Bibliaj profeciasninwan, imaschus pasasqanwan sutʼita rikuchin Jesús 1914 watapi, cielopi kamachiyta qallarisqanta. Chay watallataj Satanaspa mundonpaj tukukuynin qallarerqa. ¿Imatataj Jesús ruwarqa rey kaspaña? ¿Chay ratochu kamachisninta Jatun Babiloniamanta kacharicherqa? ¿1914 watapichu allin kamachi yuyayniyojta churarqa? ¿Chay watallatajchu cosechata qallaricherqa? (Mat. 24:45).

Mana jinachu karqa. Apóstol Pedroqa Dios yuyaychasqanman jina nerqa, “Diospa wasinwan juicio” qallarinanta (1 Ped. 4:17). Profeta Malaquiaspis nerqa Jehová yupaychana wasinman ‘tratomanta willarajwan’ jamunanta, nisunman Wawanwan (Mal. 3:1-5). Chay tiempoqa kanan karqa, pruebaman churana tiempo, llimphuchasqa kana tiempotaj. ¿Chay profecías juntʼakorqachu?

Juntʼakorqapuni. 1914 watamantapacha 1919 wata qallariykama Bibliamanta Yachaqajkunaqa, nisunman Jehovaj testigosnenqa prueba tiempopi, llimphuchana  tiempopitaj rikukorqanku. Diospa kamachisninmanta ashkhas suyasharqanku 1914 watapi kay mundo tukukunanta. Chay suyasqanku mana juntʼakojtintaj qʼasa sonqoslla kasharqanku. 1916 watapitaj niña imanakuyta aterqankuchu Charles Russell wañupojtin. Payqa Diospa llajtanta sumajta yanaparqa. Chayrayku wakin cristianosqa payman allin kʼaskasqa karqanku, cuentanmanta yaykoj Joseph Rutherfordpa contranpitaj sayaykorqanku. Ajinapi grupos rikhurerqanku, 1917 watapitaj Diospa llajtanqa tʼaqanakunanpajña kasharqa. Religionta kamachejkunaqa 1918 watapi autoridadesta tanqarqanku hermano Rutherfordta, qanchis yanapajkunasnintawan qhasillamanta juchachanankupaj, ajinapitaj paykunata carcelman wisqʼaykorqanku. Chantá Brooklyn llajtapi kaj central wisqʼakorqa. Chaypi sutʼita reparanchej Diospa llajtanqa chay tiempopi Jatun Babiloniaj makillanpiraj kasqanta.

Jinapis 1919 watapeqa ujllata tukuy ima cambiarqa. ¿Imataj chay wata karqa? Chay wata qallariyta hermano Rutherford, yanapajkunasninwan khuska kacharichisqa karqanku, chay ratopachataj llankʼaj churakorqanku. Paykunaqa uj jatun tantakuyta wakichiyta qallarerqanku, chay tantakuytaj kunankama yuyarisqallapuni. Chantapis uj mosoj revistata wakichiyta qallarerqanku predicacionpi jaywanapaj. Chay revistaj sutenqa The Golden Age karqa (kunantaj ¡Rijchʼariy! sutikun). Chantapis sapa congregacionpi uj encargado hermanota churakorqa predicacionta wakichinanpaj, ñaupajmantaj apananpaj. Chay watallataj ñaupaj kutirayku Bulletin nisqata orqhokorqa (kunantaj Cristiano Kausayninchej tantakuypaj nisqa folleto). Chaytaqa orqhokorqa willasqanchej aswan sumaj wakichisqa kananpaj.

¿Imaynatataj chay tukuy imas ruwakorqa? Chayqa ruwakorqa Cristo llajtanta Jatun Babiloniamanta kacharichisqanrayku, allin kamachi yuyayniyojtataj churasqanrayku. Cosecha tiempoqa qallarerqaña, chay watamantapachataj tʼukunata tukuynejpi willakushan.