa?

 ¹⁷ Imaynachus chay kasqanpi piensarina. Tukuy hermanos, Lucaspis Pablota rogakorqanku ama Jerusalenman rinanta, wakenqa waqarikorqankupuni. Pabloqa maytapuni paykuna munakusqankuta rikuspa, paymantataj llakikusqankuta rikuspa kʼachallamanta nerqa: “¿Imaraykutaj waqaspa iskayrayachiyta munawankichejri?”, nispa, chayri “¿imaraykutaj waqaspa sonqoyta wawayachinkichejri?”, nispa (sutʼinchaynin). Pabloqa mana saqerqachu jarkʼanankuta, imaynatachus mana saqerqachu Tiromanta hermanos jarkʼanankuta ajinata. Astawanpis payqa paykunaman nerqa rinanpuni kasqanta. Pabloqa mana manchachikoj karqa. Payqa Jesús jinallataj Jerusalenman rinantapuni nerqa (Heb. 12:2). Payqa mana wañuyta munarqachu, jinapis Cristoj discipulon kasqanrayku wañunan kajtenqa, chaypaj wakichisqa kasharqa.

¹⁸ Chanta, ¿imatá ruwarqanku hermanos? Lucas nin: “Manaña ni imaynamanta jarkʼayta atispataj chʼinllaña karqayku, ‘Jehová Diospa munaynin ruwakuchun’ nispa” (Hech. 21:14). Hermanosqa Pablo imatachus ruwasaj nisqanta jatunpaj qhawarqanku, niñataj nerqankuchu ama Jerusalenman rinanta. Paykuna entienderqanku Pabloqa Jehovaj munayninta ruwanan  kasqanta, paykunapaj llakiy kajtinpis. Pabloqa imatachus ruwananta ajllarqaña, uj ñanta riytapis ajllashanman jina, chaytaj ichá wañuyman apanman karqa. Chayrayku payta munakojkunaqa saqenallankuña karqa chay ñanta rejta, nitaj jarkʼanankuchu karqa yuyayninta cambiananpaj.

19. ¿Imatataj yachakunchej Pablota hermanos jarkʼayta munasqankumanta?

¹⁹ ¿Imatataj yachakunchej Pablota hermanos jarkʼayta munasqankumanta? Chaymantaqa yachakunchej ama jaykʼajpis Diospa astawan ruwayta munajkunata jarkʼanata. Manataj parlashanchejchu wañuyman pusaj ñanninta riyllamanta mana jarkʼana kasqanmanta. Ashkha tatasqa llakikunku wawasninku waj lugarman Jehovata sirvej ripusqankumanta. Jinapis paykunaqa mana wawasninkuta jarkʼayta munankuchu. Phyllis sutiyoj hermanamanta parlarina. Payqa Inglaterrapi tiyakun. Paypa sonqonqa mayta nanarqa uj kʼata wawitan Africaman misionera jina ripusqanmanta. Pay nerqa: “Noqaqa kusisqa kasharqani waway misionera jina kananta yachaspa. Jinapis karuman ripunanta yachay mayta llakichiwarqa. Chayrayku kutin kutita Jehovamanta mañakorqani. Jinapis waway ripuyta ajllarqa. Nitaj jaykʼajpis nerqanichu kutinpunanta. Chantapis noqapuni payman yachacherqani Diospa Gobiernonta ñaupajman churana kasqanta. Kunanqa 30 watastaña waway waj suyupi Diosta sirvishan, sapa diataj Jehovaman agradecekuni waway payta kasukushallasqanmantapuni”, nispa. May sumajpuni Jehovapaj astawan ruwajkunata yanapayqa.

20, 21. 1) ¿Imaraykutaj ninchej Pablo hermanoswanpuni kayta munasqanta? 2) ¿Imaraykutaj Pablo hermanoswan kayta maskʼaj?

²⁰ Pablowan compañerosninwanqa viajanankupaj wakichikuytawan siga viajallarqankupuni. Paykunaqa Jerusalenman rishaspa, sapa lugarman chayaspa chaypi hermanosta maskʼarqanku. Tiropeqa hermanosta tariytawan uj semanata paykunawan quedakorqanku. Tolemaidapeqa hermanosta saludarqanku, uj diatataj paykunawan karqanku. Cesareapitaj ashkha diasta Felipej wasinpi qhepakorqanku. Chantá wakin hermanos paykunata Jerusalenkama compañarqanku. Chaypitaj Mnasón sutiyoj hermano wasinpi paykunata alojarerqa. Mnasonqa Jesuspa ñaupaj discipulosninmanta ujnin karqa. ¿Imaynatá Jerusalenpi hermanos paykunata japʼikorqanku? Lucas nin: “Hermanosqa kusisqa japʼikuwarqayku”, nispa (Hech. 21:17).

²¹ Pabloqa hermanoswan khuskapuni kayta munarqa. Chaytaj payta mayta kallpacharqa, imaynatachus noqanchejtapis kunan kallpachawanchej ajinata. Hermanos kallpachasqankutaj payta yanaparqa enemigosnin wañuchiyta munajtinkupis sinchʼita sayanallanpajpuni.