Jehová Diosqa tukuy imata ruwarqa. Chaykunamanta wakintaqa rikuyta atinchej, wakintataj mana. Payqa niraj rikusqanchej imasta ruwashaspa, ashkha angelestaraj ruwarqa. Angelesqa Jehová Diosninchej jina mana rikukoj cuerpoyoj kanku. Chayrayku mana paykunata rikunchejchu. Ñaupajta ruwasqa karqa chay angelqa, Jehová Diospa yanapajnin karqa. Paytaj Jehová Diosta ruwayserqa estrellasta, planetasta, tukuy ima kajtawan. Chay planetasmanta ujnintaj kay jallpʼa. Chaypitaj noqanchej tiyakushanchej.

Jehová Diosqa jallpʼata wakicherqa, animaleswan runaswan chaypi kausakunankupaj. Chantá pay nerqa: “Kʼanchay kachun”, nispa, kʼanchaytaj karqa. Chantapis payqa ruwallarqataj orqosta, mayusta, mar nisqa qochata ima.

Chantá Jehová Dios nerqa: “Jallpʼapi wiñachun pastos, qhoras, sachʼas ima”, nispa. Ajinamanta kay jallpʼapi tukuy laya frutas, verduras, tʼikas ima wiñayta qallarerqa. Chantapis Jehová Diosqa tukuy laya animalesta ruwallarqataj, phawajkunata, yakupi kausajkunata, qhatatakojkunata ima. Wakenqa qowis jina juchʼuysitus kanku, wakintaj elefantes jina jatuchaj. ¿Ima animaltaj qanman gustasunki?

Jehová Diosqa ñaupajta ruwarqa chay angelman nerqa: “Runata ruwanachej”, nispa. Runasqa parlayta, asiyta, Diosmanta mañakuyta, mosoj imasta ruwayta ima atinchej, mana animales  jinachu kanchej. Chantapis kay jallpʼata, animalesta cuidanapaj ruwasqa karqanchej. Qhepan capitulopitaj, yachakusunchej pitachus kay jallpʼapi Dios ruwasqanta.