Jehovata munakuqkunapaq:

Jesús nirqa: “Cheqa kajta rejsinkichej, chay cheqa kajtaj kacharichisonqachej”, nispa (Juan 8:32). Jesuspa nisqanqa, ¡mayta sunquchawanchik! Kay ‘qhipa pʼunchaykunapi’ llulla yachachiykuna aywirichkaptinpis, chiqa kaqta riqsiyta atinchik (2 Timoteo 3:1). Chantapis may kusiywan, Diospa Palabranmanta chiqa kaqta yachakuchkasqanchikmanta sutʼita yuyarikunchik. ¡Mana imapis chayjinata kusichiwarqanchikchu!

Chaywanpis, mana chiqa kaqta riqsiyllachu nitaq chiqa kaqmanta runasman willayllachu, astawan sumaqqa chiqa kaqmanjina kawsakuna. Arí, Diospa munakuyninpi kanallanchikpuni tiyan. Chaywanpis, ¿imaynatá Diospa munakuyninpi kayta atillasunmanpuni? Jesús kay tapuyman kutichirqa wañunan pʼunchaymanta ñawpaq chʼisin, discipulosninmantaq nirqa: “Kamachisqasniytachus kasunkichej chayqa, munakuynillaypipuni kankichej, imaynatachus noqapis Tataypa kamachisqasninta kasuni, munakuynillampipunitaj kashani, ajinata” (Juan 15:10).

¿Imatachus Jesús Diospa munakuyninpi kanallanpaqpuni ruwasqanta reparanchikchu? Arí, payqa Tatanpa kamachisqasninta kasukurqa. Ñuqanchikpis kikillantataq ruwananchik tiyan. Diospa munakuyninpi kanallanchikpaqpuniqa, chiqa kaqmanjina kawsananchik tiyan. Jesús chay chʼisillataq chayta ruwananchikta sutʼita nirqa: “Sichus chay imasta entiendespa ruwayta yachankichej chayqa, kusikuyniyojmin kankichej”, nispa (Juan 13:17).

Tukuyninchikta, kay libropi yachachikusqan chiqa kaqmanjina kawsanallanchikpaqpuni yanapanawanchikta tukuy sunquwan munayku, jinamanta ‘Diospa munakuyninpi kanallanchikpaqpuni, wiñay kawsaytataq japʼinanchikpaq’ (Judas 21).