Mosoj sutʼinchaykuna
Watas pasasqanman jina Torremanta Qhawaj revistaqa Ezequielpa profeciasninmanta wakin imasta creesqanchejta waj jinamanta sutʼinchan. Kunantaj Tukuypis Jehovallata yupaychajtinku libropi astawan sutʼinchaykuna tiyan. Kay tapuykunata imaynatachus sutʼinchakusqanta qhawarina.
¿Imawantaj ninakunku tawa uyasniyoj kausajkuna?
Ñaupajta kay jinata sutʼinchakorqa: Chay kausajkunaj nisunman chay querubinespa tawa uyasninkoqa ninakun Jehovaj justicianwan, yachayninwan, atiyninwan, munakuyninwanpis.
Kunan kay jinata sutʼinchakun: Chay kausajkunaj tawa uyasninku Jehovaj justicianwan, yachayninwan, atiyninwan, munakuyninwan ninakojtinkupis, chay tawa uyasninkoqa tukuyninku ninakunku imaynachus Dios kasqanwan, nisunman Diospa tukuy kʼacha kaykunasninwan. Chantapis chay tawa uyasqa Jehovaj jatun atiyninmanta, jatun kayninmantawan mayta yachachiwanchej.
Imaraykutaj waj jinamanta sutʼinchakun: Diospa Palabranqa tawa palabrata oqhariyta yachan imapis tukuynin kasqanmanta, cabal kasqanmanta parlanapaj. Chay tawa uyas ujchasqa kasqankoqa mana Jehovaj tawa kʼacha kaykunasnillanwanchu ninakunku. Chay tawa kʼacha kaykunasnenqa Diospa tukuynin kʼacha kaykunasninmanta uj partella kanku. Chaykunataj kashanku Diospa tukuynin kʼacha kaykunasninpi. Chantapis chay tawa uyasqa ninakunku jatun kaywan, kallpawan, atiywan ima. Jehová leonta, torota, aguilata, runatapis atiyniyojta ruwajtinpis, chay uyasniyoj querubinesqa Jehovaj kamachina tiyananpa uranpi kashanku. Chaytaj reparachiwanchej Jehová tukuyta kamachisqanta, tukuy ima patapi kasqanta.
¿Piwantaj ninakun tinta churanayoj runa?
Ñaupajta kay jinata sutʼinchakorqa: Tinta churanayoj runaqa kay jallpʼapi ajllasqa cristianosmanta puchojkunawan ninakun. Ajllasqa cristianosqa willasqankuwan, runasta yachachisqankuwanpis runaspa frentenkupi marcata jina churashanku ‘may chhika runasmanta’ kanankupaj (Apo. 7:9).
Kunan kay jinata sutʼinchakun: Tinta churanayoj runaqa Jesucristowan ninakun. “Manchay ñakʼariy” tiempopi may chhika runasmanta kajkunata juzgaspa ovejas kasqankuta nenqa, ajinamantataj marcanqa (Mat. 24:21).
Imaraykutaj waj jinamanta sutʼinchakun: Jehovaqa Wawanta churan juzgananpaj (Juan 5:22, 23). Mateo 25:31-33 nisqanman jina Jesús juzgaspa nenqa pikunachus ‘ovejas’ kasqankuta, pikunatajchus ‘cabras’ kasqankuta.
¿Iskaynin khuchi warmis Oholawan Oholibawan cristiano nichikojkunawanchu ninakunku? ¿Chay iskay hermanas cristianos nichikojkunamanta aswan jatuchaj tʼaqasninwanchu ninakun nisunman catolicoswan evangelicoswan?
Ñaupajta kay jinata sutʼinchakorqa: Oholaqa Samaria, Israelpa capitalnin. Payqa kuraj kaj, catolicoswantaj ninakun. Oholibataj Jerusalén, Judaj capitalnin. Payqa sullkʼa kaj, evangelicoswantaj ninakun.
