Jehová Diosta munakojkunapaj:

Jesús nerqa: “Cheqa kajtataj rejsinkichej, chay cheqa kajtaj kacharichisonqachej”, nispa (Juan 8:32). Bibliamanta cheqa kajta yachakuspa maytachá kusikorqanki. Chantapis ichá mayta tʼukorqanki kay sajra mundopi kausakuspapis cheqa kajta yachakuyta atisqaykimanta (2 Timoteo 3:1).

Jehová Diosqa cheqa kajta yachakunanchejta munan. Noqanchejtaj cheqa kajta wajkunaman willariyta munanchej, paykunata munakusqanchejrayku. Jinapis Diosta sirvinapajqa mana chayllatachu ruwana tiyan. Manaqa Bibliaj yuyaychaykunasninta jatunpaj qhawasqanchejrayku, Bibliaj nisqanman jina kausakunapaj kallpachakuna tiyan. Jesusqa yachacherqa imaynatachus Diosta munakusqanchejta. Pay nerqa: “Kamachisqasniytachus juntʼankichej chayqa, munakuyniypi kallankichejpuni, imaynatachus noqapis Tataypa kamachisqasninta juntʼani, munakuyninpitaj kallanipuni, ajinata”, nispa (Juan 15:10).

Jesusqa Tatanta munakusqanrayku, paypa tukuy ima nisqanta ruwarqa. Jesús jina kasun chayqa, Jehová Dios munakuwasun, kusisqataj kasun. Jesús nerqa: “Qankunaqa chay imasta yachankichejña, chaykunata ruwaspataj kusisqa kankichej”, nispa (Juan 13:17).

Munayku kay librowan yanapachikunaykita Bibliaj nisqanman jina kausakunaykipaj, Diospa amigontaj kanaykipaj. Diosmanta mañakuyku payta astawan munakunaykipaj, paypa munakuyninpi kanallaykipajpuni. Ajinamanta wiñay kausayta tarinaykipaj (Judas 21).