1, 2. ¿Imataj 1895 watapi Torremanta Qhawaj revistapi waj jinañataj karqa, imatataj hermanos nerqanku?

 JOHN BOHNET pichus Bibliamanta Yachaqaj karqa, 1895 watapi enero killamanta Torremanta Qhawaj revistata rikuspa kusikorqa. Chay revistaj tapanpeqa waj jina dibujoñataj karqa. Chaypeqa, mama qochaj yakusnin oqharikusqan kantupi uj kʼanchanayoj torre kasharqa, tutanpi kʼanchananpaj. Chay revistallapitaj nisharqa tapan waj jinañataj kasqan, mosoj pʼacha jina kasqanta.

² Hermano John Bohnet, kusisqa uj cartata hermano Russellman apacherqa, maypichus nerqa: “TORREQA sumaj pʼachallisqa kashan. Kʼachitutaj”, nispa. Hermano John Brownpis revistaj tapanmanta jinata qhelqarqa: “May sumajpuni torrej cimientosnin sumaj sayasqa kasqanqa, yakus oqharikojtinpis, loco para kajtinpis mana urmachinchu”, nispa. Hermanosninchejqa, revistaj tapan waj jinañataj kasqanta chay wata ñaupaj kutirayku rikorqanku, aswan qhepamantaj mana kikillanpunichu karqa. Noviembre killapi waj jinañataj kajtinpis, mama qochaj yakusnin oqharikusqan dibujoqa kashallarqapuni.

3, 4. ¿Ima chʼampaymantataj 1895 watapi 15 noviembre killamanta kaj revistapi parlasharqa, chantá imatataj chay revistapi nisharqa?

³ Kay 1895 watapi 15 noviembre killamanta Torremanta Qhawaj revistapi uj yachaqana orqhokorqa. Chaypitaj kikincharqa Bibliamanta Yachaqajkuna wakin imaspi chʼampaypi kashasqankuta, mama qochapi yakus oqharikusqanwan. Hermanosqa, sapa kuti astawan chʼajwasharqanku pichus sapa qotuchakuyta ñaupajman apananmanta. Chay yachaqanataj hermanosta yanaparqa, imaynatachus chay chʼampayta allinchanankuta reparanankupaj, Diospa llajtanta uj barcowan kikinchaspa. Chay yachaqanapi nerqa willayta ñaupajman apajkunaqa, Diospa llajtanta chʼampaykunapaj mana wakichisqankuta, mayqenchus uj barco jina karqa. ¿Imatá ruwakunan karqa?

⁴ Chay yachaqanapi nillarqataj barcota sumaj kamachejqa, barconpi salvavidas nisqata apasqanta, yanapajkunasninpis sinchʼi para kajtin punkusta wisqʼanankupaj wakichisqa  kasqankuta. Ajinallatataj Diospa llajtanta ñaupajman apajkunaqa, qotuchakuykunata yanapananku karqa chʼampaykunapaj wakichisqa kanankupaj. Chaypajtaj chay revistapi nisharqa, “usqhayllata tukuy qotuchakuykunapi ancianosta ajllakunan kasqanta, Diospa tropanta qhawanankupaj” (Hech. 20:28).

5. 1) ¿Imajtintaj ñaupaj kutirayku ancianosta churakusqan may sumajpuni karqa? 2) ¿Ima tapuykunatataj ukhuncharisun?

⁵ Ñaupaj kutirayku ancianosta churakusqanqa, may sumajpuni karqa. Imajtinchus qotuchakuy sumaj sayasqa kananpaj yanaparqa. Hermanosta yanaparqa Ñaupaj kaj Guerra Mundialpi oqharikusqan yakuspi jina sinchʼita sayanankupaj. Qhepan wataspi waj imastawan allinchakusqanqa Diospa llajtanta astawan wakicherqa, Jehovata sirvinanpaj. ¿Ima profeciapitaj chaymanta parlarqa? ¿Imas allinchakusqantataj Diospa llajtanpi rikorqanki? ¿Imaynatataj chaykuna yanapasorqa?

6, 7. 1) ¿Ima niytataj munan Isaías 60:17 versículo? 2) ¿Ima niyta munan “kamachisunampaj” “pusasunampaj” Jehovaj nisqan?

