1, 2. ¿Imatá ruwana tiyan Diospa munakuyninpi kanapaj?

¹ TUKUYPIS sumaj kallpayoj, sanitostaj kayta munanchej. Chayrayku sumajta alimentakunchej, ejerciciosta ruwanchej. Chayta ruwayqa mana atikullanchu, jinapis chayqa allinninchejpaj. Kunantaj imapiwanchus kallpachasqas, sanitostaj kayta munasqanchejta yachakuna.

² Jehová Diosta rejsiyta qallarejtinchejñapis, amigosnillanpuni kanapaj kallpachakuna tiyan. Jesuspa yachachisqan Judasqa cristianosman nerqa Diospa munakuyninpi kanallankutapuni. Chayta ruwanankupajtaj yuyaycharqa: “Diospi creesqaykichejpi kallpachakuychej”, nispa (Judas 20, 21). Kunantaj yachakuna imaynatachus creesqanchejpi kallpachakunata.

3. ¿Imatataj Satanás yuyachiyta munawanchej Diospa kamachiykunasninmanta?

³ Diosta kasukuy allinninchejpaj kasqanmanta ama iskayrayanachu. Satanasqa yuyachiyta  munawanchej Diospa kamachiykunasninta kasukuy mana atikusqanta. Chantapis yuyachiyta munawanchej noqallanchejmanta imachus allin, imatajchus mana allinchu kasqanta ajllaspa kusisqa kananchejta. Satanasqa qallariymantapacha runasta ajinata yuyachiyta munarqa (Génesis 3:1-6). Kunanpis ajinallatapuni runasta yuyachiyta munashan.

4, 5. ¿Imaynatataj Diospa kamachiykunasninta, yuyaychaykunasninta qhawanchej tiyan?

⁴ Satanasqa pantasqa kashan. Imajtinchus Jehová Diosqa imatapis atisqanchejman jinalla mañawanchej. Chayta entiendenapaj uj kʼachitu lugarman puriykachaj risqaykipi piensariy. Chaypi puriykachashaspaqa ichapis rikuwaj uj lugarta jatuchaj mallaswan muyuykuchisqankuta. Chayta rikuspa ichapis yuyawaj: “Imapajtaj kayta churankuri”, nispa. Jinallapitaj ichá reparawaj uj león chay ukhupi kashasqanta. Chay leonta rikuspaqa ichapis niwaj: “Walejtachá kayman mallasta churarqanku, manaqa león mikhuykuwanman karqa”, nispa. Jehová Diospa kamachiykunasnenqa chay malla jina, Satanastaj chay león jina. Chayrayku Biblia niwanchej: “Yuyayniykichejpi kallaychejpuni, rijchʼarisqastaj kaychej. Enemigoykichej Kuraj Supayqa, qhaparirishaj león jina muyuykachashasunkichej, mayqellantapis oqoykuyta munaspa”, nispa (1 Pedro 5:8).

⁵ Jehová Diosqa allinta kausakunanchejta  munan. Payqa mana munanchu Satanás engañanawanchejta. Chayrayku kamachiykunata, yuyaychaykunata ima qowanchej Satanasmanta jarkʼakunanchejpaj, kusisqataj kananchejpaj (Efesios 6:11). Santiago qhelqarqa: ‘Pitajchus allinta qhawaykun Diospa may sumaj leyninta, mayqenchus kacharichiyta apamun chayta, kasukuntaj chayqa, chayta ruwaspa kusisqa kanqa’, nispa (Santiago 1:25).

6. ¿Imapi tʼukurispataj astawan sinchʼi creeyniyoj kanchej?

⁶ Jehová Diosta kasukuspaqa aswan sumajta kausakusun, paymantaj astawan qayllaykusun. Payqa niwanchej sapa kuti paywan parlarinata. Chayta kasukuytaj allinninchejpaj (Mateo 6:5-8;  1 Tesalonicenses 5:17). Chantapis Jehová Diosqa kamachiwanchej tantakuykunaman rispa payta yupaychanata, hermanosninchejwan purajmanta kallpachanakunata, paymanta willamunata, yachachimunata ima. Chayta kasukuspataj kusisqa kanchej (Mateo 28:19, 20; Gálatas 6:2; Hebreos 10:24, 25). Diospa kamachiykunasninta kasukusqanchejrayku imastachus japʼisqanchejpi tʼukurispaqa, astawan sinchʼi creeyniyoj kanchej, Jehová Diosta kasukuy may sumaj kasqantataj reparanchej.

