Rey Saulpa kuraj wawan Jonatanqa, wapu soldado karqa. Davidtaj nerqa: “Jonatanqa ankamanta aswan usqhayta phawaj, leonmantapis aswan kallpayoj karqa”, nispa. Uj kuti, Jonatanqa 20 filisteo soldadosta uj orqopi rikorqa. Armasninta apaykachapojtataj nerqa: “Filisteos wicharimuychej niwajtinchejqa maqanakoj risunchej. Chayqa Jehová Diosmanta señal kanqa”, nispa. Filisteostaj qhaparimorqanku: “Maqanakoj wicharimuychej”, nispa. Chayrayku wicharispa chay soldadosta wañuchimorqanku.

Jonatanqa kuraj kasqanrayku tatan wañupojtin rey kanan karqa. Jinapis yacharqa Jehová Dios Davidta rey kananpaj ajllasqanta, nitaj paymanta envidiakorqachu. Astawanpis Davidwan sumaj amigos karqanku, yanapanakunankutataj ninakorqanku. Chayrayku  Jonatanqa Davidman qoporqa ropan patapi qhatakunanta, espadanta, flechana arconta, chumpintawan.

David Saulmanta ayqekushajtin, Jonatanqa Davidman nimorqa: “Ama manchachikuychu. Jehová Dios ajllasunki rey kanaykipaj, chaytataj tataypis yachan”, nispa. Tukuypis munasunman amigosninchej Jonatán jina kanankuta.

Jonatanqa ashkha kutispi Davidta yanapasqanrayku casi wañorqa. Payqa yacharqa Davidta tatan wañuchiyta munasqanta. Chayrayku tatanman nerqa: “Davidta wañuchispaqa juchallinki. Payqa mana imanasunkipischu”, nispa. Saultaj mayta phiñakorqa. Aswan qhepamantaj paywan Jonatanwan uj maqanakupi wañorqanku.

Jonatán wañupusqanmanta qhepaman, Davidqa Jonatanpa wawan Mefi-bosetta maskʼarqa. Tariytawantaj nerqa: “Tatayki sumaj amigoy karqa. Chayrayku wañupunaykikama qhawasqayki. Kamachina wasiypi tiyakunki, noqawan khuskataj mikhunki”, nispa. Davidqa mana ni jaykʼaj amigon Jonatanmanta qonqaporqachu.