Kunan kay jinata sutʼinchakun: Chay iskay khuchi warmi hermanasqa mana cristiano nichikojkunaj tʼaqasninkuwanchu ninakunku. Jinapis imaynatachus kausakusqankuta yachayqa reparachiwanchej imaynatachus Jehová qhawan kamachisnin kashaspa waj Diosesta yupaychajkunata. Llulla religionestapis millachikullantaj.
Imaraykutaj waj jinamanta sutʼinchakun: Bibliaqa mana ninchu Oholawan Oholibawan cristiano nichikojkunawan ninakusqankuta. Israelwan Judawanqa Jehovaj kasukoj warmisnin jina karqanku. Cristiano nichikojkunarí ni jaykʼaj Jehovaj warmisnin jinachu karqanku. Chantapis Ezequiel 16 capitulopi, 23 capitulopipis Diosta mana kasukoj kamachisninta khuchi warmiswan kikinchakun, cambiajtinkutaj paykunata perdonananta nin. Cristiano nichikojkunamantarí ni jaykʼaj chayta ninchu Jatun Babilonia parte kasqankurayku.
¿Cristiano nichikojkunawanchu ninakun Diosta wasanchaj ñaupa Jerusalén llajta?
Ñaupajta kay jinata sutʼinchakorqa: Diosta wasanchaj Jerusalén llajtaqa cristiano nichikojkunawan ninakun. Chayrayku Jerusalén thuñisqa kasqanqa cristiano nichikojkunaj tukukuyninwan ninakun.
Kunan kay jinata sutʼinchakun: Jerusalén llajtapi Diosta wasanchasqanku, llulla dioskunata yupaychasqanku, suwakusqankupis cristiano nichikojkunaj ruwasqankuta yuyarichiwanchej. Jinapis manaña ninchejchu Jerusalenqa cristiano nichikojkunawan ninakusqanta.
Imaraykutaj waj jinamanta sutʼinchakun: Bibliaqa mana ninchu Jerusalén cristiano nichikojkunawan ninakusqanta. Jerusalenpeqa Jehovallata yupaychaj kanku, cristiano nichikojkunatajrí ni jaykʼaj Jehová Diosllata yupaycharqankuchu. Chantapis Jehovaqa Jerusalenta uj tiempota perdonarqa, cristiano nichikojkunatarí ni jaykʼaj perdonanqachu.
¿Imaynatá juntʼakorqa Ezequiel chʼaki tulluswan juntʼa pampata rikusqan?
Ñaupajta kay jinata sutʼinchakorqa: Ajllasqa cristianosqa 1918 watapi qhatiykachasqa kasharqanku, Jatun Babiloniataj paykunata presosta jina japʼerqa. Diospaj ruwanasninkuta casi manaña ruwayta atisqankurayku wañusqa jina kasharqanku. Presos jina kasqankumantaqa 1919 watapi kacharichisqa karqanku, chaypacha Jehovaqa paykunata kausaricherqa gobiernonmanta willanankupaj.
Kunan kay jinata sutʼinchakun: Diosta yupaychajkunaqa may chhika watasta presos jina kasharqanku, wañusqa jina kasharqanku, nitaj 1918 watamantapachallachu. Pachaj wata qhepamantapacha presos jina karqanku, 1919 watakama. Paykunaqa unay watasta presos jina karqanku, imaynatachus Jesús trigomantawan cizaña qhoramantawan kikinchaypi nerqa jina.
Imaraykutaj waj jinamanta sutʼinchakun: Israelitasqa unay watasta presos karqanku, 740 watamantapacha 537 watakama. Ezequielpa profecianqa mana ninchu chay tullus ‘chʼakislla’ kasqankuta, manachayqa “manchay chʼaki” tulluspuni kasqankuta. Chaytaj reparachiwanchej chay tullusqa unay wañusqa runaspa tullusninku kasqanta. Biblia chay tullus watejmanta kausarimusqankuta nisqantaj niyta munan pisimanta pisi kausarimunankuta, mana uj ratollapichu.
¿Ima niytá munan iskay kʼaspis ujchaykukusqanku?
