Ezequiel 23 capitulopi, Diosqa llajtanta juchachan payta wasanchasqanmanta. Kay capitulopipis 16 capitulopipis khuchi warmismanta parlan. Nintaj Jerusalenqa sullkʼa kaj kasqanta, Samariataj kuraj hermanan kasqanta. Iskaynin capitulospi nin sullkʼa kajqa kurajnin jinallataj purispa khuchi warmiman tukusqanta. Chantá kuraj hermananmantapis aswan millaytaraj purisqanta. 23 capitulopi willan chay iskaynin hermanaspa sutisninkuta. Kuraj kajqa Oholá sutikun, Samariawantaj ninakun. Samariaqa chunka ayllusniyoj Israelpa capitalnin karqa. Sullkʼa kajtaj Oholibá sutikun, Jerusalenwantaj ninakun. Jerusalenqa Judá nacionpa capitalnin karqa (Eze. 23:1-4). a

23 capitulowan 16 capitulowanqa waj imaspipis kikinkamallataj kanku. Iskayninpi nin qallariypeqa chay iskaynin warmis Jehová Diospa warmisnin jina kasqankuta, chaymantataj Jehová Diosta wasanchaspa khuchi warmisman tukusqankuta. Iskaynin capitulospi tiyan sumaj willay. 23 capitulomanta nisqaqa 16 capitulopi aswan sutʼita nishan Jehová llajtanta perdonananta. Jinapis iskaynin capitulospi nin Jehovaqa llajtanpa khuchichakuyninta tukuchinanta (Eze. 16:16, 20, 21, 37, 38, 41, 42; 23:4, 11, 22, 23, 27, 37).

Ñaupajtaqa publicacionesninchejpi sutʼinchakoj chay iskaynin hermanas Oholawan Oholibawan, cristiano nichikojkunawan ninakusqankuta, kay iskay jatun tʼaqasninkuwan: catolicoswan evangelicoswan. Jinapis Diosmanta ashkhata mañakuspa, astawan estudiakusqanwantaj kay tapuykuna rikhurerqa: ¿Maykʼajllapis cristiano nichikojkuna Jehovaj warmin jinachu karqanku? ¿Maykʼajllapis Dioswan uj tratota ruwarqankuchu? Mana. Diospa llajtan Israelwan ‘mosoj tratota’ ruwakushajtin, Jesustaj allinyachejnin kashajtin, cristiano nichikojkunaqa mana karqankurajpischu. Chantapis ni jaykʼaj ajllasqa cristianoschu karqanku (Jer. 31:31; Luc. 22:20). Cristiano nichikojkunaqa apóstoles wañupusqankumanta aswan qhepamanraj rikhurenqanku. Paykunaqa 300 wata qhepata rikhurisqankumantapacha Diosta wasancharqanku, mana allin imastataj ruwarqanku. Chayrayku ‘cizaña qhora jina’ karqanku, Jesús trigomanta cizaña qhoramantawan kikinchasqanman jina (Mat. 13:24-30).

Jehovaqa Jerusalén llajtatapis Samaria llajtatapis perdonananta nerqa (Eze. 16:41, 42, 53-55). Cristiano nichikojkunamantataj Bibliaqa mana chayta ninchu. Astawanpis nin Jatun Babiloniamanta kasqanrayku tukuchisqa kananta.

Chay tukuy imasta qhawarispa nisunman Oholawan Oholibawanqa mana cristiano nichikojkunawanchu ninakusqankuta. Jinapis imaynatachus paykuna kausasqankoqa reparachiwanchej imaynatachus Jehová qhawasqanta santo sutinta pisipaj qhawajtinku, payllata yupaychaymanta kamachiykunasnintapis mana valechejtinku. Cristiano nichikojkunaqa jatun juchayoj kanku. Paykunaqa ninku Diosta yupaychasqankuta, Jehovaj wawan Jesucristopis kamachejninku kasqanta. Jinapis nillankutaj Dioswan Jesuswan ujlla kasqankuta. Nitaj kasukunkuchu Jesuspa kamachisqanta, mana ‘kay mundomanta runas jinachu’ kanata kamachisqanta (Juan 15:19). Cristiano nichikojkunaqa llulla diosesta yupaychasqankurayku, politicamanpis satʼikusqankurayku sutʼita reparachikunku ‘atiyniyoj khuchi warmi’ parte kasqankuta (Apo. 17:1). Chayrayku paykunaqa tukuchisqallataj kanqanku llulla religiones parte kasqankurayku.