Yachakorqanchej jina, Mariaqa kinsa killata Elisabetwan qhepakorqa. Elisabetqa Judeaj orqosninpi tiyakoj, Mariaj wasinmanta karupi. Chantá Mariaqa llajtan Nazaretman kutiporqa. Chaykamataj tawa killaña onqoj kasharqa. Llajtanmanta runasqa, manaraj yacharqankuchu María onqoj kashasqanta. Chayrayku Mariaqa ichapis llakisqa kasharqa imatachus runas ninankumanta.

Chantapis Mariaqa carpintero Josewan casarakunanpaj parlasqaña karqa. Chaytaj ichá astawanraj llakicherqa. Imajtinchus Diospa Leyninman jinaqa, uj sipas mañaqasqaña kaspa waj qhariwan puñuykojtenqa, wañuchisqa kanan karqa (Deuteronomio 22:23, 24). Mariaqa mana khuchichakuy juchapi urmarqachu. Jinapis ichá sonqonpi nerqa: “¿Imaynatá onqoj kashasqayta Joseman willasajri? ¿Imatá runas niwanqankuri? ¿Rumiswan chʼanqaspachu wañuchiwanqanku?”, nispa.

Josetajrí kinsa killataña Mariawan mana tinkorqachu. Chayrayku maytachá payta rikuyta munasharqa. Tinkojtinkuña, Mariaqa onqoj kashasqanta Joseman willarqa. Imastachus nerqapis, Joseman entiendechinanpaj Diospa atiyninwan onqoj rikhurisqanta. Mariaj nisqanqa mana creenapaj jinallachu karqa.

Ichapis Joseqa yuyarqa, Mariaj wawan wajpaj kasqanta. Jinapis Mariata mayta munakorqa. Yacharqataj mana millayta purej warmichu kasqanta, allinpaj qhawasqa kasqantapis. Joseqa mana munarqachu Mariata rumiswan chʼanqaykuspa wañuchinankuta, nitaj pʼenqaypi rikhurichinankutapis. Chayrayku Mariamanta pakayllamanta divorciakuyta munarqa. Jaqay  tiempopeqa, casarakunankupaj parlasqaña kajkunata, casarasqata jinaña qhawaj kanku. Chayrayku Josewan Mariawanqa, manaña casarakunankupaj divorciakunanku karqa.

Joseqa Mariawan parlaytawan, imatachus ruwananpi tʼukurillarqapuni. Ajinapitaj puñukaporqa. Puñushajtintaj, mosqoyninpi Jehová Diospa angelnin rikhurerqa, nerqataj: “Ama manchachikuychu warmiyki Mariata wasiykiman pusakapuyta, payqa onqoj rikhurin Diospa atiyninwan. Mariaqa uj qhari wawata nacechikonqa, Jesús sutiwantaj sutichanayki tiyan, imaraykuchus payqa llajtanta juchasninmanta salvanqa”, nispa (Mateo 1:20, 21).

Joseqa rijchʼariytawan imatachus ruwananta yacharqaña. Chay ratopachataj angelta kasuspa Mariata wasinman pusakaporqa. Ajinamanta Josewan Mariawan casarakorqanku, tukuy runastaj chayta yacharqanku. Jinapis María onqoj kashajtin, Joseqa mana paywan puñuykorqachu.

Chaymanta qhepan killasman, Mariaqa jatun onqojña kasharqa. Chaypachataj Josewan Mariawanqa, Nazaretmanta karu llajtaman rinankupaj wakichikorqanku. Qhepanta yachakusun maymanchus risqankuta.