Jesuswan yachachisqasninwanqa Betsaida llajtaman chayarqanku. Chaypitaj runasqa uj cieguitota pusamuspa, mayta mañakorqanku payta llankharispa sanoyachinanta.

Jesustaj chay cieguitota aysaspa llajta kantuman pusarqa. Chaypitaj thoqayninwan ñawisninta jawiykuspa payta taporqa: “¿Rikunkichu imallatapis?”, nispa. Paytaj “rikushani runasta sachʼasta jina puriykachashajta” nerqa (Marcos 8:23, 24). Chantá Jesusqa ñawisninta llankharerqa. Paytaj sanoyaporqapacha. Chaymanta Jesusqa wasinman kachaporqa, nerqataj: “Ama llajtaman yaykunkichu”, nispa.

Chantá Jesuswan yachachisqasninwanqa, ichapis iskay días kurajta puriytawan Cesarea de Filipo jallpʼaj ujnin ranchonman chayarqanku. Chaytaj Betsaidamanta 40 kilometrospi jina kasharqa.

Chaypacha, Jesús wañuchisqa kananpaj 10 killas jinallaña faltasharqa. Jesusqa may llakisqa kasharqa ashkha yachachisqasnin payta saqerparisqankurayku. Chantapis wakin yachachisqasnenqa, sonqonkupi ichapis yuyasharqanku: “¿Imajtintaj Jesús mana munanchu reyta churanankutari? ¿Imajtintaj cielomanta señalta mañakojtinkupis mana qoyta munanchuri?”, nispa. Chayraykuchá Jesusqa Cesarea de Filipoman rishaspa ñanmanta karunchakuytawan uj lugarpi orakorqa.

Jesús orakushajtintaj, yachachisqasnin chimparqanku. Jesustaj paykunata taporqa: “¿Pi kasqaytataj runas ninku?”, nispa. Paykunataj nerqanku: “Wakenqa ninku Juan Bautista kasqaykita, wakintaj Elías kasqaykita, wakintajrí Jeremías chayri profetasmanta ujnin kasqaykita”, nispa. Arí, runasqa yuyarqanku Jesús wañuymanta kausarimoj profeta kasqanta. Jesustajrí imatachus yuyasqankuta yachananpaj taporqa: “Qankunarí, ¿pi kasqaytataj ninkichej?”, nispa. Pedrotajrí “qanqa Cristo kanki, kausaj Diospa Wawan” nerqa (Mateo 16:13-16).

Jesustajrí nerqa: “Kusikuy Simón. Chaytaqa mana runachu sutʼinchasorqa, manachayqa cielopi kashaj Tatay. Chantapis niyki: Qanqa Pedro kanki. Noqataj kay chhanka patapi congregacionniyta sayarichisaj, wañuytaj mana congregacionniyta atipanqachu”, nispa. Jesusqa congregacionninta sayarichinanta, wañupunankukama Diosta kasukojkunata wañuy mana atipananta Pedroman willarqa. Chantá nillarqataj: “Qanman cielopi kaj Gobiernoj llavesninta qosqayki”, nispa (Mateo 16:18, 19).

Chayta nispaqa, Jesús mana nisharqachu Pedro aswan kuraj kasqanta. Nillataj nisharqachu congregacionpaj cimienton kananta. Imajtinchus ‘cimientopi esquina rumeqa Cristo Jesusmin’ (1 Corintios 3:11; Efesios 2:20). Apóstol Pedroqa Gobiernoj kinsa llavesninta japʼerqa. Chay llaveswantaj uj  punkuta jina kicharerqa tukuy laya runas Diospa Gobiernonman yaykunankupaj.

Pedroqa Pentecostés 33 watapi, juchasninkumanta pesachikoj judiosman, judioman tukojkunaman ima rikucherqa salvakunankupaj imatachus ruwanankuta. Chayta ruwaspataj ujnin llavewan uj punkuta jina kicharerqa. Chantá iskay kaj llavewan uj punkuta kicharerqa Diospi creej samaritanos Diospa Gobiernonman yaykunankupaj. 36 watapitaj, kinsa kaj llavewan punkuta kicharerqa mana judío kajkuna Diospa Gobiernonman yaykunankupaj. Chaykunamanta ujnintaj Cornelio karqa (Hechos 2:37, 38; 8:14-17; 10:44-48).

Jesusqa Pedroman gobiernoj llavesninta qonanta niytawan, apostolesninman willarqa Jerusalenpi ñakʼarichisqa, wañuchisqa ima kananta. Apostolestaj chayta uyarispa llakikorqanku. Pedroqa mana entienderqachu Jesús kausarimuspa cieloman ripunanta. Chayrayku waj ladoman Jesusta pusaspa kʼamerqa: “Señor, ama chaytaqa parlallaypischu. Mana chay imaspeqa rikukunkichu”, nispa. Jesustajrí kutirikuspa Pedrota nerqa: “¡Riy kaymanta Satanás! Qanqa pantachiyta munawanki, mana Dios yuyasqanman jinachu yuyanki, manachayqa runas yuyasqankuman jinalla”, nispa (Mateo 16:22, 23).

Chantá Jesusqa, chaypi kaj runasta, apostolesnintawan wajyarqa. Paykunamantaj sutʼincharqa paypa qhepanta riy mana atikullasqanta. Pay nerqa: “Sichus pipis qhepayta jamuyta munan chayqa, pay kikinta chejnikuchun, kʼaspin lijrarisqataj qhepayta jamullachunpuni. Kausayninta salvayta munajqa wañonqa. Noqarayku, sumaj willaykunaraykutaj wañojrí kausayninta salvanqa”, nispa (Marcos 8:34, 35).

Arí, yachachisqasnenqa mana manchachikoj runas kananku karqa, tukuy imata ruwanankupajtaj wakichisqas. Jesús nerqa: “Sichus pipis noqamanta, nisqasniymantawan pʼenqakun, kay tiempomanta Diosta wasanchaj juchasapa runas ukhupi chayqa, noqapis paymanta pʼenqakullasajtaj, Tataypa atiyninpi ajllasqa angeleswan chayamojtiy”, nispa (Marcos 8:38). Arí, Jesús chayamuspaqa ‘sapa ujman ruwasqanman jina qoponqa’ (Mateo 16:27).