YAPA
Imaynatá sakwakuy nisqata atipasunman
Sakwakuy (masturbación) nisqaqa juk millay vicio; chay vicioqa Diosmanta karunchawanchik, yuyayninchiktataq chʼichichan, munasqallanchiktataq maskʼanapaq tanqawanchik. * Pikunachus chay vicioman qukuqkunaqa, wakkunata aychanpa munaynillanta ruwanankupaq qhawankuman. Chantapis qhariwarmijina puñuykuyta, munanakuyninkuta rikuchikunankupaq kasqanta qhawanankumantaqa, aychankup saqra munaynillanta thasnuchinankupaqjina kasqanta qhawanku. Chaywanpis sakwakuyqa, runap aychap saqra munayninta thasnuchinanmantaqa, astawan rikchʼarichin, chaytaq khuchichakuyman millay ruwaykunaman ima tanqan (Colosenses 3:5).
Apóstol Pablo qillqarqa: “Munakusqasniy, Diosqa willawanchej kay imasta qonawanchejta; chayrayku cuerponchejta, sonqonchejtapis llimphuchakuna tukuy chʼichi kajmanta. Diosta manchachikuspa, astawan astawan juchamanta tʼaqakuna”, nispa (2 Corintios 7:1). Wakin runasqa, “llimphuchakuna tukuy chʼichi kajmanta” kamachiyta juntʼaytaqa, mana atinapaqjinalla qhawanku, chaywanpis Diospa yanapayninwanqa ñawpaqman lluqsiyta atinkumanpuni, imaptinchus Jehovaqa “perdonanapaj wakichisqa” kachkan (Salmo 86:5; Lucas 11:9-13). Wakin kuti ichá, watiqmanta sakwakuypi urmankuman, chaywanpis ruwasqankumanta, pesachikunku, kallpachakunkutaq chay viciota saqinankupaq. Mana jaykʼaq qunqanachu “Diosqa sonqonchejmanta kurajmin [kasqanta], tukuy imatataj yacha[sqanta]” (1 Juan 3:20). Diosninchikqa mana juchasnillanchiktachu qhawan, manaqa imayna runachus sunqunchikpi kasqanchiktapis. Khuyakuyninta mañakuptinchikqa, payqa allinta riqsiwasqanchikrayku, ñuqanchikmanta khuyakunqa. Chayrayku Diosninchikmanta kʼumuykukuq sunquwan mañakunallapuni, imaynatachus juk wawita tatanmanta yanapata mañakun ajinata. Chiqamanta nisunman Jehová conciencianchikta llimphuchayta atisqanta (Salmo 51:1-12, 17; Isaías 1:18). Chaywanpis mana chayllachu, chay millay viciota atipanapaqqa mañakusqanchikmanjina tukuy atisqanchikta ruwananchik tiyan, chaypaqtaq mana qʼala runasmanta fotosta qhawasunchikchu nitaq saqra runaswan purisunchikchu. *
Pillapis chay millay viciota mana saqiyta atispaqa, allin kanman yanapata maskʼanan cristiano tatanpi, chayri mamanpi mana chayqa juk yachayniyuq, khuyakuyniyuq hermanopi chayri hermanapi (Proverbios 1:8, 9; 1 Tesalonicenses 5:14; Tito 2:3-5). *
^ párrafo 1 Sakwakuy rimayqa jispʼananchikta llukchikuspa orgasmo nisqaman chayay niyta munan (qharipiqa mujunta suruchinankama).
^ párrafo 2 Achkha hermanosqa qʼala runasmanta fotosta mana qhawanankupaqqa, wasinkupi computadorataqa sutʼipi churanku, jinamanta mana juchaman urmanankupaq. Wakinkunataq computadorasninkupi juk programa nisqata churanku mayqinchus qʼala runasmanta fotosta mana rikhuriqta saqinchu, chaywanpis wakin kuti rikhurinpuni.
^ párrafo 1 Imaynatachus sakwakuy nisqata atipanamanta astawan yachanaykipaq, noviembre 2006 watamanta ¡Despertad! revistapi kay “Los jóvenes preguntan... ¿Cómo puedo superar este hábito?”, nisqa yachaqanata ñawiriy, chantapis, kay Waynaspata, sipaskunapta ima tapukuyninku. Ruwayta atinapaqjina kutichiykuna libromanta; ñawpa kaq libro; 205-211 paginasninta ñawirillawaqtaq.
