Uj día, Eva sapitallan kashajtin uj katari payta nerqa: “¿Huertapi kaj tukuynin sachʼaspa poqoyninta ama mikhunkichejchu, nispachu Diosqa nisunkichej?”, nispa. Evataj nerqa: “Atiyku mikhuyta tukuynin sachʼaspa poqoyninta. Uj sachʼaj poqoynillanta manapuni mikhunaykuchu tiyan. Chayta mikhuspaqa wañusqayku”, nispa. Kataritaj nerqa: “Mana wañunkichejchu. Chayta mikhuspaqa Dios jina kankichej”, nispa. Chay nisqantaj llulla karqa. Evatajrí payta creespa, chay poqoyta astawan qhawaspa, mikhuykuyta munarqa. Chayrayku chay poqoyta mikhuykorqa, Adanmanpis jaywarqa. Adantajrí wañunankuta yachashaspa chay poqoyta mikhuykorqa.

Jehová Diosqa tardeyaykuyta Adanwan Evawan parlarqa. Paykunatataj taporqa imajtinchus mana kasukusqankuta. Evaqa katari juchayoj kasqanta nerqa. Adantaj Eva juchayoj kasqanta nerqa. Jehová Diostaj mana kasukusqankurayku Edén huertamanta qharqorqa. Chantá chay huertaman ni jaykʼaj kutiykunankupaj huertaman yaykoj ñanman angelesta churarqa, uj laurashaj espadatawan.

Evawanqa mana uj kataripunichu parlarqa. Imajtinchus katarisqa mana parlankuchu. Astawanpis uj sajra ángel chay katarita parlacherqa Evata engañananpaj. Chay sajra angelqa, Kuraj Supay Satanás. Aswan qhepamantaj, Jehová Dios chay angelta chinkachenqa. Chantá chay angelqa manaña runasta engañanqachu.