SONQONCHEJ juchachawasqanchejqa uj llasa qʼepi jina kanman. Rey Davidqa ajinapi rikukorqa, chayrayku pay nerqa: “Pantasqasneyqa umay patata wasarishan, llasa qʼepi jina ancha llasapuni noqapajqa”, nispa (Salmo 38:4). Wakin hermanosqa Jehová ni jaykʼaj perdonananta yuyaspa anchata llakikorqanku (2 Corintios 2:7). Qanpis, ¿juchallikusqaykirayku Jehovamanta may karunchasqa kasqaykitachu yuyanki? ¿Jehová mana perdonasunantachu yuyanki? Ama llakikuychu, Jehová yanapasuyta munan.

Jehovaqa tukuy sonqo arrepientekojkunata mana saqerparinchu, astawanpis yanapayta munan. Jesusqa chinkasqa qhari wawamanta kikinchaypi, mana allinta kausananpaj wasinmanta ripoj wawamanta parlarqa, nerqataj chay wawa tiempowan wasinman kutipusqanta. ¿Imataj karqa wasinman kutipojtin? ‘Karullapiraj kashajtin, tatanpa sonqon wawayarqa payta rikuspa, usqhayllata taripamuspataj abrazaykorqa, may munakuywantaj muchʼaykorqa’ (Lucas 15:11-20). Jehovaqa chay tata jina munakuyniyoj, khuyakuyniyojtaj. Qanrí, ¿payman qayllaykuyta munaspapis “karullapiraj” kasqaykitachu reparanki? Jehovaqa llajtanman kutinpunaykita mayta suyashan.

Jehová mana perdonasunanpaj jina, ¿ashkha juchayoj kasqaykitachu yuyanki? Jina kajtenqa Isaías 1:18 nisqanpi tʼukuriy, chaypi nin: “Jehová Diosqa nillantaj: ‘Jamuychej, chay imasmanta parlarinachej. Juchasniykichej ancha puka kajtinpis, ritʼi jina yurajman tukonqa’”, nispa. Arí, Jehovaqa yuraj ropapi puka tintawan pintasqaman rijchʼakoj juchastapis perdonan.

Jehovaqa mana munanchu sonqoyki juchachasusqanrayku llakikunaykita. Jehová perdonawajtinchej, sonqonchejpis mana juchachawajtinchejqa, sonqo tiyasqa kanchej. ¿Imatá ruwawaj Jehová perdonasunanpaj? Rey David jina ruwawaj, pay nerqa: “Jehová Diosman pantasqasniyta willakusaj”, nispa (Salmo 32:5). Jehovaqa qanta nisunkiña: “Chay imasmanta parlarinachej”, nispa. Chay nisusqanta kasukuy, paymantaj mañakuynejta qayllaykuy. Payman juchasniykita willakuy, imaynachus kashasqaykitapis. Rey David Diosmanta mañakorqa: “Juchayta llimphuchaway ari. [...] Diosníy, qanqa mana wijchʼuyta yachankichu sonqon pʼakisqa, sonqon nanasqa runataqa”, nispa (Salmo 51:2, 17).

Chantapis Davidqa Jehovaj churasqan profeta Natanpa yanapayninta japʼikorqa (2 Samuel 12:13). Kunanpis Jehovaqa congregacionespi ancianosta churan. Ancianosqa wakichisqa kashanku tukuy sonqo pesachikojkunata yanapanankupaj, ajinamanta paykuna Diosman watejmanta qayllaykunankupaj. Ancianoswan parlarejtiyki, paykunaqa wakin versiculosta  leeripusonqanku Diosman watejmanta qayllaykunaykipaj. Chantapis qanwan khuska mañakonqanku juchasniykita yuyarispa mana llakikunaykipaj (Santiago 5:14-16).

Ichá mana atillankichu Jehovaman juchasniykita willayta, ancianoswanpis chaymanta parlayta. Rey Davidpis chayta mana ruwayta atillarqachu. Bibliaqa niwanchej David uj tiempota juchasninta pakaykusqanta (Salmo 32:3). Jinapis chaymanta qhepaman repararqa juchasninta rimariy, sajra ruwayta saqeypis may allin kasqanta.

Chayta ruwasqanrayku Davidqa watejmanta kusisqa karqa. Pay nerqa: “Kusisqamin runaqa pantasqanta Dios perdonajtin, juchantapis pampachajtin”, nispa (Salmo 32:1). Chantá pay mañakorqa: “Jehová Diosníy, parlajta saqellaway ari, qanta jatunchasunaypaj”, nispa (Salmo 51:15). Davidqa Jehová perdonasqanrayku sonqo tiyasqa, agradecesqataj kasharqa. Chaytaj yanaparqa runas chaupipi Jehovata jatunchananpaj.

Jehovaqa mana munanchu sonqoyki juchachasunanta. Astawanpis payqa munan paymanta, imatachus ruwananmanta ima kusiywan, llimphu sonqowantaj willanaykita (Salmo 65:1-4). Biblia niwanchej: “Juchasniykichejmanta pesachikuychej, Diosmantaj kutirikuychej juchasniykichej perdonasqa kananpaj. Ajinamanta Jehová Diosmanta samarikuna tiempos jamunanpaj”, nispa (Hechos 3:19).

Kay yachaqanaj qallariyninpi Marthamanta parlarerqanchej, pay nin: “Wawayqa Torremanta Qhawaj, ¡Rijchʼariy! revistasta apachimullawajpuni. Jehovamanqa pisimanta pisi watejmanta qayllaykorqani. Tukuy juchasniymanta perdonta mañakuytataj mana atillarqanichu. Jinapis perdonta mañakorqanipuni. Tʼukunapaj jina, Jehovaj llajtanman kutinpunaykamaqa 40 watasña pasapusqa. Noqaqa reparani unayña Jehovamanta karunchakojtinchejpis, payqa watejmanta munakuyninpi kanata, llajtanwan khuskataj kanata munasqanta”, nispa.