⁶ Kay libroj 9 yachaqananpi rikorqanchej jina Isaiasqa nerqa, Jehová llajtanta ashkhayachispa bendecinanta (Isa. 60:22). Mana chayllachu kanan karqa, Jehová kaytawan nerqa: “Broncej cuentamantaqa qanman qosqayki qorita, fierromantaqa qolqe metalta, maderamantaqa bronceta, rumispa cuentanmantataj fierrota. Allin kawsayta churasaj kamachisunampaj, cheqan kaytataj churasaj pusasunampaj”, nispa (Isa. 60:17). ¿Ima niyta munan chay profecía? ¿Imaynatá kay tiempopi juntʼakun?

⁷ Isaiaspa profecian nisqanman jinaqa broncej, fierroj, maderaj, rumej cuentanmanta, waj imas kanan karqa. Chaykunataj chay ñaupaj imasmanta nisqaqa aswan sumaj karqanku. Broncej cuentanmanta qorita churakusqanqa may sumaj, chay ujkunawan ruwakusqanpis jinallataj. Jehovaqa llajtan wakin imaspi pisimanta pisi allinchasqa kananta chaywan kikincharqa. ¿Imas allinchakunanmantataj chay profecía parlasharqa? “Kamachisunampaj”, “pusasunampaj” nispa Jehovaqa llajtanta qhawasqan, wakichisqan ima, pisimanta pisi aswan sumaj kananta nisharqa.

8. 1) ¿Pitaj Isaiaspa profecianpi nisqanman jina wakin imas allinchakunanpaj yanapan? 2) ¿Imaynatá chaykuna yanapawanchej? (“ Llampʼu sonqowan kasukorqa” nisqa recuadrotawan qhawariy.)

⁸ ¿Pitaj yanapan Diospa llajtan ñauparinanpaj? Jehová nin: “Qosqayki qorita [...] qolqe metalta [...] Allin kawsayta churasaj”, nispa. Qotuchakuypi wakin imasta allinchakusqanqa, mana runas kallpachakusqankuraykuchu, manaqa Jehová kikin yanapasqanrayku. Jesús Rey churasqa kasqanmantapacha Jehovaqa, paynejta chayta ruwashan. ¿Imaynatá chay yanapawanchej? Chay versiculollapitaj nin, wakin imasta allinchakusqanrayku “allin” kausay, “cheqan” kajtaj kananta. Arí, Dios yanapanawanchejta saqespa, kasukuspataj, noqanchejpura allinta kausakunchej. Cheqan kajta  munakusqanchejtaj Jehovata sirvinapaj tanqawanchej, pimantachus apóstol Pablo “sonqo tiyaykuchej” Dios kasqanta nerqa (Fili. 4:9).

9. ¿Imaraykutaj qotuchakuypi tukuy ima maychus kananpi, ujchasqataj?

⁹ Apóstol Pabloqa, Jehovamanta jinata nillarqataj: “Diosqa mana pejtuchej Dioschu, astawanqa sonqo tiyachej Dios”, nispa (1 Cor. 14:33, 34, Qheshwa Biblia). Pabloqa mana nisharqachu pejtusqa, tukuy ima maychus kananpi kasqanmanta waj jina kasqanta, manaqa pejtusqa sonqo tiyaykuymanta waj jina kasqanta. ¿Imaraykú? Kaypi tʼukuriy: tukuy ima maychus kananpi kajtinpis, sonqo tiyaykuy mana kanpunichu. Sutʼincharinapaj, uj qotu soldados guerraman sumaj filasqa rejtinkupis, jatun maqanakuypi tukun, nitaj sonqo tiyaykuypichu. Chayrayku cristianosqa kayta yuyarikuna: mana sonqo tiyaykuy kajtenqa, imallapis urmanqapuni. Chaywanpis Diospa sonqo tiyaykuynenqa wiñaypaj tukuy ima maychus kaj kananpaj yanapan. Chayrayku mayta agradecekunchej “sonqo tiyaykuyta qoj Dios”, llajtanta yanapasqanmanta, llimphuchasqanmantataj (Rom. 15:33). Chay sonqo tiyaykuy kasqanrayku, Jallpʼantinpi sapa qotuchakuypi tukuy ima maychus kananpi kashan, ujchasqataj, chaymantaqa mayta agradecekunchej (Sal. 29:11).

10. 1) ¿Imastaj qallariypi Diospa llajtanpi allinchakorqa? (“ Qhawajkunata churakun” nisqa recuadrota qhawariy.) 2) ¿Ima tapuykunatataj ukhuncharisun?

