1, 2. ¿Imataj yanapasorqa Jehová Diosta munakunaykipaj?

¹ JEHOVÁ DIOSTA munakusqaykirayku, ichapis kausayniykita payman jaywaporqanki. Chantapis ichá Diostaqa sumaj amigoykita jina qhawanki. Jinapis payqa niraj payta munakuyta qallarishajtiyki munakusorqaña. Chayrayku Biblia nin: “Noqanchejqa munakunchej, Dios ñaupajta munakuwasqanchejrayku”, nispa (1 Juan 4:19).

² Jehová Diosninchej munakuwasqanchejrayku imastachus ruwasqanpi piensariy. Payqa kay jallpʼata kʼachituta ruwapuwarqanchej. Chantapis kusisqa kausakunanchejpaj tukuy ima necesitasqanchejta churapuwarqanchej (Mateo 5:43-48; Apocalipsis 4:11). Diosqa munan payman kʼaskasqa kananchejta. Chayrayku pay Bibliata qowanchej paymanta yachakunanchejpaj. Bibliata leespataj payta uyarinchej. Orakojtinchejtaj Dios uyariwanchej (Salmo 65:2). Diosqa yuyaychawanchej, atiyninwantaj kallpachawanchej (Lucas 11:13). Payqa munasqa Wawanta kachamorqa wañuymanta, juchamantawan  kacharichinawanchejpaj (Juan 3:16; Romanos 5:8 leey).

3. ¿Imatataj ruwasunman Dios munakunallawanchejpajpuni?

³ Llakiypipis, phutiypipis qanwanpuni kaj amigoykipi piensariy. Ajina amigoyoj kanaykipajqa maytachá kallpachakorqanki. Jehová Dioswan sumaj amigos kanapajpis, mayta kallpachakuna tiyan. Paywanqa wiñaypaj amigos kayta atisunman. Chayrayku Biblia niwanchej: ‘Diospa munakuyninpi kallaychejpuni’, nispa (Judas 21). ¿Imatataj ruwasunman Dios munakunallawanchejpajpuni? Biblia niwanchej: “Diosta munakoyqa kamachisqasninta juntʼaymin, kamachisqasninta juntʼaytaj atina jinalla”, nispa (1 Juan 5:3).

4, 5. ¿Imasta yachaspataj Diosta munakuyta qallarerqanki?

⁴ Apóstol Juanqa Diosta munakunata nerqa. Diosta munakuyta qallarisqaykimantataj nichá qonqapunkichu.

⁵ Jehová Diosninchejqa uj kʼachitu huertapi wiñaypaj kausakunanchejta munan. Chayta juntʼananpajtaj munasqa Wawanta noqanchejrayku kay jallpʼaman kachamorqa (Mateo 20:28; Juan 8:29; Romanos 5:12, 18). Jehová Diosninchej mayta munakuwasqanchejrayku chayta ruwasqanta yachaspaqa, maytachá kusikorqanki. Chantapis ichá chaymantapacha Diosta munakuyta qallarerqanki (1 Juan 4:9, 10 leey).

6. 1) ¿Uj runata munakuspa “munakuyki” nillanchejchu? 2) ¿Imastataj ruwanchej Diosta munakuspa?

 ⁶ Uj runata munakuspaqa, mana “munakuyki” nillanchejchu. Manachayqa imaschus payta kusichin, chay imasta ruwanchej. Dioswanpis kikillantaj, payta munakuspaqa imaschus payta kusichin, chay imasta ruwanchej. Diosta astawan munakuspataj ichapis payman kausayninchejta jaywaporqanchej chayri entregakorqanchej, bautizakorqanchejtaj. Diosman kausayninchejta jaywapushaspataj, wiñaypaj payta sirvinanchejta nerqanchej (Romanos 14:7, 8 leey). Chay nisqanchejta juntʼanapaj imastachus ruwana kasqanta qhawarina.

7. 1) Jehová Diosta munakusqanchejrayku, ¿imatataj ruwanchej? 2) ¿Imasta ruwananchejtataj Dios mana munanchu?

⁷ Jehová Diosta munakusqanchejrayku ‘kamachiykunasninta juntʼanchej’. Paytaj Bibliapi willawanchej imaynatachus kausakunanchejta munasqanta. Pay niwanchej mana machananchejta, mana suwakunanchejta, mana llullakunanchejta ima. Chantapis niwanchej mana casarakuspalla piwanpis puñuykuy jucha kasqanta. Nillawanchejtaj santosta yupaychay, runasta yupaychaypis mana allinchu kasqanta (1 Corintios 5:11; 6:18; 10:14; Efesios 4:28; Colosenses 3:9).

