Tukuypis sumaj willaykunata uyariyta munanchej. Chayrayku Jehová Diosninchejqa sumaj willaykunata willawanchej. Chaykunataj noqanchejta, familianchejtawan kusichiwasunman.

Chay sumaj willaykunaqa Bibliapi kashan. Bibliataqa Diosninchej unayña qhelqachipuwarqanchej. Kay libropitaj Bibliaj tawa librosninmanta parlarisunchej. Chay tawa librosta qhelqajkunaqa kanku Mateo, Marcos, Lucas, Juan ima. Dios yuyaychasqanman jina qhelqasqanku librostaj, sutillankuwantaj kashan.

Wakin Bibliaspeqa chay tawa libros Evangelios sutiwan kashan. Evangelio palabraqa “sumaj willay” niyta munan. Ajinapunitaj chay tawa librospeqa Jesusmanta sumaj willaykuna tiyan. Chay librospi willawanchej, Diosninchejqa Jesusta kachamusqanta salvacionta tarinapaj. Chantá willallawanchejtaj cielopi kaj Gobiernopi Jesús Rey kananta, tukuy paypi creejkunamantaj wiñay kausayta qonanta (Marcos 10:17, 30; 13:13).

Ichapis nisunman: “¿Imaraykupunitaj Diosninchej tawa librospi Jesuspa kausayninmanta qhelqacherqa?”, nispa. Chayta qhawarina.

Jesuspa kausayninmanta tawa librospi Diosninchej qhelqachisqanqa, sumajpuni karqa. Chay tawa qhelqajkunaqa mana kikin kausayniyojchu karqanku, sapa ujtaj mana kikin imastapunichu Jesusmanta qhelqarqanku. Ujnin qhelqajqa impuestero karqa, ujnintaj doctor, ujnintaj Jesuspa sumaj amigon pichus pescador karqa chay, ujnintajrí uj joven karqa, paytaj Jesuspa ruwasqasninta qhawarqa. Tawantinkutaj mana llullakoj runas karqanku. Paykunaqa Jesuspa kausayninmanta qhelqashaspa, mana kikintapunichu qhelqarqanku. Wakenqa Jesuspa yachachisqanmanta, ruwasqanmantapis astawan parlarqanku, wakintaj mana. Paykunaj qhelqasqankuta leespataj Sumaj Yachachej Jesuspa tukuy ima ruwasqanmanta,  yachachisqanmanta ima aswan sumajta entiendesun.

Impuestota cobrajqa judío runas leenankupaj libronta qhelqarqa. Doctortajrí libronta qhelqashaspa Jesús onqosqasta sanoyachisqanmanta astawan parlarqa. Chayrayku wakin imasmanta qhelqasqanqa, mana impuesteroj qhelqasqan jinapunichu. Jesuspa amigonqa imaynachus Jesús kasqanmanta astawan qhelqarqa. Aswan joven qhelqajtajrí, pisillata, aswan sutʼitataj Jesuspa kausayninmanta qhelqarqa. Jinapis paykunaj qhelqasqankoqa mana pantasqachu kashan. Chayrayku tawantin runaspa qhelqasqankuta leespaqa, Jesuspa yachachisqanmanta, imastachus ruwasqanmanta, imaynachus Jesús kasqanmanta ima, aswan sumajta yachakuyta atinchej.

Chay tawa librospeqa ‘Jesucristomanta sumaj willaykuna’ tiyan (Marcos 1:1).

Bibliata estudiaj runasqa, Mateo, Marcos, Lucas, Juan librosta kikincharqanku. Chay runasmanta ujnenqa Taciano sutiyoj runa karqa. Payqa yacharqa chay tawa libros Diospa yuyaychasqanman jinapuni qhelqasqa kasqankuta. Payqa 170 wata chaynejpi Diatessaron nisqa librota qhelqarqa. Chay libropitaj Jesuspa kausayninmanta, willasqanmantawan parlarqa.

Kay librotajrí, chay libroman rijchʼakun. Jinapis Jesuspa kausayninmanta aswan sutʼita willashan. Imajtinchus kunanqa aswan sumajtaña entiendenchej Jesuspa kikinchaykunasninmanta, imaynatachus Jesuspa nisqasnin juntʼakusqanmantapis. Jesuspa ruwasqanmanta, yachachisqanmantawan sumajta entiendespaqa, yachayta atinchej maykʼajchus Jesús imatapis ruwasqanta. Chantapis, yachayniyoj runas jallpʼata allaspa waj imastawan tarerqanku. Chaykunataj imapichus Bibliaj librosninta qhelqajkuna yuyasqankuta yachanapaj yanapawanchej. Jesús maykʼajchus imatapis ruwasqanmanta mana sutʼitapunichu yachanchej. Jinapis kay libroqa Jesuspa kausayninmanta willariwanchej tukuy entiendenanchejpaj jina, manataj imapis yapasqachu kashan.

Kay librota leeshaspaqa, imatachus Jesuspa kausayninmanta yachakuyta atisqanchejpi piensarina. Jesús nerqa: “Noqa ñan kani, cheqa kajtaj, kausaytaj. Mana pipis Tatayman chayayta atinchu, mana noqanejtaqa”, nispa (Juan 14:6).

Kay libroqa yanapawasun imaraykuchus Jesús “ñan” kasqanta entiendenapaj. Noqanchejqa Jesusnejllata Jehová Diosmanta mañakuyta atinchej, Dioswan allinyakuyta atinchej, allinpajtaj qhawasqa kayta atinchej (Juan 16:23; Romanos 5:8).

Jesusqa ‘cheqa kaj’. Payqa cheqanta yachacherqa, yachachisqanman jinataj kausakorqa. Chantapis Diospa nisqasnenqa, “may chhika kajtinpis, Jesusnejta juntʼakun” (2 Corintios 1:20; Juan 1:14). Chayta yachaspataj, Jesusqa Diospa munaynin juntʼakunanpaj yanapakusqanta yachanchej (Apocalipsis 19:10).

Jesucristoqa ‘kausay’. Payqa noqanchejrayku mana juchayoj kausayninta qorqa. Chayrayku ‘cheqa kaj kausayta’ japʼiyta atinchej, nisunman ‘wiñay kausayta’ (1 Timoteo 6:12, 19; Efesios 1:7; 1 Juan 1:7). Chantapis Jesusqa ashkha runasta kausarichimonqa, chay runastaj wiñaypaj kay jallpʼapi kausakuyta atenqanku (Juan 5:28, 29).

Tukuyninchej yachakunanchej tiyan, Jesús Diospa munaynin juntʼakunanpaj yanapakusqanta. May sumajpunitaj kanqa kay libropi yachakunanchej, Jesusmin ñan, cheqa kajtaj, kausaytaj kasqanta.