¹⁰ “ Qhawajkunata churakun” nisqa recuadro rikuchiwanchej, qallariypi Diospa llajtanpi wakin imas allinchakusqan, sumaj kasqanta, tukuy imataj maychus kananpi kasqanta. Chaywanpis, ¿imastataj Jehová, Rey Jesusnejta kunallanraj ruwarqa “broncej” cuentanmantapis “qorita” churashanman jina? ¿Imaynatá chay Jallpʼantinpi qotuchakuykuna sonqo tiyasqa, ujchasqataj kanankupaj yanaparqa? ¿Imaynatá qanta yanapasunki “sonqo tiyaykuchej Diosta[...]” sirvinaykipaj?

11. 1) ¿Imatataj aswan sumajta entiendekorqa Bibliata ukhunchaspa? 2) ¿Imatataj Diospa llajtanta kamachejkuna ruwarqanku?

¹¹ Kay 1964 watamanta 1971 watakama, Diospa llajtanta kamachejkunaqa qhawarqanku, uj qotu hermanos Bibliata ukhunchashasqankuta. Chaypitaj ukhunchakorqa apostolespa tiemponkupi imaynachus qotuchakuykuna wakichisqa kasqanta. a Repararqankutaj ñaupa cristianospa tiemponkupeqa qotuchakuykunapi mana uj ancianollachu umachasqanta manaqa tukuy ancianos (Filipenses 1:1; 1 Timoteo 4:14 leey). Diospa llajtanta kamachejkunaqa chayta allinta entiendespa, Diospa llajtan sumaj wakichisqa kananpaj Jesús yanapashasqanta repararqanku, Reyninku kamachisqanman jinataj ruwarqanku. Chaymantaqa Diospa llajtanpi wakin imasta allincharqanku, Biblia nisqanman jina ancianosta churakunanpaj. ¿Imastataj waj jinamantañataj ruwakorqa 1970 watas chaynejpi?

12. 1) Diospa llajtanta kamachejkuna, ¿ima cargotataj saqeporqanku? 2) Imayna wakichisqachus Diospa Llajtanta Kamachejkuna kashasqankuta sutʼinchay (“ Diospa Llajtanta Kamachejkunaqa Reinorayku llankʼakusqanta qhawanku” nisqa recuadrota 130 paginapi qhawariy).

 ¹² Wakin imasta allinchakusqanmanta ujqa Diospa llajtanta kamachejkunapaj karqa. Chay kutikama, qanchis ajllasqa cristianosqa kallarqankutaj Watch Tower Bible and Tract Society of Pennsylvania nisqapi junta directiva nisqa. Chaywanpis 1971 watapi Diospa llajtanta kamachejkunaqa, qanchismanta chunka ujniyojman yapakorqanku, niñataj junta directiva nisqamanta cargoyojchu karqanku. Chay hermanosqa, mana wajkunamanta aswan sumaj kasqankutachu yuyakorqanku, sapa watataj ujmanta uj kamacherqanku.

13. 1) ¿Imatataj 40 watata ruwakorqa? 2) ¿Imatataj Diospa Llajtanta Kamachejkuna 1972 watapi ruwarqanku?

¹³ Wakin imasta allinchakusqanmanta ujnenqa qotuchakuykunapajñataj karqa. ¿Imaynamantá? Kay 1932 watamanta 1972 watakamaqa, sapa qotuchakuyta uj hermanolla ñaupajman apaj. Kay 1936 watakamataj chay hermanoqa willayta ñaupajman apaj nisqa karqa (director de servicio). Aswan qhepamantaj compañiamanta anciano nisqa (siervo de compañía), chantá qotuchakuymanta anciano nisqa (siervo de congregación), chantataj qotuchakuyta qhawaj nisqa (superintendente de congregación). Chay hermanosqa, sonqo kʼajaywan hermanosta Diosta yupaychanallankupajpuni yanapaj kanku. Jinapis qotuchakuyta qhawaj hermanoqa, mana wajkunata tapurispalla imatachus ruwakunanta nej. Kay 1972 watapitaj Diospa Llajtanta Kamachejkunaqa  waj imañataj allinchasqa kananta nerqanku. ¿Imataj allinchakorqa?

14. 1) ¿Imatataj 1972 watapi 1 octubre killapi ruwayta qallarikorqa? 2) ¿Imaynamantataj ancianosta umachaj, Filipenses 2:3 nisqanman jina ruwan?

