Munasqa hermanoy:

Yachanki jina, Bibliaqa Diosta kasukoj ashkha runasmanta parlan. Paykunaqa “noqanchej jina” runasllataj kasqankurayku, imaymana llakiykunapi rikukorqanku (Santiago 5:17). Wakinkunaqa ashkha llakiykunasniyoj karqanku chayri sonqo nanasqas kasharqanku Diosta yupaychajkunallataj paykunata sufrichisqankurayku. Wakinkunatajrí, pantasqasninkupi anchata yuyaspa mayta sufrerqanku.

Chanta, ¿paykuna Diosmanta karunchasqatachu karunchakaporqanku? Mana. Paykunamanta ashkhasqa uj salmista jina nerqanku: “Chinkasqa oveja jina waj ñanta japʼirini. Noqa kamachiykitaqa maskʼaway ari, manapuni kamachisqasniykitaqa qonqanichu”, nispa (Salmo 119:176). Ichá qanpis salmista jina kasharqanki.

Jehovaqa ni jaykʼaj qonqakapunchu paymanta karunchakojkunamanta, astawanpis paykunata maskʼan. Chaytataj wakin kutis ruwan congregacionmanta hermanosnejta. Imaynatachus Jobta yanapasqanmanta parlarina. Jobqa ashkha llakiykunapi rikukorqa, tukuy kapuyninta pierderqa, wawasnin wañuporqanku, paypis sinchʼita onqoykorqa. Mana chayllachu, amigosnin yanapanankumantaqa, parlasqankuwan sonqonta nanacherqanku. Jobqa Jehovata mana wasanchaspapis, uj tiempota Jehovamanta mana allin imasta yuyarqa (Job 1:22; 2:10). ¿Imaynatá Jehová payta yanaparqa?

Jehovaqa Jobta yanapananpaj Elihuta kacharqa. Elihutaj Job llakiykunasninmanta parlasqanta sumajta uyarerqa, chaymantaraj imatachus yuyasqanta nerqa. ¿Ima nerqataj? ¿Jobmanta sajratachu parlarqa? Chayri, ¿pantaykusqanta nispachu kʼumuykachacherqa? Manachayrí, ¿may kasqanta yuyakuspachu parlapayarqa? Mana. Astawanpis payqa, Dios yuyaychasqanman jina nerqa: “Diospa ñaupaqenpi qan jinalla kani. Noqapis tʼurumanta ruwasqa kani. Chayrayku ama noqataqa manchachikuwaychu. Parlasqaywanqa mana sonqoykita nanachisqaykichu”, nispa (Job 33:6, 7). Jobta astawan llakichinanmantaqa, kʼachallamanta yuyaycharqa, kallpacharqataj.

Noqaykupis Elihú jina ruwayta munasqaykurayku, niraj kay folletota wakichishaspa, Diosmanta karunchakoj ashkha hermanospa nisqankutaraj sumajta uyarerqayku, chantataj imaynachus kashasqankupi tʼukurerqayku (Proverbios 18:13). Chantá Diosmanta mañakuytawan, Bibliapi qhawaykurerqayku imaynatachus Jehová ajinapi rikukoj kamachisninta yanapasqanta. Chaymantataj paykunaj kausayninkuta, kay tiempopi Jehovamanta karunchakojkunaj kausayninkuwan kikincharqayku. Chayman jinataj kay folletota wakicherqayku. Chayrayku munayku kay folletota sumajta leerinaykita. Noqaykoqa maytapuni munakuyku.

Diospa Llajtanta Kamachejkuna