Salomón Jehová Diosta yupaychashajtenqa, israelitas allinta kausakorqanku. Chantá Salomonqa waj llajtayoj warmiswan casarakorqa. Chay warmisnintaj waj diosesta yupaychaj kanku. Ajinamanta Salomonqa pisimanta pisi llulla diosesta yupaycharqa. Chayrayku Jehová Diosqa phiñakuspa nerqa: “Gobiernoykita familiaykimanta qhechusaj, iskaymantaj tʼaqasaj. Jatun kajtaqa ujnin kamachiykiman qosaj, juchʼuy kajtataj familiayki kamachenqa”, nispa.

Jehová Diosqa profeta Ahiasta kacharqa Salomonpa kamachin Jeroboamman. Ñanpi paywan tinkuspataj, Ahiasqa mantonta chunka iskayniyojman llikʼirarqa. Jeroboamtataj nerqa: “Jehová Diosqa Salomonpa familianmanta gobiernota qhechuspa iskayman tʼaqanqa. Japʼikuy kay llikʼisqamanta chunkata, imajtinchus qanman chunka ayllusta qosonqa”, nispa. Salomontaj chayta yachaytawan, Jeroboamta wañuchiyta munarqa. Jeroboamtaj Egiptoman ayqekorqa. Salomón wañupojtintaj wawan Roboam gobernarqa, Jeroboamtaj Israelman kutiporqa.

 Israelmanta kurajkunaqa Roboamta nerqanku: “Kʼacha kanki chayqa, runasqa qanta sirvisonqanku”, nispa. Joven amigosnintaj nerqanku: “Runasta ñakʼarichiy, sinchʼitataj trabajachiy”, nispa. Roboam chayta kasojtin, runasqa paypa contranpi oqharikuspa, Israelmanta chunka ayllusta gobernananpaj Jeroboamta churarqanku. Chay chunka ayllustaj Israel sutiwan rejsisqa karqa. Iskay ayllustajrí Judá sutiwan rejsisqa karqa, Roboamtataj kasukorqanku. Ajinamanta Israelpa 12 ayllusnin iskayman tʼaqakorqanku.

Jerusalenqa Judapi kasharqa. Jeroboamtaj mana munarqachu runas Jehová Diosta yupaychaj chayman rinankuta. Imajtinchus payqa yuyarqa, runas Roboamman kutiripunankuta. Chayrayku iskay waka uñasta ruwarqa, runastataj nerqa: “Jerusalenqa karupi kashan. Chayrayku kayllapi kay iskay waka uñasta yupaychaychej”, nispa. Runastaj payta kasuspa Jehová Diosmanta ujtawan karunchakorqanku.