8. ¿Imatataj ruwasunman wakin imasta ruwanapaj Bibliapi mana uj kamachiyta tarispa?

⁸ Jehová Diosta kusichinapajqa mana  kamachisqallantachu kasukunanchej tiyan. Imajtinchus payqa mana tukuy imapajpunichu kamachiykunata churarqa. Chayrayku wakin kutisqa, wakin imasta ruwanapaj mana Bibliapi uj kamachiyta tarisunchu. Chanta, ¿imaynatá Dios munasqanman jina imatapis ruwasunman? (Efesios 5:17). Bibliapeqa ashkha yuyaychaykuna tiyan. Chaykunataj yanapawanchej imatachus Dios yuyasqanta yachanapaj. Chayrayku Bibliata leespaqa imaynachus Diosninchej kasqanta yachakunchej. Yachakullanchejtaj imachus payta kusichisqanta, imatachus chejnikusqanta ima (Salmo 97:10 leey; Proverbios 6:16-19; “Bibliaj yuyaychaykunasnin” nisqata leeriy).

9. ¿Imaynatá yachasunman imatachus telepi chayri Internetpi qhawanata?

⁹ Jehová Diosqa mana niwanchejchu imatachus telepi chayri Internetpi qhawanata chayri mana qhawanata. Jinapis Bibliapi yuyaychaykunata churapuwanchej allin kajta ajllanapaj. Telepi, Internetpi churanku chay imasqa, maqanakuykunawan, khuchi imaswan juntʼa kashan. Bibliatajrí niwanchej, Diosqa sajra imasta ruwajta chejnikusqanta. Chantapis nillawanchejtaj “khuchichakoj runasta, qhenchachakojkunatapis” juzgananta (Salmo 11:5; Hebreos 13:4). Kayta yachayqa yanapawanchej Dios munasqanman jina ruwanapaj. Chayrayku Diospa chejnisqan imasta chejnikunallanchejtaj tiyan.

10, 11. ¿Imajtintaj Jehová Diosta kasukunchej?

 ¹⁰ Jehová Diostaqa payta munakusqanchejrayku kasukunchej, manataj uj problemapi mana rikukuyta munaspallachu, nillataj castiganawanchejta manchikuspallachu (Gálatas 6:7). Imaynatachus uj wawita tatanta kusichiyta munan, ajinallatataj noqanchejpis Jehová Diosta kusichiyta munanchej. Jehová Dios allinpaj qhawawasqanchejta yachaytaj, ni imawan kikinchakunchu (Salmo 5:12; Proverbios 12:2; “Kasukuy” nisqata leeriy).

¹¹ Jehová Diostaqa kasukunchejpuni mana atinanchejpaj jinachu kasqanta yuyaspapis. Chantapis mana ajllakunchejchu mayqen kamachiytachus kasukunanchejta, mayqentatajchus mana (Deuteronomio 12:32). Jehová Diostaqa tukuy imapipuni kasukunchej. Uj salmista jinataj ninchej: “Kamachisqasniykipi noqa kusikuni, chaykunata munakusqayrayku”, nispa (Salmo 119:47; Romanos 6:17). Chantapis Noé jina ruwayta munanchej. Payqa Jehová Diosta munakusqanrayku tukuy ima kamachisqanta juntʼarqa. Chayrayku Bibliaqa nin: “Noeqa ruwarqa, Dios imaynatachus payman nisqanman jina”, nispa (Génesis 6:22). Qanpis munawajchá Jehová Dios ajinata qanmanta ninanta.

12. ¿Imatataj ruwasunman Diosta kusichinapaj?

¹² Jehová Diosqa tukuy ima kajta ruwarqa, payta kasukojtinchejtaj mayta kusikun (Proverbios 11:20; 27:11). Jinapis payqa mana obligawanchejchu  payta kasukunapaj. Astawanpis payqa imachus allin, imatajchus mana allinchu kasqanta ajllayta atinanchejpaj jina ruwawarqanchej. Chayrayku payqa munan payta munakusqanchejrayku allin imasta ruwanata, ajinamantataj kusisqa kausakunata (Deuteronomio 30:15, 16, 19, 20; “Sapa uj ajllayta atinchej” nisqata leeriy).

13. ¿Imaynataj Diospa kamachiykunasnin kanku?