¹⁴ Chay kutikamaqa, uj hermanolla qotuchakuyta ñaupajman apaj. Chaywanpis waj hermanos ancianos kayta atillankumantaj karqa, chaypajtaj Bibliaj nisqanta juntʼananku karqa, tukuynin ancianostaj qotuchakuyta ñaupajman apananku karqa. Ancianosta churakusqanqa 1972 watapi 1 octubre killapi qallarerqa. Kay tiempopeqa ancianosta umachaj, mana jatunchakunchu, manaqa “aswan llampʼu sonqo” (Luc. 9:48). Chay llampʼu sonqo hermanosqa, Jallpʼantinpi hermanosta mayta yanapanku (Fili. 2:3).

15. 1) ¿Imaynasmantataj qotuchakuykunapi ancianos kasqanku yanapan? 2) ¿Imataj rikuchin Reyninchej sumaj yachayniyoj kasqanta?

¹⁵ Qotuchakuypi ruwanaspi tukuy ancianos yanapakusqankoqa, maytapuni yanapan. Kinsamanta parlarina. 1) Tukuy ancianosta yanapan, ima ruwanayoj kajtinkupis, Jesús qotuchakuypa Uman kasqanta mana qonqanankupaj (Efe. 5:23). 2) Proverbios 15:22 nin jina “[pitapis] allin rinanqa ashkha yuyaychajkunapi kashan”. Ancianosqa, imallatapis hermanospa allinninkupaj jina ajllananku tiyan. Tukuyninku parlarejtinku, sapa ujninkoj yuyasqanta uyarejtinkutaj, Biblia nisqanman jina uj yuyayman chayayta atillanku (Pro. 27:17). Jehovaqa jinata ruwasqankuta bendecin, chaytaj tukuypa allinninpaj. 3) Ashkha hermanos ancianos jina  sirvisqankurayku, Diospa llajtanta ñaupajman apajkunaqa yachanku qotuchakuykunapi qhawajkuna, michejkuna ima astawan necesitakusqanta (Isa. 60:3-5). Kaypi tʼukurina: Jallpʼantinpi 1971 watapi 27.000 kuraj qotuchakuykunamanta 2013 watapaj 113.000 kurajman yapakorqa. Chaytaj rikuchin sumaj yachayniyoj Reyninchejqa kamachisninman tiemponpi michejkunata qosqanta (Miq. 5:5).

16. 1) ¿Imapajtaj ancianos churasqa kanku? 2) ¿Imaynatataj Bibliamanta Yachaqajkuna, Jesús ovejasniyta michipuway nisqanta qhawarqanku?

¹⁶ Bibliamanta Yachaqajkunaj qallariyninmantapacha, ancianosqa entienderqankuña, Diosta sirvinallankupajpuni hermanosninkuta yanapanankupaj churasqa kasqankuta (Gálatas 6:10 leey). Kay 1908 watapi Torremanta Qhawaj revistaj ujnin yachaqananpi, Jesús “ovejasniyta michipuway” nispa nisqanta sutʼincharqa (Juan 21:15-17). Chay yachaqanapeqa ancianosman nerqa: “Patronninchej ovejitasninta qhawananchejta kamachiwasqanchejqa kausayninchejpi ñaupajpi kanan tiyan, Señorpa yachachisqasninman yachachiyta, paykunata qhawayta ima may sumajpaj qhawana”, nispa. Kay 1925 watapi Torremanta Qhawaj revistapi ancianosta sumaj michejkuna kanankuta yuyarichikullarqataj, kayta nispa: “Iglesiaqa Diospata [...], chayrayku hermanosninkuta sirvejkunamanta cuentata mañanqa”.

17. ¿Imaynasmantataj ancianosta yanapakorqa sumaj michejkuna kanankupaj?

