Jehovaqa munan casarasqas imatachus casarakunankupaq parlasqankuta juntʼanankuta. Ñawpa tatasninchikta jukchaykuchkaptin Jehová nirqa: ‘Chayrayku qhariqa warminwan jukchakunqa, iskayninkutaq juk runajinalla kanqanku’, nispa. Chaymanta unayninmantaq, Jesucristo kikillantataq nirqa:  “Chayrayku, Diospa ujchasqanta ama runaqa tʼaqachunchu”, nispa (Génesis 2:24; Mateo 19:3-6). Rikunchikjina Jehovawan, Jesuswanqa, qhariwarmi kawsay wiñaypaq kasqanta rikuchirqanku, chay jukchaykukuytaq tukukunman iskayninkumanta juknin wañupuptillan (1 Corintios 7:39). Jehová qhariwarmi kawsayta qallarichisqanrayku, jatunpaq qhawananchik tiyan, mana juk ratullapaqchu, imaraykuchus payqa chiqnikun mana imallamanta divorcianakuytaqa (Malaquías 2:15, 16).

Bibliap nisqanmanjina, ¿imaraykutaq casarasqas divorciakuyta atinkuman? Iskayninkumanta juknin khuchichakusqanrayku. Khuchichakuytataq Jehovaqa chiqnin (Génesis 39:9; 2 Samuel 11:26, 27; Salmo 51:4). Mayta millachikusqanraykutaq, casarasqas divorcianakunankuta saqin. (Jisqʼun yachaqanapi, 7 parrafopi, sutʼinchan imachus khuchichakuy ninayasqanta.) Chaywanpis Jehovaqa, qhariwarmimanta, ¿pitataq akllananta saqin, divorciakunanta chayri mana divorciakunanta? Mana khuchichakuq qusata chayri warmita (Mateo 19:9). Chayrayku divorciakuyta akllan chayqa, mana Diospa chiqnisqan ruwaytachu ruwachkan. Qutuchakuy ukhumanta cristianosqa mana ninankuchu tiyan divorciakunantapuni. Ichapis khuchichakuq qusanmanta chayri warminmanta mana divorciakuyta munanmanchu, khuchichakuq juchanmanta pesachikusqanrayku, wawasninkurayku ima. Chaywanpis, pay kikin akllanan tiyan, Bibliap nisqanmanjina divorciakuytachus manachus munasqanta, imaraykuchus pay kikin ruwasqanmanta Diosman cuentata qunqa (Gálatas 6:5).

¿Mana khuchichakuy kaptinpis casarasqas tʼaqakuyta chayri divorciakuyta atinkumanchu? Arí, chaywanpis Bibliaqa nin: “Kakuchun mana wajwan casarakuspa manachayri qosanwan [chayri warminwan] allinyakuchun”, nispa (1 Corintios 7:11). Juk cristiano warminmanta divorciakun chayqa, mana wakwan casarakuyta atinmanñachu (Mateo 5:32). Qhawarinachik ima chʼampaykunaraykuchus casarasqas tʼaqakuyta atinkuman.

Familianpaq mana llamkʼayta munaptin. Wakin qusasqa atichkaspa mana familiankupaq llamkʼayta munankuchu, chayraykutaq familianqa ñakʼarin. ¿Imatá Biblia nin mana familiankupaq llamkʼayta munaqkunamanta? “Sapa runa [...] familiampaj wakichipunan tiyan. Manachus chayta ruwan chayqa, creeyninta qhesachan, mana creejmantataj aswan  mana walejman tukupun.” (1 Timoteo 5:8.) Qusan mana familianpaq llamkʼaytapuni munaptinqa, warminqa tʼaqakuyta atinman kawsayninrayku, wawasninpa allinninta maskʼasqanrayku ima. Chantapis, juk qusa familianpaq mana llamkʼasqanrayku, juchachasqa kanman chayqa, qutuchakuymanta ancianos, chaymanta astawan yachayta maskʼanqanku, imaraykuchus pillapis jinata ruwaqqa Diospa llaqtamanta qharqusqa kanman.

Maqaspa sinchita ñakʼarichiptin. Wakinkunaqa may phiña runas kasqankurayku, qusanpa chayri warminpa kawsayninta peligropi churanku. Juk cristiano chayta ruwanman chayqa, ancianos paymanta parlanankupaq tantakunanku tiyan, imaraykuchus phiñanakuspa sinchita maqaqqa, qutuchakuymanta qharquchikunman (Gálatas 5:19-21).

Jehovata mana yupaychaqta saqiptin. Wakinkunaqa qusankuta chayri warminkuta Diosta yupaychaqta mana saqinkuchu, tukuy imaymanamantataq Bibliap nisqasninta pʼakichiyta munanku. Jina kaptin juk cristiano qusa chayri juk cristiana warmiqa tʼaqakuyta atinman ‘Diostapuni astawan kasunanrayku, runata kasunanmantaqa’ (Hechos 5:29).

Qusap chayri warmip kawsaynin peligropi churasqa kaptinqa, mana ni pi ninanchu tiyan, tʼaqakunantapuni chayri mana tʼaqakunanta. Ancianos, wak hermanos ima Bibliap nisqanmanjina yuyaychaspa yanapayta atinkuman, chaywanpis yuyarinanku tiyan, Jehovalla yachasqanta imachus qhariwarmi kawsayninkupi kasqanta. Juk cristiana chayri juk cristiano, tʼaqakuyta munasqanrayku llullakuspa chʼampayninta jatunman tukuchin chayqa, Diosninchik Jehovata, qhariwarmi kawsayninta ima mana jatunpaqchu qhawachkan. Chantapis Jehovalla yachan llullakuspa chʼawkiyachkasqantachus manachus, imaraykuchus Jehovapaqqa, “tukuy imapis sutʼipacha, qhatarasqataj kashan paypa rikunampi, pimanchus kawsayninchejmanta cuentata qonanchej kanqa, chaypata” (Hebreos 4:13). Juk cristiano chayri juk cristiana kawsaynin peligropi kasqanrayku, qusanmanta chayri warminmanta tʼaqakuyta akllan chayqa, mana ni pi wasanmanta rimarakunanchu tiyan, “imaraykuchus tukuyninchej Diospa juzganampa ñaupaqempi rikhurinanchej tiyan pay juzganawanchejpaj” (Romanos 14:10-12).