Jehovata riqsiwaq Bibliata ñawirispa. Diosqa unayña akllarqa wakin qharikunata paypa yuyayninta qillqanankupaq. Chay qillqakunataqa Bibliatajina riqsinchik. Kunanqa, Jehovata riqsikuwaq Bibliata ñawirispa. Chaypi Jehovap rimaynin utaq willaynin tarikun, chayrayku, Bibliataqa Diospa Rimaynintajina riqsinchik. Bibliap nisqanpi iñiyta atiwaq, imaptinchus Jehovaqa mana jaykʼaq llullakunchu. “Mana jaykʼaj llullakoj Diosqa” (Hebreos 6:18). Jinamanta, Diospa qillqasqanpiqa chiqa kaq tarikun (Juan 17:17)..

Bibliaqa, Diospa sumaq qusqan tukuy ñuqanchikpaq. Juk munakuq tata wawankunapaq cartata qillqasqanjina. Diospa simi qusqanmanta parlawanchik, imaynatá Jallpʼamanta tʼukunapaqjina juk paraíso tʼikapachata ruwanqa. Imatachus Dios juntʼa sunqu wawankunapaq ruwarqa, ruwachkan, ruwanqa ima niwanchik. Chantapis, chʼampayninchikta allinchayta yanapawanchik, kusiyta taripaytapis (2 Timoteo 3:16, 17).

 Jehovamanta sutʼinchaqkuna Diospa masinkuna kanku; Bibliap yachachisqanta umalliyta yanapasunqanku. Bibliamanta yachakuyta munasqaykita nillay. Mana imata mañaspalla yachachisunqanku (Mateo 10:8). Chantapis, tantakuykunaman riyta atiwaq. Tantakuy Wasi sutichasqapi kayqa ruwakun. Kay tantakuykunaman riptiyki, Diosmanta yachakusqayki yapakullanqapuni.

Diosta riqsiyta atiwaq ruwasqanpi tʼukurispa. Bibliaqa nin: “Dios janaj pachata kay pachatawan ruwarqa” (Génesis 1:1, Qheshwa Biblia, 1986). Jehová “janaj pachata” ruwachkaptin, Intitapis ruwallarqataq. Kayri, ¿imatataq Diosmanta yachachiwanchik? Jehová achkha atiyniyuq kasqanta. Paylla Intita kay chhika atiyniyuqta ruwayta atinman. Jehová yachayniyuq kasqanta rikuchillawanchiktaq, yachayniyuqpaqlla Intita ruwayqa, imaraykuchus ruphayta kʼanchayta mana jaykʼaq thasnukuqta quwanchik.

Jehovap ruwasqan munakuwasqanchikta rikuchiwanchik. Kay Jallpʼamanta tukuy imaymana puquykunapi, tʼukuriy. Jehovaqa juk laya puquyllata quwasunman karqa, utaq nimayqinta. Chaywanpis, tukuy laya puquykunata, imaymana riqchʼakuqta, imaymana muqʼiriyta, imaymana malliriyta ima quwanchik. Kaykunaqa Jehovap munakuyninta, may qukuq kasqanta, kʼacha kayninta ima rikuchiwanchik (Salmo 104:24).