Asiriaj ujnin llajtanqa Nínive karqa. Chay llajtapi runasqa may sajras karqanku. Chayrayku Jehová Diosqa profeta Jonasta chayman kacharqa. Paytaj chay runasman ninan karqa: “Sajra kausayniykichejta saqepuychej”, nispa. Jonastajrí Niniveman rinanmantaqa, uj barcoman wichariykuspa Tarsisman ayqerqa.

Qochapitaj ujllata wayrayta qallarerqa, barcota purichejkunataj mayta mancharikorqanku. Chayrayku diosesninkuman qhaparikuspa ninakorqanku: “¿Imajtintaj kay jinapi rikukunchejri?”, nispa. Jonastaj nerqa: “Noqa juchayoj kani. Jehová Diosta mana kasuspa ayqeshani. Yakuman wijchʼuykuwaychej, wayrataj thañenqa”, nispa. Paykunataj mana munarqankuchu. Jonasrí “wijchʼuykuwaychej” nillarqapuni, chayraykutaj wijchʼuykorqanku. Wayrataj thañerqa.

Jonasqa wañunanta yuyarqa. Yakuman astawan chinkaykushaspataj orakorqa. Jehová Diostaj Jonás mana wañunanpaj uj jatun pescadowan oqoykucherqa. Jonasqa pescadoj wijsan ukhupi orakorqa: “Diosníy, tukuy ima nisqaykitapuni ruwasaj”, nispa. Payqa pescadoj wijsanpi kinsa diata karqa. Chantá Jehová Diosqa chay jatun pescadota kamacherqa, Jonasta yaku kantuman lanzarparimunanta.

Jehová Diosqa Jonasta salvarqa. Jinapis watejmanta Niniveman kacharqa. Chay kutipitaj kasukorqa. Niniveman chayaspataj, chay sajra runasman nerqa: “Jehová Diosqa Nínive llajtata  40 diasmantawan chinkachenqa”, nispa. Ninivitastajrí willasqanta uyarispa, pesachikorqanku, kausayninkutapis cambiarqanku. Ninivemanta reyqa runasman nerqa: “Diosmanta mañakuychej, pesachikuychejtaj, ichapis ajinamanta mana chinkachisqachu kasun”, nispa. Jehová Diostajrí pesachikusqankuta rikorqa, nitaj Nínive llajtata chinkacherqachu.

Chayraykutaj Jonasqa mayta phiñakorqa. Jehová Diostaj Jonaswan pacienciakorqa, kʼachataj karqa. Jonastajrí mana ninivitasmanta khuyakorqachu. Astawanpis llajtaj jawanpi mathi yuraj llanthunpi jistulla chukurerqa. Chay yura chʼakipojtintaj Jonasqa mayta rabiakorqa. Chayrayku Jehová Diosqa nerqa: “¿Chay yuratachu astawan munakunki ninivitasmanta nisqaqa? Noqaqa chay runasmanta khuyakorqani, chayrayku mana chinkacherqanichu”, nispa. Chaywan Jehová Diosqa Jonasman yachacherqa, ima plantamanta nisqapis ninivitasta astawan munakusqanta.