¹³ Bibliaqa Diospa kamachiykunasninmanta nin: “Kamachisqasninta juntʼaytaj atina jinalla”, nispa (1 Juan 5:3). “Atina jinalla” nisqa palabrasqa, griego parlaypi “llasa” niyta munan. Bibliamanta waj versiculospi, chay palabrasta oqharikun kamachiykunata llasa qʼepisman jina tukuchisqankumanta, mana khuyakojkunamanta ima parlanapaj (Mateo 23:4; Hechos 20:29, 30). Chayrayku 1956 watamanta Mosoj Testamento Bibliapi 1 Juan 5:3 nin: “Camachiskasnintaj mana llasachu cancu”, nispa. Arí, Diospa kamachiykunasnenqa juntʼayta atinapaj jinalla kanku. Imaraykuchus Jehová Diosninchejqa imatachus ruwayta atisqallanchejta mañawanchej.

14. ¿Imatataj yachakusunman waj wasiman astakoj amigomanta?

¹⁴ Ichapis uj amigoyki waj wasiman astakushajtin yanaparerqanki. Chay amigoykeqa tukuy imasnintachá qʼepichaykorqa. Chay qʼepismanta wakintaj ichapis chhallitalla karqanku,  wakintajrí ichapis allin llasas karqanku. Jinapis payqa nichá nisorqachu chay llasa qʼepista sapallayki apanaykita. Imajtinchus payqa mana munanchu wasaykita nanachikunaykita. Jehová Diosninchejpis ajinallatataj ruwan. Payqa ni jaykʼaj mana juntʼayta atinapaj jina kamachiykunata churanmanchu (Deuteronomio 30:11-14). Jehová Diosqa “yachan imamantachus ruwasqa kasqanchejta; payqa yuyarikun jallpʼalla kasqanchejta” (Salmo 103:14).

15. ¿Jehová Diospa kamachiykunasnin allinninchejpajchu?

¹⁵ Moisesqa israelitasman nerqa, Diospa kamachiykunasnin allinninkupaj kasqanta, chayta kasukuspataj kausayta atisqankuta (Deuteronomio 5:28-33; 6:24). Kunanpis Jehová Diosninchejqa, kamachiykunata allinninchejpaj churapuwanchej (Isaías 48:17 leey). Yachantaj imachus allinninchejpaj kasqanta (Romanos 11:33). Biblia niwanchej: “Diosqa munakuymin”, nispa (1 Juan 4:8). Chayrayku Jehová Diosqa, munakuwasqanchejrayku imatapis niwanchej chayri imatapis ruwan.

16. Diosta munakusqanchejrayku, ¿imasta ruwanapajtaj kallpachakunchej?

¹⁶ Wakin kutisqa Jehová Diosta kasukuyta mana atillanchejchu. Imajtinchus kay mundomanta runasqa Kuraj Supaypa makinpi kashanku. Paytaj runasta sajra imasta ruwachishan (1 Juan 5:19). Chantapis pantaj runas kasqanchejrayku, ichapis sajra imaspi yuyayta qallarisunman, ajinamantataj  Diosta manaña kasukusunmanchu (Romanos 7:21-25). Jinapis Jehová Diosta munakusqanchejrayku allin imasta ruwanapaj kallpachakunchej. Chay ruwasqanchejtataj, Jehová Dios qhawamushan. Chantapis payqa atiyninwan yanapawanchej (1 Samuel 15:22, 23; Hechos 5:32). Chayrayku payta kasukuyta atillanchej (Gálatas 5:22, 23).

17. ¿Imatataj kay libropi yachakusunchej?

¹⁷ Kay libropeqa Jehová Dios munasqanman jina kausakuyta yachakusunchej. Chantapis yachakullasuntaj imaynatachus Bibliaj yuyaychasqanman jina kausakunata, llimphu kausayniyoj kayta ima. Jehová Diosqa ni jaykʼaj obligawasunchu payta kasukunapaj. Jinapis Diosta kasukuspaqa aswan kusisqa kasunchej, aswan qhepamantaj wiñaypaj kausakuyta atisunchej. Chantapis Jehová Diosninchejta mayta munakusqanchejta rikuchisunchej (“Llimphu kausaymanta kamachiykuna” nisqata leeriy).

18. ¿Imatataj qhepan capitulopi yachakusunchej?

¹⁸ Imachus allin, imatajchus mana allinchu kasqanta reparanapaj jina Jehová Dios ruwawarqanchej. Chayrayku chayta sumajta reparayta yachakuspaqa Diospa kamachiykunasninta kasukuyta atillasunchej. Qhepan capitulopi yachakusunchej imaynatachus chayta ruwayta atisqanchejta.