Jesusqa apostolesninwan qhepa kaj cenata ruwashaspa nerqa: “Tukuyniykichej kunan saqerpariwankichej”, nispa. Pedrotajrí nerqa: “Tukuyninku saqerparisojtinkupis, noqaqa manapuni saqerparisqaykichu”, nispa. Jesustaj Pedrota nerqa: “Niraj gallo waqashajtin, kinsa kutita mana rejsiwasqaykita ninki”, nispa.

Jesusta soldados Caifaspa wasinman apakapushajtinku, wakin apostolesqa ayqerikaporqanku. Jinapis iskay apóstoles runaswan khuska Jesuspa qhepanta rerqanku. Ujnenqa Pedro karqa. Payqa Caifaspa wasi pationman yaykuspa nina qayllapi qʼoñikorqa. Chaypitaj uj sipas kamachi Pedrota rikuspa nerqa: “Rejsiyki, qanpis Jesuswan purej kanki”, nispa.

Pedrotaj nerqa: “Mana rejsinichu, imamantachus parlashankipis”, nispa. Chantá calle punkuman rerqa. Chantá waj sipas kamachiñataj Pedrota rikuspa nerqa: “Kay runaqa Jesuswan purej”, nispa. Pedrotaj nerqa: “Mana yachanichu, pichus kanpis”, nispa. Chantá uj runañataj nerqa: “Qanpis ujninku kanki. Jesús jinallataj Galileo jina parlashanki”, nispa. Paytajrí “nipuni rejsinichu”, nispa jurarqa.

Chayllapitaj uj gallo waqarqa. Pedrotajrí Jesús qhawarimusqanta rikuspa, yuyarikorqa Jesuspa nisqanta. Chantá llojsispa sonqo nanayta waqarikorqa.

Jatun Juntamanta kajkunaqa Caifaspa wasinpi tantakorqanku Jesusta juzganankupaj. Paykunaqa Jesusta wañuchinankuta nisqankuña. Jinapis nipuni ima juchatapis Jesuspi tarerqankuchu payta wañuchinankupaj. Chantá Caifás Jesusta taporqa: “¿Qanchu Diospa Wawan kanki?”, nispa. Jesustaj kuticherqa: “Arí, noqa kani”, nispa. Caifastaj nerqa: “¿Imapajñataj testigosta munanchejri? Diospa contranta parlashan”, nispa. Tukuyninkutaj nerqanku: “Wañuchisqa kachun”, nispa. Chantá thoqaykorqanku, uyanta  qhataykuspa sajmaspataj nerqanku: “Profeta kaspaqa niwayku: ¿Pitaj sajmasunkiri?”, nispa.

Chantá sutʼiyayta watejmanta Jesusta Jatun Juntaman pusaspa taporqanku: “¿Qanchu Diospa Wawan kanki?”, nispa. Jesustaj nerqa: “Qankunallataj ninkichej Diospa Wawan kasqayta”, nispa. Chantá, “Diospa contranpi parlashan” nispa, Pilatoj kamachina wasinman pusarqanku. Qhepan capitulopi imachus pasasqanta yachakusun.