Moisesqa ashkha watasta israelitasta yanaparqa. Jinapis viejituña kasharqa. Jehová Dios payman nerqa: “Mana qanchu israelitasta Sumaj Jallpʼaman pusaykunki. Jinapis chay jallpʼata rikojta saqesqayki”, nispa. Chantá Moisesqa Diosman nerqa israelitasta yanapananpaj waj runata ajllananta. Jehová Diostaj nerqa: “Josuewan parlamuy, niytaj payta ajllasqayta”, nispa.

Moisesqa israelitasman nerqa: “Jehová Diosqa Josueta ajllan Sumaj Jallpʼaman pusaykusunaykichejpaj. Imaraykuchus pisimantawan wañupusajña”, nispa. Josuemantaj nerqa: “Ama manchikuychu, Jehová Dios yanapasonqa”, nispa. Chantá Moisesqa Nebo orqoman rerqa. Diostaj payman rikucherqa Abrahanman, Isaacman, Jacobman qonanta nerqa chay jallpʼata. Moisesqa 120 watasniyoj wañuporqa.

Jehová Diosqa Josueman nerqa: “Jordán mayuta chimpay, Canaanmantaj yaykuy. Moisesta jina noqa yanapasqayki. Leyniytaqa sapa día leeypuni. Ama manchachikuychu, nitaj qʼewakuychu. Tukuy ima nisqayta ruway”, nispa.

 Josueqa iskay wateqajkunata Jericoman kacharqa. Qhepan capitulopitaj yachakusun imachus Jericopi kasqanmanta. Chay wateqajkunaqa kutimuytawan nerqanku: “Canaanman yaykunallaña, runasqa may mancharisqa kashanku”, nispa. Qʼayantintaj Josueqa israelitasta nerqa puririnankupaj wakichikunankuta. Chantá Diospa trato ruwasqan arcata apaj sacerdotesta ñaupajta Jordán mayuman kacharqa. Chay mayumanta yakoqa wasaykusharqa. Sacerdotes saruykusqankutawantaj, yakoqa kikinpi sayaykorqa, mayutaj chʼakiporqa. Chantá sacerdotesqa khuskan mayupi qhepakorqanku tukuynin israelitas chimpanankukama. Chayta rikuspa, israelitasqa imatachus Jehová Dios Puka qochapi ruwasqanta yuyarikorqankuchá.

Israelitasqa Sumaj Jallpʼaman chayaytawan wasista ruwakuyta, llajtastapis sayarichiyta aterqanku. Chantapis tarpuyta, huertastapis churayta aterqanku. Chay jallpʼa may sumajpuni kasqanrayku nikoj lechewan abeja miskʼiwan yaku jina puririshasqanta.