Ashkha israelitasqa, watejmanta santosta yupaychallarqankutaj. Chayrayku Jehová Diosqa paykunata filisteosman jaywaykorqa. Jinapis wakin israelitasqa Jehová Diosta munakullarqankupuni. Paykunamanta ujnintaj Manoa karqa. Paywan warminwanqa mana wawasniyojchu karqanku. Uj kutitaj, Diosqa angelninta Manoaj warminman kacharqa. Chay angelqa nerqa: “Qhari wawayki tiyapusonqa. Paymin israelitasta filisteosmanta kacharichenqa. Payqa nazareo kanqa”, nispa. Nazareosqa Diospa tʼaqasqa runas karqanku, nitaj chujchankuta kʼutuchikojchu kanku.

Tiemponmanqa Manoaj wawan nacekorqa, sutintaj karqa Sansón. Pay wiñarqojtin Jehová Diosqa kallpata qorqa. Chayrayku payqa makillanwan leonta wañurpachiyta atej. Uj kutitaj, sapitallan 30 filisteosta wañucherqa. Chayrayku filisteosqa Sansonta mayta chejnikorqanku, wañuchiytataj munarqanku. Uj chʼiseqa, Sansón Gaza llajtapi puñoj qhepakorqa. Enemigosnintaj llajta punkupi suyaykorqanku qʼayantin paqarin wañuchinankupaj. Sansontaj chaupi tutata jatariytawan llajtaj punkusninta sikʼirparerqa, qʼepiriykukuspataj Hebrón qayllapi kashan chay orqoman apakaporqa.

Chantá filisteosqa Sansonpa munasqan Dalilawan parlaj rerqanku, nerqankutaj: “Imajtinchus Sansón may kallpayoj kasqanta willawajtiykoqa, ashkha qolqeta pagasqayku. Payta carcelman wisqʼaykuyta munayku”, nispa. Dalilaqa qolqerayku “ya” nerqapacha. Sasonqa Dalilaman mana willayta munarqachu imajtinchus may kallpayoj kasqanta. Jinapis Dalila kutin kutita chayllatapuni tapusqanrayku uman nanarqa. Chayrayku nerqa: “Ni jaykʼaj chujchasniyta kʼutuwarqankuchu, nazareo kasqayrayku. Sichus kʼutuwankuman chayqa, kallpay chinkanman”, nispa. Sansonqa chayta willaspa mayta pantaykorqa.

 Dalilaqa chayta chay rato filisteosman willacherqa. Chantá Sansonta chaki moqosnin patapi puñurpacherqa, uj runawantaj chujchasninta kʼutucherqa. Chantá qhaparerqa: “Sansón, filisteos kaypi kashanku”, nispa. Sansontaj rijchʼarerqa, repararqataj manaña kallpan kasqanta. Filisteostaj Sansonta japʼispa ñawisninta orqhorqanku, carcelmantaj wisqʼaykorqanku.

Uj kuti, ashkha filisteos tantakorqanku Dagón nisqa diosninkoj templonpi. Paykunaqa nerqanku: “Diosninchej jaywaykuwanchej Sansonta. Orqhomuychej paymanta alqochakunapaj”, nispa. Chantá Sansonta asipayarqanku wasej sayantasnin chaupiman sayaykuchispa. Sansontaj jatunmanta nerqa: “Jehová Diosníy, mañarikuyki uj kutillatawanpis kallpata qorinawaykita”, nispa. Sansonpa chujchanqa ñapis wiñasqaña. Chayrayku temploj sayantasninta tukuy kallpanwan ñitʼispa urmaykucherqa. Tukuy chaypi kajkunataj wañorqanku, Sansonpis wañullarqataj.