1, 2. 1) ¿Imatá Jesús ruwarqa ashkha runas uyarinankupaj? 2) ¿Imaynatá chantá imaraykutaj Cristoj cheqa sonqo yachachisqasnin pay jinallataj ruwarqanku?

 JESÚS qocha kantupi kashajtin, runasqa payta uyarinankupaj tantakorqanku. Jesustaj boteman wicharispa qocha kantumanta karuncharikorqa. ¿Imapaj? Parlasqan aswan karuman uyarikunanpaj. Ajinamantataj ashkha runas parlashasqanta sutʼita uyarinkuman karqa (Marcos 4:1, 2 leey).

² Kay 1914 wata ñaupajta, qhepamanpis, Cristoj cheqa sonqo yachachisqasnenqa pay jinallataj ruwarqanku. Diospa Reinonmantaqa ashkha runasman tukuy imaymanamanta willarqanku. Diospa llajtanqa, Jesucristoj yanapayninwan ñaupajllamanpuni rishan. Imapis mana kikillanpunichu kasqanrayku, tukuy laya aparatostaj rikhurishasqanrayku, willananchejpajqa chaykunawan yanapachikunchej. Niraj tukukuy chayamushajtin, tukuy runasman willayta munanchej (Mat. 24:14). Kunanqa maypi tiyakojtinkupis, imaynasmantachus runasman willasqanchejta qhawarina. Kay yachaqanata leerishaspaqa, imaynatachus jaqay tiempopi Bibliamanta Yachaqajkuna jina ruwayta atisqanchejpi tʼukurina.

3. Hermano Russellpa umallirichiykunasnin uj periodicopi orqhokojtin, ¿imaraykutaj cheqa kajman churanakojkuna mayta phiñakorqanku?

³ Periodiconejta. Hermano Russellwan, paywan khuska llankʼajkunapiwan Torremanta Qhawaj revistata 1879 watamantapacha orqhorqanku, chaynejtataj Diospa Reinonmanta ashkha runasman sumaj willaykunata chayacherqanku. Chaywanpis 1914 wata ñaupajta, Cristoj yanapayninwan sumaj willaykunata ashkha runasman willakorqa. Chaytaj 1903 watapi qallarerqa, maypachachus E. L. Eaton sutiyoj runa, Bibliaj wakin yachachiykunasninmanta hermano Russellwan parlariyta munarqa. Chay runaqa, Pensilvania llajtamanta (Estados Unidos) protestantespa sutinpi parlaj karqa. Chantapis hermano Russellman uj cartata apacherqa, maypichus nisharqa: “Mana kikintachu  yuyasqanchej imasmanta parlarisunman [...] chaytaqa runas mayta yachayta munankuman”, nispa. Hermano Russell, paywan khuska llankʼajkunaqa kikillantataj yuyarqanku. Chayrayku chay parlasqankuta may rejsisqa periodicopi (The Pittsburgh Gazette) orqhokunanta nerqanku. Chaykunataqa tukuy rejserqanku, hermano Russellpa nisqantapis allinta entienderqanku, chayrayku chay periodicoqa umallirichisqanta sapa semana orqhoyta munarqa. ¡Cheqa kajman churanakojkunaqa maytachá phiñakorqanku!

4, 5. ¿Imayna runataj hermano Russell karqa, imaynatá Diospa llajtanpi ima ruwayniyojpis kajkuna pay jina ruwankuman?

⁴ Pisi tiemponmanqa, waj periodicospis hermano Russellpa umallirichisqanta orqhoyta munarqanku. Kay 1908 watapitaj Torremanta Qhawaj revistapi nerqa “sapa killa 11 periodicospi” orqhokusqanta. Chaywanpis periodicosta orqhoymanta yachaj hermanosqa, hermano Russellman nerqanku, Diospa llajtanta kamachinapaj oficinasta mayqenchus Pittsburgh llajtapi (Pensilvania) kasharqa, aswan jatun llajtaman astakunanta. Ajinamanta ashkha periodicospi hermano Russellpa nisqasninta orqhokunanpaj. Hermano Russellqa chaypi, waj imaspiwan allinta tʼukurispa, 1909 watapi Brooklyn llajtaman (Nueva York) oficinasta astarqa. Astakusqankumanta pisi killasninmantaj 400 periodicospi jinaña, hermano Russellpa nisqanta orqhosharqanku, chaytaj yapakushallarqapuni. Diospa Reinon 1914 watapi sayachisqa kananpajqa, hermano Russellpa sutʼinchaykunasnin, umallirichisqan ima, 2.000 kuraj periodicospi orqhokusharqa, tawa parlaykunapitaj.

