Saúl wañupusqantawan, Davidñataj rey karqa. Payqa 30 watasniyoj karqa. Aswan qhepamantaj Davidqa kamachina wasin altos patapi uj chʼisi puriykachasharqa. Jinallapitaj uj kʼachita warmita rikorqa. Chantá payqa yacharqa chay warmej sutin Betsabé kasqanta, Uriaspa warmintaj kasqanta. Davidqa chay warmita kamachina wasinman pusachimuspa paywan puñuykorqa. Chay warmitaj onqoj rikhurerqa. Davidqa ruwasqanta pakayta munaspa soldadosninta kamachejman nerqa: “Uriasta maqanakupi ñaupajman churaychej, sapantataj saqerpariychej”, nispa. Ajinapi Uriasqa chay maqanakupi wañorqa, Davidtaj Betsabewan casarakorqa.

Jehová Diostaj chayta qhawamusharqa. Chayrayku profeta Natanta Davidman kacharqa. Natantaj Davidman nerqa: “Uj qhapaj runa ashkha ovejasniyoj karqa, uj wajcha runataj uj kʼata munasqa ovejitallayoj. Qhapaj runatajrí chay wajcha runaj ovejitanta ñakʼacherqa”, nispa. Davidtaj mayta phiñakuspa nerqa: “Chay runaqa wañunan tiyan”, nispa. Natantaj nerqa: “Qanmin chay runaqa kanki”, nispa. Davidtaj may llakisqa nerqa: “Jehová Diospa contranpi juchallini”, nispa. Davidqa juchanrayku mayta sufrerqa, jinallataj familianpis. Jehová Diosqa Davidta castigarqa, jinapis llampʼu sonqo kasqanrayku kausajta saqerqa.

Davidqa uj templota Jehová Diospaj ruwayta munarqa. Jehová Diostajrí Davidpa wawan Salomonta ajllarqa templota ruwananpaj. Davidtaj Salomón templota ruwananpaj tukuy imata  wakicherqa, nerqataj: “Diospa templonqa may kʼachitupuni kanan tiyan. Salomonqa wawallaraj, chayrayku tukuy imata wakichipusaj”, nispa. Davidqa templopaj ashkha qolqeta churarqa, sumaj trabajadorestataj maskʼarqa. Chantapis qorita, qolqe metalta tantarqa. Cedro maderatapis Sidonmanta, Tiromanta apamorqa. Viejituña kashaspataj wawanman temploj planosninta jaywarqa, nerqataj: “Jehová Diosmin kayta qosunayta niwarqa. Pay yanapasonqa. Ama manchachikuychu. Kallpachakuy, ruwaj churakuypacha”, nispa.