Ñaupajta kay jinata sutʼinchakorqa: Primera Guerra Mundialpi kasukoj ajllasqa cristianosmanta kay jallpʼapi puchojkunaqa uj tiempota tʼaqanakorqanku. Chaymantataj 1919 watapi watejmanta ujchaykukorqanku.
Kunan kay jinata sutʼinchakun: Kay profeciaqa sutʼinchan Jehová kamachisninta ujchaykunanta, ujlla kanankupaj. 1919 watamanta qhepaman watas pasasqanman jina kay jallpʼapi wiñay kausayta japʼiyta suyakojkunaqa, ajllasqa cristianosmanta puchojkunaman astawan ujchaykukunku. Chay iskaynin grupos khuska Jehovata yupaychanku, uj llajta jinalla.
Imaraykutaj waj jinamanta sutʼinchakun: Profeciaqa mana ninchu uj kʼaspi iskayman partikusqanta, watejmantataj ujchaykakapusqanta. Chayrayku mana nishanchu uj grupo iskayman tʼaqakunanta, watejmantataj ujchaykakapunanta. Astawanqa nishan iskay grupos ujchaykukunankuta.
¿Pitaj Magogmanta Gog?
Ñaupajta kay jinata sutʼinchakorqa: Magogmanta Gogqa Satanaspa sutin cielomanta kay jallpʼaman wijchʼuchikamusqanmantapacha.
Kunan kay jinata sutʼinchakun: Magogmanta Gogqa uj qotu ujchasqa naciones kanku, pikunachus manchay ñakʼariy tiempopi Jehovaj kamachisninpa contranta oqharikonqanku chaykuna.
Imaraykutaj waj jinamanta sutʼinchakun: Gogmanta profeciapeqa nin, aycha mikhu pʼisqosman qaraykusqa kananta, paymantaj kay jallpʼapi sepultura qosqa kananta. Chayrayku entiendenchej Gogqa mana uj espirituchu kasqanta. Chantapis Daniel libropi, Apocalipsispipis naciones Diospa llajtanpa contranta oqharikunanta nisqanqa, Gogpa oqharikusqanwan kikillantaj (Dan. 11:40, 44, 45; Apo. 17:14; 19:19).
¿Ezequiel purisqan templo kikillantajchu apóstol Pablo parlasqan templowan?
Ñaupajta kay jinata sutʼinchakorqa: Ezequielpa rikusqan templowan apóstol Pablo parlasqan templowan kikillan.
Kunan kay jinata sutʼinchakun: Ezequielpa rikusqan temploqa mana 29 watapi rikhurerqa chay mana rikukoj templochu karqa, manachayqa preso apasqa kasqankumanta kutimuytawan Jehovallataña Moisespa Leyninpi nisqanman jina yupaychasqankuwan ninakun. Pablo chay mana rikukoj templomanta Dios yuyaychasqanman jina sutʼinchasqanpeqa astawan parlashan, Jesús Aswan Kuraj kaj Sacerdote jina imatachus 29 watamantapacha 33 watakama ruwasqanmanta. Ezequielpa rikusqanpeqa mana kuraj kaj sacerdote kanchu. Astawanqa 1919 watamantapacha watejmanta Jehovallata yupaychanamanta parlan. Chayrayku Ezequielpa rikusqan templo imaynachus kasqan, medidasninpis imawanpunichus ninakusqanta mana uma pʼakikuyta maskʼanchejchu. Astawanpis Ezequielpa rikusqan imastachus Jehovallata yupaychanamanta yachachiwasqanchejta maskʼanchej.
Imaraykutaj waj jinamanta sutʼinchakun: Ezequielpa rikusqan templowan mana rikukoj templowanqa ashkha imaspi mana kikinchu kanku. Ezequielpa rikusqan templopeqa ashkha uywa ofrendasta jaywakun, mana rikukoj templopitaj uj ofrendallata jaywakun, “uj kutillata wiñaypajtaj” (Heb. 9:11, 12). Ezequielqa Cristomanta may chhika watas ñaupajta kausakorqa, chay tiempopajtaj Jehovaqa manaraj mana rikukoj templomanta sutʼincharqarajchu.
