Tatanchej Jehovaqa, Biblianejta yachachiwanchej. Payqa Bibliapi ashkha imasta willawanchej. Kunantaj parlarisunchej, imastachus 2.000 watas ñaupajta willachisqanmanta. Chaytaqa ángel Gabrielwan willacherqa. Payqa ‘Diospa ñaupaqenpi’ sirvin (Lucas 1:19). Kunanqa yachakunachej, maykʼajchus, pikunamantajchus Diosninchej ángel Gabrielta kachasqanta.

Jesús nacekunanpaj kinsa wata faltashajtin, Judeaj orqosninpi Zacarías sutiyoj runa tiyakorqa. Chay lugarqa ichá Jerusalén llajtaj qayllanpi kasharqa. Zacariasqa sacerdote karqa. Sacerdotesqa Diospa wasinpi, nisunman templopi llankʼaj kanku, runastataj Dioswan allinyachej kanku. Zacariaswan warmin Elisabetwanqa, viejitusña karqanku, nitaj wawasninku karqachu. Uj kuti Zacariasqa Jerusalén llajtapi kasharqa, Diospa templonpitaj sacerdote ruwanasninta juntʼasharqa. Jinallapi ángel Gabriel Zacariasman rikhurerqa, incienso altar chaynejpi.

Zacariasqa chay angelta rikuspa mayta mancharikorqa. Angeltajrí payman nerqa: “Ama mancharikuychu Zacarías, mañakusqaykitaqa Dios uyarinña. Warmiyki Elisabetqa wawayoj kanqa, chay wawamantaj Juan sutita churanki”, nispa. Chantá nillarqataj: ‘Wawaykeqa Jehová Diospa ñaupaqenpi jatunpaj qhawasqa kanqa, runastataj Jehová Diospaj wakichenqa’, nispa (Lucas 1:13-17).

Zacariasrí angelta nerqa: “Noqaqa viejituña kani, warmiypis viejitaña. ¿Imaynamantataj wawayku kanmanri?”, nispa. Ángel Gabrieltaj kuticherqa: “Mana creewasqaykiraykutaj opayapunki, nisusqay juntʼakunankama”, nispa (Lucas 1:20).

Chaykamataj, jawapi kaj runasqa Zacariasmanta llakikuyta qallarerqanku, templopi unaytaña qheparikusqanrayku. Ajinallapi Zacariasqa templomanta opayasqa llojsimorqa, señaswantaj parlasharqa. Chayta rikuspa runasqa ninakorqanku: “Imatachá Zacariasqa templopi rikun”, nispa.

Chay qhepata, Zacariasqa templopi ruwanasninta juntʼarqa, wasinmantaj kutiporqa. Chantá warmin Elisabetqa onqoj rikhurerqa, phishqa killa juntʼatataj mana wasinmanta llojserqachu.

Elisabet sojta killaña onqoj kashajtin, ángel Gabrielqa uj doncellamanñataj rikhurerqa. Chay doncellaj sutenqa María karqa, Galileapi kaj Nazaret llajtapitaj tiyakorqa. Chay llajtaqa Jerusalén llajtaj patanejninpi kasharqa. ¿Imatataj ángel Gabriel Mariaman nerqa? Pay nerqa: “Qantaqa Dios allinpaj qhawasunki. Qanqa onqoj rikhurispa uj qhari wawata nacechikunki, paymantaj Jesús sutita churanki. Payqa jatunpaj qhawasqa kanqa, sutichasqataj kanqa Aswan Patapi kaj Diospa Wawan. [...] Jacobpa miraynintataj wiñaypaj rey jina kamachenqa, Gobiernontaj mana tukukonqachu”, nispa (Lucas 1:30-33).

Ángel Gabrielqa manchay kusiywanchá chay iskay willaykunata willarqa. Juanmanta Jesusmantawan astawan yachakuspaqa, reparasunchej imaraykuchus chay iskay willaykuna may sumaj kasqanta.