⁵ ¿Imatá chaymanta yachakunchej? Jehovaj llajtanpi ima ruwayniyojpis kajkunaqa, hermano Russell jina llampʼu sonqo kanankuta. Chaytataj ruwankuman imallatapis ruwayta munashaspa, wajkunaj nisqankuta uyarispa (Proverbios 15:22 leey).

6. ¿Imaynatataj periodicospi Bibliamanta cheqa kaj orqhokusqan runasta yanaparqa? Sutʼinchariy.

⁶ Chay periodicospi Diospa Reinonmanta cheqa kajta orqhokusqanqa, ashkha runasta kausayninkupi yanaparqa (Heb. 4:12). Sutʼincharinapaj, hermana Ora Hetzelqa 1917 watapi bautizakorqa. Pay nerqa: “Casarasqaña kashaspa mamayta watukoj rerqani, payqa Rochester llajtapi (Minnesota) tiyakorqa. Periodicosmanta hermano Russellpa sutʼinchaykunasninta kʼutushajta tariparqani. Chantá imatachus yachakusqanta sutʼinchariwarqa”, nispa. Hermana Hetzelqa yachakusqanta mana saqerqachu, 60 watasta jinataj Diospa Reinonmanta willarqa.

7. ¿Imaraykutaj periodicosnejta willakunallanpipunichus manachus tʼukurikunan karqa?

⁷ Kay 1916 watapi, willayta ñaupajman apaj hermanosqa tʼukurinanku karqa periodicospi churachinallankutapunichus manachus. ¿Imaraykú? 1) Ñaupaj kaj Guerra Mundialpi papel pisiyarqa. Chay watallapitaj Gran Bretañapi,  hermano Russellpa sutʼinchaykunasninta apachinankupaj encargasqa hermanosqa, kayta nerqanku: “Kinsa chunka periodicospi jinalla sutʼinchaykunasta orqhokun. Papel anchata wichariykusqanrayku ichá astawanraj pisiyanqa”, nispa. 2) Hermano Russell 1916 watapi 31 octubre killapi wañuporqa. Chayraykutaj 1916 watapi 15 diciembre killamanta Torremanta Qhawaj revistapi jinata nerqa: “Hermano Russell wañupusqanrayku manaña sutʼinchaykuna periodicospi orqhokonqachu”, nispa. Periodicosnejta niña willakojtinpis waj imasnejta willakuyta atillarqataj. Chaykunamanta ujtaj karqa “Foto-Drama de la Creación”.

8. ¿Imatataj ruwakunan karqa “Foto-Drama de la Creación” nisqata orqhokunanpaj?

⁸ Peliculata jina qhawachinapaj, uyarinapajwan. Hermano Russellwan paywan khuska llankʼajkunawanqa kinsa watata jina “Foto-Drama de la Creación” nisqata orqhonankupaj  llankʼarqanku. Chaytataj 1914 watapi qhawachiyta qallarikorqa (Pro. 21:5). Chay Dramaqa qhawachinapaj grabasqayoj, vidriopi dibujosniyoj, uyarinapaj grabasqayoj ima karqa. Chaypitaj Biblia nisqanman jina ruwakunanpaj ashkhas yanapakorqanku, animalespis kallarqataj. Kay 1913 watamanta uj willay nerqa: “Noejpa kausayninmanta grabakunanpajqa, may rejsisqa zoologicomanta animaleswan ruwakorqa”, nispa. Chantapis dibujayta, pintayta ima yachajkuna ruwarqanku, karqankutaj Filadelfia, Londres, Nueva York, París llajtasmanta.

9. ¿Imaraykutaj “Foto-Drama” nisqata ruwanapaj ashkha qolqeta, tiempotataj churakorqa?

⁹ ¿Imaraykutaj qolqeta gastakorqa, tiempotapis churakorqa “Foto-Drama” nisqata ruwakunanpaj? Kay 1913 watapi uj tantakuypi imatachus nikusqan sutʼinchan: “Estados Unidospi runasqa periodicosta mayta qhawayta munanku dibujosniyoj, fotosniyojtaj kasqanrayku. Peliculastapis tukuy qhawayta munanku. Chayta yachaspa, Diosmanta willajkuna jina, Bibliamanta yachachejkuna jinataj ñauparillaytapuni munanchej. Chayrayku películas, coloresniyoj dibujos ima, runasman willanapaj sumaj kasqanta reparanchej”, nispa.

