Fariseoswan Herodespa partidonmanta kajkunawanqa Jesusta wañuchiyta munarqanku. Chayrayku payqa, yachachisqasninwan Galilea qochaman riporqa. Ashkha runastaj qhaterqanku: Galileamanta, Tirojpa, Sidonpa muyuyninmanta, Jordán mayoj inti llojsimuynin ladomanta, Jerusalenmanta, Idumea jallpʼamantawan, mayqenchus Jerusalenmanta sur ladopi kasharqa, chaymanta. Jesusqa ashkha onqosqasta sanoyacherqa. Chayrayku tukuy onqosqas Jesusta llankharinankupaj ñitʼinakorqanku, nitaj suyarqankuchu Jesús paykunata llankharinanta (Marcos 3:9, 10).

May chhika runapuni Jesuspaman risqankurayku, payqa yachachisqasninta nerqa uj barquitota paypaj wakichinankuta. Ajinamanta runas kʼiskinakuspa ama payta ñitʼinankupaj, chayman wicharispa yachachinanpaj ima. Chantapis barquitopeqa waj lugaresman yachachej riyta aterqa.

Mateo librota qhelqajqa, “profeta Isaiaspa nisqan” Jesuspi juntʼakusqanta nerqa (Mateo 12:17). ¿Imatataj profeta Isaías nerqa?

Pay nerqa: “¡Kaymin ajllasqa kamacheyqa, munakusqaytaj, paytaqa allinpaj qhawani! Payman qosaj atiyniyta, paytaj tukuy laya runasman Diospa cheqan kayninta sutʼinchanqa. Payqa mana siminakonqachu, nitaj qhaparqachanqachu, nillataj pipis callespi parlasqanta uyarenqachu. Mana ni uj lajrasqa caña huecallatapis pʼakenqachu, nitaj qʼoshñishaj mechallatapis wañuchenqachu, cheqan kajta allinta sayachinankama. Cheqamanta paypa sutinpi tukuy laya runas suyakonqanku”, nispa (Mateo 12:18-21; Isaías 42:1-4).

Diospa munasqa kamachenqa Jesús karqa. Judiosqa ñaupa costumbresninkuta valechispa Diospa cheqan kayninta qʼewerqanku. Chaytaj sutʼi rikukorqa fariseospa ruwasqankupi. Paykunaqa Diospa Leyninta munayninkuman jina entiendesqankurayku, mana onqosqa runasllatapis Samarikuna Pʼunchaypi yanaparejchu kanku. Jesustajrí Diospa atiyninwan kaspa, Diospa cheqan kayninta sutʼincharqa. Chayta ruwaspataj judiospa costumbresninkumanta runasta kacharicherqa. Chayrayku judiospa religionninkuta ñaupajman apajkunaqa, Jesusta wañuchiyta munarqanku. ¡Anchapuni karqanku!

 Profeta Isaiasqa Diospa ajllasqanmanta nillarqataj: “Payqa mana siminakonqachu, nitaj qhaparqachanqachu”, nispa. Jesusqa chayta juntʼarqa sanoyachisqan runasta, qharqorqa chay supaykunata, “amapuni pimanpis paymanta willanankuta” kamachispa (Marcos 3:12). Jesusqa mana munarqachu runas cuentonejllata paymanta uyarinankuta.

Chantapis Jesusqa llampʼu sonqo runasta sonqocharqa. Chay runasqa kʼumuykachachisqa kasqankurayku lajrasqa soqoso jina karqanku. Llakisqa kasqankuraykutaj ñakʼayllata laurashaj mechero jina karqanku. Jesusqa paykunata kʼachamanta, munakuywantaj kallpacharerqa. Cheqamantapuni tukuy laya runas Jesuspi suyakuyta atinku.