JEHOVAPIS kutin kutita uj michej jina kasqanta nin. Pay nin: “Noqa ovejasniyta maskʼamuspa cuidasaj”, nispa (Ezequiel 34:11, 12).

¿Pikunataj kanku Jehovaj ovejasnin? Payta munakojkuna, payta yupaychajkuna ima. Biblia nin: “Jamuychej, kʼumuykukuspa Diosta yupaychasunchej. Jehová Diosninchejpa ñaupaqenpi qonqorikuna, paymin Ruwawajninchejqa. Paymin Diosninchejqa. Noqanchejtaj llajtan kanchej. Paymin ovejitasta jina qʼomer pampaspi michiwanchej”, nispa (Salmo 95:6, 7). Imaynatachus ovejas michejninkuta kasukunku, ajinallatataj Jehovata yupaychajkunaqa payta kasukunku. Chayta ruwaytaj wakin kutis mana atikullanchu. Diospa kamachisnenqa wakin kutis “chʼeqerasqa” chayri “chinkasqa ovejas jina” kanku (Ezequiel 34:12; Mateo 15:24; 1 Pedro 2:25). Jinapis Jehovaqa paymanta karunchakojkunamanta mana qonqakapunchu, kutinpunankutataj suyashallanpuni.

 ¿Jehovata Michejniykita jinallapunichu qhawanki? ¿Imaynatá Jehová kay tiempopi uj michej jina qhawashawanchej?

Ashkha yachachiykunata mikhunata jina qowanchej. Jehová nin: “Sumaj pastospi mikhuchisaj [...]. Chaypi sumaj pastospi puñurikonqanku, [...] sumaj pastospi mikhurikonqanku”, nispa (Ezequiel 34:14). Jehovaqa ashkha yachachiykunata mikhunata jina tiemponpi qowanchej. ¿Yuyarikunkichu Jehová mañakuykunasniykiman uj yachaqananejta, uj discursonejta chayri uj videonejta kutichisusqanta? ¿Chay kutipi repararqankichu Jehová mayta munakususqanta?

Jarkʼawanchej, yanapawanchej ima. Jehová nin: “Karunchakojkunata kutirichimusaj, nanasqasta vendaykusaj, tullusta kallpachasaj”, nispa (Ezequiel 34:16). Jehovaqa llakisqa kajkunata kallpachan, nanasqastapis vendaykun sanoyapunankupaj, uj hermanollataj nanaykuchejtinpis. Chantapis karunchakojkunata kutinpunankupaj yanapan. Payqa yanapallantaj pikunachus paykuna kikinkumanta mana allinta yuyajkunatapis.

Chinkajtinchej maskʼawanchej. Jehová nin: “Maykunasmanchus [...] tʼaqarasqa karqanku, chay tukuynin lugaresmanta ovejasniyta salvamusaj”, nispa. Chantapis nillantaj: “Chinkasqasta maskʼamusaj”, nispa (Ezequiel 34:12, 16). Jehovaqa chinkasqa ovejasnin cambianankuta suyashallanpuni. Payqa reparan mayqen ovejanchus chinkasqanta, chayrayku payta maskʼamun, tarispataj kusikun (Mateo 18:12-14). Chayrayku payqa kamachisninta nin: “Ovejasníy, cuidasqay ovejasníy”, nispa (Ezequiel 34:31). Qanpis Jehovaj ujnin ovejitan kanki.

¿Imaraykutaj Jehová kutinpunaykita nishasunki? Imaraykuchus payqa kusisqa kausakunaykita munan. Payqa nin ovejasninpaj bendicionesta parata jina parachimunanta (Ezequiel 34:26). Paypa nisqantaj juntʼakunpuni. Qanqa chayta kausayniykipi rikorqankiña.

¿Imaynataj kasharqanki Diospa sutinmanta, imastachus runaspaj ruwayta munasqanmanta ima yachakuspa? ¿Yuyarikunkichu jatun tantakuykunapi hermanoswan khuska kay mayta kallpachasusqanta? Chantapis allin sonqoyoj runasman Bibliamanta sumaj willaykunata willaspaqa kusisqa, sonqo juntʼasqataj wasiykiman kutipoj kanki, ¿icharí?

Kunanpis watejmanta kusisqa kayta atillawajtaj. Unay tiempomanta Diospa kamachisnin mañakorqanku: “Jehová Diosníy, qanman kutirichiwayku, noqaykutaj chay rato qanman kutinpusqayku. Tukuy imapis unay tiempospi jina kachun ari”, nispa (Lamentaciones 5:21). Jehovaqa mañakusqankuta uyarerqa, paykunataj watejmanta kusiywan sirverqanku (Nehemías 8:17). Jehovaqa qantapis paykunata jina yanapasonqa.

Jinapis Jehovaj llajtanman kutinpuyta munajkunaqa, mana kutinpuyta atillankuchu. Kay folletopitaj qhawarisun imaraykuchus mana kutinpuyta atillasqankuta, imatachus kutinpunankupaj ruwanankutapis.