10. ¿Maykunapitaj chantá ima parlaykunapitaj “Foto-Drama” nisqata qhawachikorqa?

¹⁰ Kay 1914 watapi “Foto-Drama” nisqata 80 llajtaspi sapa día qhawachikunanpaj wakichikorqa. Estados Unidos chantá Canadá suyusllapi casi 8 millones jina qhawarqanku. Chay watallapitaj qhawachikorqa Alemania, Australia, Dinamarca, Finlandia, Gran Bretaña, Noruega, Nueva Zelanda, Suecia, Suiza suyuspi. Chantapis, “Drama Eureka” nisqa orqhokorqa, chayqa mana Foto-Drama jinapunichu karqa. Chaypeqa mana grabasqas karqañachu, apaykachayta atinapaj jinallataj karqa. Chayrayku juchʼuy llajtaspipis qhawachikorqa. Kay 1916 watapajtaj “Foto-Drama” chayri “Drama Eureka” nisqa, kay parlaykunapi karqa: alemán, armenio, danonoruego, español, francés, griego, italiano, polaco, sueco ima.

11, 12. ¿Imaynatá uj joventa “Foto-Drama” nisqa yanaparqa, imatataj paymanta yachakusunman?

¹¹ Francés parlaypi “Foto-Drama” nisqa, Charles Rohner sutiyoj 18 watayoj joventa yanaparqa, payqa Colmar llajtapi tiyakorqa (Alsacia, Francia). Pay nin: “Llajtaypi chayta qhawacherqanku, Bibliamanta cheqa kajta allinta sutʼinchakusqanta qhawaspa mayta tʼukorqani”, nispa.

¹² Charlesqa bautizakorqa, 1922 watapitaj Diospaj astawan llankʼayta qallarerqa. Payqa Franciapi “Foto-Drama” nisqata qhawachiypi yanapakorqa. Pay nin: “Ashkha imasta ruwaj kani, violinta tocaj kani, qolqemanta encargasqa kaj kani (siervo de cuentas), publicacionestataj jaywaj kani (siervo de publicaciones). Niraj qallarikushajtintaj runasta mana chʼajwanankuta nej kani. Chantapis  samarina horataqa publicacionesta jaywaj kayku. Sapa hermano chayri hermana uj cheqapi kajkunaman jaywaj. Publicacionestaqa makillaykupi apaj kayku, sapa runamantaj jaywaj kayku. Chantapis punkupi mesaspi ashkha libros, folletos ima kallajtaj”, nispa. Kay 1925 watapitaj Charles Rohner Brooklyn Betelman wajyarisqa karqa, WBBR nisqa radio kicharikorqa chaypi tocajkunaj kamachejnin kananpaj. Payqa Diospa Reinonmanta astawan willakunanpaj, ima llankʼayllapipis tukuy sonqo yanapakuyta munarqa. ¿Pay jinallatajchu willayta sumajpaj qhawanchej? (Isaías 6:8 leey.)

13, 14. ¿Imaynatá radionejtañataj sumaj willaykunata willakorqa? (“ ¿Imastataj WBBR nisqa radiopi uyarichikoj?” chantá “ Mana qonqanapaj jina jatun tantakuy” nisqa recuadrostawan qhawariy.)

¹³ Radionejta. Kay 1920 watas chaynejpi “Foto-Drama” nisqataqa manaña anchata qhawachikusharqachu. Chaywanpis, radionejtañataj sumaj willaykunata astawan willakusharqa. Kay 1922 watapi 16 abril killapi, hermano Rutherford “May chhika runas kunan kausajkuna, wiñaypaj kausanqanku” nisqata umalliricherqa Metropolitan Opera House de Filadelfia (Pensilvania) nisqa lugarpi, chaytataj 50.000 runas jina radionejta uyarerqanku. Qhepan watapitaj, jatun tantakuymanta wakillanta ñaupaj kutirayku radionejta uyarichikorqa. Chay llankʼayta ñaupajman apajkunaqa, waj radiosnejta uyarichikojtinpis, radionku kanantapuni repararqanku. Chayrayku Staten Island llajtapi (Nueva York) radio wasita ruwarqanku. Kay 1924 watapitaj 24 febrero killapi chay radiota kicharikorqa, sutikorqataj WBBR nisqa.