¹⁷ ¿Imaynatá Jehovaj llajtan yanaparqa ancianosta sumaj michejkuna kanankupaj, fierroj cuentanmantapis qolqe metalta churashanman jina? Wakichispa. Kay 1959 watapi ñaupaj kutirayku Ñaupajman Apajkunapaj Escuela ruwakorqa. Chay escuelapeqa, sapa hermanota yanapakunanta yachachikorqa, chantapis qotuchakuykunata ñaupajman apaj hermanosta nikorqa, “hermanosta wasinkuman  waturej rinankuta”. Chantá, waturispa hermanosta kallpachanankupaj imastachus ruwanankuta nikorqa. Kay 1966 watapitaj Ñaupajman Apajkunapaj Escuelaqa allinchakorqa. Chaypeqa “imaraykuchus hermanosta waturinankupuni kasqanmanta” parlakorqa. ¿Imatá astawan sutʼinchakorqa? Diospa llajtanta ñaupajman apajkunaqa, “Diospa tropanta munakuywan qhawananku kasqanta, familianta, willayta ima mana saqerparispalla”. Kay pasaj wataspeqa, chay escuelaman ashkha ancianospiwan rerqanku. Jehovaj llajtan ancianosta sapa kuti astawan wakichisqan, ¿imaynatá yanaparqa? Kay tiempopeqa tantakuykunapi ashkha hermanos michejkuna jina sumaj wakichisqas kanku.

18. 1) ¿Ima sumaj llankʼaytataj ancianos japʼinku? 2) ¿Imaraykutaj Jehovawan Jesuswan sumaj ancianosta munakunku?

¹⁸ Jehovaqa, Rey Jesusnejta ancianosta churan, uj sumaj llankʼayta juntʼanankupaj. ¿Ima llankʼaytaj chay? Diospa tropanta kay qhepa sajra pʼunchaykunapi yanapay (Efe. 4:11, 12; 2 Tim. 3:1). Jehovawan Jesuswanqa sumaj ancianosta mayta munakunku, kay yuyaychayta kasukusqankurayku: “Diosqa qhawanaykichejpaj makiykichejman churarqa, chay tropata michiychej [...] tukuy sonqo [...] Señorta sirviyta munasqaykichejrayku [...] qankuna jinallataj paykunapis kʼachata kawsanankupaj” (1 Ped. 5:2, 3). Kunanqa imaynatachus michejkuna, tropamanta kajkuna yachakunankupaj jina kausasqankumanta, qotuchakuypi sonqo tiyaykuy, kusiy kausaytaj kananpaj yanapasqankumanta, iskaymanta parlarina.

19. ¿Imaynatataj noqanchejwan willaj ancianosta qhawanchej?

¹⁹ Uj kaj, ancianosqa qotuchakuykunapi hermanoswan khuska willanku. Lucasqa, Jesusmanta jinata nerqa: “Jesús rerqa tukuy llajtasman, ranchosman ima, willaraspa, yachachispataj Diospa reinon evangeliomanta. Chunka iskayniyoj  apostolesnintaj, [...] paywan khuska karqanku”, nispa (Luc. 8:1-3). Imaynatachus Jesús apostolesninwan willarqa, ajinallatataj sumaj ancianospis hermanoswan khuska willaj rinku. Ancianosqa reparanku jinata ruwaspa qotuchakuypi allin yuyay kananpaj yanapasqankuta. ¿Imaynatá chay jina ancianosta hermanos qhawanku? Hermana Jeannine pichus 90 watayoj jina, nin: “Uj ancianowan willayman llojsispaqa paywan parlariyta atini, aswan allintataj rejsini”, nispa. Hermano Steven pichus 30 kurajniyojña, ajinata nin: “Uj anciano noqawan willaj llojsin chayqa, yanapawayta munasqanta reparani. Chaytaj mayta kusichiwan”, nispa.

20, 21. ¿Imaynatataj ancianos Jesuspa rijchʼanachinanpi michej runa jina ruwankuman? Sutʼinchariy. (“ Sapa semana waturisqanqa mana qhasichu karqa” nisqa recuadrotawan qhawariy.)

²⁰ Iskay kaj, Jehovaj llajtanqa ancianosta wakichin, qotuchakuymanta karunchakoj hermanosta yanapanankupaj (Heb. 12:12). ¿Imaraykutaj ancianos yanapananku tiyan, Diosta yupaychaypi mana allinchu kashaj hermanosta? Chantá, ¿imaynatataj chayta ruwananku tiyan? Chaymantaqa michejmanta, chinkasqa ovejamanta Jesuspa rijchʼanachinanpi sutʼinchashan (Lucas 15:4-7 leey). Michej runaqa, ujnin ovejan chinkasqanta reparaspa, chayllapis ovejan kanman jina maskʼamun. ¿Imaynatá ancianos chay michej runa jina ruwanku? Diospa llajtanmanta karunchakoj hermanota allillanpajpuni qhawaspa, imaynatachus michej runa chinkasqa ovejanta qhawan ajinata. Ancianosqa, Diosta yupaychaypi mana allinchu kashaj hermanota chinkasqa ovejitata jina qhawanku, nitaj yuyankuchu ni jaykʼaj kutimunanpaj jina kasqanta. Imaynatachus michej runa, “maskʼaj rin, chinkasqa” ovejanta “tarinankama”, ajinallatataj ancianospis llauchʼiyasqa hermanosta maskʼaj rinku, yanaparinankupaj.

