Moisesqa faraonman nerqa manaña ujtawan uyanta rikunanta. Niraj ripushaspataj nerqa: “Chaupi tutata Egiptomanta tukuy familiaspa kuraj qhari wawanku wañonqa. Faraonpa kuraj kaj wawanmantapacha, esclavospa wawasninkukama”, nispa.

Jehová Diosqa israelitasman nerqa: “Uj sumaj mikhunata wakichiychej. Uj watitayoj corderituta chayri chivituta ñakʼaychej. Yawarnintataj punku sayanta kʼaspisman chʼajchuychej. Chay aychasta ninapi kankaspa mana levadurayoj tʼantatawan mikhuychej. Llojsipunaykichejpaj pʼachallisqas, jukʼutasniyojtaj kaychej. Kunan tuta kacharichisqaykichej”, nispa. Israelitasqa chayta uyarispa maytachá kusikorqanku.

Chaupi tutata Jehová Diospa angelnenqa, Egiptomanta tukuy wasisman rerqa. Mana yawarwan chʼajchusqachu karqa chay wasispeqa kuraj kaj qhari wawata wañucherqa, yawarwan chʼajchusqa wasispitaj mana. Egiptomanta tukuy runaspa kuraj kaj qhari wawasninku wañorqanku, israelitaspatataj mana.

Faraonqa ni imanakuyta aterqachu wawan wañojtin. Payqa Moisesman Aaronmanwan nerqa: “Ripuychej. Diosniykichejta yupaychamuychej. Animalesniykichejtapis apakapuychej. Llojsiychej kaymanta”, nispa.

 Israelitas killa juntʼa kashajtin Egiptomanta riporqanku familiasninkuwan, ayllusninkuwan khuska. Paykunaqa 600.000 qharis karqanku, mana wawasta, nitaj warmista yupaspa. Ajinata israelitas kacharichisqa karqanku. Waj runaspis paykunawan ripullarqankutaj Diosta yupaychanankupaj.

Israelitasqa Jehová Dios paykunata kacharichisqanta yuyarinankupaj, sapa wata uj sumaj mikhunata wakichinanku karqa. Chaytataj Pascua nispa suticharqanku.