¹⁴ Kay 1924 watapi 1 diciembre killamanta Torremanta Qhawaj revistapi WBBR radio imapajchus kasqanmanta jinata nerqa: “Cheqa kajta radionejta willayqa may sumaj kasqanta reparayku, imajtinchus mana ashkha qolqepajchu”, nispa. Chantá nillarqataj: “Señor cheqa kajta willakunanpaj waj radiospiwan kananta munajtenqa, chayta ruwakunanpaj yanapawasunpuni”, nispa (Sal. 127:1). Kay 1926 watapajtaj, Jehovaj llajtanqa sojta radiosniyojña karqa: iskay Estados Unidospi (WBBR Nueva York llajtapi chantá WORD Chicago llajta qayllapi), tawataj Canadapi (Alberta, Columbia Británica, Ontario chantá Saskatchewan provinciaspi).

15, 16. 1) ¿Imatá Canadamanta iglesiata kamachejkuna ruwarqanku? 2) Radionejta umallirichiykuna, wasimanta wasi willaywan, ¿imaynatá astawan willakunanpaj yanaparqa?

¹⁵ Iglesiata kamachejkunaqa sutʼita repararqanku Bibliamanta radionejta willakushasqanta. Albert Hoffman, pichus Saskatchewan radiopi imachus ruwakusqanta allinta yacharqa, nerqa: “Bibliamanta Yachaqajkunamantaqa (ajinata sutichakoj Jehovaj testigosninta) ashkha runasña sapa kuti uyarisharqanku. Kay 1928 watakamaqa radionejta mayta willakorqa. Jinapis kamachejkunaqa Canadapi tukuynin radiosniykuta wisqʼacherqanku iglesiata kamachejkuna nisqankurayku”, nispa.

 ¹⁶ Canadá suyupi tawantin radiosta wisqʼachejtinkupis, waj radiosnejtañataj umallirichiykunata uyarichikorqa (Mat. 10:23). Chantapis wakichikusqanta runa astawan uyarinankupaj Torremanta Qhawaj, ¡Despertad! revistaspi uj lista karqa, ima radiosnejtachus uyarichikushasqanmanta. Ajinamanta hermanosqa wasimanta wasi willashaspa chay radiosnejta umallirichiykunata uyarinankuta runaman nej kanku. ¿Chay jina ruwasqanku yanaparqachu? Kay 1931 watapi Bulletin nisqapi nerqa: “Radioqa wasimanta wasi willakunanpaj mayta yanapan. Yachakusqanman jinaqa hermano Rutherfordpa umallirichiykunasninta ashkha runas uyarinku, chayraykutaj librosta japʼikuyta munallanku”, nispa. Chantapis Bulletin nisqa hojitapi nerqa radionejta, wasimanta wasitaj Señorpa llajtan willasqanqa, sumajpuni kasqanta.

17, 18. Wakin imas manaña kikinchu kajtinpis, ¿imaynatá radionejta willakullarqapuni?

¹⁷ Kay 1930 watas chaynejpi, waj radiosnejta uyarichikusqanman mayta churanakorqanku. Jehovaj llajtanqa, 1937 watamantapacha manaña chay radiosnejta willarqachu, astawanqa wasimanta wasi willarqa. a Chaywanpis radionejta willakullarqapuni, maymanchus mana chayayta atikorqachu chay lugarespi chayri waj chʼampayrayku. Sutʼincharinapaj, 1951 watamantapacha 1991 watakama, Berlín occidentalmanta (Alemania occidental) uj radiopi Bibliamanta umallirichiykuna sapa kuti uyarichej kanku, Alemania orientalpi tiyakojkuna Diospa Reinonmanta uyarinankupaj. Surinam suyupi (Sudamérica) suyuntinpi uyarikoj radiopi, Bibliamanta cheqa kajta sapa semana 15 minutosta uyarichikoj. Chaytaj karqa 1961 watamantapacha, 30 watas kurajtataj uyarichikorqa. Estados Unidospitaj 291 radios, 48 llajtaspi “Toda escritura es provechosa” nisqata grabasqasta uyarichikoj. Jehovaj llajtanqa, chaykunamanta 350 kurajta wakicherqa, 1969 watamanta 1977 watakama. Chantapis 1996 watapi Samoa suyoj Apia llajtanpi (Pacífico sur nisqamanta ujnin suyun) uj radiopi “Respuestas a sus preguntas bíblicas” nisqata sapa semana uyarichikoj.