7, 8. ¿Imataj yanapawasun jamoj llakiykunamanta mana phutikunapaj?

⁷ Aswan qhepaman sinchʼi llakiykunapi rikukunanchejta yachaspa ichapis phutikunchej. Ajinata llakikuspaqa ama qonqanachu Jehová Dios niwasqanchejta: “Noqamin Señorniyki Tata Dios kani; noqa yachachiyki imachus qampaj allin kasqanta. Noqa may ñantachus purinaykita rikuchiyki. Kamachisusqaytachus kasuwankiman karqa chayqa, allin kawsayniykeqa mayu jina kanman karqa, cheqan kayniykitaj mama qochaj yaku oqharikusqasnin jina kanman karqa”, nispa (Isaías 48:17, 18).

⁸ Jehová Diosta kasukusunchej chayqa, allin kausayninchejqa mana jaykʼaj chʼakej mayu jina kanqa, cheqan kayninchejtaj mama qochaj yaku oqharikusqasnin jina kallanqapuni. Ima llakiypi rikukuspapis Jehová Diosta kasukuyta atisun. Biblia nin: “Llakiyniykita Tata Diosman saqey. Payqa  sinchʼita sayachisonqa. Payqa cheqan runata ni jaykʼaj urmajta saqenqachu”, nispa (Salmo 55:22).

9, 10. ¿Imaynataj wiñay tukusqa cristiano?

⁹ Jehová Diosman astawan qayllaykuspaqa, “wiñay tukusqa” cristianosman tukusun (Hebreos 6:1). Chanta, ¿imaynataj wiñay tukusqa cristiano?

¹⁰ Ashkha watastaña Diosta sirvispapis, mana nisunmanchu wiñay tukusqa cristianos kasqanchejta. Astawanpis wiñay tukusqa kanapajqa, Jehová Diospa sumaj amigon kananchej tiyan, pay jina yuyanapajtaj kallpachakuna tiyan (Juan 4:23). Apóstol Pablo nerqa: “Aychaj munayninman jina kausajkunaqa, aychaj imasnillanpi yuyanku. Diospa atiyninman jina kausajkunarí, Diospa imasninpi yuyanku”, nispa (Romanos 8:5). Wiñay tukusqa cristianoqa mana kusirikuyllapichu, nitaj qhapajyayta maskʼayllapichu yuyan. Astawanpis Diosta sirviyta ñaupajman churan, allin kajtapunitaj kausayninpi ajllan (Proverbios 27:11; Santiago 1:2, 3 leey). Payqa mana saqenchu wajkuna sajra imasta ruwachinankuta. Imajtinchus yachan imachus allin kasqanta, chaytapunitaj ruwananta nin.

11, 12. 1) ¿Imatataj reparayta atinku wiñay tukusqa runas? 2) ¿Ima kikinchaytaj yanapawasunman wiñay tukusqa cristiano kanapaj?

¹¹ Wiñay tukusqa cristianos kanapajqa kallpachakunanchej tiyan. Pablo nerqa: “Khamuna mikhunatajrí, wiñay tukusqa runaspaj. Paykunaqa  yuyayninkuta sapa día yachachisqankurayku, imachus allin, imatajchus mana allin kasqanta reparanankupaj wakichisqa kanku”, nispa (Hebreos 5:14). Kay versiculopi “wakichisqa kanku” nispa nikusqanta astawan entiendenapaj, uj carrerapi correjkunamanta parlarina.

¹² Carreraspi correyta munajkunaqa tukuy kallpankuta churaspa sapa día wakichikunku. Mana pipis correyta yachajpachachu nacekun. Nacekuspaqa ni imata oqhariyta atinchejchu, nitaj puriytapis atinchejchu. Jinapis wiñasqanchejman jina puriyta yachakunchej, wakin imastapis apaykachayta atinchej. Chantapis wakichikuspaqa sumajta correyta yachakusunman. Ajinallatataj wiñay tukusqa cristianos kanapajqa kallpachakuna, tiempochakunataj tiyan.

