Ezequielpa rikusqan templo “jatun orqopi” kasharqa (1). Jehovallata yupaychayta, ¿jatunpajchu qhawanchej, kausayninchejpipis ñaupajmanchu churanchej?

Jawa perqaqa (2) templota karunta muyuykorqa, jatun campotaj karqa (3). Templotaj chaupinpi kasharqa. Chaymantataj kayta yachakunchej: Mana saqenachu imapis Jehovallata yupaychayninchejta chʼichichananta. “Mana santo cheqamanta” kaj imaspis Jehovallata yupaychaymanta karupi kanan kajtenqa, millay imas, khuchichakuy imaspis aswan karupi kanan tiyan Jehovallata yupaychajkunaj kausayninkumanta (Eze. 42:20).

Temploj santo lugarninmanta uj mayu llojsimushan (4), risqanman jinataj anchoman tukun, jallpʼatataj sumaj jallpʼaman tukuchin kausay kananpaj. Kay libromanta capítulo 19 chay bendicionesmanta parlan.

Jawa punkuspis (5) ukhu punkuspis (9) jatuchaj karqanku. Chaytaj yuyarichiwanchej Jehovaqa payllata yupaychajkunaman sumaj kamachiykunata qosqanta. Ukhu punkuspis jawa punkuspis kikinkamalla karqanku, chhikankamallataj. Chayrayku nisunman Jehovaj kamachiykunasnenqa tukuy kamachisninpaj kikin kasqanta, congregacionpi ima cargoyoj kajtinkupis chayri ima ruwanata japʼejtinkupis.

Comedoresqa (8) yuyarichiwanchej, unay tiempopi israelitasqa templopi jaywasqanku ofrendasmanta mikhuyta atisqankuta. Chaytaj Jehovawanpis mikhushankuman jina karqa. Kunanqa manaña ajinachu. Cristianosqa mana rikukoj templopi Diosta yupaychanchej, chaypitaj “uj jaywanallata” jaywakorqa (Heb. 10:12). Jinapis Diosta yupaychaspa uj jaywanata jina jaywanchej (Heb. 13:15).

Ezequiel mosqoypi jina rikusqanpeqa ashkha medidas tiyan, chaymantataj kayta yachakunchej: Jehová payllata yupaychayta watejmanta sayarichinanta nisqanqa juntʼakunpuni, mana cambianchu, imaynachus chay medidas cabal kanku ajinata. Ezequielqa mosqoypi jina rikusqanpi mana waj runasmanta parlanchu, jinapis payqa qhelqarqa imaynatachus Jehová kʼamisqanta sacerdotesta, kurajkunata, israelitastawan. Chayrayku tukuyninchej Diospa kamachiykunasninta kasukunanchej tiyan.