5 YACHAQANA
¿Imatataj Diosninchej runaspaj munan?
1. ¿Imapajtaj Dios jallpʼata ruwarqa?
Jehová Diosqa jallpʼata ruwarqa runas chaypi tiyakunankupaj. Adanwan Evawanqa, mana cielopi kausakunankupajchu ruwasqa karqanku. Diosqa angelesta cielopi kausakunankupaj ruwarqa (Job 38:4, 6, 7). Chayrayku ñaupaj kaj qharita ruwaytawan Edén huertaman churarqa (Génesis 2:15-17). Diosqa Adanta, miraynintapis, jallpʼapi wiñaypaj kusisqa kausanankupaj ruwarqa. Salmo 37:29; 115:16 leey.
Qallariypeqa jallpʼantinmanta uj lugarlla kʼacha huerta karqa. Adanwan Evawanqa wawasniyoj kananku karqa. Wawasninkoqa kay jallpʼaman juntʼananku karqa, uj kʼacha huertamantaj tukuchinanku karqa (Génesis 1:28). Jallpʼaqa sumaj sayachisqa kasqanrayku, ni jaykʼaj chinkachisqachu kanqa. Salmo 104:5 leey.
Kay ¿Imapajtaj Dios jallpʼata ruwarqa? nisqa videota qhawariy.
2. ¿Imaraykutaj jallpʼanchej mana uj kʼachitu lugarchu?
Adanwan Evawanqa, Diosta mana kasukusqankurayku Edén huertamanta qharqochikorqanku. Chayrayku kʼacha huerta chinkaporqa, nitaj pi ujtawan sayarichiyta atinchu. Biblia nin jina, Diosqa kay jallpʼata sajra runaspa “makinkuman churan” (Job 9:24). Génesis 3:23, 24 leey.
Jehová Diosqa tukuy atiyniyoj kasqanrayku imatachus qallariypi nisqanta juntʼanqapuni (Isaías 45:18). Arí, payqa kay jallpʼata uj kʼachitu lugarman tukuchenqa, chaypi wiñaypaj kausakunanchejpaj. Salmo 37:11, 34 leey.
3. ¿Imaynatá kay jallpʼa uj paraisoman tukonqa?
Jesusqa kay jallpʼata kamachimuspa paraisoman tukuchenqa. Diospa enemigosnintataj angelespa yanapayninwan Armagedón maqanakuypi chinkachenqa. Chantá Satanasta waranqa watasta wisqʼaykonqa. Diospa kamachisnintajrí, mana chay maqanakuypi wañonqankuchu, imaraykuchus Jesús paykunata jarkʼanqa. Ajinamanta paykunaqa paraisopi kusisqas kausakuyta atenqanku. Apocalipsis 20:1-3; 21:3, 4 leey.
4. ¿Maykʼajtaj llakiykuna chinkachisqa kanqa?
¿Maykʼajtaj Diosninchej sajra ruwaykunata chinkachenqa? Jesusqa chayta yachanapaj uj ‘señalta’ qorqa. Jesús nisqanman jinataj, kay tiempopi sajra ruwaykuna mayta yapakushan. Chaytaj rikuchiwanchej ‘kay mundoj imasninpa tukukuynin’ tiempopi kausakushasqanchejta. Mateo 24:3, 7-14, 21, 22 leey.
Jesusqa kay jallpʼata 1.000 watasta kamachimuspa tukuy llakiykunata chinkachenqa (Isaías 9:6, 7; 11:9). Payqa kuraj kaj sacerdote kanqa, kasukojkunaj juchasninkutataj pichanqa. Arí, Diosqa onqoyta, machuyayta, wañuyta ima, Jesusnejta chinkachenqa. Isaías 25:8; 33:24 leey.
5. ¿Pikunataj paraisopi kausakonqanku?
Uj Tantakuna Wasipi Diosta kasukoj runas tantasqa kashanku. Ajinata tantakuspataj Diosta kusichiyta yachakunku
Diosta kasukojkuna (1 Juan 2:17). Jesusqa llampʼu sonqo runasta maskʼamunankuta yachachisqasninman nerqa. Yanapanankutaj karqa Diospa ñaupaqenpi allinpaj qhawasqa kanankupaj. Kunanpis Jehová Diosqa, may chhika runasta paraisopi kausanankupaj wakichishan (Sofonías 2:3). Jehovaj testigosninpa tantakuyninkuman rejkunaqa, sumaj tatas, allin qosas chayri allin warmis kayta yachakunku. Familiasqa Diosta khuska yupaychanku, yachakunkutaj sumaj willaykuna kausayninkupi yanapasqanta. Miqueas 4:1-4 leey.