13. ¿Imataj yanapawasun Jehová Dios jina yuyanapaj?

¹³ Kay libropi yachakorqanchej Jehová Dios jina yuyayta. Chantapis yachakullarqanchejtaj kamachiykunasninta jatunpaj qhawayta ima. Chayrayku niraj imatapis ruwashaspaqa, ñaupajta piensarinchej Bibliaj kamachiykunasninpi, yuyaychaykunasninpi ima. Chantá imaynatachus chayman jina ruwanapi, imasta ruwanatachus Dios munasqanpi ima piensarinchej (Proverbios 3:5, 6; Santiago 1:5 leey).

14. ¿Imatataj ruwasunman sinchʼi creeyniyoj kanallapajpuni?

¹⁴ Sinchʼi creeyniyoj kanapajqa kallpachakunallapuni tiyan. Imaynatachus sumajta alimentakuspa kallpayoj kanchej,  ajinallatataj Jehová Diosmanta yachakuspapis creeyninchejpi kallpachasqa kanchej. Bibliamanta yachakuyta qallarishaspaqa, Jehová Diosmanta, kamachiykunasninmantawan wakin imasta yachakorqanchej. Jinapis tiempo pasasqanman jina, astawan yachakunanchej tiyan. Chaymanta Pablo parlasharqa “khamuna mikhunatajrí, wiñay tukusqa runaspaj” nispa. Yachakusqanchejman jina kausakuspaqa, aswan yachayniyojman tukusun. Biblia nin: “Ni aswan munana kajpis yachaywan kikinchakunmanchu”, nispa (Proverbios 4:5, 6; 8:11; 1 Pedro 2:2).

15. ¿Imaraykutaj Jehová Diosta, hermanosninchejtapis munakunanchej tiyan?

¹⁵ Uj runa sanito, kallpayojtaj kashan chayqa, ajinallapuni kananpaj cuidakunallanpuni tiyan. Ajinallatataj wiñay tukusqa cristianopis, Diospa amigollanpuni kananpaj kallpachakunallanpuni tiyan. Pablo nerqa: “Allinta qhawarikullaychejpuni, yachanaykichejpaj creeypi sinchʼitachus manachus sayashasqaykichejta, jinallataj imayna runachus kasqaykichejta yachanaykichejpajpis”, nispa (2 Corintios 13:5). Jinapis mana sinchʼi creeyniyoj kayllatachu necesitanchej. Manaqa kallpachakunallapuni tiyan Jehová Diosta, hermanosninchejtapis astawan munakunapaj. Pablo nerqa: ‘Sichus entiendeyman Diospa tukuy pakasqa yachayninta, manataj munakuyniyojchu kayman chayqa, tukuy ima ruwasqayqa qhasillapaj kanman’, nispa (1 Corintios 13:1-3).

16. ¿Imatataj Satanás yuyachiyta munawanchej?

¹⁶ Satanasqa yuyachiyta munawanchej ni jaykʼaj Jehová Diosta kusichiyta atinanchejta. Payqa munan astawan llakikunanchejta, problemasninchejpis ni jaykʼaj allinchakunanta yuyananchejta. Payqa mana munanchu hermanosninchepi confiananchejta, nitaj kusisqa kananchejtapis (Efesios 2:2). Payqa yachan mana allin imaspi yuyajtinchej astawan llakikunanchejta, Jehová Diosmantataj karunchakunanchejta. Jinapis Diosqa mana llakikunapaj willawanchej aswan qhepaman imatachus japʼinanchejta.

17. ¿Imaraykutaj suyakuyniyoj kasqanchej may sumaj?

¹⁷ Bibliaqa suyakuyninchejta monterawan kikinchan. Monteraqa uj soldadoj umanta maqanakupi kashajtin sumajta jarkʼan. ‘Suyakusqanchej salvaciontaj’ chay montera jina (1 Tesalonicenses 5:8). Jehová Dios imatachus qonawanchejta niwasqanchejpi suyakoyqa, yuyayninchejta jarkʼawanchej, allin imaspi yuyanapajtaj yanapawanchej.

18, 19. ¿Imaynatataj Jesusta kallpacharqa imatachus suyakusqanpi yuyasqan?

