Jesuswan yachachisqasninwanqa, trigo cosecha tiempopi Galileaman kutipusharqanku. Samarikuna Pʼunchaypitaj trigo chajras chaupita pasarqanku. Jesuspa yachachisqasnintaj yarqhachikuspa, trigo umasta pʼitispa mikhuyta qallarerqanku. Fariseostajrí chayta rikorqanku.

Jesusmantaj nerqanku: “¡Qhawaymá! Yachachisqasniykeqa Samarikuna Pʼunchaypi mana ruwanata ruwashanku”, nispa (Mateo 12:2). Yachakorqanchej jina, judiosqa Jesusta Jerusalenpi wañuchiyta munarqanku Samarikuna Pʼunchayta mana waqaychasqanta nispa. Fariseostajrí Jesuspa yachachisqasnintañataj juchacharqanku.

Paykunaqa nerqanku trigo umasta pʼitiy, mikhunapaj qhaqoypis cosechay jina kasqanta (Éxodo 34:21). Fariseosqa runasta mana imatapis Samarikuna Pʼunchaypi ruwajta saqejchu kanku. Ajinapi chay pʼunchayta uj llasa qʼepiman tukucherqanku. Diostajrí mana munarqachu ajina kananta. Astawanpis chay pʼunchayqa runas kusirikunankupaj, Diosman astawan qayllaykunankupaj ima kanan karqa. Chayrayku Jesusqa fariseosta pantasqa kasqankuta reparachinanpaj, iskay imasmanta parlarqa.

Ñaupajtaqa Davidmanta, runasninmantawan parlarqa. Pay nerqa: ‘Davidqa Diospa wasinman yaykuspa, Diosman jaywasqa tʼantasta mikhorqa, mayqentachus chay pʼunchayllaraj Diospa ñaupaqenmanta orqhomorqanku, chayta. Chantá Davidqa paywan kaj runasmanpis uj chhikanta jaywarillarqataj. Chay tʼantataqa ni pi mikhunanchu karqa, manachayqa sacerdoteslla’, nispa. Diostajrí mana Davidta, nitaj runasnintapis juchacharqachu chay tʼantata mikhusqankumanta (Levítico 24:5-9; 1 Samuel 21:1-6).

 Chantá Jesusqa sacerdotesmanta parlaspa nerqa: “¿Manachu Leypi leerqankichej sacerdotesqa Samarikuna Pʼunchay templopi trabajasqankuta? Chay trabajasqankumantaqa mana juchayojchu kanku”, nispa. Arí, sacerdotesqa chay pʼunchaypi animalesta Diosman jaywanankupaj ñakʼaj kanku, waj ruwanastawan ruwaj kanku. Chayrayku Jesusqa fariseosman nerqa: “Noqatajrí niykichej, templomanta nisqaqa, aswan kuraj kaypi kashan”, nispa (Mateo 12:5, 6; Números 28:9).

Chaymanta Jesús nerqa: “Diosmanta Qhelqasqapi nin: ‘Wajkunata khuyakunaykichejta munani, manataj noqapaj uywasta ñakʼanaykichejtachu’, nispa. Chaytachus entiendewajchej karqa chayqa, mana juchachawajchejchu karqa mana juchayojkunataqa”, nispa. Chantá nillarqataj: “Noqaqa, Samarikuna Pʼunchaypa Señornin kani”, nispa. Jesusqa chayta nispa, Diospa Gobiernonpi waranqa watasta kamachinanmanta parlasharqa. Chaypachataj jallpʼantinpi allin kausay kanqa (Mateo 12:7, 8; Oseas 6:6).

Unaytaña Supaypa makinpi ñakʼarishanchej. Kay mundoqa guerraswan, sajra ruwaykunawan juntʼa kashan. Jinapis Cristo kamachishajtenqa, tukuy chaymanta samarisunchej. Chaypachamá Samarikuna Pʼunchay kanqa.