Casarasqasqa waj familia jinaña kanku. Chayrayku tatasniykita munakuyta, jatunpaj qhawayta ima, ni jaykʼaj qonqajtiykipis, qosaykita chayri warmiykita astawan munakunayki tiyan. Chaytataj ichá tatasniyki mana allinpajchu qhawankuman, chaywanpis Bibliaj yuyaychaykunasnenqa, tatasniykiwan sonqo tiyasqa kausakunaykipaj, qhariwarmi kausayniykipi kusisqa kausakunaykipaj ima yanapasonqa.

BIBLIA NIN: “Tataykita, mamaykitawan jatumpaj qhaway”, nispa (Efesios 6:2, 3). Mashkha watasniyoj kajtiykipis tatasniykita jatunpaj qhawanayki tiyan. Chantá qosayki chayri warmiyki tatasninpaj tiempochakunan kasqanta yuyarillaytaj. Imaraykuchus “munakuyniyoj runaqa mana envidiakunchu” chayrayku, qosayki chayri warmiyki tatasninwan allinta apanakojtenqa, ama saqesqa jina sientekuychu (1 Corintios 13:4; Gálatas 5:26).

KAYTA RUWAWAJ:

• Ama niychu: “Tatasniyki qhawarallawankupuni” chayri “mamaykita ni jaykʼaj ruwasqaywan kusichinichu”, nispa

• Qosayki chayri warmiyki imatachus yuyasqanta entiendenaykipaj kallpachakuy

BIBLIA NIN: “Chayrayku qhareqa tatanta mamantawan saqenqa, warminwantaj ujchakonqa, iskayninkutaj uj runa jinalla kanqanku”, nispa (Génesis 2:24). Casarakojtiykiñapis ichá tatasniykeqa qhariwarmi kausayniykipi satʼikullankumanpuni.

Iskayniykichej parlariychej, imaynatachus tatasniykichejwan apanakunaykichejta. Chantá qhariwarmi kausayniykichejman ama satʼikamunankupaj, mana sonqonkuta nanachispalla, munakuywan paykunawan parlariychej (Proverbios 15:1). Llampʼu sonqoyoj, kʼumuykukuyniyoj, pacienciayoj kayqa, familiaykichejwan allinta apanakunaykichejpaj, “munakuypi kawsaku[naykichejpajpis]” yanapasonqachej (Efesios 4:2).

KAYTA RUWAWAJ:

• Familiaykichej anchata satʼikamusqankuta reparaspaqa, sonqo tiyasqa kashaspa iskayniykichej chaymanta parlariychej

• Imaynatachus ruwanaykichejta ajllaychej