¹⁸ Kay 2000 wata ñaupajtaqa sumaj willaykunata radionejta uyarichiy chinkapusharqa. Chaywanpis waj imañataj rikhurerqa ashkha runasman chaynejta willanapaj.

19, 20. ¿Imaraykutaj Jehovaj llajtan Internetpi jw.org nisqata churarqa, imaynatataj yanapashan? (“ JW.ORG” nisqa recuadrotawan qhawariy.)

¹⁹ Internetnejta. Kay 2013 watapaj 2.700 millones kurajña Internetman yaykusharqanku. Yachakusqanman jinaqa 2.000 millones runas jina Internetman yaykunku, tukuy rijchʼaj aparatosnejta, celularnejta, tabletasnejta ima. Chaytaj Jallpʼantinpi yapakushallanpuni, astawanqa Africapi maypichus 90 millonesmanta astawan runas Internetman  yaykunku. Kay tiempo runasqa ima willaytapis Internetnejllataña yachanku.

²⁰ Jehovaj llajtanqa 1997 watapi Internetta apaykachayta qallarerqa. Kay 2013 watapajtaj Internetpi jw.org nisqa 300 parlaykunapi jina kasharqa, 520 parlaykunamanta astawantaj Bibliamanta yachachiykunata uraqachikuyta aterqa. Chantá mayqen aparatonejllatapis, jw.org nisqamanqa sapa pʼunchay 750.000 runasmanta astawan yaykunku. Chantapis jw.org nisqapi videosta qhawanku, sapa killataj librosta 3 millones kurajta uraqachinku, revistasta 4 millones kurajta chantá uyarinapaj grabasqasta 22 millones kurajta.

21. ¿Imatá Sina sutiyoj runamanta yachakunchej?

²¹ Internetpi jw.org nisqaqa, Diospa Reinonmanta sumaj willaykunata willanapaj may sumajpuni, maypichus mana willajta saqewanchejchu chaypipis. Sutʼincharinapaj, Sina sutiyoj runa 2013 wata qallariyta jw.org nisqata Internetpi tarerqa, Estados Unidospi oficinasninchejmantaj wajyarqa, Bibliamanta astawan yachakuyta munaspa. ¿Imaraykutaj wajyasqan tʼukunapaj jina karqa? Imaraykuchus chay runaqa musulmán religionniyoj karqa, maypichus tiyakun chaypitaj Jehovaj testigosnin mana willayta atinkuchu. Chay runaqa Internetnejta parlaspa, Bibliamanta yachakuyta qallarerqa semanapi iskay kutita, Estados Unidosmanta uj hermanowan.

22, 23. 1) ¿Imaraykutaj ashkha runasman chayanapaj tukuy imaymanamanta willajtinchejpis, wasimanta wasi willallanchejpuni? 2) ¿Imaynatá yachanchej Jesús tukuy imaymanamanta willasqanchejta bendecisqanta?

²² Ashkha runasman tukuy imaynasmanta willakun, periodicosnejta, “Foto-Drama” nisqanejta, radionejta, Internetpi  jw.org nisqanejta ima. Chaywanpis wasimanta wasi willaytaqa nipuni saqekunchu. Imaraykuchus Jehovaj llajtanqa Jesús jinallataj ruwan. Jesusqa mana ashkha runasllamanchu willaj, manaqa sapa runamanpis willallajtaj (Luc. 19:1-5). Payqa yachachisqasninta wakicherqa pay jina ruwanankupaj, nerqataj imamantachus willamunankuta (Lucas 10:1, 8-11 leey). Kay libroj 6 yachaqananpi rikorqanchej jina, chay llankʼayta ñaupajman apaj hermanosqa, sapa runaman willananchejta niwanchej (Hech. 5:42; 20:20).

²³ Diospa Reinon kamachiyta qallarisqanmanta 100 watasña, 8 millones willajkuna jinañataj Jehovaj munayninmanta runasman yachachishanku. Arí, Jesusqa imaynasmantachus Diospa Reinonmanta willasqanchejta bendecin. Qhepan yachaqanapeqa sumaj willaykunata tukuy llajtasman, ayllusman, waj parlayniyojkunaman ima willanapaj imaswanchus yanapawasqanchejta yachakusun (Apo. 14:6).