²¹ ¿Imatataj michej runa ovejanta tarispa ruwan? Ichuriykukuspa “lijrariykukun”, tropanmantaj apan. Ajinallatataj uj anciano, Diosta yupaychaypi mana allinchu kashaj hermanowan parlarejtin kallpacharinman, qotuchakuyman kutinpunanpajtaj yanapanman. Hermano Victorqa ajinapi rikukorqa. Payqa Africamanta, niñataj tantakuykunaman rejchu. Victor nin: “Pusaj watasta niña willayman risqaypi ancianosqa, yanapallawarqankupuni”, nispa. ¿Imataj qotuchakuyman kutinpunanpaj yanaparqa? Victor nin: “Uj pʼunchay John sutiyoj anciano visitariwarqa. Paywanqa precursorespaj escuelaman khuska rerqayku, chay escuelamantataj fotosta rikuchiwarqa. Chayqa Jehovata sirvishaspa kusisqa kasqayta yuyarichiwarqa, watejmantataj chayta munarqani”, nispa. Hermano John visitarisqanmanta pisi tiemponman Victorqa qotuchakuyman kutinporqa, kunanqa watejmanta precursor. Arí, ancianosqa hermanosninkuta yanapaspa, tukuy kusisqa kanankupaj yanapanku (2 Cor. 1:24). b

22. ¿Imaynatá cheqan kay, sonqo tiyakuy ima qotuchakuy ujchasqallapuni kananpaj yanapan? (“ Mayta tʼukuchiwarqayku” nisqa recuadrotawan qhawariy.)

²² Ñaupaj parrafospi nerqanchej jina, Jehová nerqa allin kausay, cheqan kaypiwan llajtanpi pisimanta pisi yapakunanta (Isa. 60:17). Allin kausay, cheqan kaypiwan, ¿imaynasmantá qotuchakuykuna ujchasqallapuni kanankupaj yanapan? Jehovaqa “pay kʼatalla” cheqan (Deu. 6:4). Cheqan kamachiykunasnenqa Jallpʼantinpi qotuchakuykunapi kikin. Arí, allin kajmanta, mana allin kajmanta Jehovaj kamachiykunasnenqa ujlla. Chay kamachiykunataj tukuynin qotuchakuykunapaj (1 Cor. 14:32, 33). Chayrayku uj qotuchakoyqa Diospa kamachisqasninta kasukojtillan ñauparenqa. Allin kausaymanta parlaspataj Reyninchejqa mana qotuchakuypi allinta kausakunallatachu munan, manaqa “allinyachejkuna[...]” kananchejta (Mat. 5:9). Chayrayku “allin kausayman pusaj[...]” imasta ruwallanchejpuni. Arí, noqanchejwan phiñasqa kajwanqa, allinyakunapaj noqanchej parlarinchej (Rom. 14:19). Jinamanta qotuchakuyninchejpi allinta, ujchasqataj kausakunapaj yanapanchej (Isa. 60:18).

23. ¿Imataj Jehovaj kamachisninta kusichiwanchej?

²³ Kay 1895 watapi noviembre killamanta Torremanta Qhawaj revistapi ñaupaj kutirayku, imaynatachus ancianosta sutichakunanta sutʼinchakorqa. Diospa llajtanta ñaupajman apajkunapis, Jehovamanta mañakorqanku ancianosta churakusqan Diospa llajtanta “usqhayllata ujchasqa creeypi kanankupaj” yanapananta. Chay wataspi imaschus kasqanta yachakusqanchejmanta, mayta agradecekunchej. Chantapis Jehovaqa, Rey Jesusnejta llajtanpi qhawajkunata churasqanta rikusqanchejqa, ujchasqallapuni Jehovata sirvinapaj yanapawanchej (Sal. 99:4). Chayraykutaj kay tiempopi Diospa llajtanmanta kajkunaqa “uj sonqolla”, “uj ñanllata” purispa, “sonqo tiyaykuchej Dios[ta]” sirvispataj kusikunchej (2 Cor. 12:18; Sofonías 3:9 leey).