Abrahanqa wawan Isaacman yachacherqa Jehová Diosta munakuyta, tukuy ima nisqanpi atienekuyta ima.

Isaac 25 watasniyoj kashajtintaj, Jehová Diosqa Abrahanman nerqa: “Munasqa kʼata wawaykita pusarikuspa, riy Moriah sutiyoj jallpʼaman. Chaypitaj ujnin orqopi payta qʼolachipuway”, nispa. Chay kamachisqanta juntʼayqa mana atinanpaj jinachu karqa. Chantapis Abrahanqa mana yacharqachu imaraykuchus Jehová Dios chayta nisqanta. Jinapis payqa kasukorqa.

Qʼayantintaj Abrahanqa tutamanta jatarispa iskay kamachisninta, wawan Isaactawan pusarqa Moriah jallpʼaman. Kinsa diata puriytawantaj, karumanta orqosta rikorqanku. Abrahantaj kamachisninman nerqa: “Kayllapi qhepakuychej, wawaywan risaj Diosman qʼolachina jaywanata jaywanaypaj”, nispa. Abrahanqa cuchillota aparqa, wawantaj llantʼata qʼeperqa. Rishajtinkutaj Isaac taporqa: “¿Maytaj oveja qʼolachinapajri?”, nispa. Abrahamtaj nerqa: “Jehová Dios maymantapis rikhurichimullanqa wawáy”, nispa.

Orqoman chayaspataj altarta ruwarqanku. Abrahantaj Isaacta altarman siriykucherqa makisninta, chakisnintawan wataykuspa.

Abrahán cuchillota oqharishajtin, Diospa angelnin cielomanta nimorqa: “Abrahán, ama imanaychu wawaykita. Kunanqa yachani Diospi creesqaykita, imaraykuchus mana uj kʼata wawaykita michʼakunkichu qonawaykipaj”, nispa.  Chantá Abrahanqa rikorqa uj carnerota wajrasninmanta juchʼuy sachʼas ukhupi japʼisqata. Isaacta phaskaraspataj, paypa cuentanmanta chay carnerota qʼolacherqa.

Chaymantapacha Jehová Diosqa Abrahán amigon kasqanta nerqa. Imaraykuchus wakin kamachiykunata mana allinta entiendespapis, Diospa tukuy ima nisqanta kasukorqa.

Jehová Diosqa watejmanta Abrahanman nerqa: “Noqa bendecisqayki, mirayniykitapis ashkhata mirachisaj”, nispa. Chantá Dios nillarqataj: “Qannejtataj tukuy jallpʼantinmanta kasukoj runaspaj sumaj imasta ruwasaj”, nispa.