¹⁸ Jesustaqa imatachus suyakusqanpi yuyasqan mayta kallpacharqa. Payqa wañuchinankupaj uj chʼisi faltashajtin ashkha llakiykunapi rikukorqa. Paytaqa ujnin amigon traicionarqa, ujnintaj mana rejsisqanta nerqa, waj amigosnintaj saqerpariytawan ayqerikaporqanku. Chantapis llajtamasisnillantaj contranpi sayaykorqanku,  wañuchisqa kanantataj nerqanku. ¿Imataj Jesusta yanaparqa chayta aguantananpaj? Biblia nin: “Payqa ñaupaqenman churasqa karqa chay kusiyrayku, kʼaspipi wañuchisqa kayta aguantarqa mana pʼenqakuspa. Diospa kamachina tiyananpa pañanpitaj tiyaykukorqa”, nispa (Hebreos 12:2).

¹⁹ Jesusqa yacharqa wañupunankama kasukuspa Tatanta jatunchananta, Satanás llulla kasqantataj rikuchinanta. Chayta yachayqa mayta sonqocharqa. Chantapis yachallarqataj pisi tiempomantawan cieloman kutipuspa tatanwan tinkunanta. Paytaqa chaypi yuyay mayta yanaparqa aguantananpaj. Noqanchejpis Jesús jina imatachus suyakusqanchejpi astawan yuyana tiyan. Chaytaj yanapawasun imapi rikukuspapis aguantanapaj.

20. ¿Imatá ruwasunman suyakusqanchejpi yuyanallapajpuni?

 ²⁰ Jehová Diosqa paypi creesqanchejta, aguantasqanchejta ima qhawamushan (Isaías 30:18; Malaquías 3:10 leey). Biblia nin: “Paytaj sonqoykej munasqanta qosonqa”, nispa (Salmo 37:4). Chayrayku amapuni qonqanachu imatachus suyakushasqanchejta. Satanasqa munan chayta qonqapunanchejta. Chantapis yuyachiyta munawanchej Jehovaj nisqasnin ni jaykʼaj juntʼakunanta. Jinapis mana ajinata yuyanapaj kallpachakuna. Imatachus suyakusqanchejmanta iskayrayashanchej chayqa, Jehová Diosmanta yanapata mañakuna. Amapuni qonqanachu Bibliaj nisqanta. Biblia nin: “Ama imamantapis llakikuychejchu. Astawanpis tukuy imapaj  Diospa yanapayninta mañakuychej. Paymantaqa tukuy sonqo mañakuychej, rogakuspa, graciasta qospataj. Diostaj sonqo tiyaykuyta qosonqachej, mayqentachus runas mana entiendeyta atinkuchu, chayta. Ajinamanta payqa sonqoykichejta, yuyayniykichejtawan, Cristo Jesusnejta waqaychanqa”, nispa (Filipenses 4:6, 7).

21, 22. 1) ¿Imaynataj mosoj jallpʼapi kausay kanqa? 2) ¿Imata ruwaytataj munanki Diospa amigon kanaykipaj?

²¹ Aswan qhepaman sumaj kausay kananpi tʼukurinallapuni. Pisi tiempomantawanqa tukuypis Jehová Diosta yupaychasunchej (Apocalipsis 7:9, 14). Mosoj jallpʼapi imaynachus kausay kananpi piensariy. Chaypeqa yuyasqanchejmantapis aswan sumajta kausakusun. Satanás, supaykunasnin, sajra ruwaykuna ima chinkachisqa kanqa. Chantapis manaña kanqachu onqoykuna, nitaj wañuypis. Astawanpis sapa día rijchʼarisun aswan kallpayoj, kusisqataj. Tukuyninchej khuska llankʼasunchej kay jallpʼata uj paraisoman tukuchinapaj. Chantapis sumaj mikhuna kanqa, ni imata manchachikuspataj kausakusun. Runasqa manaña sajraschu kanqanku, manaqa kʼachas. Chaymanta qhepamantaj tukuy runas “Diospa wawasnin jina kacharichisqa kanqanku” (Romanos 8:21).

²² Jehová Diosqa aswan sumaj amigoyki kayta munan. Chayrayku sapa día mayta kallpachakuy payta kasukunaykipaj, paymantaj qayllaykunaykipaj. Tukuypis kallpachakunallapuni Diospa munakuyninpi kanapaj (Judas 21).